BIKƆMELI BI BA PƆSOLU 2
2
Bodoa bo Mwembo Mosɛnɔke
1Ehole eimia isu di Patekote#2, 1 Boindja Lew 23, 15-21; Det 16:9-11., badhimi baputoanaka ibo basusu esika emɔti. 2Na mbala emɔti, dhaka emɔti edonga ta busa, ondingo ekumbaki emɔti e poeya, eluma ndako esusu iyena edaka bo na mobondo. 3Iboa baso baɛnɛ leka lomɔti lobaimanea ondingo mosa; lonangana ko lodaaka ondingo yeemi ko lodoa adaa ta molo mo moto omɔti omɔti o bobo. 4Ibo basusu baluma na Mwembo Mosɛnɔke ko babanga bobala na minɔkɔ mikina, bobwana na mondumba momopaka Mwembo abale.
5Ta Yelusalɛmɛ Bayudha basapaka na Ndjakomba badaaka ena, badonga ta bikomi bisusu bi ngondo. 6Ehole eokama dhaka emina, emumu e bato eputoana. Ko ibo basusu baluma na bokamoa, modjɔ mo omɔti omɔti o bobo aokaka badhimi babala na monɔko mo bobo mo ngando. 7Bakamoaka bobuke mɛnɛ, ko basawadjaka bo: «Bato ibi babalakadea, ibo basusu badiiti bato ba Galileya#2, 7 Boɛngɛ ta 1, 11.? 8Ndenge ndani ekɔmɔkɔdea bɛngi omɔti omɔti o biso aoke babala na monɔkɔ mo nde mo ngando? 9Ta tei e biso, edii na bato badongi ta ekomi e Palate, e Mede, ko Elame. Edii na bato ba Medjopotami, e Yudhea ko na Kapadose, ta Poti ko na ta ekenge e mokili mo Adjia, 10ta Pilidji ko na Papili, e Edjipito ko na telitoale e Silɛne ta Libi; edaka pongono na bakɛndɛli ibia badonga ta Loma, 11ta Kɛlɛte ko Alabi; bato bamɔti babotama Bayudha, ko bakina badhimeaka Ndjakomba o Bayudha#2, 11 Boindja Mat 23, 15 ko na nase.. Ko na tina emina lobaokakadea batɔndea misala minɛnɛ mi Ndjakomba na minɔkɔ mi biso mi ngando!» 12Ibo basusu balumaka na bokamoa ko basayekea bobuke mɛnɛ; basawadjanaka bo: «Modjɔ momina imu mopalakadea bobala bo?» 13Endelo bakina bataaka badhimi bo: «Balangoi vino e yeene!»
Petelo alehakadea emumu e bato
14Iboa Petelo aso aema na Doomi na omɔti; ko abala na emumu e bato na moholi mo diko bo: «Ino Bayudha ko ino bato basusu bakadikame ta Yelusalɛmɛ, hokamedjani bopele mɛnɛ mibalo mi mbi ko sipoani midjɔ imi minɔmɔkɔdea. 15Bato ibibi balangoiti mondumba molɛnɛkɛdea ino modjɔ mo edii oko ngonga e ibua e ehuma. 16Ekahia edɛdiyeye eka ebala motɛli Yoɛlɛ ekokedjami:
17“Ndjakomba abala bo: Ta masu ma suka
nasopabi Mwembo mo mbi ta dii bato basusu;
bana ba bino ba baami ko na ba bali baimeabi batɛli,
bakandoli baɛnɛbi ndjɛnɛ
ko basuku ba bino baitabi ndjɔti.
18Sooti mɛnɛ, ta masu imia, nasopabi Mwembo mo mbi ta dii basali baami na bali
ko baimeadea batɛli.
19Nakɔɔdea bingengo ta busa o diko
ko bimbete bibokamoa ta kpɔtɔ:
edabi na makiya, na mosa ko na matute ma mididi,
20Modaakabusa moimeabi modidi
ko songe aimeabi mokpetu ondingo makiya,
boso bo busa bo Kumu boimee, busa bonɛnɛ bo ekumu.
21Iboa, moto na moto iyona obeabi kombe e Kumu ahelabi#2, 21 Yl 3, 1-5, elangama ta buku eyou ekomama na monɔkɔ mo gɛlɛki..”
22«Bana ba Isalɛlɛ, okani midjɔ mipalakadea mbi naotɔndeeni: Ndjakomba aoinedjani bokondji bo Yesu o Nadjalɛtɛ#2, 22 Boɛngɛ ta Mat 2, 23; Luka 18, 37. iyana akɔɔ iyo ta ndanda e bino midjɔ mibokamoa, ko bingengo na bimbete mondumba modjebakadea ino bɛnɛ. 23Moto iyo akabama bobwana na meko etomba Ndjakomba ko na mbuno ebwanedja iyo tomba ehele. Omoowabini na bomobaka ta ekulusu engbanga emɔti na bato babe#2, 23 Boindja ta Mat 27, 35; Mal 15:24; Luka 23, 33; Yoane 19, 18.. 24Iboa Ndjakomba amosisodjabi ta bogwa, amodongedji ta saya e yogo, modjɔ mo yogo ebwanakiti bomopea tina e seko#2, 24 Boɛngɛ Mat 28, 5-6; Malako 16, 6; Luka 24, 5.. 25Na tina emina, Dhapiti abala ta tina e nde bo:
“Naɛnɛkɛ ndelo esusu Kumu ta boso bo mbi,
adii mbuti na mbi bɛngi nadae pɛpɛ bongongoma.
26Na tina emina molema mo mbi molumi na mosepi ko mibalo mi mbi milumi na mongandi;
mokuku mo mbi mɛnɛ mohemadea na elɛndɛ,
27modjɔ mo, otakinadeani ta ngondo e bato bago,
otadhimadea bo mbi Mosɛnɔke o wɛ, napɔe ta tei e mombɔndɔ mo ikila.
28Oinedjini ndjea e bomɔ,
olumedjadeani na sepi ta miso ma wɛ#2, 28 Ta molɔngɔ mo 25-28, boindja ta Ndjem 16, 8-11, elangama ta monɔkɔ mo gɛlɛki..”
29«Baningani, ebɔngedjami tina e mbi bɛngi naotɔndeeni na bohu mɛnɛ ta tina e kɔkɔ Dhapiti bo: agwa, apuseama, ko ikila di nde idii na su teee mbunoko busa bu. 30Endelo iyo adaaka motɛli ko adjebaka bo Ndjakomba amodikana na ndjea e seleka bo omɔti o batitani ba nde amotitanabi ta kiti e nde e bokumu#2, 30 Boindja ta Ndjem 132, 11; 2 Sam 7, 12-13.. 31Dhapiti asia boɛnɛ ehele modjɔ mokɛkɛdea adoe; na boa abala tina e bosisoa ta bogwa bo Masiya ehole ebala iyo bo:
“Iyo aidika ta ngondo e bato bago,
ko mokuku mo nde moipɔ ta tei e mombɔndɔ mo ikila.”
32Ndjakomba asisodja Yesu ta tei e bato bago, ko iso lodii ba temo ba modjɔ momina. 33Adii ta ebɔ e baami e Ndjakomba, ko abolodji Mwembo Mosɛnɔke imu modikana iyo; ko amosopa ta diko di biso, ko edii mɛko imi miɛnɛkɛdea ino ko miokakadea ino edɛdiyeye. 34Modjɔ mo Dhapiti iyo mɛnɛ aiiwea ta busa, endelo abala bo:
“Kumu abala na Kumu o mbi bo:
doa adae ta ebɔ e mbi e baami,
35napalakadea naise baloni ba wɛ ta nase dji mako ma wɛ#2, 35 Ndjem 110, 1..”
36Bato basusu ba Isalɛlɛ batungi bodjeba sooti bo: Yesu iyo obaka ino ta ekulusu, iyo yona Ndjakomba amoimedja Kumu ko Masiya!»
37Ngɔngɔ dji booka mɛko mimina imia ibo baso babenea ta milema. Bawadja Petelo kona bapɔsɔlu bakina bo: «Baningani, lotungi lokɔeni bo?» 38Petelo abasɔmbedja bo: «Hombedjani milema mi bino, ko engi moto atombe batisimo na kombe e Yesu Kilito, bɛngi pekato dji bino djikutubane. Iboa, obolodjadeani ikabo di Mwembo Mosɛnɔke. 39Modjɔ mo ndikano e Ndjakomba epami tina e bino ko na bana ba bino, ko na ibia badii bohali, bato basusu ibia babeadea Kumu Ndjakomba o biso.» 40Petelo abatɔndea naikina mɛko mikina minɛnɛ bɛngi ababolodje ko na bobapingedja, ko abalaka bo: «Dhimani mohelo osakadiani bobe bo bato ibia babungedjama!» 41Ndambo e bato ta tei e bobo badhima mobalo mo nde ko batomba batisimo. Bato babakeama busa ibua, bokimana bato koto djisato ta iputo di badhimi.
Bomɔ bo iputo
42Bato basusu basapaka na bosusu booka bileho bipaka bapɔsɔlu, bohelama ta tei e iputo ko bayakaka esika emɔti#2, 42 Bayakaka esika emɔti: ebwanaka bodaa ndelo ekina Mesa e Kumu. kaoko Komiyo, kaoko mia ma boyaka mɛnɛ engbanga emɔti na Mesa e Kumu. ko bakweaka ta tei e miɔngɔnɔ. 43Engi moto aokaka bɔɔ, modjɔ mo Ndjakomba akɔkɔ bingengo na midjɔ mi bokamoa minɛnɛ na ndjea e bapɔsɔlu. 44Badhimi basusu badaaka omɔti. Leka losusu lopeaka bo lodaaka esika emɔti#2, 44 Boɛngɛ ta 4, 32-35.. 45Batɛkɛkɛ leka lo bobo na mapango ma bobo ko bakabanaka palanga djibolodja bo djisusu bobwana na botaka bo moto na moto. 46Engi busa, baputoanaka ta tepelo, bayakaka ipa esika emɔti ta ndako ko bayayaka mia ma bobo na mongandi ko na bosatitedja ta milema. 47Bakumedjaka Ndjakomba ko bapalamaka na bato basusu. Ko Kumu abakeaka masu na masu ta iputo di bobo bato ibia bapaka iyo mohelo.
നിലവിൽ തിരഞ്ഞെടുത്തിരിക്കുന്നു:
BIKƆMELI BI BA PƆSOLU 2: ngc
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
©2025 Communauté des Eglises Travaillistes (CET)
