Aki 2
2
Ukatia Kunyọng a be he kipam Upentikọs
1Nyọng liti kipam Upentikọs li ma fel, befe puu be ma yi he kiteng ken. 2Nya kukwo-kukwo be gyo kihwu-hwee ki be le he lifung-atabe na kufem kukandi be sho ha he ushọm. 3Be nde kiwọm na imbee-inde ki paa pwọm undi uyang-yang. 4Befe puu be ma sho le Ukatia Kunyọng be fel kọng he igie atyetye-atyetye nya ana Ukatia Kunyọng a ke be ikeb le be kọng.
5Ki ma yi le Ijuus ha he Ujeruselem abe be maa shel Unim mbee igegem abọng igye a nyin puu. 6He kunyọng ahwu be ma gyo kihwee ashin, kugam bendi ku ma tye kwuo be sho ha kikekaa ki kaa abe. Ki kwu abe he kuhwo likọye undi uyang-yang u fel gyo bebwaa-kisọm Unim be kọng igie ima. 7Kikekaa ki ma kaa abe kaang, be ma fel bii bende le, “Bendi aben be be le he Ugalili a ye a? 8Ki shi naa be fel kọng igie ityan a? 9Bel aben li ba le he Upatia, Umede, le Elam, bendi Umesopotamia, Ujudia, le Ukapadosia, Upontus, le Eshia, 10Ufrigia, le Upamfilia, Igypt, le abọng Ulibia angi a yi gwaa le Usairen le begaa-ndi le he Urom 11Ijuus igyang ọ, abe be bel Ijuus gbe he itetel ọ, Ukret le Arebia. Li gyo abe be kọng gbe le bikwole-kuhwo abi Unim a shi he igie ityan.” 12Kikekaa ki kaa abe, be bii bende le, “ashin ki ze le ana?”
13Bendi besuso be fel nyan abe, be de le be bwọm kutyo a.
Ipita a bun kisọm de kukputu bendi
14Ipita a kung bo kinaa ha liwu bebwaa-kisọm Ujeso abe lihwo le ken, kọng ha bendi le, “Men bendi Ujudia le bendi puu abe ma yi nde he Ujeruselem, ma dang kutyung gyo mi, mi de men ashi ashin ki ze. 15Li bwọm ibwọm a na ma gim ana ye. Ki so liti ki go, inde idyọng-inde na i ha kpam. 16Ashin na ki yi ashi Unim a ma kọng le-iti gbe ha utye-ugie kisọm uma, Ujọwel.
17“ ‘He ati umbee-likel, Unim a de le,
mi ba mbo Ukatia Kunyọng ugi waa bendi puu
Bebwaa-men bengikye le abe bengingye be ba tya ugie,
ishọmate imen i ba nda itam ashinyọng,
bekashi bemen be ba shi itam.
18Ha ibọyi igi abe bengikye le abe bengingye ọ,
mi ba mbo Ukatia Kunyọng ugi waa be he ati amen ana,
be ba tya ugie.
19Mi ba tyung bikwole-kuhwo he kusi lifung-atabe,
le bitaa he igye,
anung le binde le kuteteb angyu.
20Libwee li ba bel kifufeb,
kufel ku fel anung-anung,
saa ubele liti likandi le ifem angi Ada Unim.#2:20 Ujowel 2:28-32
21He kunyọng kumen ana undi uyang-yang angwu a be ko
lizen Ada Unim u ba kwa le likpan kunyọng.’
22“Bebuye bendi Izwel, ma dang kutyung gyo ashin, Ujeso angwu Unazaret a ma yi undi angwu Unim a sọm gbe he bikwole-kuhwo, bisu le bitaa abi Unim a ma shi he liwu limen gbe he ahe, na men-agyang ma ngye. 23Unim ugyang a ma fe ukaa le gbe a ngye ashi ki be shi kung Ujeso ke men gbe ha bendi bibibi, le be gwu-e maa bee he kikpakpa. 24Ukpọ Unim a wum he le he lihwu u kpee tyang le he kutọ lihwu, likọye lihwu li ma yi le ikeb le li kwa he ndọ mbee ye. 25Udebid a ma kọng gbe le he le,
“ ‘Mi nda Ada utung ha mi kunyọng yang-yang
likọye u yi-m le he kubwo lizen,
mi tung akpakpa ye.
26He ashin lityam ligi li yi le igọ kabel agi ka yal gọ,
agwo agi ọ a shan kunyọng he lishi andọ-ale,
27likọye wo ha ndu mọ mi ka gya he kusu-behwuu ye,
nyọng wo be tyang imi Unwaa-gang angwu wo waa le likwọm ligi li hwee ye.
28Wo tyung mi akwo likpan,
Wo sho-m le igọ he kushu kugang.’#2:28 Agyam 16:8-11
29“Bebuye bendi Izwel, mi da men faale atyang-ale atyamen ukandi Udebid a hwo be ngi-e likwun lima li yi kpam ku nyin. 30Ukpọ a ma yi utye-ugie kisọm Unim a, u ngye le Unim a ma ke-e ukyeb le atam-ale le u ba ndọ igia ima ken he kidem kusu kima. 31Udebid a ma nde ashi Unim u be shi. Kife na a kung kọng gbe le awum-ale Ujeso Kristi, Undi-likpan le, ‘A ma hwo ngyọ he kusu-behwuu ye. Inyia-hwo ima ọ i ma hwee ye.’ 32Bel puu li naa ushada le Unim a wum Ujeso umen i le he lihwu. 33Unim a kpe-e gye he lifung-atabe le fem he, he kubwo lizen kuma. Atya-tyan u ke-e Ukatia Kunyọng uma. Ashi ma nde, ma gyo kunyin i, ki yi kuke ahwu Unim a kyeb, ahwu Ujeso a sọm hwaa le bel a. 34Udebid ufe-gyang a ma gye he lifung-atabe ye. Ukpọ a ma kọng gbe le Ujeso, nyọng a de le,
“ ‘Ada a de Ada ugi le,
“Be kwu ha ami kubwo lizen
35kpam mi gbe shi bendi-linaa begang
kidem ashi wo pwọm abee.” ’#2:35 Agyam 110:1
36“Men bendi Izwel puu, ma ngye ashin dang le, Ujeso umen angwu ma ma maa gwu bee he kikpakpa i na Unim a shi-e a fel Ada le Undi-likpan.” (Ukristi na Unim a kyeb le u ba sọm ba he igye anyin le u kwu Undi-likpan.)
37He kunyọng ahwu bendi abena be ma gyo ashi a kọng, ki ma tang be he lityam gben. Be kung bii Ipita le bebwaa-kisọm Ujeso abe be teng le, “Bebuye, li ha shi na a?”
38Ipita a fan abe le, “Undi uyang-yang u shi beshi le he biban, u tyang abi ashele, be wu amen umbwo he lizen Ujeso Kristi, he Unim u tyang biban ke men, ma ma kpa kuke Unim ahwu ku yi Ukatia Kunyọng uma. 39Unim a ma ke ukyeb umen i ke men le bebwaa-men le igia imen angi i be le ha kushu. Ada Unim a ke ukyeb umen i ke bendi puu abe u be ko le be be hwaa le he.”
40Ipita a gye kushu shwa abe kubwo he kutyung de be le, “ma pam kuhwo-men le ha ugbe ubibi angwun.” 41Bendi gbam abe be ma kpe kisọm kima, be wu abe umbwo. He liti limen ana bendi abe be fel bọng utung ha abe be ma mbee asi lisi kugbe kadyọng-ifee, le bendi asi lihwo.
Utyang bendi abọng-ale
42Be ma shang kuhwobel ke uhwọ-ale bebwaa-kisọm Ujeso le utyang ubel, mbee le abun-ale ibred le ushang akele. 43Bebwaa-kisọm Ujeso be maa sha bikwole-kuhwo gbam abi bi tyung ikeb Unim, ki ma kwu bendi he kuhwo kaang be fel he kushel. 44Bendi abọng-ale puu be maa gya kushu sha biwọm he utyang ken, be kung biwọm bibel fe ukem. 45Be maa kung biwọm bibel ndyeb za, be kung unde umen ana hwọ ke undi uyang-yang angwu u yi le igben. 46He liti liyang-yang be maa kpee liwu he Ushọm Unim. Be tem gye he ishu bende le zi azi abwo he kukem. Be zi azi le igọ le ugim ken. 47Be maa pee Unim, bendi puu be ma yi le ugim ununung gbe le be. Ada a maa fa shwa kugi kubel he liti liyang-yang bendi abe be fel le likpan kunyọng.
നിലവിൽ തിരഞ്ഞെടുത്തിരിക്കുന്നു:
Aki 2: KUIL
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Igie Likpan™ Kushia azu Unim afufe
© 1982, 2025 Biblica, Inc.
Be kpe ikeb be ha shi kushia ahwun.
Ikeb puu gbe le kushia ahwun he igye i puu, i yi angi Biblica, Inc. a.
Bette Contemporary Version™ New Testament
Copyright © 1982, 2025 by Biblica, Inc.
Used with permission.
All rights reserved worldwide.
