Jọn 10
10
“Ami Ndi Eti Ekpeme-Erọñ”
1“Ami ntiñ akpanikọ nnọ mbufo, owo emi midukke ufọk erọñ ito inua otop, edi ọdọkde oduk ke usuñ efen, edi inọ ye owo ñwo. 2Owo emi odukde oto inua otop edi Enyemi ekpemede erọñ Esie.
3Ekpeme usuñ osio usuñ ọnọ Enye ndien mme erọñ ekpañ utọñ enọ uyo Esie. Enye okot mme erọñ esie ke enyiñ mmọ, onyuñ ada mmọ ọwọrọ añwa. 4Ke enye ama akada mmọ kpukpru ọwọrọ ke añwa, enye ebe iso ndien mme erọñ esie etiene enye koro mmọ ediọñọde uyo esie. 5Edi mmọ iditieneke esen owo, ke akpanikọ mmọ eyefeñe ekpọñ enye koro mmọ midiọñọke uyo esen owo.”
6Jisọs eketiñ ikọ emi nte mbuk, edi mmọ ikọdiọñọke se Enye eketiñde ọnọ mmọ ọwọrọde. 7Do ke Jisọs ọkọtọñọ ntak etiñ ete, “Ami ntiñ akpanikọ nnọ mbufo, Ami ndi inua otop ufọk erọñ. 8Kpukpru mme mmọ emi ekebemde Mi iso edi, ekedi mme inọ ye mbon ñwo, edi mme erọñ ikekpañke utọñ inọ mmọ. 9Ami ndi lnua Otop, owo ekededi emi ebede ke Ami oduk eyenyaña enye. Enye eyeduk onyuñ ọwọrọ, enye eyenyuñ okut awawa mbiet. 10Ñkukure ntak emi inọ edide edi ndiyip ñnyuñ ñwot ñnyuñ nsobo. Ami mmedi man otodo mmọ ekpekam enyene uwem, enyuñ enyene uwem emi nte ọyọhọde ọfọn.”
11Ami ndi Eti ekpeme-erọñ. Eti ekpeme-erọñ ebeñe idem ndikpa ke ntak mme erọñ. 12Enye emi ekpedekpe, idighe ekpeme-erọñ emi enyenede mme erọñ, ke ntre ke ini enye okutde nte ekpe edide, enye ọkpọñ mme erọñ onyuñ efehe. Do ndien ke ekpe edisin eñwan ye mme erọñ onyuñ asuan mmọ. 13Owo emi efehe ọkpọñ mme erọñ koro enye edide ñkpeutom emi mikereke ñkpọ ndomokiet ibaña mme erọñ.
14“Ami ndi eti ekpeme-erọñ, Ami mmọdiọñọ mme erọñ Mi, ndien mme erọñ Mi ñko ediọñọ Mi. 15Kpa nte Ete ọdiọñọde Mi, ndien Ami ñko ñnyuñ ndiọñọ Ete, ñnyuñ ñyak uwem Mi nduọk ke abaña mme erọñ. 16Ami mmenyene mme erọñ efen emi miduhọ ke otu mme erọñ enye emi. Ami ñnyene ndida mmọ ndi ñko. Mmọ ñko eyekpañ utọñ enọ uyo Mi, ndien mmọ eyedi otu erọñ kiet ye ekpeme-erọñ kiet ñko.
17Ntak emi ete mi amade Mi edi koro mma yak uwem Mi nnim man otodo ñkpetọñọ ntak mmen. 18Baba owo ndomokiet ibọhọ Mi uwem Mi, edi Ami ñyak nnọ ke uduak ye unyime esit Mi. Ami mme nyene odudu ndiyak uwem Mi nnọ, mmonyuñ ñnyene odudu nditọñọ ntak mbọ. Ami mbọ ewuhọ emi nto Ete Mi.”
19Ubahade ama ọtọñọ ntak odu ke otu mme Ju ke ntak mme ikọ emi. 20Ediwak mmọ ema edọhọ ete, “Idiọk spirit oduk enye idem onyuñ anam ibuot abiara Enye. Ntaha mbufo ekpañde utọñ enọ Enye-e?” 21Edi mme mmọ efen ema edọhọ ete, “Mme ikọ emi idighe mme ikọ emi owo emi mme ndiọi spirit edukde ke idem ekpetiñde. Ndiọi spirit ekpekeme didie nditat owo nnan enyin?”
Tim Tiñ Anwaña Ñnyin
22Ama edikem ini usọrọ edinam Edisana Ebiet asana ke Jerusalem. Ndien ekedi ke ini ọkpọsọñ ekarika. 23Ndien Jisọs okodu ke Edisana Ebiet emi ekekotde edian Sọlọmọn. 24Ikpọ owo mme Ju ema ekanade Enye ekuk, enyuñ ebup Enye ete, “Adaña didie ke Afo edinam ñnyin itak ke eyighe? Edieke Afo edide Andinyaña (Kraist), tiñ nọ ñnyin añwa añwa.”
25Jisọs ama ọbọrọ ete, “Ami mma ntetiñ nnọ mbufo, edi mbufo inimke ke akpanikọ. Mme utibe ñkpọ emi Ami nnamde ke Enyiñ Ete Mi etiñ ikọ ebaña Mi. 26Edi mbufo inimke Mi ke akpanikọ koro mbufo idighe kiet ke otu erọñ Mi. 27Mme erọñ Mi ekpañ utọñ enọ uyo Mi. Ami mmọdiọñọ mmọ, ndien mmọ etiene Mi. 28Ami nnọ mmọ nsinsi uwem, ndien mmọ iditakke; owo ndomokiet ikemeke ndiwamade mmọ mbọ Mi ke ubọk. 29Ete Mi emi ọnọde Mi mmọ okpon akan kpukpru ñkpọ; owo ndomokiet ikemeke ndiwabade mmọ mbọ ke ubọk Ete. 30Ami ye Ete Mi inyuñ idi kiet.”
31Ini kiet efen mme Ju ema etañ itiat ndida ntọñọ Enye ñwot.
32Edi Jisọs ama ọdọhọ mmọ ete, “Ami mmowut mbufo mme ediwak utibe ñkpọ emi etode Ete, ke ntak ewe ke otu emi ke mbufo eyom nditọñọ Mi ke itiat?”
33Mmọ ema ebọrọ Enye ete, “Ñnyin iyomke nditọñọ fi ke itiat ke ntak eti utom ndomokiet, edi, edi ke usuñ emi Afo adade ọsọñọ enyin ye Abasi: Afo edi owo kpọt kpọt, edi añwana ndinam idem Fo Abasi.”
34Jisọs ama ọbọrọ ete, “Nte iwetke isin ke ñwed ibet mbufo, ete, Ami mmọdọhọ nte ke mbufo edi mme abasi? 35Mbet eketiñ abaña mme mmọ oro ekedọñde ikọ Abasi enọ nte mme abasi; ndien owo ikemeke ndibiat se ewetde ke ñwed Abasi. 36Ekeme nditiñ nso ye Ami emi Ete ekemekde onyuñ osio ọdọñ ke ererimbot emi? Ntaha edọhọde ndien ete ke Ami mmọsọñọ enyin ye Abasi ke emi ndọhọde nte ke Ami ndi Eyen Abasi-e? 37Ekunim Mi ke akpanikọ edieke Ami mme nnamke mme utom Ete Mi. 38Edi edieke nnamde mme utom Ete Mi, okposuk edi emi mbufo mminimke Mi ke akpanikọ, akpana mbufo enim mme utibe utom idiọñọ emi ke akpanikọ, man otodo mbufo etim ediọñọ ete ke Ete odu ke Ami, Ami ñko ñnyuñ ndu ke Ete.”
39Ini kiet efen mmọ ema eyom ndimum Enye, edi Enye ọfiọnọde ọbọhọ mmọ. 40Jisọs ama ọtọñọ ntak ebe inyañ Jọdan aka ke ebiet emi Jọn ekesinimde babtisim onyuñ odu do. 41Ndien ediwak owo ema edibine Enye. Mmọ ema edọhọ ete, “Okposuk edi nte Jọn mikanamke mme utibe ñkpọ, edi kpukpru se enye eketiñde abaña owo emi ekedi akpanikọ.” 42Ndien ediwak owo ke ebiet oro ema enim Jisọs Kraist ke akpanikọ.
നിലവിൽ തിരഞ്ഞെടുത്തിരിക്കുന്നു:
Jọn 10: OOÑE
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Biblica® Open Efik Living New Testament™
Copyright © 1995 by Biblica, Inc.
“Biblica” is a trademark registered in the United States Patent and Trademark Office by Biblica, Inc. Used with permission.
