Matyu 15
15
Kayak nai nug alai aɗi dilag ɗo eɗidtte
1Aria, amu dimppa ɗo mehuqak danab laa amu ɗo gumak danab-Parasia laala ele ag Jerusalemnu ahan, Jesus gumidna uɗin appig. 2“Aɗinu nahipad ippunittak awak danab ag alai aɗi anukka ɗo meppig niitte amu ag tippaltteb? Ag ee lakkulagnu hena amu, ag eppelag, ɗo atte amubia ag ii ihatteb,” aon appig. 3Ag anam aeg amu, Jesus Nug eɗua amelagppa aum. “Aɗinu ag alai aɗi anukka ɗo meppig niitte dim lamidnana, amu ag Kayaknu ɗo tippaltteb? 4Kayak Nug ɗo inam ma aum. ‘Na mamen, anin ele binalah mate!’ Amu Nug inam ele aum. ‘Danab nug anig, o mameg eheɗ laa aokkunu anak waappa daakkunu akku dayeb amu, ag qeppeg mauhaɗ!’ 5Moses nug anam aum, amge ag inam atteb. ‘Danab laa nug men doɗo laa, anig mameg ehanatkkunu ele amge nug aa amelahppa, “Da men doɗo imu matakkulnu elele iitta. Da Kayaknu tituana metta, nuhig daakkunu hamu mettaknu tituanmi,” akku dayeb amu, 6nug men doɗo amuppa anig mameg ele binalah matakkunu ii ehanatma.’ Ag anam henana ag, ag alalkad aɗi dilag ɗonu anuqak doon dim lamidtteb, amu amuppa Kayaknu nai am hamu bia daatte. 7Ag hambuppuak danab! Propet Aisaia nug ahilagnu tutukkunab aakku anukka propet nai ana, inam mattiom. 8‘Danab ah imu ag oɗelagppan nai mattiakppa da gumiɗna uɗitteb, amge ag oolag da ii meɗatteb. 9Ag dup nona binal metteb, amge ag kobol genab dim lamidna ii hetteb. Iitta. Ag danab dilag dabmakppaib, amu ag danab dilag ɗoppaib amu hetteb,’ awa yom.” Jesus Nug anam aum.
Keeke nau danab heeg, oppiak ii daatteb
10Jesus anam ana amu, Nug danab ah kuɗum appa daappig gumidna gokkulagnu e, ag ukkaeg Nug ag amelagppa aum. “Ag imu daulagppa doon, nai diig tutukku doyeg! 11Keeke dimittimnu danab ooppa notte ele, keeke amu danab oo dubuttid ii medatte. Iitta! Keeke nau danabnu dabmakppa lokkumak dayaya, nai oɗeppanu dimittim bette amuam he, danab oo am dubuttid ele daatte,” awa aum.
12Haen amuppa nuhikkud ippunittak awak danab ag Jesus gumidna dona appig. “Ɗo gumak danab-Parasia ag nai amu doon, oolag nauhom amu na doottemte?” aon appig. 13Ag anam aeg amu, Jesus Nug nob ma aum. “Da Mamel, Nug hab aabppa daatte amu, Nug dad ele. Am keeke oh Nug ii eppom am geha Nug diɗi ele oh kakeɗiadkku. 14Amubia amu ɗo gumak danab-Parasia, ahilag ippunittak am iitta mekku amunu, ag ahilagnu aib uug aqom. Ɗo gumak danab-Parasia ag danab ah omaladtteb, amge ag amelag gaɗuom. Am ameg gaɗuak laa, nug laa, nug ele ameg gaɗuak ele, nug ib ippunitteb amu, aa oh moɗppa neya qekkulah,” awa aum.
15Jesus anam a amu, Pita Nug oɗeppa awa aum. “Na keeke danab ag dootteb ii dootteb ele ouaqatna ippunadnana mattime, amu diig mehuqppe dootu!” awa aum. 16A amu Jesus Nug aum. “Ag am danab laala ag am dabmak iitta biate amunu, ag nai amunu diig ii dootteb? 17Dimittimnu keeke, danab latte ele amu, nug danabnu dabmak abenppa ii gotte. Iitta. Nug danab biigppa ukke, nug biie gotte. 18Amge keeke nau oh danabnu dabmakppa dayaya, oɗeppa dimittim bette ele amu, amuppa danab nug oo dubuttid ele daatte. 19Kobol eheɗ imu oh dabmakppanu bette; dabmak eheɗ, danab qe mauhak kobol, ewau pakkua gappai hak kobol, gappai hak kobol digdig laa, yabhok kobol, nai genab iitta anak kobol, baeg qak kobol ele, 20keeke amu oh amu ag heeg, danab nug oo dubuttid ele daatte, amge danab laa nug eppeg ii ihowa ee latte amu, nug oo dubuttid ele ii daatte,” awa aum.
Kanan ah laa Jesusnu ooppa genab doyom
21Jesus Nug anam ana, Nug aab amu uua aha ukka, Tair, Saidon dilah wan atu, appa ukkom. 22Nug ukka te, Kanan buɗubppanu ah laa nug appa dayom, nug Jesus onigppa ewa, inam aum. “Naɗi, na Dawit bekka, na dahilnu oot gai-iitta doon oot meɗan da ehaniɗkkutnu oɗ medattem! Ouɗi nau nug nid ahin dahil he nauhom,” awa aum. 23Ah nug anam aum, amge Jesus Nug oɗeppa nakok laa ii awom. Oɗeppa nakok laa ii awe, nuhikkud ippunittak awak danab ag Jesus gumidna dona appig. “Ah imu nug ewawa, ig dim lamigttede! Na heppe ukkaɗ!” aon appig. 24Ag anam aeg amu, Jesus Nug aum. “Israel padal meppig, amu dilagnuib Kayak Nug he, da uɗimi,” awa aum. 25Jesus Nug anam a amu, ah nug uɗia, Jesus noobppa gateg qaun o, “Naɗi na da ehaniɗkkutnu oɗ medattem!” awa aum. 26Ah nug anam a amu, Jesus nug oɗeppa awa aum. “Ig nid naunau dilag bret aot, qai mattagnignu am kobol ena iitta,” awa aum. 27Nug anam aum, amge ah nug aum. “O Naɗi, na attem am genab, ge qai ag mamelkad dilag bret huppu balalppanu na qette am aon latteb,” awa aum. 28Anam a amu Jesus nug oɗeppa awa aum. “Ah, nahip ooppa genab doyak am okkainab! Keeke na oot aum, nahip-ppa anam bekku,” awa aum. Jesus Nug anam a amu, aam ameg amuppaib nid ahin nuhig eɗua ena dayom.
Jesus danab 4,000 ee mattom
29Aria, Jesus Nug aab amu uua, Galili le ihi matta ukka, qauko laappa nakok ta, heɗep na dayom. 30Appa dayeye, danab ah huanak ag danab baelag nau autaut oitteb, amelag gaɗuak, ebehilag kaliak, oɗetup amu oɗe danab laala kuɗum ele, ag amu oh omaladna uɗin, Nug baegppa maatteg, bappalattom. 31Bappalatte, danab ah ag anam anidna, dabmak kuɗum aoppig. Aɗinu? Danab ah oɗetup ele, ag nai madippig, laa ag ebehilag kaliak ele, ag ena daappig, laa baelag nau autaut oippig ele, ag ena oippig, laa amelag gaɗuak ele, ag neegppig. Ena daappig amunu, ag Israel dilag Kayak binag meppig.
32Danab ah ag anam heeg amu, Jesus Nug nuhikkud ippunittak awak danab onilagppa e doeg, ag amelagppa aum. “Da danab ah imu oh dilag ool bodoetta le mette. Ag dahilppa uɗieg, ig deɗ ewam imu aakku daamut. Ag ee oh laeg iitta me, gemu ag ee iitta. Da heppi, ag enug gokkulagnu ool ii daatte. Aɗinu? Da ee ii matten heppi, ag enug aqebeb gonana, ib manppa ag amelag qittineb, nena qekkulagtai,” awa aum. 33Jesus anam a amu, ippunittak awak danab ag Nug amegppa appig. “Laih ippa amu danab ag ii daatteb amunu, ig adeppanu bret kuɗum, danab ah kuɗum imu dilag elele aopput, ag elele lappeg, oolag didikku?” aon appig. 34Ag anam aeg, Jesus ag oɗ mattom. “Ag bret kunum gane ele?” awa aum. Awa a amu ag appig. “Bret kunum eblaih aɗit ele, amu kakai naunau laippu laippu ele daatteb,” aon appig. 35Ag anam aeg, Jesus Nug danab ah kuɗum oh ag wanppa heɗep nena daaglagnu a, ag aakku daappig. 36Ag anam daaegeg, Jesus Nug bret kunum eblaih aɗit ele, amu kakai ele diia, Kayak amegppa, “Ena hen mekkame,” awowa, pane ne, nuhikkud ippunittak awak danab mattom. Matte, ippunittak awak danab ag danab ah madappig. 37Mattaeg, ag oh laeg, oolag dittiom. Danab ah ag oolag dittie, ee big dayom amu ippunittak awak danab ag aon inaeg, kaleg eblaih aɗit ambeum. 38Danab ee lappig ele amu, ahilag ebqak am 4,000. Ah nid naunau ele amu ebqak amu ooppa ii daatteb. Danabib ebaqappig. 39Jesus Nug danab ah kuɗum amu he ukkaegeg, Nug uub attan ta, Magadannu wan atuppa ukkom.
നിലവിൽ തിരഞ്ഞെടുത്തിരിക്കുന്നു:
Matyu 15: NB
ഹൈലൈറ്റ് ചെയ്യുക
പകർത്തുക
താരതമ്യം
പങ്ക് വെക്കു
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© (Active), Wycliffe Bible Translators, Inc. All rights reserved.
