2 Tesalonicenses 3
3
U Pablo kuta chke qachlal che kik'an ch'ab'al ruk' Dios pkijlom
1Qachlal, k'isb'alre china ch'ab'al ruk' Dios pqajlom, rech jala' chanim kutix rib' utzij Dios ptaq tinmit, soq koksax u'ij, jala peche xi'an ix. 2Soq china ch'ab'al ruk' Dios pqajlom rech Dios kujuto' na pik'ab' itzel taq mnaq che xa rech itzel sutaq kik'ano, mal kunjel taj kikkub'a kk'u'x chrij Qajaw Jesús. 3Per ni Qajaw Jesús puro sk'um, ruk' saqlaj tzij ku'on na su ub'im. Re kuya na ichu'ab' soq kixuchjij na chjuch nitzel. 4Ku'l qak'u'x chrij Qajaw Jesús che ix kixtjin che u'anik, soq kitaqej u'anik su xixqataq che u'anik. 5Jaretb'a Qajaw Jesús kixuto' che uch'ob'ik chpam iwanma' che nmister kil'oj jumpa mnaq, jala peche ku'on Dios che kyul'oj kunjel jumpa mnaq. Soq kixuto'o rech kich'ij runjel jumpa k'ax kiriqo, jala peche xu'on Cristo.
Kunjel mnaq nmister kiyichkunik rech kikch'ak rjil kwa
6Qachlal, pub'i' Qajaw Jesucristo kqab'ij chiwe che kitas iwib' chkij nk'aj qachlal che kkaj taj kiyichkunik soq kik'an taj su qab'im chiwe. 7Ix mismo iwit'am chik chinchke nmister ki'ano, rech ki'an iwe peche xqa'an qo'j. Echi' xujkje iwuk', xujchkunik, ot jun b'welt che xa xqak'ayo. 8Ot jun b'welt xqata qawa che jun mnaq che xa kusipaj chqe. Runjel sutaq xqatijo, xqatojo. Chip'ij cha'ab' xujchkunik, xujkos pchak. Ruk' qak'atnal xqach'ak rjil qawa, rech jala', ot chak kqaya chiwuch ix che nmister kujitzuqu. 9Miskini' ya'tal chqe che kqata qawa chiwe, ot su xqata chiwe. Xa xujchkunik, k'utb'alre chiwuch che nmister jala ki'an ix, 10mal echi' xujkje iwuk', soq jala xqab'ij chiwe. Xqab'ij chiwe: «Chin jun kraj taj kichkunik, xa mutij uwa», xujche chiwe.
11Qatom rson che iy'o keb' uxib' chiwe, xa kikk'ayo, kkaj taj kiyichkunik. Xa jare kikmin kib' che u'anik jumpa sutaq'ik che ot kikwent che. 12Jumpa nk'aj mnaq che jala kik'ano, kqab'ij chke soq kiqapixb'ej pub'i' Qajaw Jesucristo, che chiyichkunoq rech kikch'ak rjil kwa. 13Ni ix qachlal xa mixkos che u'anik ri utzil.
14We o jun chixo'l che kraj taj ku'ono su qatz'ib'am b'i chpam un wuji', chikjo retal chinoq. Xa miwuk'aj iwib' ruk', rech jala' kk'ix rmal, mal kuna'o che xa ustaj ku'ono. 15Per mi'an iwajch'oj che, xa chipixb'ej jala peche ki'an che jun iwachlal.
K'isb'al taq tzij xub'ij u Pablo chke nk'aj qachlal
16Jaretb'a Qajaw che Rjaw ri utzil kuya nimlaj utzil chixo'l chb'e ij saq, kuya utzil chixo'l chpam runjel jumpa sutaq'ik kiriq chpam ik'asnmal. Jaretb'a Qajaw kkanaj iwuk' nimlaj iwunjel.
17In nPablo, ruk' n'ab' kintz'ib'aj b'i nk'aj k'isb'al taq tzij rech kinya rtzil iwuch. K'alnik che in kintaq b'i un wuji' chiwe mal jawa kin'an in che utz'ib'xik nk'aj k'isb'al taq tzij. Jarewa ntz'ib'nik in.
18Jaretb'a Qajaw Jesucristo kuya nimlaj ut'ob' pijlom iwunjel. Amén.#3:18 O nk'aj ujer taq wuj rech Tyox Wuj, manuscrito kb'ix che, che tz'ib'tal taj Amén chpam un versículo ri'.
El Nuevo Testamento
en K'iche' de San Andrés Sajcabajá
© 2024 Asociación Educativa y Cultural Maya (AECM)
en colaboración con SIL Global