Jọn 9
9
Jisọs Ọkọk Owo Emi Akamanade Nnan
1Nte Enye akasañade ke usuñ Enye ama okut owo emi ekedide nnan toto ke emana esie.
2Mme mbet Esie ema ebup Enye, ete, “Andikpep, anie ekenam idiọkñkpọ, eyen eren emi, mme ete ye eka esie, emi esinde enye amana nnan?”
3Jisọs ama ọbọrọ ete, “Idighe enye, mme ete ye eka esie ekenam idiọkñkpọ, edi emi eketibe man otodo utom Abasi ayarade owut idem ke uwem esie. 4Adaña nte edide uwemeyo ñnyin inyene ndinam utom Enyemi ọkọdọñde Mi. Okoneyo ke ededi emi owo baba kiet midikemeke ndinam utom. 5Kadaña emi Ami ndude ke ererimbot, Ami ndi uñwana ererimbot.”
6Ke enye ama eketiñ ntem, Enye ama ọkọk etap enim ke isọñ, ada etap emi abuak ye ntan ọwọrọ mbat, ndien ada mbat oro eyet owo nnan oro ke enyin esie mbiba. 7Jisọs ama ọdọhọ enye ete, “Ka keyet iso fo ke ñkpọdiọhọ mmọñ Silọm” (emi ọwọrọ “Ema edọñ”). Owo emi ama aka ekeyet iso esie ndien enye ama afiak edem edi ye enyin esie mbiba nte okutde usuñ.
8Mme mbọhọiduñ esie ye mme mmọ eken ekam esikutde nte enye ebeñede ebeñe, ema ebup ete, “Nte emi idighe owo emi esitiede mi ebeñe ebeñe?”
9Ndusuk owo ema enyime ete ke edi enye. Mme ubak owo ema ekañ ete ke idighe enye, ke edi owo enye emi enyene mbiet esie. Edi enye enyene idem ama eyire ọbọrọ ete, “Ami ndi owo oro.”
10Mmọ ema ebup enye ete, “Didie ndien ke ekenam fi okut usuñ?”
11Enye ama ọbọrọ ete, owo emi mmọ ekotde Jisọs akanam mbat ndien eyet mi ke enyin mi mbiba. Enye ama ọdọhọ mi ete yak ñka ke Silọm ñkeyet iso. Do ami mma ñka ñkeyet iso ndien ami ñkeme ndikut usuñ.
12Mmọ ema ebup enye ete, “Enye Enye?” Enye ama ọbọrọ ete, “Ami ndiọñọke.”
13Mmọ ema eda owo oro ekedide nnan ewọrọ ke iso mme Farisi. 14Usen emi Jisọs akanamde mbat ada atat owo emi enyin ekedi ke usen ibet (Sabat) 15Mme Farisi ema etọñọ ntak ebup owo oro nte enye akasañade okut usuñ. 16Enye ama etiñ ọnọ mmọ ete, “Enye ekeyet esisit mbat ke enyin mi mbiba, ami mma ñyet iso mi, ndien idahaemi ami mmekeme ndikut usuñ.”
17Ke akpatre, mmọ ema etọñọ ntak ewọñọde ebine owo emi ekedide nnan enyuñ ebup enye ete, “Nso ke afo ekeme nditiñ mbaña owo oro?” Edi enyin fo ke Enye akatat! Owo oro ama ọbọrọ ete, “Enye edi Asiak Uduak Abasi.” (Prọfet).
18Mme Ju, tutu oro ikenimke ke akpanikọ nte ke owo oro ekedi nnan, ndien ke ema etat enye enyin; tutu mmọ ekedọñ ekekot ete ye eka owo emi. 19Mmọ ema ebup ete ye eka owo emi ete, “Nte emi edi eyen mbufo? Ndien enye edi enyemi mbufo edọhọde ete ke akamana nnan? Enye asaña didie ndien okut usuñ idahaemi?”
20Ete ye eka esie ema ebọrọ ete, “Ñnyin imọfiọk ite ke enye edi eyen ñnyin erenowo, ndien ñnyin imenyuñ idiọñọ ite ke enye akamana nnan. 21Edi nte enye ekemede ndikut usuñ idahaemi, mme owo emi atatde enye enyin, ñnyin idiọñọke. Ebup enye, enye okpon ekem; ndien enye eyetiñ ikọ idem esie.”
22Ete ye eka esie eketiñ emi koro mmọ ekebakde mme ikpọ owo mme Ju, koro kañakaña mme Ju ema ebebiere enim ete owo ekededi emi editiñde añwa añwa ete ke Jisọs edi Kraist, eyesio enye efep ke ufọk akam mme Ju. 23Ntak ekedi oro eka ye ete esie ekedọhọde ete, “Enye okpon ekem; ebup enye.”
24Ntre mmọ ema etọñọ ntak ekot owo emi ekedide nnan enyuñ edọhọ enye ete, “Nọ Abasi ubọñ ke nditiñ akpanikọ, koro ñnyin imọdiọñọ ite ke owo oro edi anam idiọkñkpọ.”
25Enye ama ọbọrọ ete, “Mme enye edi anam idiọkñkpọ mme idighe, ami ndiọñọke mbaña. Edi ñkpọ kiet ke ami mfiọk. Ami ñkedi nnan, edi idahaemi ami mokut usuñ.”
26Do ke mmọ ekebup enye ete, “Enye akanam didie ye afo? Enye akasaña didie atat fi enyin?”
27Enye ama ọbọrọ mmọ ete “Ami mmantetiñ nnọ mbufo ndien mbufo ikekpañke utọñ. Ntaha mbufo eyomde nditọñọ ntak ñkop-e? Nte mbufo eyom ndikabade ndi mme mbet Esie ñko?”
28Mmọ ema eñwaña isuñi efuk enye enyuñ edọhọ ete, “Afo edi mbet owo oro, ñnyin idi mme mbet Moses; 29Ñnyin imọfiọk ite ke Abasi ama etiñ ikọ ye Moses, edi, ama edi owo oro ñnyin itimke idiọñọ ebiet emi enye otode edi.”
30Owo oro ekedide nnan ama ọbọrọ ete, “Nso utibe ñkpọ idi emi, mbufo idiọñọke ebiet emi Enye otode, edi Enye ama atat mi enyin mbiba! 31Ñnyin imọfiọk ite ke Abasi ikpañke utọñ inọ mme anam idiọkñkpọ. Enye akpañ utọñ ọnọ owo emi abakde Enye onyuñ anamde uduak Esie. 32Owo ndomokiet akananam ikopke ibaña editat enyin owo emi akamanade nnan. 33Edieke owo emi mikpetoho ke Abasi, Enye ikpekemeke ndinam ñkpọ ndomokiet.”
34Mmọ ema ebọrọ se enye eketiñde, ete, “Afo ọkọbuhọ ke idiọkñkpọ ke usen emana fo, afo ekeme didie ndikpep ñnyin ñkpọ?” Ndien mmọ ema emum enye efuñ ke añwa.
35Jisọs ama okop ete ke ema esio enye eduọk ke añwa, ndien Enye ama ọdọhọ enye ke ini Enye okosobode enye, ete, “Nte afo emenim Eyen Owo ke akpanikọ?”
36Owo oro ama ebup ete, “Enye edi anie Ete? Tiñ nọ mi man ami nnim Enye ke akpanikọ.”
37Jisọs ama ọdọhọ ete, “Afo omokut Enye idahaemi; ke editim ntiñ edi Enye etiñ ikọ emi ye afo.”
38Do ke owo emi ọkọdọhọ, ete, “Ọbọñ ami menim ke akpanikọ,” ndien enye atuak ibuot ọnọ Enye.
39Jisọs ama ọdọhọ ete, “Ami ñkedi ke ererimbot emi ndikpe ikpe, man otodo nnan okut usuñ, ndien mme mmọ emi ekekutde usuñ ekabarede edi nnan.”
40Mme Farisi emi ekedade do ye Enye, ema ekop nte Enye eketiñde mme ikọ emi, ndien mmọ ema ebup Enye ete, “Okudi ikọ fo ọwọrọ ete ke ñnyin idi nnan ñko?”
41Jisọs ama ọbọrọ ete, “Edieke mbufo ekpedide nnan, ikpe idiọkñkpọ ikpetipke mbufo; edi ke emi mbufo edọhọde ete ke mmimọ imekeme ndikut usuñ, utibikpe mbufo osuk anana ọnọ mbufo.”
നിലവിൽ തിരഞ്ഞെടുത്തിരിക്കുന്നു:
Jọn 9: OOÑE
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Biblica® Open Efik Living New Testament™
Copyright © 1995 by Biblica, Inc.
“Biblica” is a trademark registered in the United States Patent and Trademark Office by Biblica, Inc. Used with permission.
