Aki 9
9
Agie-ale Usọl
(Aki 22:6-16; 26:12-18)
1Usọl a maa so-i zam fa bendi abe be bọng ha Ada Ujeso. A ma le hwaa le Usu bekandi bishang Unim. 2A de-e le u fee kushia ke-e he u le ke bekandi abe he ishọm Unim angi Ijuus i kwu awu angi he Udamaskọs, le gbe a nde bendi abe be pwọm kukwo Ada Ujeso ha, he u kwu le ikeb kwu abe gye le be he Ujeruselem le fe be he igaadye. 3Nyọng a ma fel kpee-kpee gye he Udamaskọs. Nya kukwo-kukwo, ki ndeb-nwang ki ndeb le he lifung-atabe fe-e nya imbul-imbul. 4A mbu shi he itang, a gyo lingbam li kọng he ahe le, “Usọl, Usọl, kibang a, wo teb le mi?”
5Usọl a kung bii le, “Wo ayang a, Ada?”
Gyo lingbam angina le, “Mi yi Ujeso angwu wo teb le mi a.” 6“Bo kinaa gye he lifung-ushu le kwu nyọng undi angwu u be da-a ashi wo shi.”
7Bendi abe be ma yi utung he ahe, kikekaa ki ma kaa abe, be tem kọng he ungwu ọ mbee ye. Be ma gyo lingbam, ukpọ be nde undi ye. 8Usọl a ma bo kinaa le he itang. Atọng-shi ama a ma so pee, ukpọ a maa tem nda ye. Be fel kwu-e abwo ikwu gye le he he Udamaskọs. 9A ma nde ye ati akie. U zi lizi ọ, nyọng u ngwo kiwọm iyang-yang ọ ye.
10Ha he Udamaskọs, ki ma yi le undi-utung Ujeso angwu be ko le Ananayas. Ada Ujeso a ha be ko he he itam ashinyọng le, “Ananayas.”
A fan he le, “Ada, nde-m mi yi nyin.”
11Unim Ada Ujeso a de-e le, “Gye he ushọm Ujudas angwu u yi he kukwo ahwu be ko le sii le bii gbe le ungikye angwu u be le he Utaasọs, be ko he le Usọl angwu u ke ushang ha abwo. 12He itam ashinyọng, a nde ungikye angwu be ko le Ananayas, a be pwọm he abwo he atọng-shi ama a buu.”
13Ananayas a de-e le, “Ada, bendi gbam be de-m gbe le biwọm bibibi puu abi ungikye angwun a shi ha bendi begang abe he Ujeruselem. 14A kpe ikeb le ha bekandi bishang Unim he u be kwu bendi le he Udamaskọs abe be ko ha awo le wo kpel abe.”
15Ukpọ Ada Ujeso a de-e le, “Gye! Mi waa ungikye angwun le u yi kigbọ aki ashi mi kung le u de bendi abe be yi Ijuus a ye le besu bebel le bendi Izwel puu gbe le mi. 16Mi ba tyung he kitaa ashi u be kpe kingie kaang he kuhwo kugi.”
17Ananayas a kung bo gye ha he ushọm umen ana le ngwee he afee, u pwọm he abwo, u de le, “Unwaa-ndagi Usọl, Ada Ujeso angwu wo nde he kunyọng ahwu wo yi nda ashi be nyin na a sọm mi. A sọm mi le mi be sha-a wo tem nde, wo mbee kpe Ukatia Kunyọng.” 18A kọng ashin kọng-kọng, biwọm bi bọ Usọl le he atọng-shi na bipeletye ukwan tyang he itang, u maa fel nda. A bo kinaa, be wu-e umbwo. 19A zi lizi tem fel le kiken.
Usọl he Udamaskọs le Ujeruselem.
Usọl a ma ngyọ kwu he Udamaskọs utung ha bebwaa-kisọm Unim zi ati. 20A gbe ligbe-ligbe gye he ishọm Unim angi Ijuus i kwu awu le bun gbe le Ujeso le u yi Unwaa Unim a. 21Bendi puu abe be gyo he ki kwu abe he kuhwo kaang. Be fel bii le, “Ungikye angwu u gwu bendi abe be ko ha Ujeso he Ujeruselem nyin ye a? A be nyin he u be kwu bitaa bendi bimen i le ke bekandi bishang Unim a ye a?” 22Usọl a ma die fel le ikeb kaang, le ki ma fel kwu Ijuus angi i yi he Udamaskọs he kuhwo kaang gbe he akọng-ale uma le Ujeso u yi Ukristi a.
23Nyọng ati a ma gbe gbam, Ijuus i gbọng ukem tim le be gwu-e. 24Ukpọ a ma gyo ashi be kam le be sha he. Be maa kang ingwu likọng kubọng, ishu ọ, kusu ọ, he be kwu-e gwu. 25Ukpọ he liti ken le kusu, bendi-utung bema be kung he fe he kitetel, be tye indii fe shi, be ngyu gbe le he he uwindul ugying le ndọ he itang le he igye.
26He kunyọng Usọl a gye he Ujeruselem le kaa le he u le fe utung ha bendi abọng-ale abe ha he Ujeruselem, be maa shel he likọye be ma bọng le ufe ọ u yi undi abọng-ale a ye. 27Ubanabas a ha kpe-e le hwaa le bebwaa-kisọm Ujeso. A bun de be na Usọl a nde Ada Ujeso he kunyọng ahwu a maa nde ashi gye he Udamaskọs, a de be le Ujeso a kọng ha Usọl, u de be na Usọl a bun kisọm faale kushel he lizen Ujeso he Udamaskọs. 28Usọl a maa fel tan utung ha abe mbee Ujeruselem bun kisọm Unim he lizen Ada Ujeso pọ. 29A fung ha Ijuus angi i kọng igie Igrik. Be fel kaa he be gwu-e. 30He kunyọng awu bendi abọng-ale be gyo ashin. Be kpe-e gye le he he Usesaria. Be le wu ha, be sọm he gye he Utaasọs.
31Bendi abọng-ale puu he Ujudia ọ, Ugalili ọ, Usameria ọ, be fel le ikwun. Be ma fel go kugii kaang gbe he ikeb Ukatia Kunyọng. Be maa shel Ada Unim.
Aneas le Udọkas
32Nya ana Ipita a maa tan gye mbee abọng, he kunyọng ken a ha le kọng le bendi abe be yi ke Unim abe he Ulida. 33A nde ungikye ususo ha angwu be maa ko le Aneas. A ma yi kikwu itang aze adyọng-ikie likọye a ma hwo abee. 34Ipita a de-e le, “Aneas, Ujeso Kristi a mbee a. Bo kinaa he wo kung ugaa ugang.” A kung bo kinaa nya kukwo-kukwo. 35Bendi Ulida le abe he Usharọn gbam be nde-e, be bel atyam ke Ada Ujeso.
36Ungingye ususo angwu a bọng ha Ujeso a ma yi he Ujopa. Be maa ko he le Utabita. Bendi Igrik be maa ko he le Udọkas. Mbee kunyọng kpam a maa sha binunung, u kpel bendi-likaa. 37A ha mbu lingbam hwo. Be kwob he umbwo te le he le kie he ushọm kusi. 38Bendi abọng-ale abe ha he Ujopa be gyo le Ipita u yi he Ulida. Ki ma yi le kigbe kung le he Ujopa gye he Ulida ye. Be kung sọm bendi befee hwaa le he le u be akikye.
39Ipita a kung kam gbe utung ha abe. A le wu ha wuwu, be kpe-e gye ha he ushọm kusi. Bengye-uhwuu be ma kaa kel-kel fe Ipita, be kya. Be yi tyung he aliga angi Udọkas a ma kpi ke be he kunyọng ahwu a ma so uwum.
40Ipita a ndo abe puu gye he igye. A tim anung he itang kọng ha Unim. A bel ashi nde likwọm, a de le, “Utabita, bo kinaa.” A buu ashi nde Ipita, u bo bel kwu ko. 41Ipita a le kwu-e abwo bo kinaa. A ko bendi abọng-ale le bengye-uhwuu, tyung abe ahe uwum. 42Bendi Ujopa puu be gyo gbe le shi. Bendi gbam be bọng ha Ada Ujeso. 43Ipita a ngyọ kwu he Ujopa gbe kigbe he ushọm Usaimọn angwu a maa kung ikwob inyia shi biwọm.
നിലവിൽ തിരഞ്ഞെടുത്തിരിക്കുന്നു:
Aki 9: KUIL
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Igie Likpan™ Kushia azu Unim afufe
© 1982, 2025 Biblica, Inc.
Be kpe ikeb be ha shi kushia ahwun.
Ikeb puu gbe le kushia ahwun he igye i puu, i yi angi Biblica, Inc. a.
Bette Contemporary Version™ New Testament
Copyright © 1982, 2025 by Biblica, Inc.
Used with permission.
All rights reserved worldwide.
