Santiago 2
2
Ot mow che mas nim kqil jun mnaq chjuch jun chik
1Lo'laj taq wachlal, ri ix che ikub'am ik'u'x chrij Qajaw Jesucristo che nim u'ij, ot mow che mas nim kiwil jun mnaq chjuch jun chik. 2We o jun achi kok b'i iwuk' chla' jachi irqom iwib' che ukjom jun mer'ap rech an pwaq soq ukjom jun utzlaj atz'yaq che mas utz ka'yik, tik'ri o jun chik kok b'ik che xa pobre, soq xa e'l ritz'yaq ukjom, ¿su ki'an ruk'? 3We ix jare mas nim kiwil jun che ukjom utzlaj taq atz'yaq, kib'ij che: «Katku'l chi' chpam jun utzlaj tem», kixche che, per nun pobre kib'ij che: «Katitk'al upnoq jala'», kixche che, seno kib'ij che: «Katku'l qaj chuchlew», kixche che, 4¿le xat nim k'ut kiwil jun mnaq chjuch jun chik we jala ki'ano? ¿Le xat atb'altzij k'ut ki'an pkijlom mnaq ruk' itzel taq ichomb'al we jala ki'ano? Ot mow che jala ki'ano mal ustaj kuril Dios.
5Lo'laj taq wachlal chitatb'ej su kimb'ij chiwe: ¿Le xa jare t k'ut mnaq che xa ipobre chi' chuchlew xyuchay Dios rech kikje nimlaj kkojb'al, soq rech kikkechb'ej na ri utzlaj atb'altzij rech Dios, che xub'ij Dios che ruk' saqlaj tzij kuya na chke mnaq che kkil'oj Re? 6Per ni ix xa iy'om kk'ix mnaq che xa ipobre. ¿Le xa jare t k'ut nk'aj b'oymab' kik'an k'ax chiwe soq kixkk'am b'i ruk' atb'altzij? 7¿Le xa jare t k'ut nk'aj b'oymab' kiktz'ej uwuch lo'laj ub'i' Qajaw Jesucristo che ikjom utzij ix?
8We qtzij ki'ano peche kub'ij upxab' Dios che mas nim u'ij, utz ri ki'ano. Ri utzij Dios kub'ij: «Chil'oj arjil atz'qat jala peche kal'oj awib' at»,#Lv 19:18. kcha'. 9Per we xa nim kiwil jun mnaq chjuch jun chik, kixqaj chpam imak. O imak chjuch atb'altzij rech Dios, we xa jala ki'ano. 10Mal chin jun che ku'on runjel jumpa sutaq'ik kub'ij upxab' Dios, per we o ch'in che ustaj ku'on che u'anik, o umak chjuch runjel upxab' Dios. 11Ri Qajaw Dios xub'ij: «Xa ma'an amak ruk' jun ixoq we awixqil taj, soq jala at ixoq xa ma'an amak ruk' jun achi we awichjil taj»,#Éx 20:14; Dt 5:18. xcha'. Soq xub'ij chik: «Xa makamsaj jun chik mnaq»,#Éx 20:13; Dt 5:17. xcha'. We ot amak anom ruk' jun ixoq che awixqil taj, soq we at ixoq, ot amak anom ruk' jun achi che awichjil taj, per we akamsam mnaq, jare amak atzkum chik chjuch upxab' Dios.
12China kwent iwib' ruk' su kib'ij rich'il sutaq ki'an chpam ik'asnmal runjel ij. Ix iwit'am chik che k'an na atb'altzij pqajlom, jala peche kub'ij chpam upxab' Dios. Jarewa upxab' Dios che xujuresaj chpam qamak. 13Chin jun mnaq che kuril t to'b'al kwuch nk'aj chik, soq Dios kuril t na to'b'al uwuch re, xa kk'ejsax uwuch rmal. Per we jun mnaq kuril to'b'al uwuch jun chik, o jun utzil kuriq na rmal Dios, echi' ku'on atb'altzij pujlom.
Ri utzlaj taq chak kqa'ano jare kuk'utu che o qakojb'al
14Lo'laj taq wachlal, ¿su kupatnij che jun we kub'ij che o ukojb'al per we ot utzlaj taq chak ku'on chjuch Dios? ¿Xatb'a o mow kkoltaj rmal ukojb'al we xaq xawi o ruk'? 15We o jun qachlal achi, seno jun qachlal ixoq, che ot ritz'yaq soq ot uwa, 16tik'ri o jun chiwi'x kub'ij che: «Nojim kat'ek. Chikjo awitz'yaq soq chitja awa ast retal katnojik», kche che, per ot su kuya b'i che rech kukoj chpam uk'asnmal, ot kupatnij we jala ku'ono. 17Soq jala qakojb'al, we xa utkel, ot kupatnij, peche mow xa kamnaq. Nmister che jnam kuruk'aj rib' qakojb'al ruk' utzlaj taq qachak kqa'an chjuch Dios.
18Per pent o jun kub'ij: «At o akojb'al, ni in o utzlaj taq nchak kin'an chjuch Dios», kcha'. Chik'tu b'a ri akojb'al chinwuch che ot utzlaj taq chak ruk', y kink'ut nkojb'al in chawuch rich'il utzlaj taq nchak kin'an chjuch Dios. 19At kakojo che xa jun Dios olik. Utz che jala ka'ano, per soq jala kik'an nk'aj itzel taq espíritu. Ke kikkojo che xa jun Dios olik, soq kib'arb'at chjuch mal kkix'ej kib' chjuch.
20At ot apinsar. ¿Le kawaj kakojo che ot uptan ri akojb'al we ot utzlaj taq achak ka'ano? 21Ri Qajaw Dios sk'umlaj achi xuril qari'jal Abraham, echi' xraj wet xukamsaj nuk'jol che Isaac ub'i' rech kusipaj chjuch Dios chla' pujlom kojb'al a'. 22Kawilo che ri ukojb'al, jnam xichkun ruk' uchak. Xa rmal su xu'ono, x'alnik che o ukojb'al. 23Xa jala', x'antjik peche tz'ib'tal kan chpam Tyox Wuj, che kub'ij: «U Abraham xukoj utzij Dios, xa rmal che sk'umlaj achi xb'ix che rmal Dios»,#Gn 15:6. kcha' Soq xb'ixik che re, jare «rich'il Dios».#2Cr 20:7; Is 41:8. 24Chi' kiwil wi che jun mnaq kub'ij Dios che sk'umlaj mnaq, per xaw t rmal ukojb'al, soq rmal runjel jumpa utzlaj taq chak ku'on chjuch Dios.
25Soq jala x'an che nixoq che Rahab ub'i'.#Jos 2:1-21. Re xa ajmak nab'e, per Dios xub'ij che sk'umlaj ixoq, xa rmal su xu'ono echi' xuya kposada nk'aj utaqo'n Dios. Re xuk'ut jun chik b'e chikuch rech chla' ki'ax wi echi' kiyitzlij loq.
26Peche mow jun mnaq che o ub'qil per ot ranma', kilik che xa kamnaq. Soq jala u'anik qo'j, miskini' o qakojb'al per we ot utzlaj taq chak kqa'ano, ot kupatnij, mal peche mow xa kamnaq qakojb'al.
El Nuevo Testamento
en K'iche' de San Andrés Sajcabajá
© 2024 Asociación Educativa y Cultural Maya (AECM)
en colaboración con SIL Global