Mika 2
2
Upeleru wa walii yawayonera wahushu
1Hawashiwoni walii yawapanga ukontola pawagonja pashiru wapanga kutenda madoda! Katepu pawushiya wawutenda toziya wana uwezu wa kuwutenda. 2Pawafira malambu na numba wapoka, Wawiwira yawana numba na walongu wawu, wawapoka wantu lunda zawu.
3“Kumbiti, Mtuwa Mlungu kalonga, mpanga kuwagamiziya mwenga, geni hapamwezi kulilopola. Kwanjira panu kwahera muntu yakaweza kulitumba kayi, mana hashiweri shaka sha ntabiku.” 4Shaka ashi wantu hawawajongeri kwa lwimbu, “Hawalili na kudaya kwa utama pawalonga twagamira nakamu
Mtuwa Mlungu kayitola isi yetu.
Malambu getu kawapanana yawatulopoliti.”
5Su hapeni mupananwi seemu yoseri ya litapaka muwamu mwa wantu wakuyi Mtuwa Mlungu.
6Wambuyi wawu walonga, nagutunga kuhusu vintu avi. Mlungu hapeni katusoniziyi twenga. 7Mwenga wiwuka wa Yakobu, iherepa kulonga hangu? Hashi, Rohu ya Mtuwa Mlungu ikalala? Yomberi katenda vintu gambira avi? Visoweru vyangu vimtenderandiri maheri yakatenda vintu vyavifiruwa?
8Kumbiti Mtuwa Mlungu kawagambira hangu, mwenga muwakankala wantu waneni handa wankondu. Mwankuwapoka nguwu zawu wantu wanyamalira, wantu yawapita kugenda zawu pota kulishera na yawawerandiri na maholu madoda kwa mwenga. 9Mwankuwawinga wadala wa wantu waneni, kulawa munumba zawu ziherepa na wana wawu muwawusilira ntekelera yaneni mashaka goseri. 10Mugoloki mgendi zyenu, mana pahala panu pakoyera penundiri. Toziya ukontola wenu ujega uhalibisiya.
11“Muntu pakalawira na kuyowelera visoweru vya uzyanga pakalonga, haniwatungiri divayi na ujimbi hawunyililiki kwa mwenga, mbwera gwa ntambu ayi mekafiruwi na wantu.”
12Nakaka haniwajojoniri mwawoseri mwenga, wantu wa Yakobu, nakaka haniwajojoniri pamuhera masigala ga Israeli. Haniwajegi handa kondolu mungati mlizizi, handa shipinga kumaliwuziwu gakuyi, pahala panu hapaweri na mjojoniku gwa wantu.
13Yomberi hakawavuguliri njira na kuwalonguziya, hawapiti kuligomi na kulawa kunja. Mfalumi gwawu mweni ndo Mtuwa Mlungu hakawalonguziyi.
The Bible version in the Pogoro Language. @The Word for The World International and Pogoro Language translation. All rights reserved.