यहून्‍ना 17

अपने चेलौ के ताँई ईसु की पिराथना

1ईसु नै जे बात कैह कै अपनी आँख सुरग की ओर उठाते भए कैई,

“हे अब्बा, टैम आ गओ है। अपने लौंड़ा की महिमा कर, जिस्सै लौंड़ा तेरी महिमा करै। 2तैनै तौ उसकै सिगरी मानब जाति मै अधकार दओ है, कै बौ उन सबकै जिनकै तैनै उसकै दओ है, उनकै हमेसा की जिन्‍दगी दे। 3और हमेसा की जिन्‍दगी जौ है कै बे तेकै जो एकमातर सच्‍चो परमेसर और ईसु मसी कै, जिसकै तैनै भेजो है, जानै। 4जो काम तैनै मैंकै कन्‍नै कै दए हे, बाकै पूरो करकै मैंनै दुनिया मै तेरी महिमा करी है। 5हे अब्बा, अब तू अपने संग मेरी महिमा उस महिमा सै कर जो दुनिया के होनै सै पैले, तेरे संग मेरी ही।

6 “मैंनै तेरो नाम उन आदमिऔ मै परकट करो है जो तैनै दुनिया मै सै मैंकै दए। बे तेरे हैं, और तैनै बे मैंकै दए और उनौनै तेरे बचन मान लए हैं। 7अब बे जान गए हैं कै जो कुछ तैनै मैंकै दओ है, बौ सबई तेरी ओर सै है, 8कैसेकै बे बचन जो तैनै मैंकै दए, मैंनै उन तक पौंचा दए। उनौनै बचनौ कै अपनाओ और सच जान लओ है कै मैं तेसै लिकरो हौं, और उनौनै बिसवास करो कै तैनैई मैं भेजो हौं। 9मैं उनके ताँई पिराथना करौ हौं, दुनिया के ताँई पिराथना ना करौ हौं, पर उनके ताँई करौ हौं जिनकै तैनै मैंकै दओ है, कैसेकै बे तेरे हैं। 10और सब कुछ जो मेरो है बौ तेरो है, और जो तेरो है बौ मेरो है, और मेरी महिमा उनमै परकट भई है।

11 “अब मैं इस दुनिया मै ना रैहंगो। पर बे तौ इस दुनिया मै हैं और मैं तेरे धौंरे आबौ हौं। हे पबित्‍तर अब्बा, अपनो बौ नाम जो तैनै मैंकै दओ है इनकी रक्छा कर कै जैसे हम एक हैं, बे बी एक हो सकैं। 12#यहून 13:18जब मैं उनके संग हो, तौ मैंनै तेरे बा नाम सै जो तैनै मैंकै दओ उनकै बचाकै रक्‍खो और रक्छा करी है, बामै सै कोई नास ना होओ, सिरप बाई को जिसको नास होनो पक्‍को हो। इसताँई कै पबित्‍तर सास्तर की बात पूरी हो।

13 अब मैं तेरे धौंरे आ रओ हौं, मगर जे बात मैं दुनिया मै रैहते भए कैरओ हौं जिस्सै कै बे अपने दिलौ मै मेरी पूरी खुसी कै पा सकैं। 14मैंनै उनकै तेरो बचन दओ है, और दुनिया नै उनसै नफरत करी है, कैसेकै जैसे मैं दुनिया को ना हौं, बैसे बे बी दुनिया के ना हैं। 15मैं तेसै जौ पिराथना ना करौ हौं कै तू उनकै दुनिया मै सै उठा ले, पर जौ पिराथना करौ हौं कै तू उनकै बा दुसट सै बचाए रख। 16बे दुनिया के ना हैं, जैसे कै मैं बी दुनिया को ना हौं। 17सच के दुआरा उनकै पबित्‍तर कर, तेरो बचन सच्‍चो है। 18जैसे तैनै मैंकै जा दुनिया मै भेजो, बैसेई मैंनै बी बे दुनिया मै भेजे। 19और उनके ताँई मैं अपने आपकै पबित्‍तर करौं हौं, कै बे बी सच के दुआरा पबित्‍तर करे जांऐ।

20 मैं सिरप इनौई के ताँई पिराथना ना करौं हौं, पर उनके ताँई बी जो इनौके बचनौ के दुआरा मेरे ऊपर बिसवास करंगे, 21कै बे सब एक हौं। जैसे, अब्बा, तू मैं मैई है और मैं तैमैई हौं, और बैसेई बे बी हम्मै हौं, जिस्सै कै दुनिया बिसवास करै कै तैनैई मैं भेजो हौं। 22और बौ महिमा जो तैनै मैंकै दई है मैंनै उनकै दई है, कै बे बैसेई एक हौं जैसे हम एक हैं। 23मैं उनमै और तू मैंई मै है, कै बे पक्‍के होकै एक हो जांऐ, जिस्सै दुनिया जानै कै तैनै मैं भेजो और जैसे तैनै मैंसै पियार करो बैसोई उनसै बी पियार करो।

24 अब्बा, मैं चाँहौ हौं कै जिनकै तैनै मैंकै दओ है, जहाँ मैं हौं, बहाँ बे बी मेरे संग रैहंगे। कै बे मेरी बा महिमा कै देख सकैं जो तैनै मैंकै दई है, कैसेकै तैनै दुनिया बनानै सै पैले मैंसै पियार करो। 25हे धरमी अब्बा, दुनिया नै तू ना जानो, फिर बी मैंनै तू जानो, और इन चेलौ नै बी जानो है कै तैनैई मैं भेजो हौं, 26और मैंनै तेरो नाम इनकै बताओ और बतातो रैहंगो, कै जो पियार तैनै मैंसै करो, बौ उनमै बी बनो रैह और मैं बी उनमै बनो रौह।”

सध्या निवडलेले:

यहून्‍ना 17: TKB

ठळक

कॉपी करा

तुलना करा

सामायिक करा

तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन

New Life Compute Institute [NLCI] - CC BY-NC-ND 4.0

बुक्साबद्दल अधिक जाणून घ्या