Evikholwa 23
23
1Paulo kakhang'asa avesikhaso mana kavawolera, “Vasiange, nakhamenya emberi wa Nyasaye munganakani chiange nindi wulayi okhwola evise vino.” 2Awenao, omukuhani mukhongo, Anania, kawolera avali nivemire aambi nende Paulo mbo vakhupe omunwa kukwe. 3Paulo kawola, “Nyasaye yesi alikhukhupa, ewe, oli ngeta eli vavakhire echokaa! Wikhaye ano okhukhalakira okhulondana nende amalako, ne nundi wesi okhalaka amalako kachana nuwola mbo vakhupe?” 4Avali aambi naye vawola, “Onyala okhukholera enjekheresi omukuhani mukhongo owa Nyasaye?” 5Nausa Paulo kawola, “Simanyirenge vasiange mbo njomukuhani mukhongo ta, sikira liaandikwa, ‘Ochaliwola amavi khumuchuki wavanju vavo ta.’ ”
6Olu Paulo kamanya mbo valala valimo Avasadukayo navandi Avafarisayo, kawolera avesikhaso, “Vasiaange, ese ndi Mufarisayo, omwana wa Avafarisayo. Ndi musiina muno okhulondana nesuvira liange mukhusisimukha khwavafwa.” 7Olu kali nikakhawola kano, owawukhani wavao akachi wa Avafarisayo nende Avasadukayo, khanu esikhaso siakawukhanamo. 8Esikira Avasadukayo vawola vachi esisimukha liwumao, engelosi chiosi chiwumao, ata Roho awumao. Avafarisayo navo vafukirira amakhuwa ako kosi. 9Oluyoka lwametekha. Avekesi valala vamalako ka Avafarisayo venyokha mana vayingana, “Sikhunanyolangakho owuvi wosiwosi khumunju ono ta. Kanyala kava mbo ng'ali eroho namwe engelosi chiamulomalomera?” 10Olu amayingano kachianakana olukali, omukali wavamahe, nariye achi avanju valikhwosulamo Paulo, kachusa ekhuwa mbo avamahe vachie aasi vamuwukule namaani vamukoose amukulu musiwoo.
11Esiro sialondakho Omwami kamwichakho kamuwolera, “Ocharia ta, nga wukholeye owuloli Yerusalemu, nundi kenyekha wukholere Ewuroma.”
Vakhova Okhwicha Paulo
12Olu wanukha, Avayahudi vakhova mana vechuva mbo sivachia okhulia namwe okhunywa siosisiosi ta okhwola veche Paulo. 13Khwali navanju avavicha amakhumi kane avalomba etolondo yino. 14Vachia khu avakuhani vakhongo nende avasakhulu vavawolera, “Khwechuvire mbo sikhuli okhulia siosisiosi ta okhwola khwiche Paulo. 15Khanu enywe alala nende avesikhaso chume ekhuwa khumukali wavamahe amuleche aasi ano yive nga muchia okhumukhalakira owulayi. Nafwe khulikhuva khwichekekhire okhumwicha nasiri khwola eyi muli.”
16Omwana womukoko wa Paulo kawulira akavali ni vakhova, kachia amukulu musiwoo kawolera Paulo. 17Paulo kalanga mulala khuvamahe kamuwolera, “Yira omwana ono emberi womukali wavamahe, alikho nesinju esikenya okhumuwolera.” 18Kamuwukula kamuyira khumukali wavamahe mana kamuwolera, “Paulo, omuwoe, kanangire kambolera achi ndeche omwana ono emberi wuwo, alikho nende eli kenya okhukhuwolera.” 19Omukali wavamahe kamutira omukhono kasuta naye aluveka mana kamucheva muwekisi, “Njesianu esi wenyirenge okhumbolera?” 20Kawola, “Avayahudi veyamanire okhukhucheva mbo oyire Paulo aasi emberi wesikhaso muchuli, yive ngavachia okhumucheveresa wulayi. 21Nausa ocheyama elienya liawe ta, khuli navanju vawe avavicha amakhumi kane avewavire mbo sivali okhulia namwe okhunywa siosisiosi nivachamwicha ta. Esa yino vechekekhire valindire wusa elaka lilio.” 22Omukali wavamahe kamulekhula nokhumuwolera, “Ochawolerakho omunju yesiyesi ochi wumboleye kano ta.”
Paulo Ayirwa khu Omuchuki Felisi
23Kalanga avamahe vaviri kavawolera, “Ni chiakhola saa tatu chiesiro, chekekhe avamahe emia chiviri, nende avefarasi amakhumi saba alala nende avamafumo emia chiviri vachie okhwola Kaisarea. 24Chekekhe efarasi chindi echikinga Paulo mumuleche mumwose owulayi emberi wa gavana Felisi.” 25Ne kaandika ebarua yilondana nakenako.
26“Ese Klaudio Lusia, khu owoluyali Felisi, gavana welambo. Emilembe. 27Omunju ono kali atiywe nende Avayahudi nivenya okhumwicha, navanyoleresa nindi navamahe mana khwamunanula nikhwakhamanya mbo Muroma niye. 28Olu nali ninenya okhumanya amakoso kake, namulecha emberi wesikhaso siawe. 29Nanyola mbo vali vamukhalakira okhulondana nende amakhuwa kamalako kawe, nichasi sikalikho nende liosi eliolanire okhumwicha namwe okhumuwoa ta. 30Olu ekhuwa lianjolera mbo vakhova okhumwicha, namuchuma emberi wuwo lwangulwangu, nokhulakirisa avenya okhumukhalakira mbo vakhuwolerekho amakoso kake.”
31Avamahe vakhola nga vali nivalakirisiswe, vawukula Paulo vamulecha esiro esio vola Mwitookho lia Antipatri. 32Niwakhanukha vakoola enasiwoo valekha avefarasi nivachiririra naye khulukendo. 33Vola Kaisarea vaana ebarua khu gavana, nokhuana Paulo yesi emberi wuwe. 34Olu kasoma ebarua kacheva Paulo achi achula luveka sina. Nikakhamanya achi kali achula Kilikia 35kawola, “Ndi khukhuchekeresa avenya okhukhusitaka nivakhola.” Kalaka mbo vamuyire munju ya omuchuki Herode mana vamulinde.
നിലവിൽ തിരഞ്ഞെടുത്തിരിക്കുന്നു:
Evikholwa 23: LNTPP
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
©The Bible Society of Kenya, 2024
