Mututo 32
32
Namani ya gauda
(Mul 9.6-29)
1 #
Lik 7.40
Batu ha ba bona kuli Mushe n'a inzi nako ye telele fa lilundu a sa kuti, ba t'o kubukana ku Aruni, mi ba li ku yena, “Taha, u lu ezeze mulimu ya ka lu etelela, kakuli ha lu zibi se si tahezi Mushe, mutu yo ya lu zwisize mwa Egepita.”
2Aruni a li ku bona, “Mu zwise maseka a gauda a kwa lizebe za basali ba mina ni bana ba mina ba bashimani ni ba basizana, mu ni tiseze ona.” 3Cwale batu kaufela ba zwisa maseka a bona a gauda kwa lizebe, mi ba a tisa ku Aruni. 4#1 Male 12.28; Lik 7.41 Kih'a nga maseka ao, a' shengunukisa mi a sululela gauda mwa sibupelo, a eza namani.
Batu ba li, “Maisilaele, mulimu wa Isilaele ki yo, ya mi zwisize mwa Egepita.”
5Aruni h'a bona cwalo, a yaha katala fapil'a namani ya gauda. Kihona a zibisa batu, a li, “Kamuso ku ta ba ni mukiti wa ku hupula Muñ'a Bupilo.” 6#1 Bakor 10.7 Habusa kakusasa, ba eza litabelo za ku cisa, mi ba tisa limunanu za mpo ya buitumelo. Batu ba ina fafasi, ba ca, ba nwa, mi cwale ba yema ba bina.
7Muñ'a Bupilo a li ku Mushe, “Akufa, u shetumuke kapili, kakuli batu ba hao, b'o etelezi ku ba zwisa mwa Egepita, ba itompolozi. 8Ki kale ba zwa mwa nzila ye ni ba laezi kuli ba zamaye ka yona. Ba se ba ikezelize namani ye shengunukisizwe, ya gauda, mane se ba i lapela ni ku i ezeza litabelo. Ba ize, ‘Maisilaele, mulimu wa mina ki yo, ya mi zwisize mwa Egepita.’ ” 9Muñ'a Bupilo a li ku Mushe, “Ni ziba batu ba. Ba na ni mahañi. 10Mu ni siye! Ni ta ba bulaya ka buhali bo bu cisa sina mulilo. Ku zwa fo, ni ta ku eza sicaba se situna, wena ni lusika lwa hao.”
11 #
Lipa 14.13-19
Kono Mushe a lapela hahulu Muñ'a Bupilo, Mulimu wa hae, a li, “Muñ'a Bupilo, kikabakalañi ha u ka nyemela cwalo batu ba hao, b'o zwisize mwa Egepita ka maata a matuna-tuna? 12Ku ka ba cwañi Maegepita ha ba ka itumba, ba li, ‘U ba zwisize mwa Egepita ka mulelo o maswe wa ku y'o ba bulaela mwa malundu, ku y'o ba yundiseleza.’ Itetulule mwa bunyemi bwa hao, u kutise pilu ya hao, mi u si ke wa sinya sicaba sa hao. 13#Sim 22.16-17; 17.8 U hupule batanga ba hao Abrahama, Isaka ni Isilaele, ni m'o n'o ba sepiselize, mane wa ba wa ikonka ka libizo la hao, wa li ku bona, ‘Ni ta mi fa masika a mañata. Baikulu ba mina ba ta swana sina linaleli za kwahalimu. Naha ye kaufela, ye ni mi sepisize, ni ta i fa bana ba bana ba mina. I ta ba ya bona kuya kuile.’ ” 14Kamukwaocwalo Muñ'a Bupilo a kutisa pilu ya hae, mi h'a si ka eza ka mw'a n'a hupulezi pili.
15Mushe kih'a nanuha, mi a shetumuka fa lilundu, a nz'a lwezi matapa a mabeli a kupuzo, a n'a ñozi kafa ni kafa. 16I n'e li musebezi wa Mulimu, ni muñolo o n'o ñozwi fateñi n'e li muñolo wa Mulimu, o n'o cakuzwi fa matapa fo.
17Joshua a utwa batu ha ba nze ba huwa. Kiha s'a li ku Mushe, “Ni utwa lilata la ndwa mwa mafulo.”
18Mushe a li, “Wo ha si mulumo wa pina ya ku tula, kamba mulumo wa sililo sa ku tulwa. Ki mulumo wa lipina za ku bina o ni utwa.”
19Mushe ha s'a sutelezi kwa mafulo kuli mane a bone namani ni batu ba ba bina, a nyema hahulu. A latela fafasi matapa a n'a lwezi, mi a' tubehela kwa njetumuko ya lilundu. 20A nga namani ye ne ba ezize, a i cisa, a i sila-sila, mane ya ba bupi bo bu nekile. Kiha s'a hasa bupi bo mwa mezi, mi a nwisa sicaba sa Isilaele mezi ao. 21A li ku Aruni, “Batu ba, ba ku ezize cwañi kuli u ba kenye mwa sibi se si maswe cwana?”
22Aruni a alaba, a li, “U si ke wa ni nyemela, muñ'a ka. Wa ziba toho-tata ya batu ba ha ba kena mwa bumaswe. 23Ba ize ku na, ‘U lu ezeze mulimu o ka lu etelela, kakuli ha lu zibi se si tahezi Mushe, mutu yo ya lu zwisize mwa Egepita.’ 24Ni ba buzize, na li, ‘Ya na ni gauda ki mañi?’ Ba ba ne ba na ni mikabo ya gauda ba i zwisa, mi ba ni fa yona. Kiha ni i nepela mwa mulilo, mi kwa zwa namani ye.”
25Mushe a bona kuli sicaba ne si se si eza mufili-fili, kakuli Aruni n'a s'a si lukululezi ku kena mwa bulapeli bwa sihedeni, niha ne ba li mwa kozi ya ku potolohiwa ki lila za bona. 26Cwale Mushe a t'o yema kwa munyako wa mafulo, mi a huweleza, a li, “Ya li wa Mulena ki mañi? A tahe ku na!” Malivi kamukana ba t'o kubukana ku yena. 27Mushe a li ku bona, “S'a bulela Muñ'a Bupilo Mulimu wa Isilaele ki se, u li, ‘Yo muñwi ni yo muñwi wa mina a nge sabule ya hae. Mu kene mwa mafulo ku kalela hona fa munyako wo, mane ku y'o fita ku wa mwabuse bwa mafulo. Mu bulaye banabahabo mina, balikani ba mina, ni be mu bapani ni bona.’ ” 28Malivi ba eza ka mw'a n'a laelezi Mushe, mi ka lona lizazi leo kwa bulaiwa batu ba ba ne ba bata ku eza likiti ze talu. 29Mushe a li kwa Malivi, “Kacenu mu ipeile mwa ku sebeleza Muñ'a Bupilo mu li baprisita ka ku bulaya bana ba mina ni bahulwani ba mina. Kacenu, Muñ'a Bupilo u mi file limbuyoti za hae.”
30Habusa Mushe a li kwa sicaba, “Mu ezize sibi se si maswe. Kono cwale, ni ta kambama fa lilundu, ni ye ku Muñ'a Bupilo. Mwendi ni ka mi fumanela swalelo ya sibi sa mina.” 31Mushe a kutela ku Muñ'a Bupilo, mi a li, “Oho! Sicaba se, si ezize sibi se situna cwañi! Ba ikezelize mulimu wa gauda. 32#Lipi 69.28; Sin 3.5 Nihakulicwalo, na ku lapela, Muñ'a ka, u ba swalele sibi sa bona. Ha ku sa konahali, u takule libizo la ka mwa buka y'o s'o ñozi.”
33Muñ'a Bupilo a li ku Mushe, “Ki feela libizo la ya ni foselize le ni ta zwisa mwa buka ya ka. 34Cwalehe zamaya, u y'o isa sicaba kwa sibaka se ni ku bulelezi. U hupule kuli lingeloi la ka li ta ku etelela, kono lizazi li ta ba teñi, leo ni ta ba fa mulatu ka sibi sa bona.”
35Muñ'a Bupilo a kenyeza batu butuku, kakuli ne ba hapelelize Aruni ku eza namani.
നിലവിൽ തിരഞ്ഞെടുത്തിരിക്കുന്നു:
Mututo 32: Lozi09
ഹൈലൈറ്റ് ചെയ്യുക
പകർത്തുക
താരതമ്യം
പങ്ക് വെക്കു
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Lozi Interconfessional Bible, Catholic Edition © Bible Society of Zambia, 2009.
