Numera 19
19
O le Vai e Fa‘amamā ai e faia i le Lefulefu o le Povi Fafine
1‘Ua fetalai mai fo‘i le ALI‘I ‘iā Mose ma Arona, ‘ua fa‘apea mai: 2O le fa‘atonuga lenei o le tulafono ‘ua poloa‘i mai ai le ALI‘I, ‘ua fa‘apea mai, ‘Ia e fai atu i le fānauga a Isaraelu ‘ia latou ‘aumai ‘iā te oe se povi fafine mūmū,#19.2 O le fa‘aliliuga tuai; efu. e sao ‘ona lelei, e lē o i ai se ponā, e le‘i o‘o fo‘i i ai se amo.#Teu 21.3; 1 Samu 6.7 3Tou te tu‘uina atu ai ‘iā Eleasaro le ositaulaga, na te ta‘ita‘iina i tua o le toagalauapi, ‘ona fasia ai lea e se tasi i ona luma. 4E ‘ave fo‘i e Eleasaro le ositaulaga nisi ona toto i lona tamatama‘i lima, ma sausau fa‘afitu nisi ona toto i luma lava o le fale fetāfa‘i o le fa‘apotopotoga. 5E susunuina fo‘i e se tasi i ona luma le povi fafine; o lona pa‘u, ma lona ‘a‘ano, ma lona toto, ‘atoa fo‘i ma lona otaota na te susunuina.#Eso 29.14; Levi 4.11-12 6E ‘ave fo‘i e le ositaulaga le la‘au o le arasi, ma le isopo, ma le ‘ie mūmū, ma lafo i le sunuga o le povi fafine. 7‘Ona ta ai lea e le ositaulaga ona ‘ofu, ma tā‘ele lona tino i le vai; mulimuli ane ‘ona sau ai lea o ia i le toagalauapi; e leaga fo‘i le ositaulaga se‘ia o‘o i le afiafi. 8O lē na te susunuina ai fo‘i e ta e ia ona ‘ofu i le vai, ma tā‘ele lona tino i le vai, e leaga fo‘i o ia se‘ia o‘o i le afiafi. 9E fa‘aputuina fo‘i e se tagata ‘ua mamā o le lefulefu o le povi fafine, ma teu ai i se mea mamā i tua o le toagalauapi; e i ai fo‘i ia e tausia mo le fa‘apotopotoga o le fānauga a Isaraelu, e fai a‘i le vai mo ē ‘ua leaga; o le taulaga mo le agasala lea.#Epe 9.13 10O lē na te fa‘aputuina fo‘i le lefulefu o le povi fafine, e ta e ia ona ‘ofu, e leaga fo‘i o ia se‘ia o‘o i le afiafi; e fai fo‘i lea ma tulafono e fa‘avavau i le fānauga a Isaraelu, ‘atoa fo‘i ma le tagata ‘ese e āumau ‘iā te i latou.
O le Pa‘i atu i le Tino Oti
11O lē pa‘i atu i le tino o se tasi lava tagata oti e leaga o ia i po e fitu.#Nume 31.19 12E fa‘amamā o ia ‘iā te ia i lea vai i le aso tolu, ‘ona mamā ai lea o ia i le aso fitu ‘ae ‘āfai na te lē fa‘amamā ‘iā te ia i le aso tolu ma le aso fitu, ‘ona lē mamā lea o ia. 13‘Ai sē pa‘i atu i le tino o se tagata ‘ua oti, ‘ae lē fa‘amamā o ia ‘iā te ia, e leaga ‘iā te ia le malumalu o le ALI‘I; e vavae‘eseina fo‘i lea lava tagata ia Isaraelu, auā e le‘i sausauina o ia i le vai mo ē ‘ua leaga, e leaga o ia; e i ai pea lona leaga ‘iā te ia.
14O le tulafono lenei pe a oti se tagata i se fale ‘ie; o i latou uma e ulu atu i le fale ‘ie, ma i latou uma o i le fale ‘ie, e leaga i latou i aso e fitu. 15O ipu uma fo‘i e lē ufitia, e leai ni ufi e fusi ai, e leaga ia. 16‘Ai sē pa‘i atu i se tasi ‘ua fasia i le pelu ‘ua ta‘atia i le vao, po o se tagata oti, po o se ivi o se tagata, po o se tu‘ugamau, e leaga ia i po e fitu.
17Latou te ‘aumai fo‘i mo le tagata ‘ua leaga nisi lefulefu o le povi fafine na sunua, o le taulaga mo le agasala, ma latou avane i ai se suāvaipuna i se ipu.#Epe 9.13 18‘Ona tago ai lea o se tagata ‘ua mamā i le isopo, ma fufui i le vai, ma sausau ai le fale ‘ie, ma mea uma, ‘atoa ma tagata na i ai, ma lē na pa‘i atu i se ivi, po o sē na fasia, po o sē ‘ua oti, po o se tu‘ugamau.#Eso 12.22; Sala 51.7 19E sausauina fo‘i e lē na mamā lē ‘ua leaga i le aso tolu, ‘atoa fo‘i ma le aso fitu; ‘ona fa‘amamā ai lea e ia ‘iā te ia i le aso fitu, ma ta ona ‘ofu, ma tā‘ele i le vai, ‘ona mamā ai lea o ia i le afiafi.
20A o le tagata ‘ua leaga, e lē fa‘amamā fo‘i o ia ‘iā te ia, e vavae‘eseina lea tagata i le fa‘apotopotoga, auā ‘ua leaga ‘iā te ia le malumalu o le ALI‘I; e le‘i sausauina o ia i le vai mo ē ‘ua leaga; e leaga o ia. 21E fai fo‘i lenei mea ma tulafono e fa‘avavau ‘iā te i latou, o lē na te sausauina le vai mo ē ‘ua leaga, e ta e ia ona ‘ofu, ma le na te pa‘i atu i le vai mo ē ‘ua leaga e leaga o ia se‘ia o‘o i le afiafi. 22O mea uma fo‘i e pa‘i atu i ai lē ‘ua leaga, e leaga ia; o lē na te pa‘i atu i ai fo‘i e leaga o ia se‘ia o‘o i le afiafi.#Hakai 2.13
നിലവിൽ തിരഞ്ഞെടുത്തിരിക്കുന്നു:
Numera 19: RSCB
ഹൈലൈറ്റ് ചെയ്യുക
പകർത്തുക
താരതമ്യം
പങ്ക് വെക്കു
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Revised Samoan Catholic Bible © Bible Society of the South Pacific, 2010.