BIKƆMELI BI BA PƆSOLU 11
11
Lisolo ditubana Petelo ta Ekelesa e Yelusalɛmɛ
1Bapɔsɔlu ko denga didaka ta Yudhea baoka bo bato ibia badaaka pɛpɛ bodaa Bayudha baasɔkɔ pongono mobalo mo Ndjakomba. 2Ehole eyana Petelo ta Yelusalɛmɛ, badhimi ba ekomi e Yudhea bamokotoaka. 3Babala bo: «Wɛ okwei ta dii bato badii pɛpɛ bodaa Bayudha ko oyaki na bu!» 4Iboa Petelo abatubana midjɔ misusu minɔmɔkɔ. Abala na bu bo: 5«Nadaki ta ngando enɛnɛ e Yope ko ehole eangɔnɔki mbi, naɛni djɛnɛ ndelo ekwaki mbi na Mwembo. Naɛni eka emɔti etiteakini: ondingo esendja emɔti enɛnɛ, epelami ta mikpɛngɔ mi yu minɛi, etitaka ta busa ko edoaki mbuti na mbi. 6Nakokoledja ta o tei ko naɛnɛki tito ba mako manɛi ba kpɔtɔ, tito ba esika, tito bakasakpakule na sɔpɔ ko na mbulu ba diko. 7Iboa naoka kɔpi emɔti ebalaka na mbi bo: “Petelo, angɔ, owa ko yaka!” 8Endelo nasɔmbedja bo: “Ngasa Kumu, modjɔ mo eka emɔti e ekia kaoko e pita epakina kwea ta monɔkɔ mo mbi.” 9Kɔpi edonga naikina ta busa ko abala bo: “Eka ebali Ndjakomba bo edii esɛnɔke pɛpɛ boɛnɛ oko bo edii eka e pita.” 10Modjɔ momina mokɔmɔkɔ mbala djisato, ko moso mosɔmbɔ ta busa. 11Enakoboa, oko ta ehole emina, baami basato baimea ta ndako iyena edaka mbi: balomamaka ta dii mbi badongaka ta Sedjale. 12Mwembo Mosɛnɔke mobala na mbi nakɛe na bu na pɛpɛ bokakoana. denga basamano ba Ekelesa ibibi baɛnɛkɛdea ino bapakeakini ta Sedjale ko iso basusu lokweaki ta ndako e Kɔnɛlɛ. 13Moto iyo alotɔndea mondumba moɛnɛkɛ iyo obwɛndi ta ndako e nde ko abala na nde bo: “ Loma bato ta Yope bɛngi babee Simona iyona okabee bo Petelo. 14Aotɔndɔdea mibalo imia mioheledjadea wɛ na bato ba wɛ basusu.” 15Ehole edaki mbi nabala, Mwembo Mosɛnɔke motita ta tei e bobo, oko mondumba motita mo ta dii iso ta mbangi. 16Iboa nalɛnɛki eka ebala Kumu bo: “Yoane abatisaka na madiba, endelo ino obatisadeani na Mwembo Mosɛnɔke#11, 16 Boindja 1, 5..” 17Eka daa Ndjakomba abapi ikabo oko modumba mopa iyo iso ehole edhimea iso Kumu Yesu Kilito: mbi nadaaki nda bɛngi nasie Ndjakomba?» 18Ngɔngɔ dji booka modjɔ momina, ibo basusu bapɔpɔnɔ ko bakumedja Ndjakomba babala bo: «Adii mɛnɛ Ndjakomba o sooti, api pongono ibia badii pɛpɛ bodaa Bayudha enɔli e bosɔmbɔtɔnɔ mida ko na bodia bomɔ bo sooti.»
Ekelesa e Atiosi
19Minɔngɔ miimana ta ehole egwa Etsiɛni miloma badhimi banangane. Bakina ta tei e bobo bakɛɛ tee mbunoko ta Penisi, ta Sipele ko na ta Atiosi#11, 19 Minɔngɔ: Boindja ta 8, 1-4. Atiosi: edii Ngando enɛnɛ ko edikamaka gupɛlɛnɛlɛ ta ekenge e mokili mo Sili, edaka na bato banɛnɛ., endelo balehaka mobalo mo Ndjakomba oko ta dii Bayudha. 20Enakoboa, badhimi bakina ba Sipele ko na ba Silɛne, baimea ta Atiosi, ko batɔndeaka pongono Bwɛndi Bopele bo Kumu Yesu ta dii bato ibia bakabale monɔkɔ mo Gɛlɛke. 21Ngulu e Kumu edaka na bu, ko bato banɛnɛ baimea badhimi ko baso bahombana ta dii Kumu. 22Denga di Ekelesa e Yelusalɛmɛ baoka gala emina. Iboa baso baloma Balanabasi ta Atiosi. 23Ndelo eimea iyo iho aɛnɛ ngɔlu e Ndjakomba ta dii badhimi, asepa ko abapingedja ibo basusu basalee Kumu na molema momɔti. 24Modjɔ mo Balanabasi adaaka moto mopele, aluma na Mwembo Mosɛnɔke ko na edhimeli. Emumu e bato esapaka ta dii Kumu. 25Ngɔngɔ djimina Balanabasi akɛɛ ta Talase ahomba Saulu. 26Iyana amoɛnɛ iyo, akɛɛ na nde ta Atiosi. Bakɔɔ yanga esusu ta Ekelesa emina ko baleha bato banɛnɛ. Edaka mbala e mbangi ta Atiosi, bɛngi batingami babeame na kombe e bakilito. 27Ta ehole emine iyena, batɛli badonga ta Yelusalɛmɛ ko batita ta Atiosi. 28Omɔti ta tei e bobo, kombe e nde Agabusi, alomama na Mwembo, abanga botɔndea bo edadea na ndja emɔti enɛnɛ ta ngondo mobimba. Modjɔ momina mokɔmɔ ta ehole edaka Kolode#11, 28 Agabusi: Boindja ta 21, 10. Kolode mokondji monɛnɛ o batano o Loma, odaaka ta bokondji ta tei e yanga e 41 ko na 54 ngɔngɔ dji Yesu Kilito. Mikanda mi ehole iyena mibwani boinedja ndja emɔti enɛnɛ ta makono matikoanake ma bokondji bo Loma ta tei yanga e 46 ko na 48 ngɔngɔ dji Yesu Kilito.. 29Iboa batingami batomba meko bo engi moto apadea eka ebwani na nde bodia bɛngi balome ekamoli ta dii denga di ehelamaka ta Yudhea. 30Ekomɔ oko iboa ko baloma bikamoli dji bobo ta dii basuku ba Ekelesa na ndjea e Balanabasi na Saulu.
നിലവിൽ തിരഞ്ഞെടുത്തിരിക്കുന്നു:
BIKƆMELI BI BA PƆSOLU 11: ngc
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
©2025 Communauté des Eglises Travaillistes (CET)
