Nahumu 3
3
1Gwee mji gwa Ninawi hagushiwoni toziya wantu waku walaga wantu!
Gumema mpayu na lopola nduu,
yagulekandiri kuwera na vintu vya kulopola.
2Su gupikiniri! Mliru gwa ntomondu za misontu,
mlindimiru ya maguludumu,
mitukuliru ya farasi
na mwungulumu gwa mbutuka yazikwegwa na farasi!
3Wakwena farasi watuga kukomanga,
ligumba na migoha yankung'ereng'eta,
yawalagitwi wahera walanga,
wantu wankulikwala pampindi pa mauti!
4Gwee Ninawi! Guwera gambira mndiyandiya.
Guwazyangazyanga wantu,
gwee bibi gwa uhawi,
guwatenditi wantu maisi kuwera wamanda kwa undiyandiya waku na uhawi waku.
5“Mtuwa Mlungu yakana makakala katakula hangu,
neni namnkondu gwaku.
Hangibikili sheni shaku kwa gawuni yaku.
Hananguziyi maisi shivula shaku,
na soni yaku.
6Hanikwasili udoda,
hanikutenderi beziya,
na kukutenda guweri lijonga kwa wantu.
7Shakapanu woseri yawakuwona hawakutiri
pawalonga, Ninawi gwagamiziwa,
gaa hakakudayiliri kwajili yakuyi?
Gaa hakakuzyangizyangi?”
8Gwee Ninawi guherepa kuliku Tebesi, mji yagunyawitwi kumpeku kulushemba Naili? Tebesi guzyengetwa na mashi, bahali iweriti liboma lyakuyi, mashi gaweriti shibambaza shakuyi. 9Kushi na Misri ziweriti makakala gakuyi gahera, Puti na Libiya waweriti wamu wa walii yawaweriti pamuhera. 10Shakapanu wantu wa Tebeti watolitwi lopola muuhamisiwu. Ata wana wakuyi walaguwa mumapanda njira, wantu wakuyi yawamanika wawuzitwi, wakulu wakuyi woseri wa Tebeti watawitwi minyololu.
11Gwenga haguloweli viraa na hagugendi kulififa na kusakula pakutugira kulawa kwa wankondu waku. 12Vibambaza vyakuyi vyoseri haviguwi gambira mabwajubwaju ga tini za kwanja, pazitikisiwa zimtuluki mmulomu. 13Guloli wanjagira waku. Womberi wanalyoga gambira wadala. Migomi ya isi yaku ndo lupalahera kulongolu kwa wankondu waku, motu guvilunguziya nakamu vikobeku vyakuyi. 14Mteki mashi muweri kala kuzyengeta, mgangamaziyi maboma genu. Mpondangi litapaka kwa kuwutimbangatimbanga, mtandi litanuli lya kwoshiya matofali! 15Motu haguwalunguziyi na ligumba haliwalikituliri kutali, haguwamaliri handa wanjombi ntambu yawaliya.
Nakaka hamongereki gambira wanjombi, nakaka hamwongereki gambira matapa! 16Gongera walanga ya washuwuzi mpaka wawera wavuwa kuliku ntondu za kuliyera, handa wanjombi yawaliya kila shintu shakapanu waguluka na kugenda zawu. 17Wakulu wakuyi wawera wavuwa gambira vibatala, maafisa waku handa shipinga sha wanjombi, shaka sha mbepu walikala mushibambaza, kumbiti mshenji pagulawa waguluka, pota kwahera yoseri yakavimana kwawagenditi.
18Gwee mfalumi gwa Ashuru, maafisa waku wahowa, wantu waku yawana ligoya wasizira. Wantu waku wapalasiwa kumigongu, kwahera yoseri gwa kuwajojonira. 19Kwahera gwa kuviponiziya vironda vyakuyi, vironda vyaku hapeni viponi. Woseri yawapikinira visoweru vyakuyi hawanemeleri. Su gaa kakawushapiri ungesera waku yawahera upeleru?
The Bible version in the Pogoro Language. @The Word for The World International and Pogoro Language translation. All rights reserved.