Mateo 25

Skꞌaneal Ebꞌ Ix Laonwan Kꞌopo

1Oj wal ey jex an, tzet oj yun yeloc ebꞌ ánima yet oj oc Naj a Satcan Yaawiloj ebꞌ. Jaꞌ junel, ey laonwan ebꞌ ix kꞌopo ix. Jix too ebꞌ bꞌey jun nupil yet akꞌbꞌalil, jix yiꞌontoj scantin ebꞌ. Jix bꞌet ebꞌ ẍaꞌon sjul naj oj nupi tuꞌ.#25:1 Jatacꞌalaꞌ sbꞌeybꞌal ebꞌ, tol chi too naj oj nupi tuꞌ bꞌey sna ix ix, too yiꞌontej, catuꞌ chi too bꞌey sna naj. Chi echbꞌanele sjul ebꞌ yu ebꞌ yamigo, yet watxꞌ yaman stoo ebꞌ bꞌey jun kꞌin tuꞌ. 2Ey jowan ebꞌ ix cꞌam snaꞌbꞌal, jowanxa xin, caw jelan. 3Jaꞌ ebꞌ cꞌam snaꞌbꞌal tuꞌ, cꞌamxa sobrail yaceite ebꞌ jix yiꞌtoj, asan cꞌal chꞌan niꞌoj eey yul scantin ebꞌ tuꞌ. 4Jal ebꞌ ix jelan tuꞌ xin, jix yiꞌtoj junxa limeta yaceite ebꞌ ix. 5Jaꞌ naj jix nupi tuꞌ, caw jix ecꞌ hora sjul naj. Yuxan, jix tit sweyan ebꞌ ix. Catuꞌ jix weya masanil ebꞌ ix. 6Jato wal yet chuman akꞌbꞌal, ey jun mac jix awi tet ebꞌ: “Tol chi jul naj oj nupi tuꞌ. Asiꞌ chaꞌwej naj,” ẍi tet ebꞌ. 7Catuꞌ jix a waan ebꞌ ix tuꞌ. Jix yaon oc skꞌakꞌal scantin ebꞌ ix. 8Catuꞌ jix yalon ebꞌ ix cꞌam snaꞌbꞌal tuꞌ tet ebꞌ ix jelan jaxca tiꞌ: “Akꞌwej niꞌoj je yaceite ey jon. Tol lalan stan el cu cantin tiꞌ,” ẍi ebꞌ tet ebꞌ jelan tuꞌ. 9“Ma skeꞌ kakꞌon je yet, ta tol chi kakꞌ niꞌoj je yaceite, ma mi yabꞌ ket catuꞌ ma pax yabꞌ je yet. Asiꞌwej, manwej niꞌoj je yet bꞌey chi txonlei,” ẍi pax ebꞌ ix. 10Yuxan jix too ebꞌ ix sman niꞌoj yet. Jaꞌ yet xax too ebꞌ, catuꞌ jix jul naj oj nupi tuꞌ. Jaꞌ ebꞌ listo ye yetoj cꞌal yaceiteal scantin tuꞌ, jix octoj ebꞌ ix yetoj naj bꞌey oj oc nupil tuꞌ, catuꞌ jix smajchen smajil sna ebꞌ. 11Jaꞌ yet jix jul ebꞌ ix cꞌam snaꞌbꞌal tuꞌ, jix too awi octoj ebꞌ: “Mamin, Mamin, jajon octoj,” ẍi ebꞌ. 12Jix yalon eltej naj tet ebꞌ: “Cꞌamaj. Caw yel chi wal ey jex, man jex wotaj an,” ẍi eltej naj tet ebꞌ. 13Yuxan, chi wal ey jex, caw listo che yute je bꞌa. Yutol man je yotaj oj, tzet cꞌual, cꞌal jantaj hora /oj jin jul jain Akꞌbꞌil Wopiso yu Dios xol ebꞌ ket animail tiꞌ an,/ ẍi Jesús tet ebꞌ.

Skꞌaneal Ebꞌ Oxwan Mulnawom

(Lucas 19:11-27)

14Oj wal ey jex an, tzet oj yun yeloc ebꞌ ánima yet eyoc Naj a Satcan Yaawiloj ebꞌ. Jaꞌ junel, ey jun winaj jix too bꞌey junxa conobꞌ caw naat. Jaꞌ yet tuxa chi toi, jix yawtentej ebꞌ smulnawom scꞌatan, jix yakꞌon can wan chꞌen stumin yul skꞌabꞌ ebꞌ. 15Ey jun naj bꞌey jix yakꞌ can joebꞌ mil quetzal. Ey jun naj bꞌey jix yakꞌ can caabꞌ mil quetzal. Ey jun naj bꞌey jix yakꞌ can jun mil quetzal.#25:15 Jix yal Jesús: “Joebꞌ talento, cꞌal caabꞌ talento, cꞌal jun talento”. Jaꞌ sbꞌisil jun talento, ecꞌbꞌan mil quetzal. Jatacꞌalaꞌ sbꞌakꞌ satil junjun jix yilocoj. Jix lawi tuꞌ xin, catuꞌ jix too naj tuꞌ. 16Jaꞌ naj mulnawom jix chaꞌon can chꞌen joebꞌ mil quetzal tuꞌ, jix mulna naj yetoj chꞌen. Jix yiꞌon joebꞌxa mil quetzal naj yetoj chꞌen. 17Jacꞌalaꞌ pax naj jix chaꞌon chꞌen caabꞌ mil quetzal. Jix yiꞌon pax caabꞌxa mil quetzal naj yetoj chꞌen. 18Jal naj jix chaꞌon chꞌen jun mil quetzal xin, jix sjol jun jolan naj, catuꞌ jix smujon eytoj chꞌen naj. 19Peyxa tax tuꞌ, catuꞌ jix jul naj spatrón ebꞌ tuꞌ. Catuꞌ jix yiꞌon cuenta naj yetoj ebꞌ mulnawom yin chꞌen tumin yin junjunal. 20Jaꞌ naj chaꞌnen chꞌen joebꞌ mil quetzal tuꞌ, jaꞌ naj bꞌabꞌel jix apni sattaj naj. Catuꞌ jix yakꞌon can chꞌen joebꞌ mil quetzal jix yiꞌ naj tuꞌ. Catuꞌ jix yalon naj tet spatrón tuꞌ jaxca tiꞌ: “Mamin, jix ja wakꞌcan joebꞌ mil quetzal chꞌen ja tumin tiꞌ ey jin an. Jaꞌ tinaniꞌ xin, tol ey pax joebꞌ mil quetzal yuneꞌ chꞌen jix wiꞌ an,” ẍi naj. 21Catuꞌ jix yalon naj patrón tuꞌ tet naj jaxca tiꞌ: “Watxꞌ xin, caw watxꞌ jix ja wute mulna ja bꞌa ey jin an. Jix ja jije jaxca chi woche an. Yutol jijem jaach yin niꞌan tiꞌ, yuxan miman tocꞌal tzet oj wakꞌ ey jaach an. Yuxan akꞌ tzala ja cꞌul wetoj an,” ẍi naj patrón tet naj smulnawom tuꞌ. 22Jix lawi tuꞌ xin, jix apni naj chaꞌnen chꞌen caabꞌ mil quetzal. Jix yalon naj tet spatrón tuꞌ jaxca tiꞌ: “Mamin, jix ja wakꞌcan caabꞌ mil quetzal chꞌen ja tumin tiꞌ ey jin an. Jaꞌ tinaniꞌ xin, tol ey pax caabꞌ mil quetzal yuneꞌ chꞌen jix wiꞌ,” ẍi naj. 23Catuꞌ jix yalon naj patrón tuꞌ tet naj jaxca tiꞌ: “Watxꞌ xin, caw watxꞌ jix ja wute mulna ja bꞌa ey jin an. Jix ja jije jaxca chi woche. Yutol jijem jaach yin niꞌan tiꞌ, yuxan, miman tocꞌal tzet oj wakꞌ ey jaach an, yuxan akꞌ tzala ja cꞌul wetoj an,” ẍi naj tet junxa smulnawom tuꞌ. 24Jaxa yet jix apni naj chaꞌnen jun mil quetzal sattaj naj xin, jix yalon naj tet naj spatrón jaxca tiꞌ: “Jaach patrón, wotaj tol chꞌaan jaach. Cha jatxꞌa tzet man awbꞌil oj ja wu. Tuxa cꞌal cha chaꞌ smulnail junojxa ánima. 25Yuxan, jix jin xiwa ey jaach an, jix jin mujon chꞌen ja tumin tuꞌ yul txꞌotxꞌ. Tol jaꞌ chꞌen ja tumin jix ja wakꞌ ey jin an, eyecꞌ chꞌen masanil tiꞌ xin,” ẍi naj tet spatrón. 26Catuꞌ jix yalon naj patrón tuꞌ tet naj jaxca tiꞌ: “Jaach tiꞌ, mooso jaach na yalbꞌanil, cꞌam ja watxꞌil. Caw isa jaach. Tutun tol ja wotajxa tol chin jatxꞌa bꞌey tzet man awbꞌil oj wu an, catuꞌ chin chaꞌon tzet chi yiꞌ junojxa ánima yin smulnail. 27Yuxan, tzet yuxan ma ja watoj chꞌen jin tumin tiꞌ maanil, catuꞌ chin chaꞌon pax chꞌen yetoj yuneꞌ yet chin jul tiꞌ,” ẍi naj tet naj mooso tuꞌ. 28Jix lawi tuꞌ xin, jix yalon naj tet wan ebꞌ eyecꞌ tituꞌ: “Iꞌwej ecꞌ chꞌen mil quetzal tuꞌ tet naj. Akꞌwej chꞌen tet naj ey laonebꞌ mil quetzal yet tuꞌ. 29Yutol jaꞌ mac ey yet, oj akꞌle wanxa tet, yet watxꞌ chi yakꞌ sobra tet. Jal ebꞌ cꞌam wal yet, jaꞌ niꞌoj yet ebꞌ ey taꞌaꞌ, oj iꞌle ecꞌ tet ebꞌ. 30Jaꞌ naj mooso cꞌam yopiso tiꞌ, chi too je kꞌojcan eltoj naj xol kꞌejkꞌinal, bꞌey oj okꞌoj, cꞌal chi natxꞌatxꞌoj yee yabꞌen syaꞌil,” ẍi naj patrón tuꞌ.

Jaꞌ Yet Oj Naꞌle Oc Yin Ebꞌ Ánima

31Jain Akꞌbꞌil Wopiso yu Dios xol ebꞌ ket animail tiꞌ,* oj jin jul yetoj ebꞌ wángel masanil yetoj jin miman tzejejial. Catuꞌ oj jin ey chotan bꞌey jin despacho. Jaꞌ yet tuꞌ oj txeclo eloj tol caw miman weloc apnoj. 32Masanil ánima bꞌey junjun conobꞌlaj, oj jul ebꞌ jin sattaj. Jaxca junoj naj ilom meꞌ chi poꞌon el noꞌ meꞌ xol noꞌ chiw, queytuꞌ oj wute jin poꞌon snan ebꞌ. 33Jaꞌ ebꞌ jaxca tol jin meꞌ yei, oj can ebꞌ bꞌey jin watxꞌ kꞌabꞌ. Jal ebꞌ jaxca noꞌ chiw yei, oj can ebꞌ bꞌey jin qꞌuexan. 34Jain Rey jin tiꞌ an, oj wal tet ebꞌ bꞌey jin watxꞌ kꞌabꞌ jaxca tiꞌ: “Jaex tiꞌ, albꞌilcan ey jex yu jin Mam tol oj yakꞌ swatxꞌcꞌulal ey jex. Ocanwej wetoj bꞌey oj wakꞌ Yaawilal. Jaꞌ tax yet jix waꞌxi can yul yibꞌankꞌinal tiꞌ yu Dios, waꞌnebꞌil xacꞌaltaꞌ jun tiꞌ je yu. 35Yutol jaꞌ yet jix tit jin wail, jix jin je yakꞌ lowoj. Jaꞌ yet jix tit jin tajin tiꞌal, jix je yakꞌon tzet jix wucꞌ an. Jaꞌ yet jix jin ecꞌle kꞌano posada, jix je yakꞌ jin posada bꞌey je na. 36Yet cꞌam jin pichil, jix je yakꞌon jin pichil, yet yaꞌ jin ey, jix jin ecꞌ je yilaꞌ. Jaꞌ yet ey jin oc preso, jix bꞌet jin je yiloctoj,” jin chi, oj walon tet ebꞌ. 37Catuꞌ jaꞌ ebꞌ watxꞌ sbꞌeybꞌal sattaj Dios tuꞌ, oj takꞌwoj ebꞌ ey jin jaxca tiꞌ an: “Mamin, ¿bꞌakꞌini ey ja wail jix kilaꞌ, cꞌal ja tajin tiꞌal tuꞌ? Toj ey tzet jix kakꞌ ey jaach. 38¿Bꞌakꞌini jix kil ja wecꞌ kꞌano posada stiꞌlaj cu na, catuꞌ jix kakꞌon ja posada tuꞌ? ¿Bꞌakꞌini cꞌamxa ja pichil, catuꞌ jix kakꞌon ja pichil tuꞌ? 39¿Bꞌakꞌini yaꞌ jaach ey, ma bꞌakꞌini ey jaach oc preso catuꞌ jix jaach bꞌet kiloni?” ẍi ebꞌ, catuꞌ oj yalon ebꞌ ey jin an. 40Catuꞌ oj walon tet ebꞌ jaxca tiꞌ: “Caw yel chi wal ey jex, jaꞌ yet jix je yakꞌon wan watxꞌcꞌulal tiꞌ tet ebꞌ wuẍtaj cꞌal tet ebꞌ wanabꞌ, caxcꞌal tet ebꞌ cꞌam yeloc apnoj, chi yal yeloc apnoj tol jaꞌ ey jin jix je yunne,” jin chi, oj walon tet ebꞌ. 41Oj lawoj jun tuꞌ xin, catuꞌ oj walon tet ebꞌ eyecꞌ bꞌey jin qꞌuexan kꞌabꞌ jaxca tiꞌ: “Elanwej jaex tiꞌ jin cꞌatan an, yutol jow Dios je yin. Asiꞌwej can xol jun kꞌakꞌ cꞌam bꞌakꞌin chi tani, bꞌey jun lugar waꞌnebꞌil can yu Dios bꞌey oj tojcan naj diablo yetoj ebꞌ yángel. 42Yutol jaꞌ yet jix tit jin wail, ma jin je yakꞌ low niꞌoj. Yet jix tit jin tajin tiꞌal, ma je yakꞌ niꞌoj tzet jix wucꞌ an. 43Jix jin ecꞌle kꞌano posada, ma je yakꞌ pax jin posada. Jaꞌ yet cꞌam jin pichil, cꞌam niꞌoj jin pichil jix je yakꞌa. Yetoj pax yet yaꞌ jin ey, cꞌal yet ey jin oc preso, ma jin bꞌet je yilaꞌ,” jin chi, oj walon tet ebꞌ. 44Catuꞌ oj yalon ebꞌ ey jin an jaxca tiꞌ: “Mamin, ¿bꞌakꞌini ey ja wail jix kilaꞌ, ma ja tajin tiꞌal tuꞌ, yetoj yet jix jaach ecꞌ kꞌano posada, cꞌal yet cꞌam ja pichil, cꞌal yet yaꞌ jaach ey tuꞌ, cꞌal yet preso ja wei? ¿Tumi ey bꞌey ma cu colwa ey jaach xin?” ẍi ebꞌ, oj yalon ebꞌ ey jin an. 45Oj walon tet ebꞌ jaxca tiꞌ: “Caw yel chi wal ey jex, jaꞌ yet ma jex colwa tet ebꞌ wuẍtaj tuꞌ cꞌal tet ebꞌ wanabꞌ tuꞌ, caxcꞌal cꞌam yeloc apnoj ebꞌ, chi yal yeloc apnoj tol jaꞌ ey jin, ma jex colwaoj,” jin chi, oj walon tet ebꞌ. 46Jaꞌ ebꞌ tuꞌ, oj toj ebꞌ bꞌey syaꞌtajilal yin junelne. Jal ebꞌ watxꞌ sbꞌeybꞌal sattaj Dios xin, oj ẍaꞌ skꞌinal ebꞌ, tol ey cꞌal yin tobꞌalkꞌinal, ẍi Jesucristo tet ebꞌ.

നിലവിൽ തിരഞ്ഞെടുത്തിരിക്കുന്നു:

Mateo 25: knj

ഹൈലൈറ്റ് ചെയ്യുക

പങ്ക് വെക്കു

താരതമ്യം

പകർത്തുക