Uluk 14
14
Ujeso he ushọm undi Iferesis
1He liti-uwel lisuso Ujeso a gye le u la za lizi he ushọm undi ken angwu u yi ukandi he likwu Iferesis. Bendi be maa fel kang he kaang. 2Ungikye ken angwu a ma mbwee abwo le abee abe hwaa le Ujeso. 3Ujeso a kung bii bitisha Iten le Iferesis le, “Iten ityan i bọng le li mbee undi he liti-uwel a, ha li mbee ye?” 4Be kwu kpii. Ujeso a mbee ungikye angwuna, u de-e le u ndu gye.
5A mbee bii abe le, “Gbe undi he liwu limen u yi le unwaa ukyeb kigundu, gbe a mbu fe he libel he liti-uwel, u la fem he ha liti-uwel ye a?” 6Kibibi ashin ọ, be ma fan he ashi kaa.
7Ujeso a ma nde na bendi besuso abe be be ha he kipam be kin kwu he bidem ife. A ha bun ityang de be le.
8“Gbe undi a ko-a gye he kipam libee, wo le kwu he kidem ashi ki dyam hwo a ye. Pisoye a ko undi angwu a dyam hwo a ọ titi. 9Undi angwu a ko amen ana u ha ba da-a le wo bo ke angwel kidem. Wo bo ishwia-ishwia la kwa he kidem ashi ki zen hwo puu. 10Ukpọ gbe undi a ko-a gye he kipam, wo le kwu he kidem ashi ki zen hwo puu hwan, he undi angwu a ko-a u be da-a le. ‘Udimgi, be kwu he kidem ashi ki dyam hwo nyin.’ Ashin ki dyam-a he ashi begaa-ndi abe be teng puu. 11Atan-lengi u yi le undi angwu a kung kuhwo-ma gye he kusi, Unim u ba keb he ba he itang. Angwu a keb kuhwo-ma be he itang na Unim u be kung he gye he kusi.”
12Ujeso a kung de undi angwu a ko he kipam le, “Gbe wo shi kipam, wo shi ko bedim-gang le bebwaa-naa le behwan-gang le bende-gang abe be yi bendi-kingbeb a ye, likọye be ba hwee a he ako-ale ugang lizi titi. 13Gbe wo shi kipam, wo ko bendi-likaa le bigwun. 14Ma wo ba kwa le kukwun likọye be yi le shi he be be hwee a ye. Unim u ba hwee a he kunyọng ahwu bendi benunung be be wum le he lihwu.”
Ityang gbe le kipam kikandi
(Mat 22:1-10)
15He kunyọng ahwu undi ken he liwu bendi abe be maa zi lizi ha, a gyo ashi Ujeso a kọng ana, a de Ujeso le bendi abe be be kwu he kipam he kiteng kusu Unim he lifung-atabe, be ba kwa le kukwun.
16Ujeso a kung ityang bun de-e le, “Ungikye ken a ma kam kipam kikandi ashele. A ko bendi gbam le be be ha. 17Kunyọng ku ma fel ha, a sọm ubọyi uma le u le de bendi abe a ko le, ‘Ma be le. Mi kam biwọm puu ma.’
18“Undi-undi u fel ka atan-lengi angwu a shi-e u be ye. Ukpi-kikwu undi a de ubọyi ana le, ‘Mi ndyeb kupung, ki yi kpe-kpe le mi le nde hwu. Le de-e le, kusii, u ha ngyo ye.’
19“Angwel u de le, ‘Mi ndyeb bigundu lihwo. Mi ndu gya le bi la kaa nda na bi shi aki a. Le de-e le, kusii, u ha ngyo ye.’
20“Angwel u de le, ‘Mi ha kpeb ungye ikpeb, mi ba wa ha ye.’
21“Ubọyi ana a tem le de ukandi uma abin puu. Ukandi ana a ma fel he ingyo kaang. A de ubọyi uma le u te akikye gye he igba-akwo le be le bendi-likaa ọ, bigwun ọ.
22“He kanwaa kunyọng zang ubọyi ana a tem be de-e le, ‘Ukandi, mi shi ashi wo kọng ma, ukpọ kukwo ku teng le bendi be mbee be kwu.’
23“Ukandi ana a de ufee uma le u mbee gye he ibo ọ, ibi-kukwo angi be gbe gye he utia ọ, le de bendi le be be kpe-kpe he be sho he ahe ushọm. 24A kung de le, ‘Mi de men le bendi abe mi kpi-kikwu ko, be ba tyọ lizi he ungwu ọ ye.’ ”
Apwọm-ale Ujeso a kaa kate
(Mat 10:37-38)
25He kunyọng ken bendi gbam be ma fe utung ha Ujeso. Ujeso a ha bel ashi ndọ abe, u de be le, 26“Undi uyang-yang angwu abe hwaa le mi na u kwu undi-utung ugi ye, ha angwu a, a swan atyam, anam, ungye-ma, bebwaa-ma, bebwaa-nam le kuhwo-ma ọ titi a. 27Undi uyang-yang angwu a bọng lihwu, kung kikpakpa kima so pwọm mi ye, u ha ndu kwa undi-utung ugi ye.
28“Gbe undi ken ha he liwu limen i a kam ushọm kusi atyele, u nya kpi-kikwu kwu kate ushọm ugyang he u nde le unde uma u nya kpa he tya ushọm ugyang ye a? 29Gbe a shi na ye, u fa lishii life-life a, u tem tya ushọm ugyang mbee ye. Bendi puu abe be nde kigem aki ashi a shi be ndu nyan he le 30‘Ungikye angwun a tye ushọm be ndọ kigem, u tem mbee he mbee ye.’ ”
31U mbee bii le, “Kibang kitaa usu angwu u nya bo le bendi asi lisi kugbe lisi le bendi asi lisi kugbe kadyọng le u la ndo ha usu angwu u yi le bendi ashia ha bema kugbe kafee? U nya kpi-kikwu kwa ko sha ugim le u yi le ikeb le u ndo ha undi-linaa uma umen ana mbee ye a? 32Gbe a nde le u yi le ikeb ye, u sọm bendi le be le de usu angwel he kunyọng ahwu u so kigbe-kigbe le a kee le be shi ikwun.” 33Ujeso a ha fe lishi le, “Kitaa kimen na ki yi le undi he liwu limen angwu a tyang biwọm bima puu ye, u kwa undi-utung ugi ye.”
34Ujeso a mbee de le, “Bendo be ngbeb, ukpọ gbe be tem nyin he ungwu ye, be nya sha abe na a he be tem nyin? 35Be tem yi le lifem he itang ọ, nyọng kizee ọ ye. Bendi be kung abe wa le hel.
“Undi angwu u yi le atyung kigyo, u gyo.”
നിലവിൽ തിരഞ്ഞെടുത്തിരിക്കുന്നു:
Uluk 14: KUIL
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Igie Likpan™ Kushia azu Unim afufe
© 1982, 2025 Biblica, Inc.
Be kpe ikeb be ha shi kushia ahwun.
Ikeb puu gbe le kushia ahwun he igye i puu, i yi angi Biblica, Inc. a.
Bette Contemporary Version™ New Testament
Copyright © 1982, 2025 by Biblica, Inc.
Used with permission.
All rights reserved worldwide.
