2 Timoteo 1
1
Pablo imenaca memoria
1Njua, Pablo, Dios iniwananda lirsudalricarru njua ljiaji Jesucristo icatsa njua lrimenacanda caiji lriumacapishu nucaitecarru lrinacu ljiaji jalredauca mawayacacadalri lricadalriutsa narsu Jesucristo inacuite. 2Numenaca pirsu memoria pjia, Timoteo, nuenipeshudalrina nucapaca nupeyunda. Fanirri Dios njite Waminalri Jesucristo icadaa lrimatsiaca pinacu, kjenaacarruatsa nacapaca pirsu njite nakitsindata pjia piufaacarru pimaudaca.
Pablo yaa matsiadalri Dios irsu
3Caidalritsa nuaca matsiadalri pinacu njite nuwadaca pjia deepirricu jalewerricutsakja nutatjacadanacu Dios iinai, ljiaji nudejinda irsu nuwaopiakje maupitjadalri yapiya, caitsa nadejicapishupia naji nuferrinaipe. 4Caidalritsa nawaopiaca pjia piiyacadanacu nuakaolrena piuya, njite numatja nucapaca pjia catimacarruntja nucaolre. 5Ima nuwaopiaca cuanca pirsuca ljiaji shepakjeti ajadalri. Caiji nainitacapishupia naji pjirruitam Lioda njite tsakja rsuaji pjidua Eunice, njite nuajintsa ajadalri pjiepjentsakjani.
Mapaimantsa picadaca picaolreo
6Caishupa nucaite pirsu ljiaji, pikerratacarrupja ljiaji lricamarrana ljiaji lrianda pirsu macuadatsa ljiaji Dios Espíritun pidejishupao nucadacadanacupia nucapi pinacu. 7Ima ljiaji Dios i-Espíritun lricadanda warsu currim lricadaa cafiukjeperrica faa, mitsa lricadaadekja warsu itaitakjeti, warsucarru ipeyukjeti njite wajiicarrutsakja wawapacacao. 8Caishupa, mapaimantsa picaiteca lriacunaa ljiaji Waminalri; mapaimantsakja pjia nuikjaote, presocapua njua lrikjaote. Matsiapjadekja, lrishu ljiaji jidaati Dios icadalri pirsu, pitarrawatena nuinai ljiaji jirrapjitakjeti inulriutsa lriikjaote ljiaji sheepakjeti. 9Dios iyumjetenina faa njite lriniwana faa lrinaikiteo lrienitampe lrirsuwao, currim wanaitjanda imaca, mitsa caipiakena lricadaca njite lriwaopiapiena lriacautsa warsu kjenacapua lricapaca warsu ljiaji matsiadalri ipeyukjeti lrinaitjalri warsu Jesucristo nakjuite lripjeyapiatua lriinitacao pjiumi; 10Njite panaya ljiaji matsiadalri ipeyukjeti lrinaitjalri uupina lricañatani lrinucauljepia ljiaji Waminalri Jesucristo Iyumjetacaita faa, ljiaji iwayaketalri ljiaji mayamicalri njite lrinakjuite ljiaji yacuti matsidalri lricadaa warsu jalredauca mawayacacadalri.
11Dios-tsa icadaa njua nucaitecarru njaji yaacuti, njite lricadatsakja njua lrimenacaoda njite icanantacaitacarru njua. 12Lrikjaote ljiaji Dios icadacapuena, njurrapjitaca ljiaji njurrapjitalri aji. Mitsa currim capaimanca njua lrikjaote, Ima nuajintsa cucanacuca ljiaji nucadaa nucaolreo; Njite nuajintsa lirsuca ljiaji jiidati lricadacarru nacananta ljiaji lriacu matsiadalri, atee ljiadaawatsa Jesucristo inuca lripieta lricaitecarruatsa naacuna pjiumi.
13Picanantena caiji picapacapishuena ljiaji icanantakjeti mayacandalri ljiaji piajirrina nunakjuite, njite piufena lrinacu ljiaji sheepakjeti njite ipeyukjeti tsakja ljiaji warsulri acapua faa iinai. 14Ljiaji Espíritu Santo yuufalri wacaolrerricu lrikitsindatautsa pjia piwapacarruatsa matsia ljiaji matsiadalri icananatakjeti feepalri, ljiaji nacadalrina pirsu.
15Caiji piajicapishuena, pjiumi njaji shepacaperri Asialricuperri currinatsa nacuadata njua; nanakuite icatsa njaji, Figelo njite Hermógenes. 16Waminalri watsa icapa njenaa njaji lrikitsiñape ljiaji Onesíforo, ima ljia aimawalriapia lricadaa metaami nucaolre njite currimpia capaimanni nuikjaote presocapua njua. 17Mitsadekja lriucacadanacupia lriinita Romalricu mamapjica-piatsa lriajica lriuma njua akjerreca lriuketaca njua. 18Waminalriwatsa icañata lricapa lrimatsietautsani ljiadawatsa lricaite nacuna pjiumi. Njite pjia piajintsa matsia cuanca lrikitsindataca faa a Efesolricu.
© 2025 CLAN
© 2025 Seed Company