MGA BUHAT 28
28
Si Pablo Didto sa Pulo sa Malta
1Sa nakalingkawas na kami, among nahibaloan nga ang pulo ginganlan diay ug Malta. 2Ug ang mga lumad didto nagpakita kanamo ug talagsaong kaayo, kay sila nagdaob, ug kaming tanan giabiabi nila tungod kay nagsugod na man pag-ulan ug tugnaw ang panahon. 3Si Pablo namunit ug mga igsusugnod, ug sa iya na kining gibutang sa daob, usa ka bitin migawas tungod sa kainit ug mibalikos sa iyang kamot. 4Sa pagkakita sa mga lumad sa bitin nga nagbitay sa iyang kamot, sila miingon sa usa ug usa, “Sa walay duhaduha kining tawhana mamumuno. Ug bisan tuod nakalingkawas siya gikan sa dagat, ang hustisya wala motugot nga mabuhi siya.” 5Apan gisawilik niya ang bitin ngadto sa kalayo, ug siya wala maunsa. 6Sila nagpaabot nga mohubag ang iyang kamot o mokalit pagkatumba nga patay, apan sa nakapaabot na sila ug taas nga panahon ug walay nakitang kadaot nga nahitabo kaniya, giusab nila ang ilang hunahuna ug miingon nga siya usa ka dios.
7Ug kasikbit niadtong dapita mao ang kayutaan nga iya sa pangulo sa maong pulo nga ginganlan ug Publio, nga midawat kanamo ug maabiabihong mipapuyo kanamo sulod sa tulo ka adlaw. 8Ug nahitabo nga ang amahan ni Publio naghigda nga gihilantan ug may disenterya. Ug si Pablo miadto kaniya ug nag-ampo ug mitapion sa iyang kamot diha kaniya, ug naayo siya. 9Pagkahitabo niini, ang ubang mga tawo sa pulo nga may mga sakit miadto usab ug nangaayo. 10Unya mihatag sila kanamo ug daghang mga gasa, ug sa among paggikan, gisangkapan nila kami sa mga butang nga among gikinahanglan.
Ang Pag-abot ni Pablo sa Roma
11Human sa tulo ka bulan milawig kami sakay sa usa ka barko nga nagpalabay sa tingtugnaw didto sa pulo, usa ka barko nga gikan sa Alejandria nga ang dulong may kinulit nga dagway sa Kaluhang dios.#28:11 KALUHANG DIOS: Sa Grego, Dioscuro. Ang kaluhang diosdios sa mga Romano nga si Castor ug Pollux. 12Ug sa pagdunggo namo sa Siracusa mipabilin kami didto sulod sa tulo ka adlaw. 13Ug gikan didto miliyok kami ug miabot sa Regio, ug human sa usa ka adlaw mihuros ang habagat, ug sa ikaduhang adlaw miabot kami sa Puteoli. 14Didto nakatagbo kami ug mga kaigsoonan, ug ila kaming gidapit sa pagpabilin uban kanila sulod sa pito ka adlaw. Ug unya miabot kami sa Roma. 15Ug ang mga kaigsoonan didto, sa ilang pagkadungog mahitungod kanamo, miadto hangtod sa Taboan ni Apio ug sa Tulo ka Abotanan aron sa pagsugat kanamo. Ug sa iyang pagkakita kanila, si Pablo nagpasalamat sa Dios ug nadasig. 16Sa pag-abot namo sa Roma, si Pablo gitugotan sa pagpuyo nga siya ra, uban sa sundalo nga nagbantay kaniya.
Ang Pagwali ni Pablo Didto sa Roma
17Ug mao kadto nga human sa tulo ka adlaw, iyang gipatawag ang mga kadagkoan sa mga Judio didto, ug sa nagtigom na sila, siya miingon kanila, “Mga igsoon, ako gitugyan nga binilanggo gikan sa Jerusalem ngadto sa mga kamot sa mga Romanhon, apan wala akoy nahimong bisan unsa nga supak sa katawhan o supak sa mga nabatasan sa atong mga katigulangan. 18Sa nasukitsukit na ako nila, buot unta nila nga ako buhian kay wala may katarongan nga hukman ako sa kamatayon. 19#Buh. 25:11. Apan sa diha nga misupak niini ang mga Judio, napugos ako sa pagdangop kang Cesar bisan ug wala akoy ikasumbong batok sa akong nasod. 20Busa tungod niining maong hinungdan, mihangyo ako sa pagpakigkita ug pagpakigsulti kaninyo, kay kini tungod man sa paglaom sa Israel nga gigapos ako karon niining kadena.” 21Ug sila miingon kaniya, “Wala kami makadawat ug mga sulat gikan sa Judea mahitungod kanimo, ug walay misugilon o misulti ug daotan mahitungod kanimo sa mga kaigsoonan nga miabot dinhi. 22Apan buot kaming mamati kanimo kon unsa ang imong mga hunahuna, kay mahitungod niining maong pundok kami nasayod nga kini gisupak bisan diin.”
23Sa dihang nakatakda na sila ug adlaw alang kaniya, daghan sila nga nangadto kaniya sa iyang gipuy-an. Ug sukad sa buntag hangtod sa gabii, iyang gipasabot ang mga butang ngadto kanila nga nagpamatuod sa gingharian sa Dios ug naningkamot nga motuo sila mahitungod kang Jesus pinasikad sa Balaod ni Moises ug sa mga propeta. 24Ug ang uban mituo sa iyang gisulti, apan ang uban wala motuo. 25Ug kay wala man sila magkauyon, sila namauli human si Pablo makasulti ug usa ka pahayag nga nag-ingon, “Tukma gayod ang gisulti sa Espiritu Santo ngadto sa inyong mga katigulangan pinaagi kang Isaias nga propeta,
26 #
Isa. 6:9-10 (LXX). ‘Adtoa kining mga tawhana, ug sultihi sila:
Sa inyong pagpamati makabati kamo, apan dili gayod kamo makasabot;
sa inyong pagtan-aw makasud-ong kamo, apan dili gayod kamo makakita.
27Kay nahabol ang mga kasingkasing niining mga tawhana,
ug ang ilang mga dalunggan naglisod sa pagpamati,
ug ang ilang mga mata gipiyong nila,
kay tingali unya ug makakita sila pinaagi sa ilang mga mata,
ug makabati pinaagi sa ilang mga dalunggan,
ug makasabot pinaagi sa ilang kasingkasing,
ug modangop kanako aron ayohon nako sila.’
28Busa hibaloi ninyo nga kining maong kaluwasan nga gikan sa Dios gipadala na ngadto sa mga Gentil; sila mamati niini.”#28:28 Ang ubang karaang sinulat nagdugang ug bersikulo 29: Ug sa nakasulti na siya niining mga pulonga, ang mga Judio namauli nga may dakong panaglalis taliwala sa ilang kaugalingon.
30Ug si Pablo mipuyo didto sulod sa tibuok duha ka tuig, pinaagi sa iyang kaugalingong gasto,#28:30 pinaagi sa iyang kaugalingong gasto: o kaugalingong balay nga inabangan. ug nag-abiabi sa tanang miadto kaniya. 31Nagwali siya sa gingharian sa Dios ug nagtudlo sa mga butang mahitungod sa Ginoong Jesu-Cristo uban sa tanang kaisog ug walay misanta kaniya.
सध्या निवडलेले:
MGA BUHAT 28: ABCEB
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
©Philippine Bible Society, 2011
