Tito 2
2
Nmister che jare saqlaj tzij kiyitjox mnaq che
1Per ni at Tito, nmister che jare kyatjoj mnaq che saqlaj tzij che jare utzij Dios. 2Chb'ij chke nk'aj ri'j achjab' che inmaq mnaq chik, che utz kik'an ruk' sutaq kik'an chpam kk'asnmal. Nmister che utz kmow kuk' mnaq rech koksax k'ij kmal. Nmister che utz kik'an che uchomxik sutaq kik'ano, nmister che itz'qat ruk' runjel sutaq kik'ano, ruk' kkojb'al, ruk' lo'b'al kk'u'x, soq nmister che kikch'ijo we o k'ax kpi chkij.
3Soq nmister kyatjoj nk'aj ri'j ixqib' che inmaq mnaq chik rech kik'an jun utzlaj k'asnmal chjuch Dios, xaq mik'an tzijtal, xaq miyi'b'arik. Xani jare nmister che kikk'ut utz chikuch nk'aj chik mnaq, ruk' runjel sutaq kik'ano, 4rech jala', o mow kikpixb'ej nk'aj iltom che ik'lunaq chik. Kikk'ut chikuch su mow kik'ano rech kkil'oj kichjil, soq kikk'ut chikuch su mow kik'ano rech kkil'oj taq kal. 5Nmister kikk'ut chikuch che utz kik'an che uchomxik sutaq kik'an chpam kk'asnmal. Nmister kikk'ut chikuch su mow kik'ano rech ch'ajch'oj kk'asnmal, kikk'ut chikuch che nmister kik'an kpi's chitaq kchoch, soq kikk'ut chikuch che nmister kikto' nk'aj chik mnaq ruk' su nmister chke. Nmister kikkoj ktzij kichjil rech jala' ot mow kikb'ij jun k'axlaj tzij mnaq chrij utzij Dios.
6Soq nmister che jala ka'an kuk' nk'aj ch'ut taq ab'om rich'il nk'aj achjab' che ik'ak'al mnaq na. Chyapixb'ej rech utz kik'an che uchomxik sutaq kik'ano. 7Chik'tu jun utzlaj k'asnmal chikuch ruk' runjel sutaq ka'ano. Echi' kyapixb'ej, jare kab'ij tzij chke che jare usuk'mal chjuch Dios, kyach'ab'ej ruk' saqlaj tzij rech kikkoj atzij. 8Echi' katch'aw kuk', utzlaj taq tzij kab'ij chke, rech ot jun mnaq kub'ij tzij chawij at. We jala ka'ano, chin jun kwa'laj chawij, xaq utkel re kuya uk'ix, mal ot mak kriqtaj chawij at. Xa jala', ot jun kikunik kub'ij jun k'axlaj tzij chqij.
9Soq chyapixb'ej nk'aj ajchak che iy'o pik'ab' kpatrón, rech kik'ano runjel su kb'ix chke kmal kpatrón. Kikkoj kchu'ab' che u'anik su kraj kpatrón ruk' ch'uch'uj kanma', rech utz kiyiltaj wi rmal. Ot mow kkik'le'lej uwuch ktzij kpatrón. 10Ot mow kik'an ela', xani jare nmister che kik'an jun utzlaj k'asnmal rech kukub'a uk'u'x kpatrón chkij. Xa jala', kikk'ut chikuch mnaq che kiyichkun ruk' Dios, kikk'utu che mas je'l utayik, utz riltjik, sutaq kub'ij utzij Dios che jare Re ajTo'lqe.
11Ruk' saqlaj tzij, Dios uk'tum chiquch che mas kujraj qunjel jumpa ujumnaq. Ub'im chqe che rmal ri nimlaj ut'ob', kujkoltaj na qunjel. 12Jare nimlaj ut'ob' Dios kuk'ut chiquch che nmister kqaya kan u'anik runjel jumpa sutaq'ik che xa ustaj, soq kqaya kan u'anik jumpa sutaq'ik kqarij uwuch chi' chuchlew. Jare ut'ob' Dios kuk'ut chiquch che nmister che utz kqa'an che uchomxik sutaq kqa'an chpam qak'asnmal, soq kuk'ut chiquch su mow kqa'ano rech kujkunik kqa'an jun sk'umlaj k'asnmal, soq rech kqakoj u'ij Dios ruk' runjel su kqa'an chpam qak'asnmal chi' chuchlew. 13Echi' kqa'an wari', jarela kujtjinik kqak'utu che qi'em kuriq ij che kpi Qajaw Jesucristo che jare uK'jol nimlaj qaDios. Ri Qajaw Jesucristo jare ajTo'lqe, nim u'ij echi' kpitik. 14Ri Qajaw Jesucristo xuya rib' xkamsxik, xa qmal qech qo'j, xa rmal che xujuresaj chpam qamak. Xuch'aj qanma' rech xa jala', o mow kuj'ax chikxo'l utinmit Dios, rech kqakoj qachu'ab' che u'anik utzlaj taq chak.
15Chb'ij chke mnaq runjel su ximb'ij chawe. Chiy'a jun kowlaj k'u'x chke. Chyapixb'ej rech k'alnik we o sutaq'ik kik'ano che xa ustaj. Xa max'ej awib' chikuch, chik'tu chikuch che o atb'altzij pa'ab', rech jala' kunjel kikkoj a'ij.
El Nuevo Testamento
en K'iche' de San Andrés Sajcabajá
© 2024 Asociación Educativa y Cultural Maya (AECM)
en colaboración con SIL Global