Yohana 9
9
Yesu Awonia Owewulwa Omuofu
1Olu kali navichao, kawona omusacha omuofu okhuchula nikewulwa. 2Ne avalondi vave vamucheva, “Omwekesi, owakhola owoni njanu, omusacha ono namwe avewusi vave, kho kewulwa omuofu?” 3Yesu kachipa, “Sikali mbo omusacha ono kakhola owoni namwe avewusi vave ta, nausa mbo emilimo kia Nyasaye kiwonekhane muniye. 4Khukhoya khwakhola emilimo kia oyo owanjuma, niyisiri esiteche, esiro sicha, olu awumao onyala okhukhola emilimo. 5Nisiri musialo, nise owulafu wesialo.” 6Olu kawola kano, kafucha khwilova ne kalomba etosi namache kake, kavakha khumoni chiomusacha oyo etosi elio. 7Kamuwolera, “Chia, osave mutiva lia Siloamu” (eliwola Okhuchuma). Kho kachia, kasava ne kakoola nawona. 8Avolukongo nende avo avamuwonanga nasava, vawola, “Ono sinje omusacha owekhalanga nasava?” 9Valala vawola, “Eee, nje niye”, avandi vawola, “Tawe, nausa afwanana wusa naye.” Naye kawola, “Nise omusacha oyo.” 10Vamuwolera, “Kavaye kachie emoni chichio chikukhire?” 11Kavachipa, “Omusacha yivalanga Yesu alombire etosi ne kavakha emoni chiange ne kambolera, ‘Chia Siloamu mana osave’, kho nachia ne nasava ne nanja okhuwona.” 12Navo vamucheva, “Ali ena?” Kawola, “Ese simanyire tawe.”
Avafarisayo Valeveresa Owuwonia
13Vamuyira khu Avafarisayo omusacha wali omuofu. 14Khanu yali enyinga ya Sabato, olu Yesu kalomba etosi ne kekula emoni chichie. 15Avafarisayo nundi vamucheveresa nganyoye okhuwona khukhwe. Naye kavawolera, “Achaye etosi khumoni chiange, ne esavire, ne embona.” 16Valala khu Avafarisayo vawola, “Omusacha ono siachula khu Nyasaye tawe, sikira siaria esabato tawe.” Nausa avandi vawola, “Kava kachie omunju wowoni okhukhola evikholwa vichi?” Khwava neliawukhana munivo. 17Kho nundi vawolera omusacha muofu, “Owola ochie khumusacha ono okhuvera kekuye emoni chichio?” Kawola, “Nabii niye.”
18Avayahudi sivasuvira mbo kali muofu ne anawonanga tawe, okhwola valanga avewusi vomusacha wali nanyoye okhuwona, 19ne vavacheva, “Ono njomwana wenywe, owewulwa omuofu; kava kachie khanu awona?” 20Avewusi vachipa, “Khumanyire mbo ono njomwana wefwe, ne mbo kewulwa omuofu; 21ne khanu nga kali mbo anawonanga efwe sikhumanyire tawe, nundi sikhumanyire owikuye emoni chichie tawe. Mucheve, akhulire, alikhuwola omwene.” 22Avewusi vave vawola kano sikira vali vachichikanire Avayahudi, sikira Avayahudi vali vavisisie mbo niva omunju yesiyesi keyama mbo nje Kristo, vali okhumuchusa musinagogi. 23Kho avewusi vave vawola, “Akhulire, mucheve.”
24Kho olwakhaviri valanga omusacha oyo owali omuofu, ne vamuwolera, “Weresa Nyasaye oluyali, khumanyire mbo omusacha ono mwoni.” 25Naye kavachipa, “Niva mbo mwoni, ese simanyire tawe. Ese simanyire siri mbo, nali muofu ne khanu embona.” 26Vamuwolera, “Akhukholire achie? Kekuye achie emoni chichio?” 27Naye kavachipa, “Evawoleye khale, ne simuwulira tawe. Sikira sina nimwenya okhuwulira nundi? Mwesi mwenya okhuva avalondi vave?” 28Ne vamutukha, nivawola, “Oli mulondi wuwe, nausa efwe khuli valondi va Musa. 29Khumanyire mbo Nyasaye kalomaloma khu Musa, nausa khumusacha ono sikhumanyire eyiachula tawe.” 30Omusacha oyo kavachipa, “Esikira sina, sino siokhuwuka! Simumanyire eyiachula, ne mana kekuye emoni chiange. 31Khumanyire mbo Nyasaye siawuliranga avoni tawe, ne niva yesiyesi kenamira Nyasaye, ne akhole elienya lilie, Nyasaye amuchekeresanga. 32Khuchawulirakho okhuchula esialo nisianja mbo omunju yesiyesi kekula emoni chiomunju wewulwa omuofu. 33Niva omusacha ono siwa Nyasaye ta, sikakhakholire siosisiosi ta.” 34Navo vamuchipa, “Ewe wewulwa muwoni owukali, ne wenya okhuchusomia efwe?” Ne vamutupa njie.
Owuwofu Womwoyo
35Yesu kawulira mbo vamutupire erwanyi, nolu kamunyola kawola, “Osuvira mu Omwana womunju?” 36Naye kachipa, “Ne naye njanu, omukali, kho esuvire muniye?” 37Yesu kamuwolera, “Wakhamuwona, ne nje okhulomalomakho ono.” 38Omusacha oyo kawola, “Omwami, esuviye”, ne kamwinamira. 39Yesu kawola, “Sikira yokhukhalaka, nacha musialo muno, kho avo avachawona vole okhuwona, navo avawona vole okhuofula.” 40Valala khu Avafarisayo aambi naye vawulira ne vamuwolera, “Fwesi khuli vaofu?” 41Yesu kavawolera, “Muva nimuli avaofu, muva muwuma owuvi; nausa khanu sikira muwola mbo, ‘Khuwona,’ owuvi wenywe wutong'a.
നിലവിൽ തിരഞ്ഞെടുത്തിരിക്കുന്നു:
Yohana 9: LNTPP
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
©The Bible Society of Kenya, 2024
