San Lucas 5

Manaitjacanaadalri ipuitakjeti nacu

(Mt 4:18-22; Mc 1:16-20)

1Apapia naculje, aacadanacu Jesús uuni macapawan inumapi nacu Galileadalri iipitana, njajĩ inaiki yumacape jimica Dios yacu nawacacawa lriderse nini napatuetacan napeculricu. 2Jesús icapa yamafia iita macafialripe caida inumapinacu. Njajĩ ipuitacape naurrucu natan yuuya nacutsucarru natarrayan. 3Jesús yuurrucua pafialricu, Simón iyarrufia lricu, njite lrinaa lripjialretaca tekjuapja lrinumapi yuuya. Njite lriufa lrirricuda, icamina lriinita lricanantaca njajĩ inaiki njite. 4Yami cadanacu cacucani, lriacu Simón irsu:

—Pidee ljia iita macafialri tewacacawapja uuni macapawan irsu, ipeecu carru itarrayan nini, ipuitacarru.

5Njite Simón shepani:

—Pjia, icanantacaita faa, deepjitetja wapuitaca uupica njite currim cuca féta; mitsa, cayucada pinaa wanaitjaca, nupecu tsenakja jlia tarraya.

6Napecucadanacu tsenakja natarrayan, jurre njepaca cupje atee wadeepe tserrenca natarrayan. 7Icamina nawanaca nakitsiñape pafia lricupe nacapishu, naanucarru nakitsindatana. Icamina naaca naikjaolre, njite napakjanta yamafiape natan wadeepeenatsa njettacao. 8Simón icapacadanacu ljiajĩ jiyapalriu, lrituda lriursipadao Jesús ipjeyalje, lriacu:

—¡Iminalritti, pjiena nuuya, ima matsidalrimcatsa njua!#5:8 ¡Iminalritti, pjiena nuuya, ima matsidalrimcatsa njua! Cayu lriacu ljia Pedro, lricaite shupa curricatsa matsiadalricani, curricatsa lrirsuwalreca Jesús itsumita carruntjani, ljiajĩ mamatsicanadalri.

9Ima ljia Simón njite nja paana nafiucawa lriikjaote ljiajĩ ipuitakjeti macapacanaadalri Jesús inaitjalri. 10Santiago njite Juan, njajĩ Zebedeo yeenipe jurree nafiucawa, njajĩ Simón ikitsiñape. Mitsa Jesús yacu Simón irsu:

—Mafiutsawa; panaya nakjuite pipuita cautsa inaiki#5:10 Pipuita cautsa inaiki: Lricaite shupa currim ketsa lripuitaca cupje cayujĩ lridejĩcapishu pia, mitsa lriwaketacautsa njajĩ inaiki Jesús irsuwawa. .

11Naucacadanacu napatua jipai naculje, icamina namaca pjiumi naacarru Jesús shapudam.

Jesús imatsieta apada weedalrim idaki

(Mt 8:1-4; Mc 1:40-45)

12Apapia jalredauca, aacadanacu Jesús apafe yaacalre ricu apada atsia yuucawa iyamicada matsina wepemshu padakinacu. Lricapacadanacu Jesús, lriufawa lriursipadashu atee lrituda lrieecua jipai naculje njite lritatjani caiwirricutsa:

—Numinalri, cayucada piumaca, pitaita pimatsietaca njua nuyamikje yuuya.

13Jesús ipjialreta lricapi njite lrinuta ljia atsia, lriacu cayujĩ:

—Ajã, ¡Numa matsiaca pjia!

Ljiada nacutsa matsiacani lriuya ljiajĩ weepem lridakinacu. 14Njite Jesús inaani:

—Macaitetsa cuca irsu kjaiterrica imatsieta pjia. Icamitsa piawa njite pia sacerdote iikjaolre piñjata carru lricapa matsiakena ljia pidaki, njite pidee njajĩ maaficalri nainucarruna Dios irsu lriikjaote ljiajĩ pirrena cayujĩ Moisés inaacapishupia, nacaite carru matsiakeena pjia lriuya#5:14 Matsiakeena pjia lriuya: Naajĩca yalranai rikjuite, purificación. Njajĩ weepem idaki ricu, currim pia nataita naufacawa nainai nja marsucapetsan, namutueta teecu naufacawa yuuya. Mitsa matsiacadanacuenana ikena Moisés inaa pia nanaitjaca maaficalri nainu carru Dios irsu pada sacerdote icaite carruena matsiakena lrirrenaa yuuya. Pacapacani, Lv 14:1-32 .

15Mitsa njajĩ inaiki nacaite paana irsu nanacu njajĩ Jesús icanantalri njite nanacu njajĩ manaitjacanaperri lrinaitjalri lripjeyatua lrimatsietaca ljia weedalrim idaki, njite jurre inaiki itsumitani njemi carru lricanantaca njite lrimatsieta carruna nayamikje yuuya. 16Mitsa Jesús shena nauya pafe riculje maminalricawatsa lritatja carru cayujĩ lrinaitja capishu mana.

Jesús imatsieta apada meemakadalrim

(Mt 9:1-8; Mc 2:1-12)

17Apapia jalredauca Jesús icanantacadanacu nja inaiki, naufa tsakja nacudapi pana fariseonai njite njajĩ icanantacape Moisés idananda inucape jipai Galilea rikjuite, Judea rikjuite tsakja njite Jerusalén rikjuitjepe tsakja. Njemi Jesús icanantaca. Njite pjiumi nacapaca Dios jidaa Jesús nacu lrimatsietacadanacu nja iyamicape. 18Cayushupa apapiena jalredauca, paana atsianai nawakje nadee apada atsia meemakadalrim padeecarruda lricu iyamicape#5:18 Padeecarruda lricu iyamicape: Njanjirri nja yalranainai, camilla. Jesús iderse. Naumatja nadeecani pantirriculje nacadaa carrun Jesús yemalri niini. 19Mitsa currim nataita natsumitacani nama nja inaiki aimadan; cayushupa njerrawa pantinacu najuljumtacarru lritapje nataita carru naurrucuetan njite ljia iyamicada lriursuacarruita lricutsa, niini nacadacani napamuyuaca lricu nja inaiki aimadan, Jesús icudapi. 20Jesús icapacadanacu njeepaca lritaitaca lrimatsietaca ljia nakitsinda, lriacu lrirsu ljia iyamicada:

—Pjia atsia, currinatsa nuwadaca nja pimatsicana.

21Njite njajĩ icanantacape ljiajĩ Moisés idananda njite nja fariseonai nawaopia cayujĩ nacaolre ricu: —"¿Cucao inaa ljia atsiaca ljiajĩ cacu carruntjan Dios-shu? Apadatsa Dios itaita imawadacaca namatsicana yuuya njajĩ jalredauca lricuperri".

22Mitsa Jesús yajĩntsa cuanca nawaopiaca, niini lritatja ljimiuna:

—¿Cuada iwaopia cayu? 23¿Cucao ljia mjerrapitinaa pja, pacaiteca: “Curritsa nuwadaca nja pimatsicana,” u “pjinicu piemao piemanjicarrua?” 24Niini Njua, Atsia Dios inakjuitedalri nuñjataosa icapa nursuca jidati ajĩ jalredauca lricu nutaitacarru nucadaca ljiyapacao ljia imatsicanati macuadatsa.

Njite lriacu lrirsu ljia meemacadalrim:

—Nucaite pirsu, pjinicu piemawa, pjipa ljia piursua carruita pia carru piipana lriculje.

25Ljiada nacutsa, ljiajĩ maapidalrim ljinicu lriemao nacapawerricu pjiumi njajĩ inaiki, ljipa ljia lriursuacarruita njite lriwada matsia Dios nacu lriacayawa lriipana lriculje. 26Pjiumi njajĩ inaiki curritsa njajĩ cuca nacaite. Njite cacucana matsia Dios nacu. Nacapa capua Dios jiida jurre nafiucawa, niini naacu:

—Uupi dekja wacapa ljiajĩ curridalritsa atsianai itaita inaitjaca.

Jesús iniwana Leví lricanantacalreo

(Mt 9:9-13; Mc 2:13-17)

27Jesús imatsieta cayami ljia meemacadalrim, lrimutu njite niini lricapa mayacan lriikjaolre ljiajĩ pada iniwacada palrata talricanati Roma lricuda irsu, lriipitana pia Leví,#5:27 Leví: Ljia minitsa ljia Jesús yaajĩrriutsa Mateo-ca cap. 6:26 ricu. njite lriufacawa nawapacawa inaiki yaa icawiña lrirsu. Jesús yaacu lrirsu:

—Pínu nuinai.

28Icamina Leví jinicu yeemao, lrimaca pjiumi lriacarru Jesús shapudam.

29Ljiadaaminitsa, Leví inaitja lripanalricu lricatimatacacawa napiya Jesús iipitana nacu. Jesús njite lricanantanipe tsakja nainai. Nja tsakja nainai njajĩ aimadan iniwacape palrata talricanati irsu, Leví ikitsiñape njite paanapja inaiki tsakja. 30Mitsa njajĩ fariseonai njite njajĩ nanakjuite perri minitsa icanantacape Moisés idananda,#5:30 Papucope minitsa: Lricaiteshupa njajĩ fariseonai njite njajĩ icanantacape ljiajĩ Dios inanda Moisés idanaca uupi pacuacacatsa nawaopiaca lrinacu ljia njeepalri, njite nawaopiatja njeepaca matsia pja, njite nanaitjapjaca matsia nauya nja paana irraelitanai. nainita cacupecana matsi nanacu njajĩ Jesús icanantanipem. Nacu narsu:

—¿Cuada iñja njite irratsakja nainai njajĩ iniwacape palrata talricanati irsu njite njajĩ paana camatsicanaaperri tsakja?

31Njite Jesús shepana:

—Njajĩ inaiki marrenapetsa curritsa cuada naumaca itapecaita, mitsa njajĩ carrenaperri njaadekja canacai irsu itapecada. 32Currim nunu jalredaucalricu nuumacarru njajĩ matsiaperritsa, mitsa nunu nuumacarru njajĩ camatsicanaperri, nadiacarru nauma natalricawa Dios.

Natatja njemiu Jesús maiñjacaapan nacu

(Mt 9:14-17; Mc 2:18-22)

33Papia naculje, apadapena inaiki icaite Jesús irsu cayujĩ:

—Njajĩ Juan Bautista icanantanipe njite njajĩ fariseonai icanantanipe aimawalria maiñjacacana, njite natatja Dios iinai caidalritsa, mitsa njajĩ picanantacalre naiñja njite nairra tsakja caidalritsa.

34Nini Jesús yaacu narsu:

—Cainucarruda lricuna, ¿Capja currica naiñja lriinai ljiajĩ walridalri cainuca njajĩ lrikitsiñapejĩ aacadanacuna lriinai? 35Mitsa apapia jalredauca njajĩ inaiki nadeecautsa ljiajĩ cainuite niini ljiawaljinautsa njajĩ lrikitsiñapejĩ iinunautsana njite maiñjacacautsana; icatsa lricayushuca njua ljiajĩ cainudalri#5:35 Njajĩ irraelitanai, walriperri cainuca, currim naawa pafe riculje cainuca shapudam. Icamitsa nacatimatacawa nakitsiñapejĩ yaapiya paanja matsia. Panja shapudam dekjeena lriawa ljiajĩ walridalri cainuca..

36Lricaite tsakja narsu ljiajĩ pada pajĩshupa:

—Currim pataita parruetaca yamacati upidalrim walridalri inacu, cayucada lrinaitjaca lrimatsicamtja ljia tsaya walridalri. Njite currim tsakja matsia pacapaca lrirrucao jliajĩ yamacati walrimaki lrinacu ljiajĩ upidalrim.

37Njite currim tsakja cuca yaarru jaicutjeda yaana walrianjai lriarruda#5:37 Naarrucarruda lricu jaicu tjedaa yaana. Naturruapatanda maaficalri iya nakjuite. upidalrim ricu, ima cayucadantja, capuakena ljiajĩ jaicutjeda lrijulruntacantja lriarruda upidalrim, njite lriarruntjawa ljiajĩ jaicutjeda njite maatsicantja ljia naarruda. 38Cayushupa njajĩ inaiki narsutsa naarruca ljiajĩ jaicutjeda yaana walrianjai lriarruda walridalrirricutua. 39Njite cayu tsakja, apada irracayamina ljiajĩ jaicutjeda yaana upianjaim currinatsa lriuma lrirraca ljiajĩ jaicutjeda yaana walrianjai lriwaopiacapua juiwipjaca ljiajĩ jaicutjeda yaana upianjaim.

നിലവിൽ തിരഞ്ഞെടുത്തിരിക്കുന്നു:

San Lucas 5: kpc

ഹൈലൈറ്റ് ചെയ്യുക

പങ്ക് വെക്കു

പകർത്തുക