ܒܪܝܬܐ 25
25
ܝܵܠܹ̈ܕ݇ܐ ܕܐܲܒ݂ܪܵܗܵܡ ܡ̣ܢ ܩܹܛܘܿܪܵܐ
1ܫܩܝܼܠ ܠܹܗ ܐܲܒ݂ܪܵܗܵܡ ܒܲܟ݂ܬܵܐ ܐ݇ܚܹܪ݇ܬܵܐ، ܫܸܡܘܼܗ̇ ܩܹܛܘܿܪܵܐ. 2ܝ݇ܠܝܼܕ ܠܵܗ̇ ܐܸܠܹܗ ܠܙܸܡܪܵܢ، ܘܠܝܵܩܫܵܢ، ܘܠܡܵܕܵܢ، ܘܠܡܸܕܝܲܢ، ܘܠܝܲܫܒܵܩ، ܘܠܫܘܿܚ. 3ܝܵܩܫܵܢ ܡܘܼܠܸܕ ܠܹܗ ܠܫܒ݂ܵܐ، ܘܠܕܵܕܵܢ. ܒܢܘܿܢܹ̈ܐ ܕܕܵܕܵܢ ܝܼܗ݇ܘܵܘ: ܐܲܫܘܿܪ̈ܵܝܹܐ، ܘܠܲܛܘܼܫܵܝܹ̈ܐ، ܘܠܹܐܘܼܡܝܼܡ. 4ܘܒܢܘܿܢܹ̈ܐ ܕܡܸܕܝܲܢ ܝܼܗ݇ܘܵܘ: ܥܝܼܦܵܐ، ܘܥܵܦܵܪ، ܘܚܢܘܿܟ݂، ܘܐܲܒ݂ܝܼܕܲܥ، ܘܐܸܠܕܵܥܵܐ. ܟܠܲܝܗܝ ܐܲܢܹܐ ܒܢܘܿܢܹ̈ܐ ܕܩܹܛܘܿܪܵܐ ܝܗ݇ܘܵܘ.
5ܝܘܼܗ݇ܒܸܠ ܠܹܗ ܐܲܒ݂ܪܵܗܵܡ ܟܠ ܡܸܢܕܝܼ ܕܐܝܼܬ ܗ݇ܘܵܐ ܠܹܗ ܠܐܝܼܣܚܵܩ. 6ܐܝܼܢܵܐ ܐܲܒ݂ܪܵܗܵܡ ܗܹܫ ܚܵܝܵܐ ܝܘܼܗ݇ܒܸܠ ܠܹܗ ܡܵܘܗܒ݂ܵܬܹ̈ܐ ܠܒܢܘܿܢܹ̈ܐ ܕܕܪ̈ܘܼܟ݂ܝܵܬܹܐ ܕܐܝܼܬ ܗ݇ܘܵܘ ܠܹܗ، ܘܫܘܼܕܪܲܝ ܠܹܗ ܡ̣ܢ ܠܟܸܣ ܒܪܘܿܢܹܗ ܐܝܼܣܚܵܩ ܠܡܲܕܢܚܵܐ، ܠܐܲܪܥܵܐ ܕܡܲܕܢܚܵܐ.
ܡܵܘܬܵܐ ܕܐܲܒ݂ܪܵܗܵܡ
7ܘܗܘܹܐ ܠܗܘܿܢ ܟܠܲܝܗܝ ܚܲܝܹ̈ܐ ܕܐܲܒ݂ܪܵܗܵܡ ܐܸܡܵܐܐ ܘܫܲܒ݂ܥܝܼ ܘܚܲܡܸܫ ܫܸܢܹ̈ܐ. 8ܘܣܘܼܦܝܵܐ ܠܹܗ ܪܘܼܚܹܗ ܐܲܒ݂ܪܵܗܵܡ ܘܡܝܼܬ ܠܹܗ ܒܣܲܝܒܘܼܬܵܐ ܛܵܒ݂ܬܵܐ، ܣܵܒ݂ܵܐ ܘܣܒ݂ܝܼܥܵܐ ܒܫܸܢܹ̈ܐ؛ ܘܦܝܼܫ ܠܹܗ ܩܒ݂ܝܼܪܵܐ ܒܕܸܦܢܵܐ ܕܥܲܡܹܗ. 9ܩܒ݂ܝܼܪܗܘܿܢ ܐܸܠܹܗ ܐܝܼܣܚܵܩ ܘܐܝܼܫܡܲܥܹܝܠ ܒܢܘܿܢܘܼ̈ܗܝ، ܓܵܘ ܓܸܦܝܼܬܵܐ ܕܡܲܟ݂ܦܹܠܵܐ، ܠܡܲܕܢܚܵܐ ܕܡܲܡܪܹܐ، ܓܵܘ ܚܲܩܠܵܐ ܕܥܸܦܪܘܿܢ ܒܪܘܿܢܵܐ ܕܨܵܚܵܪ ܚܹܝܬܵܝܵܐ، 10ܗ̇ܝ ܚܲܩܠܵܐ ܕܙܒ݂ܝܼܢܘܼܗ̇ ܝܗ݇ܘܵܐ ܐܲܒ݂ܪܵܗܵܡ ܡ̣ܢ ܒܢܲܝ̈ ܚܹܝܬ. ܬܵܡܵܐ ܦܝܼܫ ܠܹܗ ܩܒ݂ܝܼܪܵܐ ܐܲܒ݂ܪܵܗܵܡ، ܠܟܸܣ ܣܲܪܵܐ ܒܲܟ݂ܬܹܗ. 11ܗܘܹܐ ܠܵܗ̇ ܡ̣ܢ ܒܵܬ݇ܪ ܡܵܘܬܵܐ ܕܐܲܒ݂ܪܵܗܵܡ، ܒܘܼܪܸܟ݂ ܠܹܗ ܐܲܠܵܗܵܐ ܠܐܝܼܣܚܵܩ ܒܪܘܿܢܹܗ، ܘܝ݇ܬܝܼܒ݂ ܠܹܗ ܐܝܼܣܚܵܩ ܠܟܸܣ ܒܹܪ ܠܲܚܲܝ ܪܘܿܐܝܼ.
ܬܵܘܠܕܵܬܹ̈ܐ ܕܐܝܼܫܡܲܥܹܝܠ
12ܐܲܢܹܐ ܝܢܵܐ ܬܵܘܠܕܵܬܹ̈ܐ ܕܐܝܼܫܡܲܥܹܝܠ، ܒܪܘܿܢܵܐ ܕܐܲܒ݂ܪܵܗܵܡ، ܕܝ݇ܠܝܼܕ ܠܵܗ̇ ܠܐܲܒ݂ܪܵܗܵܡ ܗܵܓ݂ܵܪ ܡܸܨܪܵܝܬܵܐ، ܚܹܕܲܡܬܵܐ ܕܣܲܪܵܐ. 13ܘܐܲܢܹܐ ܝܢܵܐ ܫܸܡܵܢܹ̈ܐ ܕܒܢܘܿܢܹ̈ܐ ܕܐܝܼܫܡܲܥܹܝܠ، ܒܫܸܡܵܢܲܝ̈ܗܝ ܒܣܸܕܪܵܐ ܕܡܵܘܠܵܕܲܝܗܝ: ܒܘܼܟ݂ܪܵܐ ܢܒ݂ܝܼܘܿܬ، ܘܩܹܕܲܪ، ܘܐܲܕܒܹܐܹܝܠ، ܘܡܲܒ݂ܣܲܡ، 14ܘܡܲܫܡܲܥ، ܘܕܘܿܡܵܐ، ܘܡܲܣܵܐ، 15ܚܵܕܵܪ، ܘܬܲܝܡܵܐ، ܘܝܹܛܘܿܪ، ܘܢܵܦܸܫ، ܘܩܵܕ݇ܡܵܐ. 16ܐܲܢܹܐ ܝܢܵܐ ܒܢܘܿܢܹ̈ܐ ܕܐܝܼܫܡܲܥܹܝܠ، ܘܐܲܢܹܐ ܝܢܵܐ ܫܸܡܵܢܲܝ̈ܗܝ، ܒܡܵܬܘܵܬܲܝ̈ܗܝ ܘܡܲܫܪ̈ܝܼܵܬܲܝܗܝ، ܬܪܸܥܣܲܪ ܪܵܘܪ̈ܒ݂ܵܢܹܐ ܒܫܲܒ݂ܛܲܝ̈ܗܝ. 17ܐܲܢܹܐ ܝܢܵܐ ܫܸܢܹ̈ܐ ܕܚܲܝܹ̈ܐ ܕܐܝܼܫܡܲܥܹܝܠ، ܐܸܡܵܐܐ ܘܬܠܵܬܝܼ ܘܫܒܲܥ ܫܸܢܹ̈ܐ. ܘܣܘܼܦܝܵܐ ܠܹܗ ܪܘܼܚܹܗ ܘܡܝܼܬ ܠܹܗ، ܘܦܝܼܫ ܠܹܗ ܩܒ݂ܝܼܪܵܐ ܕܸܦܢܵܐ ܕܥܲܡܹܗ. 18ܫܪܹܐ ܠܗܘܿܢ ܡ̣ܢ ܚܘܝܼܠܵܐ ܗܲܠ ܫܘܼܪ، ܕܝܼܠܵܗ̇ ܩܵܕ݇ܡ ܡܸܨܪܹܝܢ، ܒܐܘܼܪܚܵܐ ܠܐܵܬܘܿܪ؛ ܫܪܹܐ ܠܹܗ ܩܵܕ݇ܡ ܦܵܬܵܐ ܕܟܠܲܝܗܝ ܐܲܚܘܿܢܘܵܬܹ̈ܗ.
ܬܵܘܠܕܵܬܹ̈ܐ ܕܐܝܼܣܚܵܩ
19ܘܐܲܢܹܐ ܝܢܵܐ ܬܵܘܠܕܵܬܹ̈ܐ ܕܐܝܼܣܚܵܩ، ܒܪܘܿܢܵܐ ܕܐܲܒ݂ܪܵܗܵܡ: ܐܲܒ݂ܪܵܗܵܡ ܡܘܼܠܸܕ ܠܹܗ ܠܐܝܼܣܚܵܩ. 20ܐܝܼܣܚܵܩ ܒܲܪ ܐܲܪܒܥܝܼ ܫܸܢܹ̈ܐ ܝܼܗ݇ܘܵܐ ܐܝܼܡܲܢ ܕܓܒ݂ܝܼܪܹܗ ܠܪܲܦܩܵܐ، ܒܪܵܬܵܐ ܕܒܬܘܼܐܹܝܠ ܐܵܪܵܡܵܝܵܐ، ܡ̣ܢ ܦܵܕܵܢ ܐܵܪܵܡ، ܚܵܬܵܐ ܕܠܵܒ݂ܵܢ ܐܵܪܵܡܵܝܵܐ. 21ܦܘܼܪܦܸܠ ܠܹܗ ܐܝܼܣܚܵܩ ܒܡܵܪܝܵܐ ܒܘܼܬ ܒܲܟ݂ܬܹܗ ܣܵܒܵܒ ܥܩܲܪܬܵܐ ܝܗ݇ܘܵܐ، ܘܫܡܝܼܥ ܠܹܗ ܐܸܠܹܗ ܡܵܪܝܵܐ، ܘܒܛܝܼܢܵܗ̇ ܪܲܦܩܵܐ ܒܲܟ݂ܬܹܗ. 22ܡܘܼܠܝܸܨ ܠܗܘܿܢ ܠܸܚܕܵܕܹ̈ܐ ܒܢܘܿܢܹ̈ܐ ܒܟܹܪ݇ܣܘܼܗ̇، ܘܐ݇ܡܝܼܪܵܗ̇، ”ܐܸܢ ܗܲܕܟ݂ܵܐ ܝܠܵܗ̇، ܩܵܡܘܿܕܝܼ ܚܵܝܵܢ ܐܵܢܵܐ.“ ܘܐ݇ܙܝܼܠ ܠܵܗ̇ ܠܒܲܩܘܼܪܹܐ ܡ̣ܢ ܡܵܪܝܵܐ. 23ܘܐ݇ܡܝܼܪܹܗ ܡܵܪܝܵܐ ܐܸܠܘܼܗ̇،
”ܗܵܐ، ܬܪܹܝ ܐܸܡܘܵܬܹ̈ܐ ܒܡܲܪܒܥܵܟ݂ܝ ܝܼܢܵܐ،
ܘܬܪܹܝ ܥܲܡܡܹ̈ܐ ܡ̣ܢ ܟܹܪ݇ܣܵܟ݂ܝ ܒܸܬ ܦܵܪܫܝܼ؛
ܚܲܕ ܒܸܬ ܗܵܘܹܐ ܒܘܼܫ ܚܲܝܠܵܢܵܐ ܡ̣ܢ ܗ̇ܘ ܐ݇ܚܹܪ݇ܢܵܐ،
ܘܗ̇ܘ ܓܘܼܪܵܐ ܒܸܬ ܦܵܠܹܚ ܠܗ̇ܘ ܙܥܘܿܪܵܐ.“
24ܐܝܼܡܲܢ ܕܬܘܼܡܸܡ ܠܗܘܿܢ ܝܵܘܡܵܢܘܼ̈ܗ̇ ܕܗܲܨܠܵܐ ܗ݇ܘܵܐ، ܗܵܐ، ܓ̰ܲܡܹ̈ܐ ܒܡܲܪܒܥܘܼܗ̇. 25ܦܠܝܼܛ ܠܹܗ ܗ̇ܘ ܩܵܕ݇ܡܵܝܵܐ ܣܡܘܿܩܢܵܝܵܐ، ܟܠܹܗ ܦܲܓ݂ܪܹܗ ܐܲܝܟ݂ ܥܵܒܵܝܬܵܐ ܡܸܙܬܵܢܬܵܐ، ܘܩܪܹܐ ܠܗܘܿܢ ܫܸܡܹܗ ”ܥܹܣܘܿ.“#25:25 ܫܸܡܵܐ ܕܥܹܣܘܿ ܩܵܠܹܗ ܒܸܕܡܵܝܵܐ ܝܠܹܗ ܠܚܲܒܪܵܐ ܕܡܸܙܬܵܢܵܐ ܒܠܸܫܵܢܵܐ ܥܸܒ݂ܪܵܝܵܐ 26ܡ̣ܢ ܒܵܬ݇ܪ ܡܸܢܹܗ ܦܠܝܼܛ ܠܹܗ ܐܲܚܘܿܢܘܼܗܝ، ܘܐܝܼܕܹܗ ܕܒ݂ܝܼܩܬܵܐ ܒܥܸܩܒܵܐ ܕܥܹܣܘܿ؛ ܘܩܪܹܐ ܠܗܘܿܢ ܫܸܡܹܗ ”ܝܲܥܩܘܿܒ݂.“#25:26 ܫܸܡܵܐ ܕܝܲܥܩܘܿܒ݂ ܩܵܠܹܗ ܒܸܕܡܵܝܵܐ ܝܠܹܗ ܠܚܲܒܪܵܐ ܕܕܵܒ݂ܩܵܢܵܐ ܕܥܸܩܒܵܐ ܒܠܸܫܵܢܵܐ ܥܸܒ݂ܪܵܝܵܐ، ܝܲܥܢܹܐ ܥܲܠܕܝܼܵܢܵܐ ܐܝܼܣܚܵܩ ܒܲܪ ܐܸܫܬܝܼ ܫܸܢܹ̈ܐ ܝܗ݇ܘܵܐ ܟܲܕ ܝ݇ܠܝܼܕܲܝ ܠܵܗ̇ ܪܲܦܩܵܐ.
ܥܹܣܘܿ ܙܲܒܘܼܢܹܐ ܒܘܼܟ݂ܪܘܼܬܹܗ
27ܓܘܼܪܘܸܣ ܠܗܘܿܢ ܝܵܠܹ̈ܕ݇ܐ، ܘܥܹܣܘܿ ܗܘܹܐ ܠܹܗ ܡܗܝܼܪܵܐ ܒܨܲܝܕܵܐ، ܐ݇ܢܵܫܵܐ ܕܕܸܫܬܵܐ؛ ܘܝܲܥܩܘܿܒ݂ ܗܘܹܐ ܠܹܗ ܫܸܠܝܵܐ، ܝܵܬܒ݂ܵܢܵܐ ܒܡܲܫܟܢܹ̈ܐ. 28ܐܝܼܣܚܵܩ ܡܘܼܚܸܒ ܠܹܗ ܠܥܹܣܘܿ ܣܵܒܵܒ ܟܹܐ ܐܵܟܹܠ ܗ݇ܘܵܐ ܡ̣ܢ ܨܲܝܕܹܗ، ܐܝܼܢܵܐ ܪܲܦܩܵܐ ܡܘܼܚܸܒ ܠܵܗ̇ ܠܝܲܥܩܘܿܒ݂.
29ܒܲܫܘܼܠܹܐ ܝܗ݇ܘܵܐ ܝܲܥܩܘܿܒ݂ ܒܘܼܫܵܠܵܐ، ܘܐ݇ܬܹܐ ܠܹܗ ܥܹܣܘܿ ܡ̣ܢ ܕܸܫܬܵܐ ܟܟ̰ܝܼܚܵܐ. 30ܘܐ݇ܡܝܼܪܹܗ ܥܹܣܘܿ ܠܝܲܥܩܘܿܒ݂، ”ܡܲܠܝܸܙ، ܗܲܒ݂݇ܠ ܠܝܼ ܕܐܵܟ݂ܠܹܢ ܗܲܪ ܡ̣ܢ ܐܵܗܵܐ ܒܘܼܫܵܠܵܐ ܣܡܘܿܩܬܵܐ، ܣܵܒܵܒ ܟܟ̰ܝܼܚܵܐ ܝܘܸܢ.“ (ܒܘܼܬ ܐܵܗܵܐ ܩܪܹܐ ܠܗܘܿܢ ܫܸܡܹܗ ܐܲܕܘܿܡ.#25:30 ܥܸܒ݂ܪܵܐܝܼܬ ܒܡܲܥܢܵܝܵܐ: ܣܡܘܿܩܵܐ ) 31ܐ݇ܡܝܼܪܹܗ ܝܲܥܩܘܿܒ݂، ”ܙܲܒܸܢ ܐܸܠܝܼ ܐܸܕܝܘܿܡ ܒܘܼܟ݂ܪܘܼܬܘܼܟ݂.“ 32ܘܐ݇ܡܝܼܪܹܗ ܥܹܣܘܿ، ”ܗܵܐ، ܐܵܢܵܐ ܒܸܡܝܵܬܵܐ ܝܘܸܢ، ܩܵܡܘܿܕܝܼ ܝܠܵܗ̇ ܐܸܠܝܼ ܒܘܼܟ݂ܪܘܼܬܝܼ؟“ 33ܐ݇ܡܝܼܪܹܗ ܝܲܥܩܘܿܒ݂، ”ܝ݇ܡܝܼ ܐܸܠܝܼ ܐܸܕܝܘܿܡ ܝܵܘܡܵܐ.“ ܘܝ݇ܡܹܐ ܠܹܗ ܐܸܠܹܗ، ܘܙܘܼܒܢܵܐ ܠܹܗ ܒܘܼܟ݂ܪܘܼܬܹܗ ܠܝܲܥܩܘܿܒ݂. 34ܗ̇ܝܓܵܗ ܝܘܼܗ݇ܒܸܠ ܠܹܗ ܝܲܥܩܘܿܒ݂ ܠܥܹܣܘܿ ܠܲܚܡܵܐ ܘܒܘܼܫܵܠܵܐ ܕܛܠܲܦ̮ܚܹ̈ܐ، ܘܐ݇ܟ݂ܝܼܠ ܠܹܗ ܘܫܬܹܐ ܠܹܗ، ܘܩܝܼܡ ܠܹܗ ܘܐ݇ܙܝܼܠ ܠܹܗ. ܗܲܕܟ݂ܵܐ ܡܘܼܣܠܹܐ ܠܹܗ ܥܹܣܘܿ ܠܒܘܼܟ݂ܪܘܼܬܹܗ.
सध्या निवडलेले:
ܒܪܝܬܐ 25: ABTAB
ठळक
कॉपी करा
तुलना करा
सामायिक करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
Aramaic Bible Translation Assyrian Bible © 2025 Aramaic Bible Translation