San Lucas 4
4
Ñacaim icadaatja Jesús inaitja imatsicanawa
(Mt 4:1-11; Mc 1:12-13)
1Jesús idia uuni Jordán rikjuite Juan yapjueta cayamini, njite Espíritu Santo yaajĩ Jesús nacu niini lrideecani jalrapuculri ricu. 2Lriufa nirse cuarenta jalredauca. Nirse cadanacun currim cuca lriñja niini caiwica lrirsu maawitacai. Njite jalredauca icuam ñacaim yumatja Jesús inaitjaca lrimatsicanao. 3Ikeena ñacaim yacu Jesús irsu:
—Dios Yeenipe cadaa pjia, picaite lrirsu ljiajĩ jiipada lripadama carru iñjaodatiwa.
4Jesús shepani:
—Dios yacu nadananda icaite: “Currim iñjaodatishu minitsa caafi njajĩ inaiki.”
5Njite ñacai idee Jesús apafe yenundalri naculje, lricañjata carru lricapa njite pjiumi njajĩ yacaalre jalredauca lricupe, 6ñacai yacu Jesús irsu:
—Nucadautsa, pjia carru yaajĩ nanacu pjiumi njajĩ yacalre njite nanaani cacuadaperri nacu tsakja. Ima nursuperrica nacadana, njite nutaita tsakja nucadaacana cuca irsucatsa nuuma. 7Piyapecautsa pjiumi njajĩ, pituda cadaa piursipada piacarru nursu matsiadalri.
8Njite Jesús shepani:
—Dios yacu nadananda icaite: “Apadatsa Dios irsu paa matsiadalri, apadatsa lrisu padejĩ.”
9Njĩtedalri ñacai inai Jesús yacaalre Jerusalén riculje, nini lricadani Dios iipana ipulricu nacu njite lriacu Jesús irsu:
—Ajãdalricada Dios Yeenipeca pjia, piwatsiawa aajaitejĩ; 10ima Dios yacu nadananda icaite tsakja:
“Dios imeenacautsa njajĩ lrirsuperri angelenai
nawapa carru, njite namatsieta tsakja pjia.
11Nacuadatácarru pjia nacapishu
wade pitudaca pjipao jiipada nacu.”
12Jesús shepani:
—Dios yacu nadananda icaite tsakja: “Matatjatsa Dios inai lrinaitja carru manaitjacanaadalri lriñjata carrutsantja cuanca lriwapaca pjia.”#4:12 Maumetatsa ljiajĩ pitalricana Dios. Lricaiteshupa: Macadatsa kerrua ljiajĩ Dios yaajĩcada pinacu tsakja.
13Njite currinatsa cucashu ñacaim itaita icadaca Jesús inaitja imatsicanawa, icamina ljienaca Jesús yuuya kjeeyatsa jalredauca.
Jesús inita lridejicalre Nazaret ricu
(Mt 4:12-17; Mc 1:14-15)
14Yaami cayami ñacaim Jesús yuuya, Jesús idiawa jiipai Galilea riculje njite kjaida Espíritu Santo Jesús nacu, njite pjiumi njajĩ inaiki lrirricudape yuufacao nacaitepe lrinacu. 15Lricanantana njajĩ inaiki sinagoga#4:15 Sinagoga: Panti tsude nawacaca carruda lricu mana nja Judionai. Nalee niini Dios yacu upidalrim, natatja carruda Dios inai, namatsieta carruda lricu tsakja yacuti. lricu yacaalre icuan, njite pjiumi nja jimicape cuanca lricanantaca nacaite matsia lrinacu.
Nazaret ricuperri namenata Jesús
(Mt 13:53-58; Mc 6:1-6)
16Galilea ricu cadanacutua Jesús, lriawa Nazaret riculje, ljiajĩ yacaalre lritawiña carrumio. Apapia jalredauca nawafetacarrua#4:16 Nawafetacarrua Sábado: Njajĩ irraelitanai nawafetamana nadejicalre yuuya sábado ricu, mitsa naamanawa sinagoga lricu naacarru matsiadalri Dios irsu. lricu nja irraelitanai, Jesús shewawa sinagoga lricu cayujĩ lrinaitja capishu mana, njite ljinicu lriemao lrileecarru Dios yaacu nadananda ricu. 17Pada jiyapeta Jesús irsu inuparrutacaita Isaías idananda lrileecarruni, niini lrimjecu cadanacu lriuketaca lridanacawa nja yacuti canjajĩ:
18"Dios i-Espíritun yaajĩ nunacu,
ima lriniwanaca njua
nudee carru ljiajĩ yacuti matsiadalri narsu njajĩ kjenaaperri.
Dios imeenaca njua nucaite carru narsu njajĩ napapijĩ lriwatacacautsana napapi yuuya
njite njajĩ matjiperrimi lricadacautsa nacapa;
lricadautsa namaudaca carruena njajĩ njerrapitetajĩ nauya njajĩ jirrapitetacapena;
19lrimeenaca njua nucaite carru nja lrinaikite lriuca keena ljinana lriñjatacawa nacapa nainai keenani".
20Jesús ilee cayami ljiajĩ lrileenda lridia lriitani, njite ljiyapetan lrirsu ljiajĩ yajicada sinagoga nacu njite lridia lriufao. Pjiumi njajĩ sinagoga lricupe currim yami nacapaca lrirsu. 21Ikena lriinita cacuca narsu, lriacu:
—Icatsa ljinana yucakenawa irsu lrinacu ljiajĩ jimirri cayujĩ Dios yacu nadananda icaite capishu.
22Pjiumi njajĩ inaiki cacucana matsia Jesús nacu njite currim nirse najĩacacao njemicadanacu nja yacuti matsiaperri lricaiterri. Cacu narsuwaca:
—¿Curridatsao José irrica ljiajĩ?
23Jesús shepana:
—Nuanjintsa icaitecautsa nursu cayujĩ wacaite capishu nana: “Pjia, itapecada, pitapiacao pjiwacatsa.” Icaitetsakjantja nursu: “Ljiajĩ femirri pinaitjaca Capernaúm ricu, pinaitja tsakja ajĩ piyacalre ricu.”
24Lricaite pja narsu:
—Ajãdalri nucaiteca shaa, currim pacapa apada inuparrutacada nacuadatanda matsia lriyacalre ricu. 25Ajãdalri nucaite irsu, inuparrutacada Elías jiawalji pia jurre maduiyuanaipe Israel ricu. Currim capua iiyani madalriwalria njite pamuyua pja pawalria naculje jurre maawitacai pjiumi irraelitanai jipaite ricu. 26Currim Dios imeenaca Elías Lrikitsindata carruntja njajĩ maduiyuanaipe Israel ricupe, mitsa lrimeenacani Lrikitsindata carru apama maduiyuam yacalre Sarepta darru yuufawa, tsumi yacalre Sidom yuuya. 27Jurre pia tsakja iyamicape wepem padakirricu Israel ricu inuparrutacada Eliseo shawalji pia, mitsa currim Dios imatsieta pada nanakjuite, padatsa Naamán, Siria dalri.
28Njemicadanacu njajĩ Jesús icaiterri, pjiumi njajĩ sinagoga lricupe jurre kerruacana. 29Njenicu nemao njite jidatirricu namutueta Jesús nayacalre yuuya, njite nadeecani jiipana yenundalri nacu nanaitjalri niini ljia yacaalre Nazaret, naduitacarruni njĩten nainucarrun. 30Mitsa Jesús icapucu idia nauya njite ljiyapa pamuyua narsu.
Jesús ipecu icaoljeti matsidalri
(Mc 1:21-28)
31Jesús yaawa Capernaúm riculje, pafe yacalre jipai Galilea ricuda. Jesús icanantamana njajĩ inaiki sinagoga lricu nawafetacarrua lricu njajĩ irraelitanai. 32Njajĩ inaiki currim njajĩ cuancana njemicadanacu lricanantaca, ima cacucani kjaidádalrishu.
33Niini pia sinagoga lricu pada atsia icaoljeti matsidalri yajĩnda inacu. Ljiajĩ icaoljeti matsidalri shematja mana kjaida:
34—¡Pimaca faa! ¿Cucao piuma wainai, pjia Jesús Nazaredalri? ¿Pinukena piwayaketacarru faa? Nuanjintsa kjaiterrica pjia. Njuanjentsa icacatsa Mamatsicanadalrica pjia, Dios imenacanda.
35Ikena cacuca kjaida Jesús icaoljeti matsidalri irsu. Lriacu lrirsu:
—¡Macutsa pjia. Pimutu lriuya!
Icamina ljiajĩ icaoljeti matsidalri ipecu liwao ljia atsia jipai ricu nacapawerricu nja niini perri, lrimutu lriuya njite currinatsa cuajĩ lrinaitjacan. 36Pjiumi nafiucawa, njite nacu narsuwaca:
—¡Ljia yacuti lricaiterri lrirsuca ljiida! Lricaite kjaidádalrishu njite itaitakjetishu narsu njajĩ icaoljeti matsiperrim namutu carrua, ¡njite namutoa!
37Njite njajĩ inaiki nacaitepe Jesús nacu yacalrewape icuam lrirricudape jipaica.
Jesús imatsieta ipuati yuuya rsuajĩ Simón iñjerru
(Mt 8:14-15; Mc 1:29-31)
38Ikena Jesús imutua sinagoga lrikjuite njite ljiewao Simón ipana lriculje. Rsuajĩ Simón#4:38 Simón: Ljiaminitsa ljiajĩ pada Jesús icanantacalre. iñjerru matsinaa jamucanu, matsinaa capuanu ipuatishu. Njajĩ panti ricupe natatja caiwirricutsa Jesús inai lrimatsieta carrunu. 39Icamina Jesús itsumitanu njite lricuanjaca runaculje niini cacucani kjaida ipuati irsu, njite matsiacanu ipuati yuuya. Ljiapudamjite tsa, rsunicu ruemao njite runaitja iñjaodati narsu naiñjacarru.
Jesús imatsieta jurre iyamicape
(Mt 8:16-17; Mc 1:32-34)
40Tsumi cadanacuena deepi carru, pjiumi njajĩ irsu cape nakitsiñape iyamicape nadecana Jesús iikjaolre; njite lricadaa lricapi nanacu nacuamtsa, njite Jesús imatsieta pjiumena. 41Namutu tsakja iyamicape yuuya icaoljeti matsiperri, njemata cayu:
—¡Dios Yeenipeca pjia!
Mitsa cacu kjaida Jesús narsu nja icaoljeti matsiperri njite currinatsa lricadapja cacuna, ima njajica icacatsa Dios Imenacandacan.
Jesús icananta yacuti matsiadalri
(Mc 1:35-39)
42Jalreca iikjaolre, Jesús imatsieta cayami jurre inaiki, lriawa yacalre Capernaúm yuuya, apafe maninalricawa riculje. Njajĩ inaiki njajĩ naumani, njite naucawa lrialri nirse. Nauketa cayamini, curritja nauma nacadaca lria nauya, 43mitsa Jesús yacu narsu:
—Nursutsa nuaca nucananta pafe yacalre riculje ljiajĩ yacuti matsiadalri cuanca Dios italricanataca nanacu njajĩ icuadatacape natalricanashun, ima cayushupa Dios imenaca njua.
44Icatsa cayujĩ Jesús icananta ljia yacuti matsiadalri sinagoga lricu njepaite ricu njajĩ Judea ricupe.
നിലവിൽ തിരഞ്ഞെടുത്തിരിക്കുന്നു:
San Lucas 4: kpc
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© 2025 CLAN
© 2025 Seed Company
