चेलौ के काम 24

राजपाल फेलिक्‍स के सामने पौलुस

1पाँच दिनौ के बाद बड़ो पुजारी हननियाह कुछ यहूदी नेताऔं और तिरतुलुस नाम के एक बकील कै संग लेकै केसरिया मै आए। बौ राजपाल के सामने पौलुस के ऊपर आरोप लगानै लगे। 2जब पौलुस कै बुलाओ गओ तबई तिरतुलुस नै पौलुस के ऊपर आरोप लगाते भए कैई कै,

“हे महान फेलिक्‍स, तेरी बजै सै हमरे देस मै सान्‍ति है और तेरे काम कन्‍नै सैई देस मै अच्‍छो सुदार हो रओ है। 3इसताँई हर जघै और हर बखत हम तेकै धन्‍नबाद देवै हैं। 4मैं तेरो और बखत खराब ना करते भए तेसै जौ बिनती करौ हौं, दया कर कै तू हमरी एक दो बात सुनै।

5“हमरी बात जौ है कै जौ आदमी लड़ाई और दुनिया के सिगरे यहूदी लोगौ मै फूट पड़बा रओ है और नासरी लोगौ को मुखिया है। 6जब जानै मन्‍दर कै असुद्‍द कन्‍नो चाँहो, तबई हमनै जाकै पकड़ लओ और जाको नियाय अपने नियम के हिसाब सै कन्‍नै की सोची। 7पर सैनापति लुसियस नै बाकै हम सै जबरदस्ती छुटा लओ, 8और जाके ऊपर इलजाम लगानै बारे लोगौ कै तेरे सामने लानै को हुकम देओ। हम जिन बातौं को इलजाम जाके ऊपर लगाबैं हैं, तू खुदई जासै पूँछ ले तबई तेकै बी पतो चलैगो।” 9और यहूदी लोगौ नै बी बाको सात दओ और कैई कै, “जौ बात सच्‍ची है।”

पौलुस को जबाब

10जब राजपाल नै पौलुस कै बोलनै के ताँई इसारो करो तौ तबई बानै जबाब दओ कै,

“तू बड़े सालौं सै जा देस को नियाय कन्‍नै बारो है, इसताँई मैं जौ बात जानकै बेसानी खुस हौं, कै मैं तेरे सामने अपने बचाब मै बोलौ हौं। 11तू खुद जान सकै है कै मैं परमेसर की आराधना कन्‍नै के ताँई ऐरूसलेम मै आओ और मैंकै बारैह दिन सै ऊपर ना भए हैं। 12किसी नै मैंकै ना तौ मन्‍दर मै और ना पिराथना घर मै और ना सैहर मै किसी के संग लड़ाई और ना लोगौ कै भड़काते भए देखो। 13और ना तौ बे इन बातौं कै साबित कर सकै हैं जिनको इलजाम जे मेरे ऊपर लगाबैं हैं। 14पर मैं तेरे सामने जा बात कै मान लेबौ हौं कै मैं अपने बापदादौं के परमेसर की आराधना ईसु की रस्ता के हिसाब सै करौ हौं जिसकै जे बेकार कैबै हैं, और जो कुछ मूसा के नियम मै और नबिऔ की किताबौ मै जो लिखो है, उनके ऊपर मैं बिसवास करौ हौं। 15और मैं परमेसर सै बैसीई आस रक्‍खौ हौं जैसी जे खुद रक्‍खै हैं, कै सिगरे धरमी और अधरमी दौनौ मर कै फिर सै जिन्‍दे होवै हैं। 16इसताँई मैं बी परमेसर और आदमी के सामने अपनी भीतर की आत्‍मा कै सुद्‍द रखनै की कोसिस करौ हौं।

17 # चेलौ 21:17–28 “कई सालौं के बाद मैं ऐरूसलेम मै अपने लोगौ के ताँई दान पौंचानै और मन्‍दर मै बलि चढ़ानै के ताँई आओ हो। 18जब मैं मन्‍दर मै अपनी सुद्‍दिकरन की रीति कै कर रओ हो तबई इन लोगौ नै मैंकै देखो और ना मेरे धौंरे भीड़ ही और ना हल्‍ला गुल्‍ला हो। 19पर एसिया सै आए भए यहूदी लोग बी बहाँ हे। अगर मेरे खिलाप उनकै कुछ कैनो होतो तौ बे तेरे सामने आकै मेरे ऊपर इलजाम लगाते। 20या जे लोग जो हिंया खड़े हैं बे बता दैं कै, जब मैं यहूदी की बड़ी सभा के सामने खड़ो हो तौ उन्‍नै मेरे ऊपर का गलती पाई। 21#चेलौ 23:6सिरप एक बात कै छोड़कै जो मैंनै उनके बीच मै खड़े होकै कैई ही कै, ‘मर कै फिर सै जिन्‍दे होनै के बारे मै आज तुमरे सामने मेरे ऊपर मुकदमा चलाओ जा रओ है।’”

22पर फेलिक्‍स जो ईसु की जा रस्ता के बारे मै अच्‍छे तरीका सै जानै हो। बानै जौ कैह कै सुनबाई रोक दई कै, “जब सैनापति लुसियस आगो तबई मैं जा बात को फैसला सुनांगो।” 23और फिर बानै सूबेदार कै हुकम दओ कै पौलुस कै जेल मै रखो जाऐ पर बाकै छूट देईओ जिस्सै कै बाके दोस्त बाकी जरूरत कै पूरी कर सकैं।

पौलुस की फेलिक्‍स और बाकी बईयर सै बातचीत

24कुछ दिनौ के बाद फेलिक्‍स अपनी बईयर दुरसिल्‍ला कै बहाँ अपने संग लेकै आओ जो एक यहूदी ही। बानै पौलुस कै बुलबाओ और बाके बिसवास के बारे मै सुनो जो ईसु मसी मै हो। 25जब पौलुस परमेसर की अच्‍छाई, सबर और परमेसर के आनै बारे नियाय की बात कर रओ हो तौ तबई फेलिक्‍स डर गओ और कैई कै, “अबी तू जा और बखत आनै मै मैं तेकै फिर बुलांगो।” 26कैसेकै बाकै पौलुस सै पैसा मिलनै की आस ही, इसताँई बौ पौलुस कै बेरमबेरा बात कन्‍नै के ताँई बुलाबै हो। 27पर ऐंसोई चलतो रैहओ और दो साल बीत गए तबई फेलिक्‍स की जघै मै पुरकियुस फेस्तुस राजपाल आओ। फेलिक्‍स नै यहूदी लोगौ कै खुस कन्‍नै के ताँई पौलुस कै जेल मैई कैदी बने रैहन दओ।

सध्या निवडलेले:

चेलौ के काम 24: TKB

ठळक

कॉपी करा

तुलना करा

सामायिक करा

तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन

New Life Compute Institute [NLCI] - CC BY-NC-ND 4.0

बुक्साबद्दल अधिक जाणून घ्या