Romê-na 12
12
TITA HI KRETIYÊNID’A
(2.1—15.13)
He tad’a mAlona á lum tam djivid’id’a
1B’oziyona, d’igi Alona mi tagei we hohou mamba na, an nga ni tchenegiya, agi hagi tagi mAlona d’igi vama ngat buzu ma ari ma agi tinim iram vam á lAlona tam djivid’ina na. Wana ni kud’or magi d’a gagazid’a avok Alona. 2Ar agi mbud’ugi tagi d’igi suma kur duniya d’a wandina na d’i, wani ar Alona mi mbud’ugi djib’er magid’a memet. Hina wani, agi mba wagi minda hAlonid’a ala wana ni vama djivi ma lum tam djivid’a ma ndak memetna.
3Kayam he d’a hawa d’a Alona mi handjï kur djivi mambid’a ba, an nga ni de mi nge nge pî adigagiya, ar sa djib’er ala mam kal suma hiuna d’i. Wani ar mi djib’erî djib’er ra irat ta ndak ata he gagazi d’a Alona mi b’rawat mi suma tutu peta. 4Ei nga ki ir hliu tad’a ablaud’a kur hliu ma tuna, wani sun mazid’a nga ni tu d’i. 5Ei ni hina mi. Le ei nablaud’a pî, ei ni hliu ma tuna zlapa tu ki Christ. Ei pet zlabei ata tei tu d’igi ir hliuna teteng kur hliu ma tuna na mi. 6Wani ei nga ki he d’a hawad’a teteng d’igi Alona mi heizi hawa na. Le sana adigei mi nga ki he d’a hawad’a á djok vun Alona ni, ar mi le hina kur ad’enga hi he gagazi mambid’a. 7Le ma dingâ mi nga ki he d’a hawad’a á le sunda mi Toka ni, ar mi lad’u. Le sana mi nga ki he d’a hawad’a á hat suma ni, ar mi had’aziya. 8Le ná giget suma ni, ar mi gigid’eziya. Sama hahle mam suma djivina mi suma hiuna, ar mi hazizi ki hur ma tuna. Sama avok suma hiuna kur Tokina, ar mi le sun mamba ki zlezleûd’a. Sama ndjun suma hohoud’ina, ar mi ndjunuzi ki furîd’a mi.
9Ar o magid’a ti ka’î od’a bei lop ira. Ar agi noyôgi tchod’a woyo, ar agi vagi ahle suma djivina ad’enga. 10Ar agi lagi yam tagi d’igi b’oziyo tagi na. Ar agi lagi ad’u tagi mi. 11Ar agi lagi azulomba kur sun nda led’a d’i. Ar agi lagi sunda mi Salad’a ni ki zlezleûd’a. 12Ar agi lagi furîd’a yam hur magi ma tinda. Ar agi vagi tagi kur ndaka. Ar agi tchenegi Alona bei ara ba. 13Ar agi ndjunugi b’oziyogi suma a nga kur kid’akina. Ar agi lagi akoina ki furîd’a.
14Ar agi tchenegi Alona ala mi b’e vunam yam suma a nga djobogi vunagina. Ar agi tchenem ala mi b’e vunam kaziya, mi gazi vuna d’i. 15Ar agi lagi furîd’a ki suma a nga le furîd’ina. Ar agi tchigi ki suma a nga tchina mi. 16Ar agi kagagi ki djib’er ra tud’a aduk tagiya. Ar agi suburugi tagi d’i, wani ar agi tid’igi ni ki suma lulumana. Ar agi gologi tagi d’igi suma ned’a na d’i.
17Le sana mi lagi tchod’a ni, agi hulong lum tchod’a d’i. Ar agi halagi á lahle suma djivina avok suma pet. 18Le agi ndagagiya ni, agi kagagi ki b’leng nga halasa ki suma pet. 19Buniyôn suma od’a, sagi atchugulugi d’i, wani aragi ayîna hAlonina mi le sun mamba. Kayam Ma didina mi dala: Atchugul la sad’a ni manda; ni an ba, mba ni sad’u. 20Wani d’igi mbaktumba hAlonid’a ti de na ala: Le mang ma djangûna meid’a nga d’i tchumu ni, ang hum tena mi te; le vunam mi so ni, ang hum mbina mi tche mi. Hina wani, ni d’igi ang togomî gordjona kam na. 21Ar tchod’a ti kuzugi d’i, wani agi kuzugi tchod’a ki djivi d’a led’a.
നിലവിൽ തിരഞ്ഞെടുത്തിരിക്കുന്നു:
Romê-na 12: BA
ഹൈലൈറ്റ് ചെയ്യുക
പങ്ക് വെക്കു
താരതമ്യം
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Azumeina Bible © Alliance Biblique du Tchad, 1999.
