यहून्‍ना 11

लाजर की मौत

1 # लूका 10:38,39 मरियम और बाकी बहन मारथा के गाम बैतनिया मै लाजर नाम को एक आदमी बेमार हो। 2#यहून 12:3मरियम बौई बईयर ही जिसनै परभु ईसु के ऊपर मैहंगो ईत्‍तर डारो हो और अपने खोपड़ी के बारौ सै बाके पाँऐऔं कै पछौनो हो, बाई को भईया लाजर बेमार हो। 3इसताँई बाकी बहनौ नै ईसु कै जौ सन्‍देसो भेजो, “परभु देख, जिस्सै तू पियार करै है बौ बेमार है।”

4पर जब ईसु नै जौ सुनी तौ कैई, “जौ बेमारी मौत की ना है, पर परमेसर की इज्‍जत के ताँई है, कै जाके दुआरा परमेसर के लौंड़ा की बड़ाई हो।” 5ईसु तौ मारथा और बाकी बहन और लाजर सै पियार करै हो। 6फिर बी जब बानै सुनो कै बौ बेमार है, तौ जिस जघै मै बौ हो बहाँ दो दिन और रुको। 7तब इसके बाद बानै चेलौ सै कैई, “आऔ, हम फिर यहूदिया मै चलैं।”

8चेलौ नै बासै कैई, “गुरूजी, अबी तौ यहूदी तेरे ऊपर पत्‍थर मारनो चाँहबै हैं, और का तू फिर बहीं जा रओ है?”

9ईसु नै जबाब दओ, “का एक दिन मै बारैह घंटा ना होवै हैं? अगर कोई दिन मै चलै तौ बौ ठोकर ना खावै है, कैसेकै बौ जा दुनिया के उज्‍जेरे कै देखै है। 10पर अगर कोई रात मै चलै तौ बौ ठोकर खावै है, कैसेकै बाके धौंरे उज्‍जेरो ना होवै है।”

11ऐंसो कैनै के बाद बानै फिर उनसै कैई, “हमरो दोस्त लाजर सो गओ है, पर मैं बाकै जगानै जा रओ हौं।” 12इसताँई चेलौ नै बासै कैई, “परभु, अगर बौ सो गओ है तौ बौ बच जागो।” 13ईसु नै तौ बाकी मौत के बारे मै कैई ही, पर उनौनै सोचो कै बौ नींद सै सो जानै के बारे मै कैरओ है।

14इसताँई ईसु नै उनसै साप-साप कैह दई, “लाजर मर गओ है, 15और मैं तुमरे बजै सै खुस हौं कै मैं बहाँ ना हो, जिस्सै कै तुम बिसवास कर सकौ, पर आऔ, अब हम बाके धौंरे चलैं।”

16इसताँई थौमा नै जो दिदुमस कैलाबै है, अपने सातिऔं सै कैई, “चलौ, हम बी बाके संग मरनै चलैं।”

ईसु को बैतनिया मै आनो

17तब जब ईसु बैतनिया मै आओ, तौ बाकै पतो चलो कै लाजर कै कबर मै रखे भए चार दिन हो चुके हैं। 18बैतनिया ऐरूसलेम सै लगभग तीन किलोमीटर दूर हो। 19भईया की मौत मै मारथा और मरियम कै तसल्‍ली दैनै के ताँई भौत से यहूदी लोग आए हे। 20इसताँई मारथा नै जब सुनो कै ईसु आ रओ है तौ बौ बासै मिलनै गई, पर मरियम घर मैई बैठी रैहई। 21मारथा नै ईसु सै कैई, “परभु, अगर तू हिंया होतो तौ मेरो भईया ना मरतो। 22पर मैं अब्बी जानौ हौं कै तू परमेसर सै जो कुछ माँगैगो, परमेसर तेकै देगो।”

23ईसु नै बासै कैई, “तेरो भईया जिन्‍दो हो जागो।”

24मारथा नै बासै कैई, “मैं जानौ हौं कै आखरी दिन मै जब मरे भए फिर जी उठंगे तौ बौ बी जिन्‍दो हो जागो।”

25ईसु नै बासै कैई, “फिर सै जिन्‍दो कन्‍नै बारो और जिन्‍दगी मैंई हौं, जो मेरे ऊपर बिसवास करै है, अगर बौ मर बी जाय फिर बी बौ जिन्‍दो रैहगो, 26और हर एक जो जिन्‍दो है, और मेरे ऊपर बिसवास करै है, कबी ना मरैगो। का तू जा बात मै बिसवास करै है?”

27बानै बासै कैई, “हाँ परभु मैंनै बिसवास कर लओ है, कै तूई परमेसर को लौंड़ा मसी है, यानी बौई जो दुनिया मै आनै बारो है।”

ईसु रोओ

28जे बात कैह कै बौ चली गई, और अपनी बहन मरियम कै बुलाकै चुपके सै कैई, “गुरूजी जहीं है और तेकै बुला रओ है।” 29जब बानै जौ सुनी तौ बौ तुरन्‍त उठकै बासै मिलनै गई। 30ईसु अबी तक गाम मै ना पौंचो हो, पर बाई जघै मै हो जहाँ मारथा बासै मिली ही। 31तब बे यहूदी लोग जो बाके संग घर मै हे, और बाकै तसल्‍ली दे रऐ हे, जब मरियम कै तुरन्‍त उठते बाहार जाते देखो तौ बे जौ समजे कै बौ कबर मै रोनै जा रई है, बे बाके पीछे चल पड़े। 32जब मरियम बहाँ पौंची जहाँ ईसु हो, तौ बाकै देखतेई बाके पाँऐऔं मै गिर पड़ी और कैललगी, “परभु अगर तू हिंया होतो तौ मेरो भईया ना मरतो।”

33जब ईसु नै मरियम कै और बाके संग आए यहूदिऔं कै रोते देखो, तौ बौ मन मै दुखी और उदास भओ, 34और कैई, “तुमनै बाकै कहाँ रक्‍खो है?”

उनौनै बासै कैई, “परभु, आकै देख ले।”

35ईसु रो पड़ो।

36इसताँई यहूदी लोग कैललगे, “देखौ, बौ लाजर सै कितनो पियार करै हो।” 37पर उनमै सै कुछ लोगौ नै कैई, “जिसनै अन्धा की आँख ठीक करीं का जौ लाजर कै मरनै सै ना बचा सकै हो?”

लाजर कै जिन्‍दो कन्‍नो

38और ईसु मनई मन मै फिर भौतई दुखी होकै कबर मै आओ। बौ एक गुफा ही और एक पत्‍थर बामै रक्‍खो भओ हो। 39ईसु नै कैई, “पत्‍थर कै हटाऔ।”

बा मरे भए की बहन मारथा नै बासै कैई, “परभु अब तौ बामै सै बास आ रई होगी, कैसेकै बाकै मरे भए चार दिन हो गए हैं।”

40ईसु नै बासै कैई, “का मैंनै तेसै ना कैई ही कै अगर तू बिसवास करैगी तौ परमेसर की महिमा देखैगी?”

41तब उनौनै पत्‍थर हटाओ। और ईसु नै आसमान की ओर देखो और कैई, “अब्बा मैं तेरो धन्‍नबाद करौ हौं कै तैनै मेरी सुन लई। 42और मैं जानौ हौं कै तू हरदम मेरी सुनै है, पर चारौ ओर खड़े आदमिऔ के कारन मैंनै ऐंसो कैई कै बे बिसवास करैं कै तैनै मैं भेजो हौं।” 43और जब बौ जे बात कैह चुको तौ बानै जोर सै चिल्‍लाकै कैई, “लाजर लिकरकै आ!” 44जो आदमी मर गओ हो बौ लिकरकै बाहार आओ बाके हात-पाँऐ अबी बी कफन मै बंधे भए हे, और बाको मौह लत्‍तौ सै लिपटो भओ हो।

ईसु नै उनसै कैई, “बाकै खोल दो और जान दो।”

ईसु कै मार डान्‍नै की साजिस

(मत्‍ती 26:1–5; मरकुस 14:1,2; लूका 22:1,2)

45तब उन यहूदिऔं मै सै जो मरियम के संग आए हे, ईसु को जौ काम देक्‍कै, भौतौं नै बाके ऊपर बिसवास करो। 46पर उनमै सै कुछ नै फरीसिऔं के धौंरे जाकै उनकै बताई कै ईसु नै का का करो है। 47इसताँई मुक्‍ख पुजारिऔं और फरीसिऔं नै पंचात बुलाई और जौ कैई, “हम का कर रऐ हैं? जौ आदमी तौ भौत चमत्कार के काम कर रओ है। 48अगर हम बाकै ऐंसेई छोड़ दैं तौ सब आदमी बाके ऊपर बिसवास करंगे, और रोमी आकै हमरे मन्‍दर को नास कर दंगे और हमरे लोगौ कै मार डारंगे।”

49तब उनमै सै एक आदमी नै जिसको नाम कैफा हो, जो बा साल को बड़ो पुजारी हो, बानै कैई, “तुम कुछ बी ना जानौ हौ, 50नाई जा बात कै समजौ हौ कै जौ अच्‍छो है, कै एक आदमी हमरे लोगौ के ताँई मरै, और ना जौ सिगरी जाति नास हो।” 51पर जौ बानै अपने आप ना कैई, पर बा साल को बड़ो पुजारी होते भए भबिसबानी करी कै ईसु लोगौ के ताँई मरैगो, 52और ना सिरप लोगौ के ताँई, पर जा ताँई बी कै परमेसर की बिखरी भई औलादौं कै एक कर दे। 53और उसी दिन सै बे बाकै मार डान्‍नै की साजिस बनाल लगे। 54बा दिन सै ईसु नै यहूदी लोगौ के बीच मै खुले रूप सै चलनो फिरनो बन्‍द कर दओ, और ऐरूसलेम छोड़कै बौ रेगिस्तान के धौंरे इपराईम नाम के सैहर मै जाकै अपने चेलौ के संग रैहल लगो। 55और यहूदी लोगौ को फसै को तौहार आनै बारो हो। भौत से आदमी अपने गाम सै ऐरूसलेम चले गए हे ताकि बे फसै तौहार सै पैले अपने आपकै सुद्‍द कर लैं। 56इसताँई बे ईसु कै ढूंड़ रए हे और मन्‍दर मै खड़े भए आपस मै कैरए हे, “तुम का सोचौ हौ, कै बौ तौहार मै आगोई ना?” 57मुक्‍ख पुजारिऔं और फरीसिऔं नै हुकम देओ कै, अगर किसी कै मालूम पड़ै कै ईसु कहाँ है, तौ बौ हमकै बताऐ, कै हम बाकै पकड़ सकैं।

सध्या निवडलेले:

यहून्‍ना 11: TKB

ठळक

कॉपी करा

तुलना करा

सामायिक करा

तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन

New Life Compute Institute [NLCI] - CC BY-NC-ND 4.0

बुक्साबद्दल अधिक जाणून घ्या