Yohana 5
5
Yesu Awonia Omunju Aativa
1Kano nikakhawa yalio esao lia Avayahudi, ne Yesu kachia Yerusalemu.
2Mana Yerusalemu eyo, aambi nomuliango okuvalanga mbo Omuliango Kwekondi etiva lilio, mu Oluebrania mbo Bethzatha, eliali nevikoro vichanu. 3Muvikoro omwo vali vakoniremo avachenyalira, avaofu, avaleme, avafwokoya. [Vali valindire amachi katumbulwe 4Esikira khase, engelosi ya Omwami yekhanga mana yitumbuula amachi. Omunju yesiyesi owasenangamo owamberi kasosanga owulwaye wosiwosi owu kali nalwala.] 5Omusacha mulala kalimo, owali nikakhalwala emiaka amakhumi katachu namunane. 6Olu Yesu kamuwona ne kamanya mbo kali kakhakonao oluono, kamucheva, “Wenya okhuwona?” 7Omulwaye kamuchipa, “Omukali, embuma omunju wokhunyingisa mutiva amachi nikakhatumbuukha, olu mba kho nenya okhuchiamo, nowundi asenamo emberi wange.” 8Yesu kamuwolera, “Yinyokha owukule omukeka kukwo, ne okende.” 9Ne aonao kawona, kawukula omukeka kukwe kakenda.
Mana enyinga eyo yali Esabato. 10Kho Avayahudi vawolera omunju wali nawonire, “Sabato niyo, siwulayi okinge omukeka ta.” 11Naye kavachipa, “Omunju owumbonisie kamboleye, ‘wukula omukeka kukwo okende.’” 12Vamucheva, “Omunju okhuwoleye, ‘Wukula omukeka kukwo okende,’ njanu?” 13Khanu omunju oyu vali nivawonisie sikali namanyire omuwonisie tawe, sikira Yesu kali achulireo okhuvera esituma siali sichireo. 14Enyuma wako, Yesu kamunyola mu Etemperi ne kamuwolera, “Mbona oli wulayi! Ochakhola owoni nundi tawe, kho esinju sindi esivi sichakhunyola ta.” 15Omusacha oyo kachulao ne kawolera Avayahudi mbo nje Yesu owali namuwonisie. 16Sino njesikira Avayahudi nivanja okhuviyira Yesu, sikira kakhola kano olutalo lwa Esabato. 17Yesu kavachipa, “Papa wange asikhola emilimo ne sesi khola emilimo.” 18Sino njesiakira Avayahudi vatakha olukali okhumwicha; okhukhalaka elako lie Sabato nundi kalanga Nyasaye achi Papa wuwe, nikekerania khu Nyasaye.
Owunyali wa Omusoliri
19Yesu kavawolera, “Ng'aling'ali, lekhavawolere, omwana sianyala okhukhola siosisiosi khululwe tawe, nausa esi awona simwana nakhola; esikira siosisiosi siakhola, omwana yesi akhola achio. 20Sikira Simwana kasima Omwana, ne amwekesanga viosi evi mwene akhola, ne evikholwa evikali okhukhira ano alikhumwekesa, kho muwuke. 21Nga simwana kenyosa avafu ne avawa owulamu, ndwolu omwana aana owulamu khuyukenya. 22Simwana siakhalakiranga yesiyesi, nausa kalekhera omwana wuwe okhukhalaka, 23kho vosi vawerese omwana oluyali, nga vaweresa Simwana oluyali. Oyo ochaweresa Omwana oluyali awuma oluyali khu Simwana wamuchuma. 24Ng'ali evawolera, oyo owulira amakhuwa kange ne kasuvira oyo owanjuma, ali nowulamu wa wuli lwosi; siali okhwingira mwikhalakirwa tawe nausa avichire okhuchula mulufu kengira muwulamu.
25“Ng'aling'ali, vawolera, evise vicha, ne mbano violire, olu avafu vawulira omwoyo kwa Omwana wa Nyasaye, navo avawulira vamenya. 26Sikira nga Simwana ali nowulamu mumwene, kho kakhaweresa Omwana yesi okhuva nowulamu mumwene, 27ne kakhamuweresa owunyali okhuvisia evikhalako, sikira nje Omwana womunju. 28Muchawuka khukano ta, sikira evise vicha olu vosi avali muvirindwa valiwulira omwoyo kukwe 29nevachulemo, avo avakholire amalayi, khusisimukha liowulamu, navo avo avakhola amavi, khusisimukha liekhalakirwa.
Avaveri va Yesu
30“Sinyala okhukhola siosisiosi khumaani kange ta, nga mbulira, ndwolu khalaka. Okhukhalaka khwange khuli awene, sikira sindakha elienya liange ta nichasi elia oyo owanjuma. 31Ninechusira owuloli samwene, owuloli wange siwang'ali tawe. 32Aliwo owundi owunjusira owuloli, nemanyire mbo owuloli owu mbana khwise wang'ali. 33Mwachuma avanju khu Yohana, ne kakhaana owuloli khuwung'ali. 34Sikali mbo owuloli owu nyoye wuchula khumunju ta; ne embola enjio kho muwoniwe. 35Kali etaa yatukha niyikhosa ne mwafukirira okhusangala nimusiri muwulafu wuwe. 36Nausa owuloli wundi ni nawo wukali okhukhira owa Yohana; sikira emilimo eki Papa kambaye okhukhola, emilimo kino ndakholanga, kichusa owuloli mbo Papa kanjuma. 37Ne Papa owanjuma omwene kanjusira owuloli. Omwoyo kukwe muchawulirakho ta, efwani yiye muchayiwonakho ta. 38Ne ekhuwa lilie sirimenyire mwinywe ta, sikira simusuvira oyo oyu kachuma tawe. 39Mutakha mumaandiko sikira mupara mbo muniko mulikhunyola owulamu wa wuli lwosi, nenje akaana owuloli khwise. 40Ata kachio, mulova okhwicha khwise mbo munyole owulamu. 41Sinyola oluyali okhuchula khuvanju ta. 42Nausa emanyire mbo muwuma owusimi wa Nyasaye mwinywe. 43Nichire mulicha lia Papa, ne simufukirira tawe. Oluwundi ali okhwicha mulicha lilie omwene, oyo mulikhumweyama. 44Munyala muchie okhusuvira, avawukula oluyali okhuchula khu mwavene, ne mulove okhutakha oluyali luchula khu Nyasaye yeng'ene? 45Muchapara mbo ndikhuvasitaka khu Papa ta, Musa njovasitaka, ne njoyu mwachakho esuvira lienywe. 46Muva nimwasuvira Musa, mwakhasuviye sesi, sikira kaandika akalondana nange. 47Ne nimuchasuvira amaandiko kake tawe, musuvira muchie amakhuwa kange?”
നിലവിൽ തിരഞ്ഞെടുത്തിരിക്കുന്നു:
Yohana 5: LNTPP
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
©The Bible Society of Kenya, 2024
