Matyu 28
28
Jesus Nug eɗua hibaittom
1Amu Sabat deɗ ukka male, wagɗe mettidnu deɗ digmakppa aam bekkunu heehe, Maria, Makdala ted amu Maria laa ele aa moɗ anidkkulahnu gopiɗ.
2Ukkaeheh am mim okkai neum. Aɗinu? Naɗinu engel laa hab aabppanu na, moɗppa ukka, men buɗibɗib mette ukke, ameg kola, men amu qaɗeppa heɗep na dayom. 3Nug iɗu am amemɗi bia amahlom. Nuhig lamen amu hakkabnab sno bia. 4Ban danab ag nuhignu baɗaeg, beɗulag hahaɗeɗe, danab mauhak bia niippig.
5Am engel nug ah aɗit amelahppa aum. “A aib baɗapiɗ! Da doottem, aa Jesus, ad emaitakppa atulppig amu, aa Nug madittep. 6Nug ippa ii daatte, nug anukka aum bia eɗua hibaittom! Aa doya, Nug niiom aben iikkud antteɗ! 7Anttoya am paha goya, nuhikkud ippunittak awak danab amelagppa, ‘Nug moɗppanu eɗua hibaittom! Nug anuqa Galili gotte, ag Nug appa anidkkulag!’ aoya aiɗ. Antteɗ! Da aa amelahppa iikku ami!” awa aum.
8Engel anam a amu ah aɗit aa baɗapiɗ, amge maɗoɗppan gamag ahak okkainab ele dooya, moɗ uuya, nuhikkud ippunittak awak danab amelagppa akkulahnu qaiqaɗ gopiɗ. 9Aa anam ukkaeheh amu, antte! Jesus aa uɗalti teum. Nug ta amu Nug, “Buttua ena,” awa aum. Jesus anam a amu aa Nug gukkuidya waya, baeg aɗaya, aa dup noa binag mak hepiɗ. 10Aa anam heeh amu, Jesus Nug aa amelahppa aum. “Aa aib baɗapiɗ! Aa goya, da lailadnab amelagppa apeɗ doona, ag Galili gona, appa da aniɗeg!” awa aum.
Daup ag keeke anidppignu aeg, ikki danab dooppig
11Aria, ah aɗit ukkaeheh, ban danab laala ag Jerusalem nona, ag keeke aɗi aɗi beum amu oh mana mettak danab okkai amelagppa appig. 12Amelagppa aeg, mana mettak danab okkai amu Juda dilag ikki danab ele ag qagmena, nai mattin amu ban danab men doɗo okkai mattana appig. 13“Ag, ‘Ig niiutut, nuhikkud ippunittak awak danab tuqan uɗin, Nug gaɗa yab aoppig,’ aon aig! 14Aria, gawana nug nai amu doya heeb amu, ig nug amegppa imunu akkunig amunu, ag uug laa ii anidmana,” aon appig. 15Anam aeg amu ban danab ag men doɗo aona, ag mana mettak ikki danab ag aɗi hekkulagnu appig amu, ag anamib heppig. Anam heeg amu, nai amu Juda danab kuɗum doon malaeg uɗie, gemu ele maditteb.
Jesus Nug ippunittak awak danab uɗat mattom
16Aria, ippunittak awak danab 11 ag Galili appa qauko laappa Jesus gokkulagnu aum amu, ag amuppa goppig. 17Gona, appa ag Nug anidna, Nug noobppa dup nona binag meppig, amge laala ag oolagppa dabmak aɗit ele dayom. 18Anam heegeg, Jesus Nug ag gumatta doa, amelagppa aum. “Kayak Nug da keeke oh wanppanu, habppanu ele ikkilag daakkulnu meiɗom 19amunu, ag gowona, wan atu ohppanu danab ah heppeg, dahilad ippunittak awak danab ah daappeg, ag Mama onigppa, Nug Bekka onigppa, amu Kayak Ouɗi onigppa layatteg! 20Ag keeke oh da ag amelagppa haknunab ami amu, ag amu oh ele ippuanatteg! Ag doyeg! Da haen oh ag ele daapput ukkeb, gog tak haenppa batakku,” awa aum.
നിലവിൽ തിരഞ്ഞെടുത്തിരിക്കുന്നു:
Matyu 28: NB
ഹൈലൈറ്റ് ചെയ്യുക
പകർത്തുക
താരതമ്യം
പങ്ക് വെക്കു
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© (Active), Wycliffe Bible Translators, Inc. All rights reserved.
