चेलौ के काम 17
17
पौलुस और सीलास थिसलुनीके सैहर मै
1तबई बे अफिपुलिस और अपुलोनिया सैहर सै होते भए थिसलुनीके मै पौंचे और बहाँ यहूदी लोगौ को पिराथना घर हो। 2और जैसी पौलुस की आदत ही बैसेई बौ उनके धौंरे गओ और बानै तीन आराम कन्नै बारे दिनौ मै पबित्तर सास्तर सै उन लोगौ के संग बैहैस बाजी करल लगो। 3और पबित्तर सास्तर सै उनकै समजातो रैहओ कै मसी को दुख झेलनो और मर कै फिर सै जिन्दो होनो जरूरी हो कै, “जौई ईसु जिसकी कथा मैं तुमकै सुनावौं हौं मुक्ति दैनै बारो है।” 4उनमै से भौस्से लोगौ नै पौलुस और सीलास की बात मान लई और उनके संग हो गए और इनमै परमेसर को डर माननै बारे यूनानी लोग और इज्जतदार घराने की बईयरैं बी हीं।
5पर यहूदी लोग जौ सब देक्कै जरन सै भर गए। उन्नै बजार के कुछ बदमास लोगौ कै अपने संग ले लओ और सैहर मै भीड़ लगाकै दंगा करल लगे। बे यासोन के घर जाकै लड़ाई करल लगे। पौलुस और सीलास कै लोगौ के सामने लानै की कोसिस करी।
6जब बे पौलुस और सीलास कै ना पकड़ सके तौ उन्नै यासोन और कुछ बिसवासी लोगौ कै सैहर के अधकारिऔं के सामने खैंच कै ले गए और कैललगे कै, “जे लोग जिनौनै सिगरी दुनिया मै लड़ाई और हल्ला मचार खाओ है, अब जे हिंया आए हैं। 7और यासोन नै उनकै अपने घर मै रखर खाओ है और जे सिगरे लोग जौ कैबै हैं कै ईसु राजा है और रोमी राजा के हुकम को बी बिरोद करै हैं।”
8जौ बात सुनकै बा सैहर के अधकारी और लोगौ के पेट मै आग लग गई। 9इसताँई उन्नै यासोन और दूसरे बिसवासी लोगौ कै जमानत के पैसा लेकै छोड़ दओ।
पौलुस और सीलास बिरिया सैहर मै
10तबई बहाँ के बिसवासी लोगौ नै रातौं रात पौलुस और सीलास कै बिरिया मै भेज दओ, और बे बहाँ पौंच कै यहूदिऔं के पिराथना घर मै गए। 11बिरिया सैहर के लोग थिसलुनीके के यहूदी लोगौ सै अच्छे हे और इनौनै बड़े धियान सै परमेसर को बचन सुनो और पौलुस नै जो बात कैंई हीं उनकै रोज पबित्तर सास्तर मै ढूंड़ते रैहए कै जे बात सच्ची हैं कै झूँटी हैं। 12इसताँई उनमै सै भौस्से लोगौ नै बिसवास करो जिसमै यूनानी इज्जतदार घराने की बईयरैं और आदमी बी हे। 13पर जब थिसलुनीके के यहूदी लोगौ कै जौ बात पतो लगो कै पौलुस बिरिया मै बी परमेसर के बचन को परचार कर रओ है तौ तबई बे बहाँ बी आकै लोगौ कै उकसाल लगे और भड़काल लगे। 14तबई बिसवासी लोगौ नै पौलुस कै समन्दर के किनार भेज दओ पर सीलास और तीमुथियुस बहीं रैहए। 15जो लोग पौलुस कै छोड़नै गए हे उन्नै बाकै एथेन्स सैहर मै पौंचा दओ हो, और बे लोग सीलास और तीमुथियुस के ताँई जौ खबर लाए कै तुम मेरे धौंरे जल्दी अईओ।
एथेन्स मै पौलुस को परचार
16जब पौलुस एथेन्स मै सीलास और तीमुथियुस को पैंड़ो देख रओ हो, तबई बौ बा सैहर मै मूरतिऔं कै जघै-जघै देक्कै तिलमिला उठो और इस्सै बाको मन दुखी भओ। 17इसताँई बौ रोज यहूदी लोगौ के पिराथना घर मै जाकै और यहूदी और गैर यहूदी लोगौ के संग बातचीत करल लगो और जो लोग बाकै घाट बजारौं मै मिलते उनके संग बैहैस करतो रैहतो। 18तबई इपीकुरी और स्तोईकी के पंडतौ मै सै कितने बाके संग बैहैस करल लगे।
उनमै सै कुछ कैललगे कै, “जौ बकबास कन्नै बारो कैहनो का चाँहबै है?”
तबई कुछ दूसरे लोगौ नै कैई कै, “ऐंसो लगै है कै जे किसी नए देबता को परचार कन्नै बारे हैं।” कैसेकै पौलुस ईसु और फिर सै जी उठनै की अच्छी खबर के बारे मै बताबै हो।
19तबई बे बाकै अपने संग अरिपुस नाम की जघै मै ले गए जहाँ सभा ही और पौलुस सै सबाल पूँछे, “का हम जौ जान सकै हैं कै जौ नई सिक्छा कौन सी है? 20तू हमकै जिन बातौं के बारे मै बताबै है बे हमरे ताँई नई हैं, इसताँई हम जान्नो चाँहै हैं कै इनको मतलब का है।” 21उन्नै ऐंसो इसताँई कैओ कैसेकै एथेन्स के रैहनै बारे लोग और पराए देस के लोग सिरप नई बातौं कै सुन्नै और बोलनै के अलाबा कोई दूसरो काम ना करै हे।
अनजाने देबता
22तब जो अरिपुस मै सभा ही बामै खड़े होकै पौलुस नै कैई, “हे एथेन्स के लोगौ, मैंनै जौ देखो है कै तुम लोग देबताऔ कै बेसानी मानौ हौ।
23“जब मैं घूम रओ हो तबई मैंनै इन चीजौ कै तुमकै पूजते भए देखो तबई एक जघै ऐंसी बेदी देखी जिसमै जौ लिखो हो, ‘अनजाने देबता के ताँई’ इसताँई जिसकै तुम बगैर जाने पूजौ हौ, मैं तुमकै बाके बारे मै बताबौ हौं। 24#चेलौ 7:48जिस परमेसर नै जा दुनिया कै और बामै की सिगरी चीज कै बनाओ, बौ सुरग और दुनिया को मालिक है, और बौ हात सै बनाए भए मन्दरौं मै ना रैहबै है। 25परमेसर कै किसी बी चीज की कमी ना है, और बाकै आदमी की सायता की जरूरत बी ना है, कैसेकै बौई सबई कै जिन्दगी, साँस और सबई कुछ देवै है। 26बानै एकई आदमी सै दुनिया के सिगरे लोग पैदा करे, कै बे धरती मै बसैं, और बानै उनके ताँई बखत और जघै की हद ठैराई, 27और जौ सबई कुछ इसताँई भओ कै लोग परमेसर कै ढूंड़ै और बाके धौंरे पौंचै और पा लैं। सच्ची मैई बौ हम्मै सै किसी सै दूर ना है। 28कैसेकै बाई मै हमरी जिन्दगी और चलनो फिरनो और हम बी बाईके हैं। जैसो कबिता लिखनै बारौ नै कैई है कै, ‘हम बी बाईके खानदान के हैं।’
29“हम परमेसर की औलाद हैं इसताँई हमकै जौ कबी समजनो ना चँईऐ कै परमेसर सौने, चाँदी, या पत्थर की आदमी के हात सै बनाई भई मूरतिऔं के हाँई है। 30अब तक परमेसर नै उनसै उनको लेखो ना लेओ पर अब तुमरे ताँई बाको जौ हुकम है कै तुम अपने पापौं सै मन फिराऔ। 31कैसेकै परमेसर नै एक दिन ऐंसो ठैराओ है, जिसमै बौ बा आदमी के दुआरा दुनिया के लोगौ को सच्चाई सै नियाय करैगो जिसकै बानै ठैरार खाओ है, और बाकै मरे भएऔं मै सै फिर सै जिन्दो करकै जा बात को सबूत दे दओ है।”
32मरे भएऔं और फिर सै जिन्दे होनै की बात सुनकै लोग मजाक बनाल लगे, पर दूसरे लोग कैललगे कै, “जा बात के बारे मै हम और बी जादा किसी और दिन तेसै सुन्नो चाँहै हैं।” 33और तबई पौलुस उनके धौंरे सै चलो गओ।
34कुछ लोगौ नै बिसवास करो और बाके संग मिल गए। उनमै सै अरिपुस की सभा को एक सदस्य दिनुयुस हो और दमरिस नाम की एक बईयर और कुछ लोग और बी हे।
सध्या निवडलेले:
चेलौ के काम 17: TKB
ठळक
कॉपी करा
तुलना करा
सामायिक करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
New Life Compute Institute [NLCI] - CC BY-NC-ND 4.0
