Romanos 10
10
1Qachlal, kwaj ruk' runjel wanma', che kikoltaj na nimnaq iyaj Israel. Kimb'och'ij ujlom Dios rech kikoltaj na rmal. 2Kimb'ij saqlaj tzij chkij nk'aj aj Israel. Niwlom chke che mas kiyok'il che utzukxik Dios, per xa kisach che utzukxik. Kisach che, mal kit'am taj su kik'an che utzukxik. 3Ke, kikch'ob' taj su kraj Dios chke, rech kub'ij chke che sk'um kinom chjuch. Xa jala' xaq kitkel ke xkitzkuj kb'e. Xikya t kib' che u'anik su xraj Dios chke rech kuk'utu che isk'um chjuch. 4Ri Jesucristo xuk'is u'anik runjel su kub'ij upxab' Dios. Chanim chik, kunjel mnaq che kiyikjon che Jesucristo, jare Dios kuk'ut chikuch che isk'um chjuch, rmal su xu'on Jesucristo, che jare Re xutz'qatsaj runjel su kub'ij un pxab'.
5U Moisés xutz'ib'aj jun tzij chkij nk'aj mnaq we kikk'is u'anik runjel su kub'ij un pxab'. Jala kub'ij: «Chin jun che kuk'is u'anik runjel su kub'ij upxab' Dios, jare Dios kub'ij che sk'um chjuch, y kuriq na junalik uk'asnmal rmal»,#Lv 18:5. kcha'. 6Per ni Dios kuk'am mnaq, per xa rmal che kikjon che Qajaw Jesucristo, jala peche kub'ij chpam Tyox Wuj: «Mab'ij chpam awanma': ¿Chin kipqe' b'i chkaj?»#Dt 30:12. kcha'. (Mal jare kilwi che peche mow xa kraj kuqasaj loq Qajaw Jesucristo chi' chuchlew). 7Soq xub'ij: «Mab'ij chpam awanma': ¿Chin lo kqaj b'i chpam un jul chla' jachi k'wi kanma' nk'aj kamnaq?» kcha'. (Jarewa kilwi che xa kuresaj loq Qajaw Jesucristo chikxo'l nk'aj kamnaq). 8Ni le', ¿su kub'ij u Moisés chqe? Jarewa ri' kub'ij chqe: «Xa nqaj k'wi utzij Dios chawe. K'ax t uch'ob'ik, mal o chpam awanma'»,#Dt 30:14. kcha'. Jarewa tzij o nqaj chiwe. Jarewa tzij che kujtjin che ub'ixik chiwe, kuya qakojb'al. 9Jare kilwi che we kab'ij ruk' achi' chikuch mnaq che Jesucristo jare Re Awjaw, soq jala' kakoj ruk' runjel awanma' che Dios xuk'suj Qajaw Jesucristo chikxo'l nk'aj kamnaq, katkoltaj na rmal Dios. 10Xa jala' kqakoj ruk' qanma' che Qajaw Jesucristo xkamik xa qmal qech qo'j, tik'ri xk'astaj chikxo'l nk'aj kamnaq rmal Dios, rech jala' jare Dios kub'ij che qo'j ujsk'um chjuch Re. Per ruk' qachi' kqab'ij chsaq chikuch mnaq che jare Jesucristo Qajaw, rech jala' kujkoltaj na rmal Dios.
11Jare Dios kch'aw chrij Jesucristo chpam Tyox Wuj che tz'ib'tal kan ujer che kub'ij: «Kunjel mnaq che kiyikjon che Re, ot kik'ix wi, mal kikoltaj na»,#Is 28:16. kcha'. 12Ot su kri' mnaq che jaljoj kikkil kib'. Nk'aj aj Israel rich'il nk'aj che iyaj Israel taj, xaq ijnam, mal xa jun Kjaw kunjel, we kikkub'a kk'u'x chrij Dios. Re nim utzil kuya na chke kunjel jumpa mnaq che kikta utzil che. 13Jala tz'ib'tal kanoq chpam utzij Dios: «Kunjel jumpa mnaq che kik'an kch'ab'al ruk' Qajaw kito'taj na chpam k'ax»,#Jl 2:32; Hch 2:21. kcha'.
14We mja kiyikjon che Qajaw Jesucristo, ¿su mow kiyikunik kikta utzil che? ¿Su mow kiyikjon che Qajaw Jesucristo we mja kikta utzij su kub'ij? ¿Su mow kikta utzij Qajaw Jesucristo we ot chin ub'im chke? 15¿Su mow kikya ub'ixik utzij Dios chke, we ot chin jun kyutaq b'i che ub'ixik? Jala peche kub'ij chpam Tyox Wuj: «¡Utz upitik jun che uk'mom loq tzij rech nimlaj utzil, mas nim rilik jun che kuya ub'ixik utzlaj taq rson chke mnaq!»#Is 52:7. kcha'.
16Per kunjel taj nk'aj aj Israel xiyikjon che utzlaj taq rson chrij Qajaw Jesucristo. Jala peche xub'ij u Isaías: «¡Ay, Qajaw! ¿Le o jun chke amnaq che xikjon che utzlaj atzij xqab'ij chke?»#Is 53:1. xcha'. 17Nk'aj mnaq kiyikjon che Qajaw Jesucristo, xa rmal mel nab'e kiktatb'ej utzlaj utzij Dios. Jarewa tzij che kiktatb'ej, jare utzij Qajaw Jesucristo. 18Per ni le' kimb'ij: ¿Le ktom t k'ut nk'aj aj Israel che jala kb'ixik? Qtzij ktom chik su xb'ixik, kincha'. Jala peche kub'ij Tyox Wuj che kub'ij:
«Chjuch runjel uwuchlew elnaq b'i rson chrij utzij Dios.
Chpam runjel jumpa tinmit che mas naj ik'wi, o'panaq chik utzij Dios chla' kuk'», (Sal 19:4)
kcha'. 19Per ni le', kinta chik: «¿Le xa xikch'ob' t k'ut nk'aj aj Israel saqlaj tzij pitnaq ruk' Dios chrij ri'?» kincha'. Tik'ri k'ut in kimb'ij che xikch'ob'o, per xa xkaj taj xiyikjon che. Xa rmal che xub'ij u Moisés che jala kik'an na nk'aj aj Israel, echi' jawa xub'ij:
«Kin'an na chiwe che kpi iwiwal chkij nk'aj mnaq che iyaj Israel taj
che jare t jun mero tinmit.
Kin'an na chiwe che kpi iwiwal kmal nk'aj mnaq
rech jun tinmit mnaq che ot mas kin'oj». (Dt 32:21)
Jala xub'ij. 20Tik'ri xub'ij u Isaías ruk' runjel ranma':
«Xinriqtaj kmal nk'aj mnaq che xnikitzkuj taj.
Xink'ut wib' chikuch nk'aj mnaq che xikta t nirson», (Is 65:1)
xcha'. 21Echi' xch'aw u Isaías chkij nk'aj aj Israel, jarewa xub'ij:
«Ujer xinlik' n'ab' che ksik'xik nk'aj mnaq iyaj Israel rech kipi wuk',
per ni ke xa xkik'le'lej ntzij.
Xa jala', xikkoj t ntzij», xcha'. (Is 65:2)
El Nuevo Testamento
en K'iche' de San Andrés Sajcabajá
© 2024 Asociación Educativa y Cultural Maya (AECM)
en colaboración con SIL Global