Mako 15

Jesu unozhisiwa mbeli kwa Pilato

(Matewu 27:1-2, 11-14; Luke 23:1-5; Johani 18:28-38)

1Kwakati zhuba liyedza, bapirisiti bakulu ne bakulu ne badiyi be nlayo bakashangana ne makulukota wose, bakalebesana, ngono bakasunga Jesu nge mitjili bakayenda naye kuna Pilato. 2Pilato kaswika kambhuzwa kati, “Ndiwe Mambo we Bajuta?”

Jesu kanshandula kati, “Waleba.”

3Bapirisiti bakatangisa kuntilika milandu minjinji. 4Pilato kambhuzwa kakale kati, “Apa auna tjaungaleba kene? Autohwa kuti banokutilika milandu mingapani?”

5Koga Jesu kasitongo dwilila nge kubadabila, Pilato katjenama.

Pilato unolaula kuti Jesu abulawe

(Matewu 27:15-26; Luke 23:13-25; Johani 18:39—19:16)

6Ngwenu bathu bakabe bakawolobela kuti nge Nzano we Kupinda pezhugwi Pilato abasunungulile nthu ng'ompela, wabanobe bakumbila. 7Ngono nge tjibaka itjetjo, kwakabe kuna mmwe nlume wakabe edang'wa Bharabhasi ali pakati kwe basungwa mu ng'umba ye basungwa nge nlandu we kubulaya mu nsi we kupanduka. 8Mbunga we bathu ukazha kuna Pilato kuwonkumbila kuti abathamile sekwa agala ebathamila. 9Kabashandula eti, “Moshaka kuti ndimusunungulile Mambo we Bajuta kene?” 10Wakabe abona kuti bapirisiti bakulu bazhisa Jesu kunli ngobe bana fupa.

11Koga bapirisiti bakulu bakabe bafulila bathu kale kuti, bakumbile Bharabhasi mu bumo gwa Jesu. 12Pilato kababhuzwa kakale kati, “Ngono ndithameni ngekwe nlume iwoyu, wamunoti, ‘Ndi Mambo we Bajuta?’ ”

13Bathu bakamimila beti, “Mumbambule.”

14Pilato kapapha kabhuzwa eti, “Nge kutini, wathama bubi gupi?”

Koga bunji gukadwilila guti, “Mumbambule.”

15Ndizo Pilato kasunungula Bharabhasi, ngobe wakabe eshaka shathisa bathu. Kudwapo kati Jesu alobgwe, shule kwa ikoko kampitshila ku Bajuta kuti bambambule mu tjileyanyo.

Babhayani ba Pilato banodadila Jesu

(Matewu 27:27-31; Johani 19:2-3)

16Kudwapo Jesu wakatogwa nge babhayani bakangina naye mu ng'umba ye nlauli, bakadanana bose. 17Bakatola hazu ye mbala nshaba wakabondelela, bakanfukidza, bakanlukila tjiala tje mihwa, bakambadza itjo. 18Bakatangisa kun'dumilisa beti, “Ngakukudziwe Mambo we Bajuta.” 19Bakanloba mu nsholo nge lushanga, benthwila mate. Bakathigama mbeli kukwe se banonteta. 20Bakati bepedza kun'dadila, bakambula hazu shaba bakambadza zwiambalo zwizwe. Bakabe bentungamilila kwabanonombambulila.

Jesu unobambugwa

(Matewu 27:32-44; Luke 23:26-43; Johani 19:17-27)

21 # Baroma 16:13 Bakati bali mu zila benombambula, bakashangana ne mmwe nlume wakabe edang'wa Simoni we ku shango inoyi Sirene, eswika edwa kwaakabe edwa bakankombeledza kusenga tjileyanyo tja Jesu. Wakabe ali tate ba Alekizanda na Rufu. 22Bakayenda bakanoswikisa Jesu pathu panodang'wa Gologota, kunodwa kuti pathu pe ipepe tje nsholo. 23Ngono bakampa nkumbi wakashanganyiwa ne nti unodang'wa mira, koga Jesu kaulamba. 24#Njimbo 22:18Bakambambula mu tjileyanyo, bekobana zwiambalo zwizwe, bekandila kubona kuti ndiani unotola tjipi. 25Bakambambula nge tjibaka tje zhanalume mangwanana. 26Nlandu wa Jesu wakabe wakakwagwa kuyi, “MAMBO WE BAJUTA.” 27#Isaya 53:12Zwigebeng'a zwibili zwakabambugwa naye, mmwe ku luboko gwe luji, mmwe kuna gwe lumeshwe. [28Hwalo dzikazhadzisika dzinoti, “Wakabaligwanyiwa ne batjinyi.”]#15:28: Hwalo njinji dza ntolo dze Bhaibhili adzina ndimana iyeyi.

29 # Njimbo 22:7; 109:25; Mako 14:58; Johani 2:19 Kwakati ne bakabe bepinda napo bakan'gongobola, bedzungudza misholo bentuka beti, “Iwe unokolomodza ng'umba ye Ndzimu ukabuya ukayibaka kakale mu mazhuba ali matatu, 30tjizwitjidza ngono, udeluke mu tjileyanyo!”

31Bapirisiti ne badiyi be nlayo bakan'dadilabo beti, “Wakatjidza bamwe, aatotubula kuzwitjidza. 32Mesiya, Mambo we Iziraela ngaadeluke mu tjileyanyo, kuti ndizo tibone, tigalemoyo.”

Ngono na ibabo bakabe bakabambugwa naye bakankayikanya.

Lufu gwa Jesu

(Matewu 27:45-56; Luke 23:44-49; Johani 19:28-30)

33Kwakati nge tjibaka tje masikati makulu, kukabe ne zhalima gulu mu shango yose, kukadzina kukanoti nge tjibaka tje butatu mu matewuko. 34#Njimbo 22:1Ipapo Jesu kamilidza hwi kadana eti, “Eloi, Eloi lama sabakatani?” Kunodwa kuti, “Ndzimu wangu, Ndzimu wangu, mandisiyilani kene?”

35Bamwe bathu bakabe bakalingilila bakati behwa eijalo bakati, “Hwililani, unodana Elija.” 36#Njimbo 69:21Mmwe wabo kalabuka kadubika lungudze mu nkumbi wakatyorowa, kagubhayila mu lukombo kayisa ku nlomo wa Jesu, kati ku bamwe, “Imani tibone kene Elija unowozha kuwontulula.”

37Ipapo Jesu kalilila pezhugwi kabe epela.

38 # Kufuluka 26:31-33 Nge tjibaka itjetjo tjisitili tje ng'umba ye Ndzimu tjikapaluka pakati, kudwa pezhugwi kunoti pasi. 39Nlauli we babhayani bali zana wakabe ali mile akalingisana na Jesu, ebona Jesu epela kati, “Tjoselele iwoyu nlume wabe ali Nkololo we Ndzimu.”

40 # Luke 8:2, 3 Kwakabe kuna bamwe bakadzi bali mile thambgwana bakalingilila kose ikoku. Bamwe babo bakabe bali Mariya we Magadala na Mariya, mme ba Jakubo ntjetjana na Josefa, bana Salome. 41Bakabe bazha na Jesu kudwa ku ntuthu we Galili, bembhatsha. Kwakabe kuna bamwe bakadzi banjinji bakabe bazha na Jesu ku Jerusalema.

Mbiganyo ya Jesu

(Matewu 27:57-61; Luke 23:50-56; Johani 19:38-42)

42Kwakati madekwana eswika, iko kuli Zhuba le Kululwamisila le Sabata, lili zhuba linotobela le Sabata, 43Josefa we ku Arimateya ali mmwe bathu bakabe bana mamo mu makulukota wakabe agala abe akalindila bushe gwe Ndzimu, kasimisamoyo kayenda kuna Pilato kunokumbila itumbu tja Jesu. 44Ngono Pilato katjenama kuti Jesu wafa kale, kadana nlauli we babhayani bali zana kuti ambhuzwe kene Jesu ungabe afa kale. 45Wakati ehwa nge nlauli we babhayani kuti Jesu wafa, kasunungulila itumbu Josefa kuti atjitole. 46Josefa kamilika kayenda kanotenga jila, kazha katulula itumbu tja Jesu, katjipetela kanotjibiganya mu ikumbu tjakatshiwa mu shongwe. Kakunguludzila shongwe pa nkoba we ikumbu kuti azhalile. 47Mariya we Magadala na Mariya mme ba Josefa bakabona pabiganyiwa Jesu.

നിലവിൽ തിരഞ്ഞെടുത്തിരിക്കുന്നു:

Mako 15: KBTP

ഹൈലൈറ്റ് ചെയ്യുക

പകർത്തുക

താരതമ്യം

പങ്ക് വെക്കു