Aki 19
19
Upọl he Efesọs
1He kunyọng ahwu Apolọs a ma yi he Ukọrint, Upọl a ma gbe afee-afee be wu he Efesọs. A nde bendi abọng-ale besuso ha. 2A bii abe le, “Gbe ma bọng ha Ujeso, ma kpe Ukatia Kunyọng ngye a?”
Be de-e le, “Li ha gyo gbe le Ukatia Kunyọng ọ ngye ye.”
3Upọl a kung bii abe le, “Kibang kitaa umbwo awole angwu ma ma wu?”
Be de-e le, “Umbwo awole angwu Ujọn a.”
4A de be le, “Ujọn a maa wa bendi abe be bel atyam le he biban bibel umbwo. A maa da bendi Izwel le be bọng ha undi angwu u pwọm he le ha angwu be ko le Ujeso.” 5Be gyo ashin gyo-gyo, be wu abe umbwo he lizen Ada Ujeso. 6Upọl a kung abwo pwọm abe, Ukatia Kunyọng a be hwaa le be, be fel kọng igie kubọng kususo, be tye ugie. 7Be ma mbee bendi lihwo le be befee.
8Upọl a gye he ushọm Unim angwu Ijuus i kwu liwu. A kọng ha abe pọ afel akie, u fung fe be, u kaa he u hwọ abe gbe le kiteng kusu Unim. 9Besuso be kpo ashi, be kee le be bọng ye, be kọng ban kukwo Ada Ujeso ha he liwu bendi. Upọl a kpe bendi abọng-ale gbe le be le ha. A ko bendi le be be azu he ushọm Utiranus u hwọ bendi. 10A shi ashin aze afee. Bendi Eshia puu abe be ma yi Ijuus ọ, abe be yi Igrik ọ, be gyo kisọm gbe le Ada Ujeso.
11Unim a shi bikwole-kuhwo le ikeb kaang gbe ha Upọl. 12Kishel-kushi le abee kihwọm angi a gbe tyọ Upọl ọ, be ma kung la ka bendi-angbam le abe ikeb ibibi i yi ha abe, be mbee, ikeb ibibi i gbe le ha abe.
13Bendi Ijuus besuso abe be ma tan mbee bipi ndo ikeb ibibi ọ, be ma kaa le be fel sha ashi he lizen Ada Ujeso a. Be maa da ikeb ibibi le: “Mi ndo a he lizen Ujeso angwu Upọl u bun gbe le he.” 14Bebwaa Uskeva bedyọng-ifee, angwu a ma yi ukandi bishang Unim, na be ma shi kimen i. 15Ikeb ibibi ana i kung de be le, “Mi ngye Ujeso, mi mbee ngye gbe le Upọl. Ayang u ha yi amen ufe?” 16Ungikye umen angwu ikeb ibibi i ma yi he ahe ana a buu le kwu abe he abwo kpam. A hwo abe ikeb. Be fel bibaa-bibaa, biwọm bibel bi gie. Be fel buu ibuu uten-libọng shul le ha he ushọm ungikye angwuna.
17Bendi Ijuus puu le bendi Igrik abe he Efesọs be gyo gbe le shi, be fel he kushel. Bendi be mbee fem lizen Ada Ujeso. 18Bendi abọng-ale gbam be be, kọng de bendi he kugboo gbe le biwọm bibibi abi be ma shi ma ukpọng be ha bọng ha Ujeso. 19Besuso gbam abe be maa shi anọng be gbọng ashia anọng abel he ukem ting-shi kinde he ashi bendi puu. Be ma kwu unde ashia amen a na, a ma yi igaa ikwudi asisi-lisi kugbe kafee le asi lihwo. 20Be gye kushu bun igie Ada Unim mbee bipi puu le ikeb kaang. Bendi gbam be bọng ha Ujeso.
21Biwọm abin bi shi gbe puu, Upọl a ha shi ugim le hang a le gbe he Umasedonia le Akaya gye he Ujeruselem. A de le, “Gbe mi le wu ha, mi gya he Urom ọ titi.” 22A waa Utimoti befe le Erastus le he liwu bendi-ukpel bema sọm gye he Umasedonia. Ufe-gyang a ngyọ kwu he Eshia.
Linaa he Efesọs
23Ha he kunyọng kumen ana na linaa li ma yi he Efesọs kaang he kuhwo bendi abe be pwọm kukwo Ada Ujeso. 24Ungikye angwu be maa ko le Udemetrius angwu a maa shi aki isiliva a ma kung isiliva shi inwaa litelakpa na katelakpa ake ka yi he ushọm Unim angwu be ko le Atemis. Aki ama a ma be le unde ke bendi aki bema. 25A ko abe puu le bendi abe be ma shi kitaa aki kibel be sho he kiteng ken, u de be le, “Bebuye, ma ngye le lifem lityan li be le he aki amen i a. 26Men-agyang ma nde, ma mbee gyo ashi ungikye angwu be ko le Upọl i u shi. A de le litelakpa angi bendi be shi he abwo li yi Unim a ye; u shi bendi gbam hen he Efesọs ọ, he kubọng Eshia ọ, be gie igim ibel. 27Ki sha kinunung ye, aki atyan a ba le lizen libibi. Ashina kife-kife a ye, ki sha kinunung ye, ushọm Unim angwu be ko le Atemis u ba fel kididing, Ifem Unim umen angwu bendi Eshia puu kpe mbee igye be fe nyin, i ba ba he itang.”
28Be gyo he a kọng ashin. Lityam li nyung abe; be fel gaa le: “Atemis angwu he Efesọs a dyam!” 29Kihwee ki ma yi mbee Efesọs puu. Bendi bemen gbam ana be kwu Ugaius befe le Aristakus. Bendi bemen befee i be ma ba utung ha Upọl le he Umasedonia a. Be buu gbe le be gye he ushokwo. 30Upọl a kung he u gye ha he liwu, bendi abọng-ale be bọng he le u te ye. 31Bekandi kubọng besuso abe be ma yi bedimma be sọm bendi le be le tim he anung le u shi gye ha he liwu he ushokwo ye.
32Bendi puu be maa so-i kpa kihwee, Puu ubel, undi-undi a maa kọng kima, undi-undi u kọng kima. Bendi gbam be ngye na ki baa nyọng be fel ha ọ ye. 33Besuso be de le Alezanda na u tan le shi likọye Ijuus i ma be le he, be naa he kushu. Alezanda a yọ abwo de be le be tyang le kihwee he u kọng ke Ijuus he ashi bendi. 34Be nde shob le u yi Ijuus a. Be keb aga-ale kọng kitaa kiwọm a ken le, “Atemis angwu he Efesọs a dyam.” Be gaa kpam le kwọm he awa afee.
35He umbee-likel undi angwu a ma yi akawu ha he kubọng na a ha ndu shi abe be kwun atyung. A ma kọng le, “Men bendi Efesọs, bendi puu be ngye le bendi abe nyin he Efesọs na be kang Unim angwu be ko le Atemis angwu a dyam. Ushọm uma u yi nyin. Ha he ushọm umen ana na be ma ndọ kukọ ahwu ku ma mbu le he lifung-atabe ọ. 36Undi u ha ndu fung biwọm abin ye. Ma kwun atyung. Ma shi kiwọm faale ugim ye. 37Ma kwu bendi aben be le be nyin, ki shi le be zi biwọm he ishọm Unim a ọ, nyọng wo ko le be kọng ban Unim utyan ọ ye. 38Gbe Udemetrius befe le bendi aki bema be yi le ushe ha undi, ki yi le Ukoto he kipi be maa ushe, ki shi le bendi abe be maa ushe. Be le kpee ha kọng anaa abel. 39Gbe kiwọm kisuso ki yi ha he afee pel ashi ma kee, ma kwu kpam bendi Efesọs be kpee he be maa ushe, kọng amen ashi. 40Gbe li shi kinunung ye, bekandi Urom be ben li le li shi linaa hen kunyin. Ki yi le atan-lengi angwu hang kihwee ki kwu kitel i ye. Gbe be bii li, li ngya atan-lengi angwu li ke be ye.” 41A kọng ashin puu, a ha de be le be ndu gye.
നിലവിൽ തിരഞ്ഞെടുത്തിരിക്കുന്നു:
Aki 19: KUIL
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Igie Likpan™ Kushia azu Unim afufe
© 1982, 2025 Biblica, Inc.
Be kpe ikeb be ha shi kushia ahwun.
Ikeb puu gbe le kushia ahwun he igye i puu, i yi angi Biblica, Inc. a.
Bette Contemporary Version™ New Testament
Copyright © 1982, 2025 by Biblica, Inc.
Used with permission.
All rights reserved worldwide.
