Evikholwa 5
5
Anania nende Safira
1Nausa omusacha mulala owalangwa Anania nende omukhaye wuwe Safira vakusia esitonye khumukunda kwawe, 2omukhaye wuwe namanyire wulayi wene, Anania kavikha esikero khusende echi kanyola, kayira esikero siasikala emberi wavachumwa. 3Petero kawola, “Anania, mbo sina Setani nikechuye mumwoyo kukwo okhwola waveya Roho Muchwenufu, nundi wavikha esikero khusende chiomukunda? 4Olu kwali ni kuchakusiwa sikwali kukwo tawe? Ne nundi niwakhakusia, esende echio sichiali chichio wakhakholeye esi wenya? Kho khanu sikira sina wapara okhukhola ekhuwa ngelieneri mumwoyo kukwo? Suveyire avanju ta, oveyire Nyasaye.” 5Olu Anania kawulira amakhuwa kano, kakwa aasi kafwa. Vosi avakaulira vechula owuchi. 6Avawukha venyokha, vamuwikha ne vamuyira erwanyi okhumusikha. 7Esaa chitachu nichiakhavicha, omukhaye wuwe kengira nachamanyire akakholekhire. 8Petero kamuwolera, “Mbolere niva mbo mukusisie omukunda esikero sino.” Ne kawola, “Yee, khukusisie esikero esio.” 9Petero kamuwolera, “Kali kachie mbo mweyamanire okhutema Roho wa Omwami? Chekeresa, avo avasikhire omusacha wuwo vasiri aamuliango, mana vanakhukinga wesi.” 10Evise evio kakwa avirenge via Petero kafwa. Olu avawukha vengira, vanyola nafwiye, vamuyira erwanyi nokhumusikha aambi nomusacha wuwe. 11Owuchi owungi watira ekanisa liosi nende vosi avawulira ako.
Amangayimwa nende Akokhuwukia
12Khanu evimanyiro nende amangayimwa viakholekhana muvanju okhuvichira mumakhono kavachumwa. Ne vosi vasanga alala muweru wa Solomoni. 13Sialikhoo owerwanyi owatema okhweunga navo tawe, nichasi avanju vachianakana okhuvawa oluyali muno. 14Avasuviri vachianakana okhumetekha khu Omwami, avasacha navakhasi avangi, 15vakinganga ata avalwaye nivavayira khumianda nokhuvalisa khuvitanda, nende khumikeka mbo Petero navicha, ata esisiko sisie siong'ene sitirekho khu valala. 16Avanju avangi vacha okhuchula mumatookho kali aambi nende Yerusalemu, valecha avalwaye nende avo avanyakhana nende roho mayanu, ne vosi vanyola owuwonia.
Avachumwa Vanyasiwa
17Nausa omukuhani mukhongo kenyokha nende vosi ava kali navo, njavomukanda kwa Avasadukayo vali ao, nivechuyemo euva 18vatira avachumwa nokhuvawoa musiwoo siavanju vosi. 19Musiro, Engelosi ya Omwami yekula emiliango kiesiwoo yavachusa erwanyi nokhuvawolera, 20“Chie mweme mu Etemperi muwolere avanju amakhuwa kosi Akowulamu wuno.” 21Olu vawulira kano, vengira mu Etemperi mumaweriweri vekesa.
Khanu omukuhani mukhongo kacha nende vosi ava kali navo kalanga esikhaso siavakofu vosi Avaisraeli, kachuma avanju musiwoo vachie valeche avachumwa musikhaso. 22Olu avemirisi vola musiwoo, sivavanyolamo tawe, vakoola valecha ekhuwa, 23“Khunyoye esiwoo nisikaywe owulayi ne avamahe vokhumuliango vavaye valindire, nausa olu khwikuyeo sikhunyoyekhomo omunju ta.” 24Olu omwimirisi wetemberi nende avakuhani vakhongo vawulira amakhuwa ako, vesindukha muno, nivawuka mbo sina esiekholekhire. 25Omunju mulala kacha kavawolera, “Avanju ava muchaye musiwoo khuvise vino vali mu Etemperi vanekesanga avanju.” 26Kho, omwimirisi nende avayetereri vave vachia okhuvalecha, ne sivali nemiero ta, esikira vali variye mbo avanju vanyala okhuvakhupa amakina. 27Olu vali nivakhavalecha, vavemesa emberi wesikhaso. Omukuhani mukhongo kavacheva, 28nawola, “Khwavakania owutinyu okhwekesa mulicha lino, ne ninywe vano mwichusise Yerusalemu nende amekeso kenywe khanu mwenya okhulecha amalasire komunju ono khwifwe.” 29Petero nende avachumwa vachipa, “Khwenyekha khurie Nyasaye okhuvicha avanju. 30Nyasaye wavakuka vefwe kasisimusa Yesu oyu mwavamba khumusala. 31Nyasaye kamukingula khumukhono kukwe mulungi nga Omwimirisi nende Omuwonia, okhuweresa Avaisraeli eliekanira nende okhuverwa owoni. 32Efwe khulivaveri khuvinju vino, alala nende Roho Muchwenufu oyu Nyasaye kaanira avo avamuria.”
33Olu vawulira ako, vali nechima mana vatakha okhuvecha. 34Nausa Omufarisayo mulala musikhaso oyu valanga Gamalieli, omwekesi wamalako, oyu avanju vosi vawa oluyali, kenyokha mana nawola achi avanju vano vachusiwe erwanyi khusikha esititi. 35Kavawolera, “Vana va Israeli, ve meso khu aka mukholera avanju vano. 36Okhuvera anyuma ao Theuda kenyokha, kekingula mbo njomusacha, mana avanju avolana emia chine, vesanga naye, nichasi kechwa ne vosi avali nivamulonda vasalana vawa vosi. 37Enyinga nichiakhavicha nundi Yuda, Omugalilaya, kenyokha munyinga chiowuvali mana kakhwesa avanju vamulonda, yesi kechwa, ne vosi avamulonda vasalana. 38Kho khu akesayino kano vawolera, yevaye navanju vano mana mulekhane navo; esikira mbo niva amakhuwa kano kavanju kanawa akene. 39Nausa niva ka Nyasaye, simunavakhaya ta. Munyala okhwenyola ata nimunayingananga nende Nyasaye!”
40Kho vawukula ekerako lilie, nolu valanga avachumwa, vavakhupa eviwoko mana vavakhalakira mbo vachalomalomakho nundi mulicha lia Yesu tawe, vavalekhula. 41Vachula musikhaso nivasangaye mbo vavalikhire okhwolana okhuambwa esoni khulwelicha lia Yesu. 42Kho musialo mu Etemperi nende engo sivalekhakho okhwekesa nende okhwirwacha Yesu mbo nje Kristo ta.
നിലവിൽ തിരഞ്ഞെടുത്തിരിക്കുന്നു:
Evikholwa 5: LNTPP
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
©The Bible Society of Kenya, 2024
