Mateo 8

Jix Waꞌxi Can Scꞌul Jun Winaj Yaꞌey Yu Lepra Yu Naj Jesús

(Marcos 1:40-45; Lucas 5:12-16)

1Jaꞌ yet jix paxeytej Jesús bꞌey jun wonan tuꞌ xin, ecꞌal ebꞌ ánima jix tzajlo yintaj Naj. 2Ey jun winaj caw yaꞌey sicꞌlebꞌil yu jun yaꞌbꞌil chi yij lepra,* jun chi kꞌaꞌtoj ánima yu. Jaꞌ jun winaj tuꞌ, jix apni scꞌatan Jesús, catuꞌ jix ey kaan sattaj Naj, catuꞌ jix yalon jaxca tiꞌ:

—Mamin, ta chi yal ja cꞌul, chi skeꞌ ja wakꞌon can waꞌxoj jin cꞌul an, ẍi naj tet Jesús. 3Catuꞌ jix sbꞌatxbꞌan oc skꞌabꞌ Naj Jesús yibꞌan naj, catuꞌ jix yalon jaxca tiꞌ:

—Chi yal jin cꞌul. Tol chi wakꞌcan waꞌxoj ja cꞌul, ẍi Jesús tet naj. Yet xacꞌal jun txolan tuꞌ jix waꞌxi can scꞌul naj yu Jesús. 4Catuꞌ jix yalon Jesús tet naj jaxca tiꞌ:

—Manche ja wal tet ánima. Asiꞌ, txꞌox ja bꞌa tet junoj naj yakꞌomal xaambꞌal tet Dios. Catuꞌ cha wakꞌon can ja xaambꞌal tuꞌ tet Dios jaxca yalon sley Moisés* yet watxꞌ chi il-le yu conobꞌ tol jix waꞌxi can ja cꞌul, ẍi Jesús tet naj.

Jix Waꞌxi Can Scꞌul Naj Smooso Jun Naj Capitán Yu Naj Jesús

(Lucas 7:1-10)

5Jaꞌ yet jix apni Jesús bꞌey conobꞌ Capernaúm, jix apni jun capitán scꞌatan Naj, catuꞌ jix oc tean yin Naj. 6Jix yalon naj jaxca tiꞌ:

—Mamin, jaꞌ jun jin mooso eyecꞌ wetoj bꞌey jin na tiꞌ, jix too telan sat txꞌat. Sicbꞌinaj el smimanil. Caw chi chiꞌwa yul-laj smimanil chi yabꞌe, ẍi naj tet Jesús. 7Jix yalon Jesús tuꞌ tet naj jaxca tiꞌ:

—Oj jin toj xin, catuꞌ oj toj wakꞌon can waꞌxoj scꞌul, ẍi Jesús tet naj capitán tuꞌ. 8Jal naj capitán tuꞌ, jix takꞌwi tet Jesús jaxca tiꞌ:

—Mamin, man jin moo oj chach oc yul jin na an. Asanne ojabꞌ tol chach kꞌanabꞌtoj titiꞌ, catuꞌ oj waꞌxoj can scꞌul naj jin mooso tuꞌ an. 9Wotaj jun tiꞌ an, yutol jain tiꞌ, ey ebꞌ waawil chin chejoni. Jacꞌalaꞌ ey pax ebꞌ soldado chin chejaꞌ. Ta ey junoj mac chin chejaꞌ, chi cꞌal sjije stoi. Ta ey mac chi wawte, chi cꞌal sjije sjuli. Yetoj pax oj, ta ey tzet chin chej swaꞌne junoj jin mooso an, chi cꞌal sjije swaꞌneni, ẍi naj capitán tuꞌ tet Naj Jesús. 10Jaꞌ yet jix yilon Jesús tol caw chi yaoc scꞌul naj capitán tuꞌ yin, jix qꞌueya scꞌul, yuxan jix yal tet ebꞌ tzajan oc yintaj jaxca tiꞌ:

—Caw yel chi wal ey jex an, cꞌamto junoj wet a Israel jix wil yaon oc scꞌul yin Dios jaxca jun winaj tiꞌ. 11Chi walon pax ey jex, tol ecꞌal ebꞌ oj tit bꞌey masanil yul yibꞌankꞌinal tiꞌ, catuꞌ oj ey chotan ebꞌ low yetoj naj Abraham,#8:11 “Oj ey chotan ebꞌ low yetoj naj Abraham,” chi yal yeloc apnoj, tol oj oc ebꞌ yalan Yaawil Dios. yetoj naj Isaac, cꞌal yetoj naj Jacob bꞌey teꞌ smeẍa Naj a satcan. 12Jaꞌ ebꞌ Israel, smoo yoc ebꞌ bꞌey jun looꞌ tuꞌ, jal pax wanoj ebꞌ oj kꞌojle eltoj xol kꞌejkꞌinal bꞌey yin na tuꞌ xin,#8:12 “Xol kꞌejkꞌinal yin na,” chi yal yeloc apnoj, syaꞌilal cꞌal cuscꞌulal. bꞌey oj oc okꞌil cꞌal scꞌuxon ey yee ebꞌ yu yabꞌen syaꞌil, ẍi Jesús tet ebꞌ. 13Jix lawi yalon jun tuꞌ xin, catuꞌ jix yalon Jesús tet naj capitán tuꞌ jaxca tiꞌ:

—Tinaniꞌ, paxan bꞌey ja na, oj yun cꞌaltaꞌ tzet jix ja waoc yin ja cꞌul, ẍi Jesús tet naj.

Jix waꞌxi xacꞌal scꞌul jun smooso naj capitán tuꞌ yet jun txolan tuꞌ.

Jix Waꞌxi Can Scꞌul Ix Sniꞌ Naj Pedro Tuꞌ Yu Naj Jesús

(Marcos 1:29-31; Lucas 4:38-39)

14Jix too Naj Jesús bꞌey sna naj Pedro tuꞌ. Jaꞌ tituꞌ jix yiloni, tol telantoj ix sniꞌ naj Pedro tuꞌ yu jun kꞌakꞌal yaꞌbꞌil. 15Catuꞌ jix oc mitxꞌan Jesús tuꞌ yin skꞌabꞌ ix, jaꞌ yet tuꞌ, catuꞌ jix el jun kꞌakꞌal yaꞌbꞌil tuꞌ yin ix, catuꞌ jix a waan ix, catuꞌ jix cꞌoli yakꞌle servil ebꞌ yu ix.

Chi Waꞌxi Can Scꞌul Ecꞌal Ebꞌ Ánima Yu Jesús

(Marcos 1:32-34; Lucas 4:40-41)

16Jaxa yet yeycꞌualil xin, ecꞌal ebꞌ eyoc pena espíritu yin jix apni scꞌatan Naj Jesús. Asan chꞌan yu jun kꞌaneal jix elcan ebꞌ pena espíritu yin ebꞌ yu Naj Jesús tuꞌ. Jacꞌalaꞌ pax masanil ebꞌ ánima yaꞌey, jix waꞌxi cꞌal can scꞌul ebꞌ masanil yu Naj. 17Jix cꞌal yunen wan tzet jix el yunen Jesús tiꞌ xin, yet watxꞌ chi yun el tzet jix yal naj ẍejabꞌ Dios* chi yij Isaías yet tax peyxa, yet jix yalon naj jaxca tiꞌ: “Jaꞌ Naj jix iꞌon el cu yaꞌilal kin, catuꞌ jix yakꞌon jul cu cꞌul yin yal cꞌal tzet syaꞌilal chi cu ioni,” ẍi.

Jaꞌ Ebꞌ Chi Yoche Chi Tzajlo Yintaj Jesús

(Lucas 9:57-62)

18Jaꞌ yet jix yilon Jesús tol manxa ánima oj jix oc xacꞌal joyan yinlaj, jix yijbꞌan ecꞌtoj ebꞌ scuywom bꞌey junxa skꞌaxepal jaꞌ mar. 19Jaꞌ yet cꞌamto chi ecꞌtoj ebꞌ tuꞌ, jix apni jun cuywam yin sley Moisés* scꞌatan Naj, catuꞌ jix yalon naj jaxca tiꞌ:

—Mamin, yal cꞌal bꞌey oj jaach toj, oj jin toj ja wetoj an, ẍi naj tet Jesús. 20Catuꞌ jix yalon Jesús tet naj jaxca tiꞌ:

—Jaꞌ noꞌ waax ey snachꞌen noꞌ, cꞌal noꞌ tzꞌiquin, ey sweyubꞌ noꞌ. Jal jin jain tiꞌ, caxcꞌal Akꞌbꞌil Wopiso yu Dios xol ebꞌ ket animail an,* cꞌam niꞌoj jin na bꞌey chin weyi, ẍi Jesús tet naj. 21Jix yal pax junxa eyoc stzꞌajiloj ebꞌ scuywom tet Naj jaxca tiꞌ:

—Mamin, oj jin ecꞌ cꞌal cuywoj ja wintaj an. Asan xin, akꞌ niꞌojxa jin permiso an, chi woche chin mujcantoj jin mam an, ẍi naj tet Jesús. 22Catuꞌ jix yalon Jesús tuꞌ tet naj jaxca tiꞌ:

—Ocan cꞌal tzajan cuywoj wintaj an. Jaꞌ ebꞌ camnaj to el yul sat Dios, jaꞌ ebꞌ chi skeꞌ smujon can ebꞌ yet camnajil tuꞌ, ẍi Jesús tet naj.

Jun Miman Kaꞌeꞌ Cꞌal Jaꞌ Mar Jix Oc Tucan Yu Jesús

(Marcos 4:35-41; Lucas 8:22-25)

23Jix lawi jun tuꞌ xin, catuꞌ jix octoj Jesús yul barco catuꞌ jix oc pax toj ebꞌ scuywom yetoj. Catuꞌ jix kꞌaxbꞌon ebꞌ tuꞌ. 24Jaꞌ yet lalan sbꞌey ebꞌ yibꞌan jaꞌ tuꞌ, catuꞌ jix jul jun miman kaꞌeꞌ caw jow. Jix cꞌoli sbꞌilwi a sat jaꞌ, catuꞌ jix too jaꞌ yul teꞌ barco tuꞌ. Jal Naj Jesús tuꞌ xin, tol chi wey Naj. 25Catuꞌ jix tenle el sweyan Naj yu ebꞌ scuywom tuꞌ, jix yalon ebꞌ tet naj jaxca tiꞌ:

—Mamin, col jon, tol lalan cu paxey yich jaꞌ, ẍi ebꞌ tet Jesús.

26—¿Tzet yuxan caw chex xiwi? ¿Tzet yuxan cꞌam che yaoc je cꞌul yin Dios? ẍi Naj Jesús tet ebꞌ.

Jix lawi tuꞌ xin, catuꞌ jix a waan Jesús tuꞌ. Catuꞌ jix stenon oc tucan jun kaꞌeꞌ, cꞌal jaꞌ mar tuꞌ. Catuꞌ jix sjijen yoc tucan yu, tzꞌinini xacꞌal.

27—¿Tzet la ye jun winaj tiꞌ? yuxan chi yal tet kaꞌeꞌ yetoj jaꞌ mar, catuꞌ chi sjijen tet, ẍi ebꞌ.

Ebꞌ Cawan Winaj A Gadara Eyoc Pena Espíritu Yin

(Marcos 5:1-20; Lucas 8:26-39)

28Jix lawi jun tuꞌ xin, jix ecꞌ apnoj ebꞌ skꞌaxepal jaꞌ bꞌey jun lugar chi yij Gadara. Jix apni cawan winaj eyoc pena espíritu yin scꞌatan Naj Jesús tituꞌ. Speto ebꞌ bꞌey camposanto. Yel xacꞌal ey smey ebꞌ, yuxan cꞌam mac chi ecꞌ bꞌey jun bꞌe tuꞌ. 29Jaꞌ yet jix yilon yin Jesús ebꞌ, catuꞌ jix el yaw ebꞌ tuꞌ, jix yalon ebꞌ tet Jesús jaxca tiꞌ:

—Jaach Scꞌaal Dios, ¿tzet ja walon ja wet kin? ¿Tumi yin eyojto cꞌal catuꞌ chach jul yu jon ja waon oc yin syaꞌtajil? ẍi ebꞌ tet Jesús. 30Jaꞌ scawilal ebꞌ tuꞌ ey pax ecꞌ jun miman bꞌulan noꞌ txitam lalan sloꞌon cꞌultaj noꞌ. 31Yuxan jix yal ebꞌ pena espíritu tuꞌ tet Jesús jaxca tiꞌ:

—Ta chon ja wujte el yin ebꞌ ánima tiꞌ, jaꞌ yin noꞌ txitam tuꞌ chon ja wa can ocoj, ẍi ebꞌ tet Jesús.

32—Ocanwej yin noꞌ xin, ẍi Jesús tet ebꞌ.

Yuxan jix el ebꞌ yin ebꞌ ánima tuꞌ, catuꞌ jaꞌ yin noꞌ txitam tuꞌ jix oc can ebꞌ. Yuxan eyman jix too noꞌ yu ebꞌ. Jix skꞌojon el sbꞌa noꞌ masanil sat pacꞌan masantaꞌcꞌal jix ey apnoj noꞌ xol jaꞌ mar. Catuꞌ jix jiꞌwi eytoj masanil noꞌ xol jaꞌ tuꞌ, catuꞌ jix cam noꞌ. 33Jal ebꞌ yilomal noꞌ txitam tuꞌ xin, caw jix xiwa ebꞌ. Yuxan jix too ebꞌ yin eymanil bꞌey conobꞌ yu stoo yalon ebꞌ tzet jix yun noꞌ txitam tuꞌ, cꞌal yu ebꞌ jix elcan pena espíritu tuꞌ yin. 34Yuxan, masanil conobꞌ jix eltoj yilon Jesús tuꞌ, catuꞌ jix skꞌanon ebꞌ tet Jesús, tol chi sbꞌosel sbꞌa Naj yul sconobꞌ ebꞌ.

നിലവിൽ തിരഞ്ഞെടുത്തിരിക്കുന്നു:

Mateo 8: knj

ഹൈലൈറ്റ് ചെയ്യുക

പങ്ക് വെക്കു

താരതമ്യം

പകർത്തുക