Luk 5
5
Jisọs Emek Mme Nsaña Esie
1Usen kiet, nte Jisọs okosuk adade ke mben inyañ Kanesaret, akwa otu owo ema esaña ekpere Enye man ekop ikọ Abasi. 2Enye ama okut ubom iba eyirede ke mben inyañ, emi mme ọkọ iyak ekekpọñde ke ini eyetde iyire mmọ. 3Enye ama oduk kiet ke otu ubom oro, enyemi ekenyenede Saimọn ndien ọdọhọ enye ete adiañade ubom ọkpọñ isọñ esit. Do ke esit ubom ke Enye eketie ekpep mme owo ñkpọ.
4Kini Enye ama eketiñ ikọ okure, Enye ọdọhọ Saimọn, ete, “Idahaemi, fiak wat esisit wọrọ ke akwa udem ndien duọk iyire fo do, ndien afo eyemum ata ediwak iyak.”
5Saimọn ama ọbọrọ Enye ete, “Eteufọk ñnyin ima inam utom eti eti ofuri okoneyo ñkpọñ edi ñnyin ikemumke baba iyak ndomokiet. Edi sia edide Afo ọdọhọ ntre, ami ñyeyak iyire mfiak nsin.”
6Ke mmọ ema ekenam ntre, mmọ ema emum ata ediwak iyak tutu iyire ọtọñọ ndiwaha. 7Ntem ke mmọ ekefuñ ubọk ekot mme nsaña mmọ ke ubom enyeken edi ediñwam mmimọ, ndien ema edi edikot iyak eyọhọ ubom mbiba tutu mme ubom etọñọ ndisip.
8Ke ini Saimọn Pita okokutde se iketibede enye ama ọduọ ke edọñ esie mbiba ke iso Jisọs onyuñ ọdọhọ ete, “O, Ete, mbọk daha kpọñ mi; ami ndi ata owo anam idiọk emi mendotke ndisaña ñkpere Fi.” 9Koro idem ama akpa enye ye mme nsaña esie ke uwak iyak emi mmọ ekemumde. 10Ntre ke ekedi ye Jems ye Jọn nditọ Sebidi; mme nsaña Saimọn. Ndien Jisọs ọdọhọ Saimọn ete, “Kufehe ndik, ọtọñọde ke emi afo eyekọ mme owo.”
11Ntem ke mmọ eketut mme ubom mmọ edori ke obot; enyuñ ekpọñ kpukpru ñkpọ edaha etiene Enye.
Ekọk Ediwak Owo Udọñọ
12Usen kiet ke obio emi Jisọs okodukde, owo emi ọkọdọñọde akpamfia ama odu do. Ke ini enye okokutde Jisọs, enye ama ọduọ ọtọñọ edọñ ke iso Esie, onyuñ otuk iso ke isọñ ndien ebeñe Enye ete, “Ọbọñ, edieke Afo enyimede, emekeme ndinam mi nsana.”
13Jisọs ama anyanade ubọk Esie otuk owo oro, onyuñ ọdọhọ Enye ete, “Ami menyime, sana!” Kpa ke ndo ndo oro akpamfia esie ama okure. 14Ntem ke Jisọs ọkọdọhọ enye, ete, “Kutiñ unọ baba owo kiet, edi kowut oku idem fo nyuñ wa uwa emi Moses okowukde abaña edinam owo asana man edi ñkpọ ntiense ọnọ mmọ.” 15Edi etop odudu Esie ama osuk akaiso ndisuana, emi akanamde ediwak otu owo edi ndikop ikọ Enye, enyuñ ebọ edikọk ke mme nsio nsio udọñọ mmọ. 16Edi ediwak ini Jisọs esiwak ndikpọñ otu owo ñka ke ndobo ebiet ndibọñ akam.
17Usen kiet, ke ini Enye okosuk ekpepde ñkpọ, mme Farisi (Mbuot itie ukpono Abasi mme Ju) ye mme ekpep ibet, emi eketode ke kpukpru mme obio iñwañ Kalili ye Judia ye ke Jerusalem ema etie do. Ndien odudu Abasi ama odu do ọnọ Enye ndikọk udọñọ.
18Ndusuk owo emen owo akpaubeñ ke mbri enyuñ eñwana ndida enye nduk esit ufọk man eyak enye enim Jisọs ke iso. 19Ke ini mmọ mikekemeke ndikut ufañ ndimen enye nduk nte mmọ ekekerede ke ntak uwak otu owo, mmọ ema edọk ọkọm ufọk ekubọrede enyuñ esuk enye ke mbri ke ufọt otu owo, enim ke iso Jisọs.
20Ke ini Jisọs okokutde mbuọtidem mmọ, Enye ama ọdọhọ ete, “Ufan emefen mme idiọkñkpọ fo.”
21Mme Farisi ye mme ekpep ibet ema etọñọ ndikere ke idem mmọ ete, “Anie ededi owo emi osuk etiñde ikọ edisabade ubọñ Abasi? Anie ekeme ndifen mme idiọkñkpọ?”
22Jisọs ama ọfiọk inikiet se mmọ ekekerede ke esit; ndien obup mmọ ete, “Ntak emi mbufo ekerede mme ñkpọ emi ke esit mbufo-o? 23Ewe edi mmem mmem? Ndidọhọ, ‘Emefen mme idiọkñkpọ fo,’ mme, ndidọhọ ete, ‘Daha ke enyọñ nyuñ saña?’ 24Edi man mbufo ediọñọ ete, ke Eyen owo enyene odudu ke isọñ ndifen mme idiọkñkpọ.” Enye ama ọdọhọ owo akpaubeñ oro, ete, “Ami ndọhọ fi nte, daha da ke enyọñ, men mbri fo ñnyuñ nyọñ ufọk fo.”
25Kpa ndo ndo oro, enye ama adaha ada ke enyọñ ke iso mmọ, onyuñ emen se enye akadade ana, ndien enye ama ọnyọñ ufọk esie ke ọnọ Abasi itoro. 26Idem ama akpa kpukpru owo, mmọ enyuñ etoro Abasi. Ndik ama onyuñ omum mmọ tutu mmọ edọhọ ete, “Ñnyin imokut mme ñkpọ ñkpaidem ke usen mfin emi.”
27Ke emi ama ekebe, Jisọs ama ọwọrọ añwa ndien okokut ọbọ utib obio kiet emi ekekerede Lefai nte etiede ke efe ubọ utib esie. Jisọs ama ọdọhọ enye ete, “Tiene Mi.” 28Ndien Lefai ama adaha ke enyọñ ọkpọñ kpukpru ñkpọ onyuñ etiene Enye.
29Lefai ama anam akamba usọrọ ndidara Jisọs ke ufọk esie, ndien ediwak mme ọbọ ataksi efen ye mme nsio nsio isenowo efen ema etiene ebuana ke usọrọ oro.
30Edi mme Farisi ye mme ekpep ibet ema edu ke ọkpọsọñ iyatesit, enyuñ ebup mme mbet Jisọs ete, “Nsidi ntak emi mbufo ediade ñkpọ enyuñ eñwọñ ñkpọ ye mme ọbọ ataksi ye mme anam idiọkñkpọ?”
31Jisọs ama ọbọrọ mmọ ete, “Edi owo udọñọ esiyom abiaibọk, idighe mbon nsọñidem. 32Ami ñkedighe ndikot mme ndinen owo, edi ñkedi ndikot mme anam idiọkñkpọ ekabade esit.”
33Mmọ ema edọhọ Jisọs ete, “mme mbet Jọn etetre udia enyuñ ebọñ akam kpukpru ini, ntre ñko ke mme mbet Farisi enam, edi mme mbet Fo esuk eka iso ndidia udia ñnyuñ ññwọñ ñkpọ.”
34Jisọs ama obup mmọ ete, “Nte mbufo emekeme ndinam mme isenowo ebendọ etre udia ke ini emi ebendọ osuk odude ye mmọ?” 35Edi usen eyedi, emi edimende ebendọ ikpọñ mmọ, ke mme usen oro ke mmọ editre udia.
36Jisọs ama etiñ ikọ ke ñke ọnọ mmọ ete, “Baba owo ndomokiet isibeke obufa ọfọñidem ikekim idian ke akani ọfọñidem. Edieke enye anamde ntre, enye eyewai obufa ọfọñ ke ikpuikpu kini ubak obufa ọfọñ oro midisañake kiet ye akani ọfọñ. 37Ndien baba owo ndomokiet ñko ikemeke ndiñwaña obufa mmin nsin ke akani ekpat ikpa unam usin mmin; Edieke enye anamde ntre, obufa mmin eyetak ndien ekpat ikpa unam onyuñ abiara. 38Baba, ana esin obufa mmin ke obufa ekpat ikpa unam. 39Ndien baba owo ndomokiet iduhọ emi ama ọkọñwọñ akani mmin ama ndien afiak oyom obufa, koro enye ọdọhọde, ete, ke akani oro ọfọn akan.”
നിലവിൽ തിരഞ്ഞെടുത്തിരിക്കുന്നു:
Luk 5: OOÑE
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Biblica® Open Efik Living New Testament™
Copyright © 1995 by Biblica, Inc.
“Biblica” is a trademark registered in the United States Patent and Trademark Office by Biblica, Inc. Used with permission.
