Sáni Mateo 16
16
Jonasiri mínta
(Mk 8.11-13; Lk 12.54-56)
1Jimaksï antarheraspti máru fariseuecha ka saduseuecha Jesusini ts'ék'ukuekani, ka arhisptiksï eska auantarhu mínta ma xarhatakuapirinka.
2Ka Jesusi arhiantaaspti: “Enka inchatirueni jarhak'ia, cháts'ï uantasïnka: ‘Sési jánteati jimpoka charhapencheska.’ 3Ka tsípkuts'ï uantasïnka: ‘¡Iásï nósesi jánteati jimpoka k'umanharhikuni eranteska!’ ¡Ískuts'ï ísï uantasïnka. Úsïnkats'ï erancheparini exeni néna enka jánteaka, ka k'óruts'ï no úsïnka íni jurhiatekuechani mínta exeani! 4Iásï anapu no kaxumpiticha ka ísku jántichaksï mínta kurhak'orhexati. Ka nóteruksï ma mínta xarhatamenhaatia, imantku enka Diósïri uantari Jonasi úkorhenchapka.”
Ka kéntikukuaspti.
Fariseuecheri jurhentperakua
(Mk 8.14-21)
5Enkaksï Jesusi japuntarhu parhikupka, jurhenkorherichaksï mirikurhispti kurhinta pát'ani. 6Ka Jesusi arhiaspti: “Exe je, jinkuntku jáma je fariseuecheri ka saduseuecheri xarhiperakua jinkuni.” 7Ka imaksï mámaru ampe arhip'eraspti: “Ísïts'ïni arhixati jimpokachi kurhinta no juáska.” 8Ka Jesusi mítespti ka arhiaspti: “¿Antits'ïsï ísï arhip'erani jaki eskats'ï kurhinta no kámsïnka? ¡Sántkuts'ï jakak'usïnka! 9¿Nótkits'ï kurhankusïnki ka nóts'ï míantasïnki enkani iúmu kurhintechani jimpo, iúmu míli t'irerpepka?, ¿Namuntsï tsïkiata tánantaaspki? 10¿Anti nóts'ï míasïnki enkani iúmu tsimani kurhintechani jimpo, t'ámu míli t'irerpepka? ¿Namuntsï tsïkiata tánataaspki? 11¿Antits'ïsï no jánhaskak'i eskaksïni no kurhinta jimposï arhini jaka? Enkaksïni arhik'a eskats'ï jinkuntku jámaaka fariseuecheri ka saduseuecheri xarhiperakua jinkuni.” 12Ka jurhenkorherichaksï jiák'ani kurhankuspti eska Jesusi no kurhinta xarhiperakuerisï arhiani jápka, eska fariseuecheri ka saduseuecheri jurhentperakua ampe jimposï arhiani jápka.
Pédru uantant'a'sti eska Jesusisï Krístueka
(Mk 8.27-30; Lk 9.18-21)
13Enkaksï Jesusi Sesarea niárapka, jima enka Filipu anapueka, Jesusi jurhenkorheri jémpechani kurhamarheaspti: “¿Na uantanhasïnki eska néska Acheti Uáp'a?” 14Ka imaksï arhintaspti: “Máruksï uantasïnti eska Juánu itsï atats'ïkpiriska, ka máteruksï uantasïnti eska Eliasïska, ka máteruksï uantasïnti eska Jeremiasïska o máteru Diósïri uantari ma.” 15Ka Jesusi kurhamarheaspti: “¿Ka cha na uantasïnki eskani ji néska?” 16Ka Simoni Pédru arhispti; “T'úrisï Krístueka, Acha Diósï tsípiti Uáp'a.” 17Ka Jesusi arhintaspti: “Tsípe t'u, Simoni Jonasi uáp'a, jimpokakini nónema aiankuska, jucheti Táte auantarhu anapukinisï aiankunt'ati. 18Ka ístukini ji arhixaka eskari Pédrueska ka íni k'erentarhu úts'ïtaaka jucheti tánkorhekuani, ka uarhikueri uinhapekua no úati antani. 19Ka auantarhu anapu mítakuechanikini t'únkeni íntsauaka: Ampe enkari parhakpeni k'ataaka, auantarhut'u k'atanhaati, ka ampe enkari parhakpeni kuerakuaka, auantarhut'u kuerakunhaati.” 20Tátsekua Jesusi jurhenkorheri jémpechani juramukuaspti eskaksï no jámapirinka uantant'a'ni eska imasï Krístueka.
Jesusi uénasti uantanukukorhent'ani
(Mk 8.27-30; Lk 9.18-21)
21Jiák'ani uénani Jesusi jurhenkorheri jémpechani aiankuant'aspti eska k'uanisïrempka eska Jerusaleni nipiranka, ka eska jini kánekua nósesi nitamanchapirinka, jimpokaksï achamasïcha ka tátecheri urhets'ïkuricha ka juramukua jurhentpirichaksï nósesi kámapirinka, ka eskaksï uántikupirinka ka eska tanimu jurhiatekua jimpo tsíntapirinka. 22Ka Pédru Jesusini támu pératini xukaspti ka arhispti: “Tata, p'amok'ukorhe ¡Nóri ísï úkorhenchaaka!” 23Ka Jesusi p'irhipakorhespti Pédruni arhiparini: “¡Nóampakiti, kéntikucherini! Ók'utasïnkarini jimpokari no ísï exesïnka eska Diósï na exek'a, k'uiripuenti exesïnka.”
24Tátsekua Jesusi jurhenkorheri jémpechani arhiaspti: “Ima enkarini chúxapakuekaaka, mirikurhikorhe, ka krúsini ichantikorhe ka chúxapuerini. 25Jimpoka ima enka imeri tsípekuani pátsakorhekuekaaka, sánteru tsîtaati, ka ima enka imeri tsípekuani jínteni jimpo tsîtaaka, tsípekua jatsiati. 26¿Anti ampe marhuatspea enka parhakpeni anapu ampe antakorhenhaaka, ka jini tsípekua tsîtakorhenhani? ¿Anti náxani jimpo ua nema tsípekuani piántani? 27Jimpoka Acheti Uáp'a Tátjemperi t'íntskua jinkuni ka imeri ánjelichani jinkuni juuaka, ka mántani arhiati maiamuantaani imani ampe jimpo enka xáni únhaka. 28Sési jimpoksïni arhixaka máru enkats'ï ixu jaka, nótkits'ï uarhini jauaka enkats'ï no urheta exeaka Acheti Uáp'ani jurhani irechetspeni.”
നിലവിൽ തിരഞ്ഞെടുത്തിരിക്കുന്നു:
Sáni Mateo 16: DKPJ
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Biblia en P´urhépecha, Michoacán, México © Sociedad Bíblica de México, A.C.
