Mak 4
4
Danab ee aeg datta tauɗomnu nai
1Aria, Jesus Nug Galili le ameg ihippa mehuqak uɗat baula digma heum. Nug anam he amu, danab ah kuɗumnab uɗin qagmeppig amunu, Jesus Nug uub attan teum. Nug ta, heɗep na dayeye, danab ah oh ag le ihippa daaegeg, 2Jesus Nug keeke danab ag dootteb ii dootteb ele ouaqata ippuanittak naippa keeke kuɗum ippunattak ha, inam mattiom. 3“Ag daulag human doyeg! Ee aeg eppak danab nug ee aeg ebakkunu aha, 4dad okkaippa ukka ee eppaknu abenppa oiyaya, ee aeg tauɗom. Nug tauɗa ugekke, ee aeg laala danab ib oittebppa nena qena niiegeg, ai ag uɗin, ee aeg amu lappig. 5Ee aeg laala ag wan men duqe ukkak amuppa nena qeppig amu, wan unuqag iitta amunu pahanab beppig, 6amge haen aam na, keeke beppig ele qe amu, ag diɗilag wan ooppanab ii noum amunu bunaɗppig. 7Aria, ee aeg laala ag wan uud keeke qaun ele beppigppa nena qeeg, uud keeke qaun ele bena naɗi ma, teguatte bunaɗna, meu ii oppig. 8Ee aeg laala ag wan enappa nena qena, ena bena, meu oppig. Ee aeg laala ag meulkad 30 oppig. Laala ag meulkad 60 oppig, amu laala ag 100 oppig.” Jesus Nug anam aum.
9Nug anam ana, Nug baula ele aum. “Danab nug daug ele dayeb, nug doyaɗ!”
10Jesus Nug anam a amu dimppa Nug, amu nuhikkud ippunittak awak danab 12, amu Nug laikkud laala ele ag akka daanna, ag Jesus keeke danab ag dootteb ii dootteb ele ouaqata ippuanittak nai aum, ag amu dilag meunu oɗ medappig. 11Oɗ mettaeg amu Jesus Nug aum. “Ag dahilad amu, Kayak Nug ag Kayaknu ɗo maɗoɗnu keeke diig lokkumak amu dooglagnu doyak mattom amunu, ag dootteb, amge danab laala, ag dahil nai dim ii lamidtteb, ag nai danab nug keeke danab ag dootteb ii dootteb ele ouaqata ippunadtte, nai amuppaib anidtteb.
12Amunu diig am, ‘Ag neegna neegna daaglag, amge ag diig tutukku ii anidmana.
Ao, ag nai daulagppa doon doon daaglag, amge nai meu am tutukku ii doomna.
Ag anam ii helob, ⌊ag nai dahil doona,⌋ ag oolag eɗuglagtai. Ag anam hekkulag dayeb amu, Kayak Nug ahilag hipunin uhuqa madakku,’ ” awa aum.
13Jesus Nug anam ana amu, Nug nai baula tuɗitta aum. “Da keeke danab ag dootteb ii dootteb ele ouaqaten ippuanatten ami amu, nai amuam uug iitta, amge ag meunab nuhig ii dooppig amunu, dimppa da nai amubia, amge ɠagattag ele madippi, ag attem oolag maidkku? 14Danab nug Kayak nai mehuqtte amu, nug am danab ee aeg ebatte bia. 15Ee aeg laala ibppa nena qeppig ele amu, nai amu inam ippunigtte. Danab laala ag nai dootteb, amge Satan nug paha uɗia he, Kayak nai ag oolagppa dayom iitta mette. 16Amu ee aeg men duqe ukkakppa nena qeppig ele amu, nai amu inam ippunigtte. Danab laa ag nai doon, oolag gamag ahehe, pahanab aotteb, 17amge ahilag ooppa genab doyak am ɠagattag iitta, haen tutunuib amunu, deɗ laa ag Kayaknu nai dim lamidtteb, diig amunu uug laa bette, o danab laala ag eheɗ hadatteb amu, ag pahanab ahilag ooppa genab doyak paɗatteb. 18Ee aeg wan uud keeke qaun ele beppigppa nena qeppig ele amu, nai amu inam ippunigtte. Danab amu ag nai dootteb, 19amge ag wannu haen imunu uug laala, amu enub awak uɗat amu ameg qak kobol ele, keeke amu oh ag oolagppa he, Kayak nai iitta ma, meu ii otte. 20Aria, ee aeg wan enappa nena qeppig ele amu, nai amu inam ippunigtte. Danab laa ag nai doonna, aon oolagppa metteb amu, ag meu ena otteb, laa 100, laa 60, laa 30 eppakppanu eɗittak, anam otteb,” awa aum.
Amahlaknu nai
21Aria, Jesus Nug nai imu ele mattiom. “Na lam amotna, tappiɗ waappa o iitta niiaknu balal waappa mettemte? Iitta! Na amotna, lam maknu balal attan mee eotte. 22Amubia gemu keeke oh lokkumak daatteb, am dimppa miag atiglagnu daatteb. Ge, keeke oh danab ag lokkumppig daatteb, am dimppa ag miag atippeg, danab oh anidkkulagnu daatteb. 23Laa nug daug ele dayeb, nug doyaɗ!” awa aum.
24Aria, Jesus Nug baula aum. “Ag aɗi dootteb amu, ag daulag human, tutukku doyeg! Ag lailkad dilagnu aɗi melemelppa keeke hetteb, ag melemel amuppaib geha keeke aoglag. Ag amu aona, ag baula ele tuɗittak aoglag. 25Danab nug Kayaknu keeke awa, uɗat pehettak medatte amu, Kayak Nug amu laa ele medakku, amge danab nug Kayaknu keeke awa, uɗat pehettak ii medatte amu, Kayak nug nuhig keeke awom amu eɗua aɗidkku,” awa aum.
Kayaknu ɗo maɗoɗ attem daakku
26Jesus Nug nai amu mattiowa, Nug Kayaknu ɗo maɗoɗ attem daakkunu amu inam mattiom. “Kayaknu ɗo maɗoɗ amuam danab nug ee aeg wanppa tauɗtte bia. 27Nug anam eppowa amu nug tuqanppa niiaya, amunppa nug uɗat laala haaha oiyeye, ee aeg nug ba, okkai mette. Okkai mette, amge danab nug ee amu attem ba okkai mette nug ii dootte. 28Nug uɗat laa heehe, wan nug nukka ee ittag medette, ee amu bette. Tatam am qaɗu, dimppa haɗag qette, amu dimppa nug meu otte. 29Aria, meu oa oɗue, meu awak haen aakku doum amunu, danab nug meu aotte,” awa aum.
30Nug anam ana amu, Nug nai tuɗitta aum. “Ig Kayaknu ɗo maɗoɗ am aɗi keeke bia daatte akkunig? O ig aɗi keeke danab ag dootteb ii dootteb ele ouaqata ippuanittak nai aɗi apput, ag Kayaknu ɗo maɗoɗnu oolag maidkku? Am inam. 31Kayaknu ɗo maɗoɗ am mastet aeg eppaeg bette amubia. Mastet aeg nug am ee laa aeg bia iitta. Nug aeg nakoknab, amge danab nug wanppa ebatte, nug bette. 32Nug ba, okkai mewowa, dattanu ee laa oh eɗadtte. Eɗatta, eppeg ele okkai mena daaegeg, ai ag nug logoppa daatteb,” awa aum.
33Jesus Nug nuhig nai keeke danab ag dootteb ii dootteb ele ouaqata ippuanittak nai kuɗum amubiappa danab ah amelagppa mattiom. Ib amuppa Nug ag dooglagnu elele daappig, Nug amu ippuanattom. 34Nug keeke danab ag dootteb ii dootteb ele ouaqata ippuanittak nai aakkuib mattiom, amu Nug nuhikkud ippunittak awak danab ele haen laala ag akkaib daanna, Nug nuhig nai oh amu diig mehuqttom.
Jesus Nug he, koɗkoɗ qak iitta meum
35Deɗ amu tueb me, aam noono Jesus Nug nuhikkud ippunittak awak danab amelagppa aum. “Ig ahat, Galili le ameg mataɗta, laih gotu!” awa aum. 36Awa a amu ag ahan, danab ah kuɗum uuadna, uub nakok, Nug uub amuppa dayom ele amu, uub amuppa ukkaegeg, uub naunau laala ele oh goppig. 37Ag ukkaegeg, ulah okkainab heehe, le ameg koɗkoɗ huan qa, uub ooppa noa, ambekkunu heum. 38Le anam heehe amu, Jesus Nug uub bitobppa uɗunppa niieye, nuhikkud ippunittak awak danab ag Nug maɗettan appig. “Ippunikkak ihinig, ig mauhkkunignu hettem amu, na amunu iite dabmettem?” aon appig. 39Ag anam aeg amu Jesus Nug aha, ulah amegppa nug anam hemanu ana, le amegppa, “Na uuna, toettan daye!” awa aum. Nug anam a, ulah nug iitta me, le ele toetta, manin niiom. 40Nug anam ha amu, Nug nuhikkud ippunittak awak danab amelagppa aum. “Ag aɗinu anam baɗatteb? Ag gemu ele oolagppa genab iite dootteb?” awa aum. 41Jesus Nug anam he anidna, nuhikkud ippunittak awak danab ag baɗak eheɗ nau doon, ag akka akka appig. “Danab imu am aun? Ulah, le ele, aa ele nuhig nai dim lamidttep!” aon appig.
നിലവിൽ തിരഞ്ഞെടുത്തിരിക്കുന്നു:
Mak 4: NB
ഹൈലൈറ്റ് ചെയ്യുക
പകർത്തുക
താരതമ്യം
പങ്ക് വെക്കു
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© (Active), Wycliffe Bible Translators, Inc. All rights reserved.
