Aki 24
24
Upọl a naa ushe he kushu Ufelis
1Ati a gbe adyọng, Ananayas angwu u yi Usu bekandi bishang Unim befe le bekandi besuso le Utetulus angwu a ma yi uloya be gye he Usesaria. Be le hwaa le usu Ufelis he be le de-e bibibi abi Upọl a shi. 2Be ko Upọl, Utetulus a fel kọng fe-e le: “Ukandi Ufelis, le gbe wo bilishi, li fel le ikwun ki gbe kigbe. Le gbe wo yi le kinde, wo gie biwọm gbam le kubọng kutyan ku ngbeb. 3Mbee kunyọng kpam, mbee biteng puu li yi le igọ he ashin li pee a kaang. 4Mi kee le mi ban na kunyọng gba gyọng ye. Mi tim-a anung le wo ha kwu le inung he wo dang kutyung gyo li he kanwaa kunyọng zang.
5“Ungikye angwun u sha linaa kaang. A kpi linaa ashele he liwu Ijuus angi i yi mbee igye puu. Ufe na u teng likwu bendi abe be ko le Unazarin likọye be bọng ha Ujeso angwu u be le he Unazaret. 6A ma kaa le he u ban Ushọm Unim. Li ha kwu-e. [Li ma kam le li maa he ushe kee ha Iten ityan, 7ukpọ Ulisias angwu a ma yi ukandi ishogya a ma be shwa kpe kung he le ha abel le ikeb. 8Ulisias a ha ke uten le bendi-linaa bema be be hwaa le wo.] Wo bii he bibibi, ma wogyang wo nda biwọm abi li kọng fe-e i.”
9Ijuus abe be teng be bọng le abi be kọng gbe le he puu bi yi kigyang a.
10Nyọng Ufaa-ukwob a yọ abwo de Upọl le u ndu kọng igie ima. Upọl a kung kọng le, “mi yi le igọ na mi ndu maa ushe ugi he ashi agang nyin, likọye mi ngye le ki fel aze gbam na wo yi utang-ushe he kubọng ahwun. 11Bii bendi ọ be da le ati lihwo le ngi afee a gbe na mi ma gye he Ujeruselem, mi le fe Unim. 12Bendi abe be ko mi ushe nyin, be ma nde-m mi fa ifung he Ushọm Unim ọ, nyọng be nde-m mi tim ititim fe bendi he ishọm Unim ibel angi be kwu awu ọ, nyọng he kiteng kiyang-yang ọ ye. 13Be yi le kiwọm ashi be ha ndu shi tyung le ashi be kọng fe-m ki yi kigyang a ye. 14Ashi mi da-a ki yi le be kọng kigyang a le, mi fa Unim betie-tyan he kukwo ahwu befe be de le ku yi del-del ye. Ukpọ mi bọng biwọm puu abi be fee he kushia Iten Umosis le ashia bitye-ugie kisọm Unim. 15Mi yi le lishi andọ-ale ken a ha Unim nya ana befe ọ be bọng le bendi puu abe benunung ọ, abe bebibi ọ, be ba wum le he lihwu. 16He atan-lengi angwun mi kaa he kunyọng kuyang-ayang he ugim ugi u kwu-m utaa-utaa ha Unim ọ, bendi-gye ọ.
17“Mi ma kwu le kigbe le he Ujeruselem he aze gbam. Mi ha tem gye ha le kuke le mi la shang Unim, mi mbee kpel bendi begi. 18He kunyọng ahwu mi ma shi kimen ashin na be nde-m he Ushọm Unim, mi ma mbee le ato-ale kuhwo-gi le mi fel utaa-utaa nya ana Iten ityan i kọng. Bendi gbam be ma yi utung ha ami ha ye, linaa li shi ha ye. 19Ukpọ ki yi le bendi Ijuus besuso abe be be le he kubọng Eshia abe ki yi le hang be yi nyin le be ko mi ushe gbe be yi le kibibi kiyang-yang ashi be kọng fe-m. 20Gbe na a ye, wo de abe be yi nyin le be kọng kibibi ashi be ma nde le mi shi he kunyọng ahwu mi ma naa he ashi Isanhendrin, 21fem kiwọm ken ashin ashi mi ma gaa kọng ha he kushu kubel tyang. Mi ma gaa kọng le, ‘Ma maa mi ushe kunyin i likọye mi bọng le bendi abe be hwo be ba wum.’ ”
22Ufelis angwu a ngye dang gbe le kukwo Ujeso a fe likọng Upọl lishi le, “Ukandi ishogya angwu be ko le Ulysias u ba ma mi tang ushe ugang.” 23A de ukandi ishogya angwu u kang Upọl le u kang he, ukpọ u tyang he u kwu pọ kunyọng kususo, u tyang bedimma be be kpel fọ igben ima.
24Ati a gbe gbam, Ufelis befe le ungye-ma Udrusila, angwu a ma yi Ijuus be kung be. A sọm ko Upọl, u dang kutyung gyo he na u bun gbe le abọng-ale ha Ujeso Kristi. 25Ukpọ he kunyọng ahwu Upọl a gye kushu bun gbe le kinunung ashele le akwole kuhwo-gang le liti Ushe Unim angi li be, Ufelis a fel he kushel. A de-e le, “Ki kpe! Ndu gye, gbe mi nde kunyọng ma mi sọm ko-a.” 26U kọng ashin, u yi ndọ lishi le Upọl u ndyeb abwo le he. He atan-lengi angwun u maa sọm ko he akikye-akikye kọng he ahe.
27Nyọng aze a gbe afee, Uposius Festus a kpe Ufelis lishi. Ukpọ le gbe Ufelis a ma kam le u sha nyin Ijuus, a ma tyang Upọl fe he igaadye.
നിലവിൽ തിരഞ്ഞെടുത്തിരിക്കുന്നു:
Aki 24: KUIL
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Igie Likpan™ Kushia azu Unim afufe
© 1982, 2025 Biblica, Inc.
Be kpe ikeb be ha shi kushia ahwun.
Ikeb puu gbe le kushia ahwun he igye i puu, i yi angi Biblica, Inc. a.
Bette Contemporary Version™ New Testament
Copyright © 1982, 2025 by Biblica, Inc.
Used with permission.
All rights reserved worldwide.
