Mateo 14

Scamichal Naj Juan Bautista

(Marcos 6:14-29; Lucas 9:7-9)

1Jaꞌ naj Herodes,* naj yaawil yul yet Galilea, jix yabꞌ skꞌaneal Jesús naj yet jun tiempoal tuꞌ, 2yuxan jix yal naj tet ebꞌ eyoc yopiso yalan ẍejbꞌanil naj jaxca tiꞌ:

—Jaꞌ jun winaj tuꞌ, jaꞌton naj Juan Bautista, pitzcꞌunaj a naj xol ebꞌ camnaj. Yuxan ey yipal yunen wan milagro tuꞌ, ẍi naj tet ebꞌ. 3-4Queytuꞌ jix yute naj yalon jaxca tuꞌ, yutol camnajxa naj Juan tuꞌ yu naj. Jaxca tiꞌ jix yunne, yuxan akꞌbꞌil cam naj yu. Ey jun yuẍtaj naj Herodes tuꞌ, chi yij Felipe. Herodías sbꞌi yistil. Jaꞌ naj Herodes tuꞌ, jix smonte el yistil yuẍtaj tuꞌ. Yuxan jix yal naj Juan tet naj Herodes jaxca tiꞌ:

—Caw man smoo oj cha wiꞌ ix tiꞌ, ẍi naj Juan tuꞌ tet naj. Yuxan jix akꞌle scꞌul naj Herodes tuꞌ yu ix. Catuꞌ jix akꞌle mitxꞌle naj Juan tuꞌ, catuꞌ jix oc naj yul preso, jix oc cadena yin naj. 5Jix yoche naj Herodes tuꞌ, chi yakꞌ cam naj Juan tuꞌ, asan xin, caw chi xiw naj tet ebꞌ conobꞌ. Yutol chi snaꞌ ebꞌ ánima masanil tol ẍejabꞌ Dios yeoc naj Juan tuꞌ: 6Jaꞌ yet jix ẍaꞌon skꞌinal yabꞌilal naj Herodes xin, jix syambꞌa oc ebꞌ ánima. Jix canalwi ix yuneꞌ Herodías tuꞌ sattaj ebꞌ masanil. Caw sakꞌal yecꞌ ix jix yil naj Herodes tuꞌ. 7Yuxan jix sloctej sbꞌi Dios catuꞌ jix yakꞌon stiꞌ tet ix jaxca tiꞌ:

—Yal cꞌal tzet oj ja kꞌan ey jin an, oj wakꞌ ey jaach an, ẍi naj tet ix. 8Caw akꞌbꞌil xa scꞌul ix yu xutx, yuxan jix yal ix jaxca tiꞌ:

—Jaꞌ sjolom naj Juan Bautista cha wakꞌ yul junoj plato ey jin an, ẍi ix tet naj Herodes tuꞌ. 9Jaꞌ yet jix yabꞌen naj rey tuꞌ jaxca tuꞌ xin, caw jix cusa scꞌul naj. Yutol xax sloctej sbꞌi Dios naj. Jix yabꞌ pax ebꞌ eyecꞌ yetoj naj. Yuxan jix yalaꞌ, tol chi akꞌle tet ix. 10Jix yakꞌon chejle naj tol chi too iꞌle el sjolom naj Juan tuꞌ yul preso. 11Jix bꞌet ebꞌ catuꞌ jix iꞌletej sjolom naj Juan tuꞌ yul junoj plato, catuꞌ jix yakꞌon ebꞌ tet ix, catuꞌ jix yakꞌon ix tet xutx. 12Catuꞌ jix apni ebꞌ scuywom naj Juan tuꞌ, catuꞌ jix yiꞌontoj smimanil naj ebꞌ, catuꞌ jix smujon can eytoj ebꞌ. Jix lawi tuꞌ xin, jix too yalon ebꞌ tet Jesús tzet jix yun scam naj.

Jaꞌ Yet Jix Low Ebꞌ Joebꞌ Mil Winaj Yu Jesús

(Marcos 6:30-44; Lucas 9:10-17; Juan 6:1-14)

13Jaꞌ yet jix yabꞌen Jesús jun tuꞌ xin, catuꞌ jix octoj yul jun barco yetoj ebꞌ scuywom tuꞌ, catuꞌ jix too ebꞌ bꞌey jun cusiltaj txꞌotxꞌ xꞌojli. Jaꞌ yet jix yabꞌen a skꞌumal ebꞌ ánima bꞌey conobꞌlaj, jix too ebꞌ yetoj yajan catuꞌ jix too ebꞌ bꞌey oj apnoj Jesús tuꞌ. 14Jaꞌ yet jix eltej Jesús yul barco tuꞌ xin, jix yilon jun miman bꞌulan ánima eyxa ecꞌ tituꞌ. Jix okꞌ scꞌul naj yin ebꞌ, catuꞌ jix yakꞌon can waꞌxoj scꞌul ebꞌ yaꞌey iꞌbꞌil ocoj. 15Jaxa yet yeycꞌualil tuꞌ jix apni ebꞌ scuywom scꞌatan, catuꞌ jix yalon ebꞌ tet Naj jaxca tiꞌ:

—Ilaꞌla, lalan stoo cꞌu, cusiltaj txꞌotxꞌ pax bꞌey ey jon ecꞌ tiꞌ, yuxan tejan watxꞌ ta cha chej pax ebꞌ ánima tiꞌ bꞌey wan aldealaj cu cawil-laj tiꞌ, yet watxꞌ chi too sman low sbꞌa ebꞌ, ẍi ebꞌ tet Jesús.

16—¿Tzet yuxan oj toj sman low sbꞌa ebꞌ? Akꞌwej low ebꞌ jaex tiꞌ, ẍi Naj tet ebꞌ scuywom tuꞌ.

17—Asan chꞌan joebꞌ cu yaliẍ pan iꞌbꞌil, yetoj cacꞌon noꞌ pescado, ẍi ebꞌ tet Naj.

18—Iꞌwejtej ey jin an xin, ẍi Naj tet ebꞌ. 19Catuꞌ jix yalon tet ebꞌ ánima bꞌulan ecꞌ tituꞌ, tol chi ey chotan ebꞌ sat acꞌal tuꞌ, catuꞌ jix yiꞌon a ixim joebꞌ pan tuꞌ cꞌal noꞌ cacꞌon pescado. Jix a tꞌanan satcan, catuꞌ jix yalon yu diosalil yu. Jix spoꞌon ey ixim pan tuꞌ, catuꞌ jix yakꞌon tet ebꞌ scuywom. Jaꞌ ebꞌ jix poꞌontoj xol ánima. 20Jix low ebꞌ masanil xin, catuꞌ jix no can scꞌul ebꞌ. Jix lawi tuꞌ, catuꞌ jix syambꞌan a ixim jix cancan sobraoj tuꞌ, lacawebꞌ to xuc ixim jix yamcha aoj. 21Joebꞌ mil ebꞌ winaj jix lowi, ma pax bꞌisle ebꞌ ix cꞌal ebꞌ unin.

Yet Jix Bꞌey Jesús Yibꞌan Jaꞌ Mar

(Marcos 6:45-52; Juan 6:16-21)

22Jix lawi jun tuꞌ xin, catuꞌ jix yalon Jesús tet ebꞌ scuywom tol chi octoj ebꞌ yul barco, catuꞌ chi bꞌabꞌi kꞌaxbꞌon ecꞌtoj ebꞌ, yajbꞌan chi yal too sbꞌa Naj tet ebꞌ ánima bꞌulan ecꞌ tituꞌ. 23Jix lawi yalon too sbꞌa tet ebꞌ ánima tuꞌ xin, catuꞌ jix too bꞌey jun wonan txaloj xꞌojli. Eyxa ecꞌ tituꞌ xꞌojli catuꞌ jix kꞌejbꞌi eyoj. 24Jal ebꞌ scuywom xin, eyxa ecꞌ ebꞌ snan jaꞌ yetoj teꞌ barco tuꞌ. Lalanxa spitxlo teꞌ yu jaꞌ, yutol caw jow stit kaꞌeꞌ sattaj ebꞌ. 25Tuxa chi sajbꞌi catuꞌ jix apni Jesús yintaj ebꞌ. Jix bꞌey Naj yetoj yajan yibꞌan jaꞌ. 26Jaꞌ yet jix yilontoj ebꞌ cuywom tuꞌ, tol chi bꞌey Naj yibꞌan jaꞌ, jix xiwa ebꞌ yu. Jix el yaw ebꞌ yu xiwcꞌulal, jix yalon ebꞌ jaxca tiꞌ:

—Jix jul jun cu labꞌ, ẍi ebꞌ. 27Catuꞌ jix yalon Naj tet ebꞌ jaxca tiꞌ:

—Manche jex oc il. Jain Jesús jin tiꞌ an. Manche jex xiwi, ẍi Naj tet ebꞌ. 28Catuꞌ jix yalon naj Pedro tuꞌ tet Jesús:

—Mamin, ta yel jaach, chej jin bꞌey yibꞌan jaꞌ, catuꞌ chin too ey jaach tuꞌ an, ẍi naj tet Jesús.

29—Titan, ẍi Jesús tet naj.

Catuꞌ jix eytej naj Pedro yul teꞌ barco tuꞌ, catuꞌ jix yakꞌlen naj stoo scꞌatan Jesús. 30Jaꞌ yet jix yabꞌeni tol caw jow kaꞌeꞌ, jix xiwaoj. Jix yabꞌeni, tol lalan spaxey xol jaꞌ, yuxan jix a yaw:

—Mamin, col jin an, ẍi naj tet Jesús. 31Eyman jix oc mitxꞌan Jesús yin skꞌabꞌ naj catuꞌ jix yalon tet naj jaxca tiꞌ:

—Jaach tiꞌ, cꞌam cha waoc ja cꞌul win an. ¿Tzet yuxan jix ja wakꞌ caabꞌcꞌulal? ẍi Jesús tet naj Pedro tuꞌ. 32Catuꞌ jaꞌ yet jix octoj ebꞌ yul teꞌ barco tuꞌ xin, catuꞌ jix oc tucan jun kaꞌeꞌ tuꞌ. 33Jix yiꞌon ey sbꞌa ebꞌ eyxa cꞌaltaꞌ octoj yul teꞌ barco tuꞌ tet Jesús, catuꞌ jix yalon ebꞌ tet Naj jaxca tiꞌ:

—Caw yel Scꞌaal jaach Dios jaach tiꞌ, ẍi ebꞌ cuywom tuꞌ tet Jesús.

Jix Waꞌxi Can Scꞌul Ebꞌ Yaꞌey a Genesaret Yu Jesús

(Marcos 6:53-56)

34Jix kꞌaxbꞌo ecꞌ ebꞌ xin, jix ecꞌ apnoj ebꞌ bꞌey conobꞌ Genesaret. 35Jaꞌ yet jix yilon oc ebꞌ ánima tol jaꞌ Jesús jun jix juli, jix abꞌcha el yul-laj masanil jun lugar tuꞌ, catuꞌ jix iꞌletej masanil ebꞌ yaꞌey bꞌey eyecꞌ Naj Jesús. 36Jix skꞌanon ebꞌ ta asan tol chi smitxꞌ niꞌoj stiꞌ spichil Naj ebꞌ. Jaꞌ masanil ebꞌ jix mitxꞌon stiꞌ spichil Naj tuꞌ, jix waꞌxi can scꞌul ebꞌ.

നിലവിൽ തിരഞ്ഞെടുത്തിരിക്കുന്നു:

Mateo 14: knj

ഹൈലൈറ്റ് ചെയ്യുക

പങ്ക് വെക്കു

താരതമ്യം

പകർത്തുക