Yohana 19
19
1Kho Pilato kawukula Yesu ne vamuchapa. 2Navamahe valukha ekutwa yamawa, vayicha khumuchwe kukwe, vamufwala ekanju yerangi yesambarau; 3vamwichakho nivawola, “Omwami wa Avayahudi ayindire!” Ne vamukhupa embi. 4Pilato kachula erwanyi nundi, kavawolera, “Wone, emuchusa erwanyi khwinywe, kho mumanye mbo njanyola ekoso ninaye ta.” 5Kho Yesu Kachula erwanyi, nafwaye ekutwa yamawa nekanju yerangi yesambarau; 6Olu avakuhani vakhongo navamahe va Etemperi vamuwona, vayula, “Mumuvambe, mumuvambe!” Pilato kavawolera, “Muwukule mwavene mumuvambe, sikira ese simbona ekoso lilie ta.” 7Avayahudi vamuchipa, “Khuli nelako, nelako elio liwola mbo okhwola afwe, sikira kekholire Omwana wa Nyasaye.” 8Olu Pilato kawulira amakhuwa ako, kava nowuchi owukali; 9kengira munju wuwe nundi kacheva Yesu, “Ochula ena?” Nausa Yesu kawulera wusa. 10Pilato kho nonu kamuwolera, “Siwunomalomakho tawe? Omanyire mbo ndi nowunyali wokhukhulekhula, ne nowunyali wokhukhuvamba?” 11Yesu kamuchipa, “Ovowuma owunyali khwise, nichasi owuwanyola okhuchula ekulu; khokhanu owusitakire khwiwe ali nowoni wukali.”
12Lino liakira Pilato katema okhumulekhula, nausa Avayahudi vayula, “Nulekhula wusa omusacha ono, sulimwicha wa Kaisari ta, yesiyesi owekhola omuchuki kekerania khu Kaisari.” 13Olu Pilato kawulira amakhuwa kano, kachusa Yesu erwanyi ne kekhala khusisala sisie siowuchuki awunju aa valanga mbo Oweru wa Makina, mu Oluebrania, Gabbatha. 14Khanu yali enyinga yokhwechekekha Pasaka, yali aambi saa sita. Kawolera Avayahudi, “Nguno omwami wenywe!” 15Navo vayula, “Muchuse ano, muchuse ano, muvambe!” Pilato kavacheva, “Ndikhuvamba omwami wenywe?” Avakuhani vakhongo vamuchipa, “Khuwuma omuchuki nichasi Kaisari.” 16Kho kavaweresa Yesu vamuvambe.
Vavamba Yesu Khumusalaba
(Mat. 27.32-44; Mrk. 15.21-32; Lk. 23.26-43)
17Kho vawukula Yesu, kachula nakingire omusalaba kukwe, kachia awunju alangwa mbo awunju wesianga, eliwola muluebrania Golgotha. 18Ao vamuvamba, navandi vaviri, mulala wuli luveka wuwe, ne Yesu akachi wawe. 19Pilato kaandika owuandike ne kacha khumusalaba niwusoma, “Yesu wa Nazareti, Omwami wa Avayahudi.” 20Owungi wa Avayahudi vasoma elio, sikira awunju aa Yesu kavambirwa ali aambi netookho, ne liaandikwa mu Oluhebrania, Olulatini nende Olugiriki. 21Avakuhani vakhongo ava Avayahudi kho vawolera Pilato, “Ochaandika mbo ‘Omwami wa Avayahudi ta,’ aandika, ‘Omusacha ono awola mbo nise omwami wa Avayahudi.’ ” 22Pilato kavachipa, “Esimbandikire, embandikire.”
23Olu avamahe vali nivakhavamba Yesu, vawukula enguo chichie nevakavamo ali khane, silala khu wuli musikari; nundi ekanju yali yiwumakho ekemo, yanavwa okhuchula amukulu okhwola aasi; 24Kho vawoleranira, “Khuchayosula ta, nausa kende khukhupe ekura, khuwone yikwira anu.” Lino liali okhwoseresa eliaandikwa mbo,
“Vakavana enguo chiange khuvene,
Nenguo chiange vakhupirakho ekura.”
25Kho avamahe vakhola vachio. Nausa aa musalaba vali vemireo, ng'ina, ni wandaye wa ng'ina, Maria omukhasi wa Kleopa, nende Maria Magdalena. 26Olu Yesu kawona ng'ina, nende omulondi oyu kasima nivemire aambi, kawolera ng'ina, “Mayi ewe, wona omwana wuwo!” 27Mana kawolera omulondi wuwe, “Wona, mayiwo!” Ne okhuchula evise evio omuchumwa oyo kamuyira mungo yiye.
Efwa lia Yesu
(Mat. 27.45-46; Mrk. 15.33-41; Lk. 23.44-49)
28Kano nikakhawa, Yesu namanyire mbo kosi khanu kaweye, kawola (kho endakaano yosereswe), “Embulira owuluwo.” 29Ebakuli niyichuye edivai enyangu yalio, mana venamo esiwoo siomuvinuvinu vamucha khumunwa. 30Olu vali nivakhamukhombia edivai enyangu eyo, kawola, “Kaweye”, ne kenamia omuchwe kukwe mana kafwa.
Yesu Awunwa Mumbafu
31Lwali olutalo lwa khachanu, kava mbo emiviri ekio kichatong'a khumusalaba endalo ya Esabato (Esabato eyo yali enyinga engali) Avayahudi vacheva Pilato mbo amakulu kawe kafunakwe, mbo kho vachusiwe khumusalaba. 32Kho avamahe vacha vafunaka amakulu kowamberi, nende akowundi avali nivavambirwe ninaye; 33nausa olu vola khu Yesu vawona mbo afwiye khale, sivafunaka amakulu kake tawe. 34Nausa mulala khuvamahe kamuwuna muluvafu nefumo, ne amalasire nende amachi vietikha. 35Oyo owawona kano achusa owuloli, nowuloli wuwe wang'ali, namanyire mbo awola owung'ali, mbo mwesi musuvire. 36Sikira evinju vino viakholekha mbo endakaano yosereswe, “Siwumao esikumba sisie esilikhalakwa.” 37Ne nundi endakaano yindi eyiwola mbo, “Vachia khulengera khuyo oyu vawunire.”
Okhusikhwa khwa Yesu
(Mat. 27.57-61; Mrk. 15.42-47; Lk. 23.50-56)
38Kano nikakhawa Yosefu wa Arimathaya, owali omulondi wa Yesu muwekisi, sikira yokhuria Avayahudi, kacheva Pilato nanyala okhuchusa omuviri kwa Yesu ao, ne Pilato kamufukirira. Kho kacha kawukula omuviri okwo. 39Nikodemu yesi, owachangira kamwichakho musiro, kacha nalecha amarashi kakhupanire nende owuvani aambi ekilo amakhumi katachu. 40Vawukula omuviri kwa Yesu, ne vakuwoya musanda namarashi, nga kwali omwima kwokhusikha Avayahudi. 41Khanu awunju aa kavambirwa kwalio omukunda, ne mumukunda esirindwa esiyakha esimuviri kwosikwosi kwali kusiri okhuvikhwakhomo tawe. 42Kho sikira yendalo ya Avayahudi yokhwechekekha, sikira njesirindwa siali aambi, vasikha Yesu muwenomwo.
നിലവിൽ തിരഞ്ഞെടുത്തിരിക്കുന്നു:
Yohana 19: LNTPP
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
©The Bible Society of Kenya, 2024
