Evikholwa 3
3
Omusavi Muleme Awonisiwa
1Petero nende Yohana vali vachia mu Etemperi evise viamasayo esa ya tisa musiteche. 2Ne evise vienevyo omunju muleme okhuchula nikewulwa kali akingirwe. Vamwalisanga nausia musiriwa sietemberi esi valanganga vachi “Esiriwa Silayi,” mbo asave siosisiosi khwavo avacha mu Etemperi. 3Olu kawona Petero nende Yohana nivengira mu Etemperi kavasava vamuwekho siosisiosi esivali nasio. 4Petero nende Yohana vamukhang'asa mumoni ne vawola, “Chulengere wulayi wene.” 5Yesi kavakhang'asa wulayi wene namanyanga achi anavanyolakho esinju. 6Petero kamuwolera, “Sindi nende efesa namwe edhahabu tawe, nichasi khuwa esi ndi nasio. Mulicha lia Kristo Omunazareti, yinyokha okende.” 7Kamutira nomukhono mulungi kamwinyosa, muvise vienevyo evirenge vivie alala nende enjeke vianyola amaani. 8Kenyokha lwangu kema, kengira navo mu Etemperi nakenda nokhusuna suna nafumia Nyasaye. 9Avanju vosi avaliwo vamuwona nakenda nokhufumia Nyasaye, 10olu vamanyirisa mbo njomunju owekhalanga aa Esiriwa Silayi, vesindukha nokhuwuka nivachamanya esimwekholekhirekho.
Ekhuwa lia Petero mu Etemperi
11Olu kali ni asikhayiye khu Petero nende Yohana, avanju nivasiri muwuchi, vatima vewusa khuwaali owu valanganga vachi “Esikoro sia Suleimani.” 12Olu Petero kawona achio kavawolera, “Avanju va Israeli, mbo sina nimwesindukha khukano, ne nundi mbo sina nimuchulengera muchio ochi fwana akendire khumaani kefwe namwe owuchwenufu wefwe avene? 13Nyasaye wa Abrahamu nende Isaka nende Yakopo, Nyasaye wa avakuka vefwe omukhalavani wuwe kamukingula Yesu ono, oyu mwaana mana mwamulova emberi wa Pilato, olu kali nikenya okhumulekhula. 14Mana mwalova oyo owali omuchwenufu nundi omulungi, ne mwasava mbo vavalekhulire omwichi, 15mwecha omwanjirisi wowulamu, ne Nyasaye naye kamusisimusa okhuchula muvafu. Omwene ono ngwoyu khunakholeranga owuveri. 16Elicha lia Yesu, nende esuvira mulicha elio, njevikholire omunju ono kakenda, nesuvira liokhuvichira mu Yesu liwaye omunju ono owulamu wawene mwesi nga muwona.
17“Kho khanu vasiefwe, manyire nji mwakholera mukhukochwa ngavachuki venywe vosi vakhola. 18Nausa aka Nyasaye kawola okhuvichira khuvanabii vave, mbo Kristo anakhavichire khusinyasio, koseresiswe. 19Kho khanu yekanire, mana mukoolere Nyasaye, muverwe owoni wenywe, kho munyole oweyangu wokhusangala emberi wa Omwami, 20avachumire Kristo oyu kachoola omwene, Yesu. 21Vienyekhire asikale mwikulu okhwola evise viokhwoseresa ako kosi aka Nyasaye kalaka okhuvichira khuvanabii vave vachwenufu okhuchula khale. 22Musa kawola, ‘Omwami Nyasaye achia okhukingula omunabii mulala khu avasienywe nga kangingula ese. Mumuchekerese khu kosi aka avawolera. 23Yesiyesi ochalonda amakhuwa ka omunabii oyo, anakhawulwe muvanju va Nyasaye kononokhere eyo.’ 24Avanabii vosi avalomaloma, okhwanja nende Samueli nende vosi avalondakho valomaloma khumakhuwa kanekholekhanga enyinga chino. 25Endakaano eyi Nyasaye kalaka okhuvichira khuvanabii yali yenywe, ne mwesi muli mundakaano eyi Nyasaye kalomba nende avakuka venywe nawolera Abrahamu, ‘Okhuvichira khulwiwulo lulwo, ekholo chiosi echiomusialo chinakhanyole ekhavi.’ 26Kho Nyasaye kachoola omukhalavani wuwe, kachangirira kavachumira enywe, mbo avalechere ekhavi, nundi avachuse siawuli mulala mumbi chienywe.”
നിലവിൽ തിരഞ്ഞെടുത്തിരിക്കുന്നു:
Evikholwa 3: LNTPP
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
©The Bible Society of Kenya, 2024
