Luka 11

Yesu Kekesa Okhusala

(Mat. 6.9-13; 7.7-11)

1Yesu kali asala awunju aandi, nolu kamala, mulala khuvalondi vave kamuwolera, “Omwami, chwekese okhusala, nga Yohana kekesa avalondi vave.”

2Yesu kavawolera, “Nimusala, wole:

‘Papa!

Elicha lilio linyole oluyali,

owami wuwo wiche.

3Chuwerese sia wulinyinga esiokhulia siefwe

4Chuvere embi chiefwe, sikira fwesi khuvera vosi avachukosera, ochachucha mumatemo tawe.’”

5Kavawolera, “Njanu khwinye oli nomwicha, alikhuchia khuniye akachi wesiro amusave, ‘Omwicha, mbekho emikati kitachu. 6Okhuva omwicha wange kakhola achula khulukendo, ne mbuma esimuwa.’ 7Ne omwicha wuwe ali khumuchipa okhuchula munju, ‘Lekha okhunyasa, nikaye khale omuliango, ese navana vange khukonire, ne sinyala nenyokha nakhuwa siosisiosi tawe’! 8Vawolera, ata nalova okhwinyokha amuwe esinju sikira mwicha wuwe, nausa khulwomunju oyo okhuchianakana okhumusava achia okhwinyokha amuwe esikenya.

9“Khulwako vawolera, sava, nochia okhuwereswa, takha, nochia okhunyola, khong'onda, nochia okhwikulirwa. 10Okhuva osava awereswa, otakha anyola, nokhong'onda kekulirwa. 11Mwiwusi sina mwinywe, omwana wuwe namusava eng'eni, musirenge sieng'eni naye amuweresa enjukha? 12Namwe nacheva ewuyu, amuweresa esang'unyi? 13Kho enywe avali avavi, mumanyire okhuweresa evianwa vilayi avana venywe, Papa womwikulu kakhakhirwa okhuana Roho Muchwenufu khwavo avamusava!”

Yesu nende Beelsebuli

(Mat. 12.22-30; Mrk. 3.20-27)

14Kali achusa esisieno sindi esia masiru, nolu esisieno siali nisichulire, masiru oyo kalomaloma, navanju vawuka. 15Nausa avandi khunivo vawola, “Achusanga evisieno muwunyali wa Beelsebuli, omukali wevisieno.”

16Avandi okhumutema, nivenya esimanyiro okhuchula khuniye esichula mwikulu. 17Nausa kamanya amaparo kawe, kavawolera, “Wuli owuchuki wakawukhana khuwene siwuyindira tawe, nenju yakawukhana yikwa. 18Ata Setani yesi kakawukhana omwene khumwene, owami wuwe wakhema wuchie? Sikira muwola mbo enachusanga evisieno muwunyali wa Beelsebuli. 19Niyiva ese njusanga evisieno muwunyali wa Beelsebuli, navo avana venywe vavichusanga muwunyali wanu? Khulwako vachia okhuvakhalakira. 20Ese niva njusanga evisieno khumaani ka Nyasaye, kho Owami wa Nyasaye wakhamwichira.

21“Omunju owamaani, nali nevimanulwa, olu alindanga etala lilie, emiandu kikie kiva wulayi. 22Omunju wundi omukhira amaani, namunula evimanulwa vivie evikeyikina, amala amuyayira emiandu.

23“Oyo ochali nange, kambinga, noyo ocha wusa nange asalania.

Okhukoola khwa Roho Muvi

(Mat. 12.43-45)

24“Olu roho muvi ava nachulire mumunju, avichanga awunju avalakafu natakha awokhuluwuukhira, ne nachanyola awolanga, ‘Ndi okhukoola munju yange eyinachulamo.’ 25Nolu akoola, ayinyola niyeyirwe niyicheresiswe. 26Amala achia nalecha roho vandi Saba avavi sana okhumuvicha, ne vengira okhumenyamo, neva liomunju oyo livevi sana okhuvicha nga kali.”

Owusangafu Wang'ali

27Nga kawola kano, omukhasi musituma siavanju kakingula omwoyo kamuwolera, “Yiri nekhavi enda yakhwiwula, nende oluvere olu wanuna!” 28Nausa Yesu kawola, “Valinekhavi avawulira ekhuwa lia Nyasaye nokhulitira!”

Venya Amangayimwa

(Mat. 12.38-42)

29Olu esituma siavanju siametekha, kanja okhuwola, “Olwiwulo luno lwiwulo lumayanu, lutakha esimanyiro, nausa siwumao esimanyiro esilwiwulo luno luli okhunyola ta, nichali esimanyiro sia Yona. 30Okhuva Yona kekhola esimanyiro khuvanju va Ninawi, kho Omwana womunju achiakhuva esimanyiro khulwiwulo luno. 31Omuchuki mukhasi Wemulambo anakhenyokhe mumuse alala nende avanju volwiwulo luno, vavakhalakire esiina, sikira kachula khusiakamo siesialo okhuwulira owukesi wa Solomoni, ne wona, okhira Solomoni ali ano. 32Avanju va Ninawi vanakhenyokhe mumayalo nende olwiwulo luno nivalukhalakira esiina. Sikira vakalukhana khumerwacho ka Yona, ne wona, ovichire Yona ali ano.

Owulafu Womuviri

(Mat. 5.15; 6.22-23)

33“Awumao oambianga etaa acha mulwalo namwe musimwero ta, nausa ayicha khusichivi, mbo avo avengira vawone owulafu. 34Emoni yiyo njetaa yomuviri kukwo, emoni yiyo niyiri enamu, omuviri kukwo kwosi kuva nowulafu, nausa niyichali awene, omuviri kukwo kwichula esirima. 35Kho olengere owulayi, owulafu wuli mwiwe wuchava esirima tawe. 36Niyiva omuviri kwosi kwichuye owulafu, nikuwuma esirima eluveka, kuchia okhwichulamo owulafu wong'ene, ngetaa yikhukhoseranga owulafu.”

Yesu Afuchira Avafarisayo nende Avekesi Vamalako

(Mat. 23.1-36; Mrk. 12.38-40)

37Olu kali nasilomaloma Omufarisayo wundi kamulanga achie alie esiokhulia ewuwe, kho kachia kengira kekhala aamesa yokhulia. 38Omufarisayo kawuka mbo sikachangira kasava kho kalia ta. 39Omwami kamuwolera, “Enywe Avafarisayo mulavia esikombe nende esipakuli khumukulu, ne mukachi mwichuye owuchafu nowumayanu. 40Vasiru enywe! Oyo owalonga evierwanyi sinjowalonga eviomukachi viosi? 41Nausa muane evianwa khuvinju viomukachi, ne wona evinju viosi vilafu khwinywe.

42“Akhoo enywe Avafarisayo! Musolola khuvanju esitonye siekhumi, ata khumasafu kaunya owulayi okhumeta esing'ari musiokhulia, ne mulekeresa owukhalaki wang'ali nende owusimi wa Nyasaye. Kano kenyekha mwakalonda, nimuchalekha akandi ako nundi ta.

43“Akhoo enywe Avafarisayo! Mwasima evisala viemberi musinagogi nende okhukhesana musokoni. 44Akhoo enywe! Muli ngevirindwa vichawonekha ta, navanju vakenda khumukulu nivachaviwona ta.”

45Mulala khu Avekesi vamalako kamuchipa, “Omwekesi, mukhuwola ochio ochutukhiramo fwesi.”

46Kawola, “Akhoo khwinywe mwesi avekesi vamalako! Sikira muchwikhanga avanju emisiko ekivachanyala okhukinga, ne enywe mwavene simutiranga khumisiko ekio ata nolwala lwenywe ta. 47Akhoo enywe! Mwombakhanga evirindwa viavanabii ava papa venywe vecha. 48Kho muli avaloli, nundi mufukiriranga evikholwa via ava papa venywe, sikira vavecha, nanywe mwombakha evirindwa viawe. 49Njakakira owukesi wa Nyasaye niwuwola, ‘Ndikhuvachumira avanabii nende avachumwa, ne valala vanakhaveche nende okhuvanyasa.’ 50Mbo amalasire kavanabii vosi, aketiswa okhuchula khumuse kwesialo, kavalirwe khulwiwulo luno, 51okhuchulira khu amalasire ka Abeli okhwola khu aka Sakaria, owafwira akachi wowaali nende Etemperi. Yee evawolera akachia okhuva khulwiwulo luno.

52“Akhoo enywe avekesi vamalako! Sikira mwawukula olufunguo lwowukesi, ne simwengira mwavene ta, nundi mwakayira avo avali nivengiramo.”

53Nga kachula awenao, avekesi vamalako nende Avafarisayo vanja okhumunyasa nende amacheva kevinju evingi, 54Nivamucheka, khumakhuwa komunwa mbo vanyolemo evi.

നിലവിൽ തിരഞ്ഞെടുത്തിരിക്കുന്നു:

Luka 11: LNTPP

ഹൈലൈറ്റ് ചെയ്യുക

പങ്ക് വെക്കു

പകർത്തുക