Matiye 1
1
Mezley ŋga səkway ŋga Yesu Kəriste
(Luk 3.23-38)
1 Yesu Kəriste na, ara ndaw daa səkway ŋga Bay Davit. Davit e may, a yawa daa səkway ŋga Abəraham. Ndəhay daa səkway ŋga Yesu Kəriste he na, a zley ta Abəraham. #1.1 Raw 1.3-4; 2Ti 2.8; Mat 20.30-31
2Abəraham a na, aŋga papaŋ ŋga Izak.
Izak may, papaŋ ŋga Jakwap.
Jakwap, papaŋ ŋga ata Juda ta məlmaha hay. #1.2 Mŋc 21.2-3; 25.26; 29.32–30.24
3Juda, papaŋ ŋga ata Peres ta Zera ma yatərwa ta ŋgwas aŋga Tamar.
Peres, papaŋ ŋga Hesraŋw.
Hesraŋw, papaŋ ŋga Aram. #1.3 Mŋc 38.29-30; Rut 4.18-22
4Aram, papaŋ ŋga Aminadap.
Aminadap, papaŋ ŋga Naasaŋw.
Naasaŋw, papaŋ ŋga Salmaŋ.
5Salmaŋ, papaŋ ŋga Bəwaz ma yarawa ta ŋgwas aŋga Rahap.
Bəwaz, papaŋ ŋga Awbet ma yarawa ta ŋgwas aŋga Rut.
Awbet, papaŋ ŋga Jese. #1.5Rahap: Jes 2.1-24; Rut ta Bəwaz: Rut 1–4
6Jese, papaŋ ŋga Bay Davit.
Davit e na, aŋga papaŋ ŋga Salamaŋw. Mamaha ta key ŋgwas ŋga Uri la. #1.6 2Sa 11–12
7*Salamaŋw, papaŋ ŋga Rabəwam.
Rabəwam, papaŋ ŋga Abiyah.
Abiyah, papaŋ ŋga Asaf. #1.7 2Kə 11.23–13.23
8Asaf, papaŋ ŋga Jawzafat.
Jawzafat, papaŋ ŋga Jəwaram.
Jəwaram, papaŋ ŋga Awziyas. #1.8 2Kə 13.23–21.20; 26.1
9Awziyas, papaŋ ŋga Jəwatam.
Jəwatam, papaŋ ŋga Ahaz.
Ahaz, papaŋ ŋga Ezekiyas. #1.9 1Kə 26.1–28.21
10Ezekiyas, papaŋ ŋga Manase.
Manase, papaŋ ŋga Amaŋw.
Amaŋw, papaŋ ŋga Jawziyas. #1.10 2Kə 29.1–33.25
11Jawziyas, papaŋ ŋga ata Yekwaniya ta məlmaha hay.
A yatərwa daa masa ndəhay daa hwayak ŋga Babilaŋw
ma həlmata Israyel hay aa hwayak ata. #1.11 2Kə 34.1–36.21
12Fa dəɓa ha masa ata ma həlmata la a Babilaŋw a na,
Yekwaniya a yawa Salatiyel.
Salatiyel, papaŋ ŋga Zarawbabel.
13Zarawbabel, papaŋ ŋga Abiyut.
Abiyut, papaŋ ŋga Eliyakim.
Eliyakim, papaŋ ŋga Azawr.
14Azawr, papaŋ ŋga Sadakw.
Sadakw, papaŋ ŋga Akim.
Akim, papaŋ ŋga Eliyut.
15Eliyut, papaŋ ŋga Elazar.
Elazar, papaŋ ŋga Mataŋ.
Mataŋ, papaŋ ŋga Jakwap.
16*Jakwap, papaŋ ŋga *Jawzef, zel ŋga Mari
ma yarawa Yesu ma zəlmara Kəriste, anda meləvey,
ndaw masa Bay Gazlavay ma wala ŋga ləhdata ndəhay. #1.16 Luk 1.27
17Anda keɗe, dəga fa Abəraham kasl fa Davit na, dedeŋ ŋga dedeŋ hay kuraw a ray a məfaɗ. Dəga fa Davit e may kasl ta pas masa ata ma həlmata Israyel hay a Babilaŋw na, dedeŋ ŋga dedeŋ hay kuraw a ray a məfaɗ. Yaw, dəga ta pas a ŋgene kasl fa mayawa ŋga Kəriste na, dedeŋ ŋga dedeŋ hay kuraw a ray a məfaɗ saya.
Mey da ray mayawa ŋga Yesu Kəriste
(Luk 2.1-7)
18Ehe cəndamara mey da ray mayawa ŋga Yesu Kəriste. Mari mamaha na, ara kwakwa ŋga *Jawzef. Daa masa Jawzef ta la Mari a way aŋga daa ba araŋ na, Mari ta key hwaɗ sem ta gədaŋ ŋga *Mesəfney ŋga Gazlavay. #1.18 Luk 1.35 19Jawzef, maŋgasl ŋga Mari na, ara ndaw maaya ta leŋgesl. Daa masa aa ma cənda Mari ta key ta hwaɗ sem na, a wuɗey a par hwaray fa dey ŋga ndəhay ba. Da ray ŋgene, a wulkey ŋga mbəkda kwakwa aŋga, ama, a wuɗey ŋga mbəkda na, ndaw a səra mey a ba. 20Daa masa Jawzef fa wulkey da ray mey a na, maslaŋ ŋga Bay Gazlavay da vaɗ taʼ, a sawa a ray a, aa guzlar daa mesəfney, a ləvar: «Jawzef, səkway ŋga Davit, ka da zlurey ŋga la kwakwa akah Mari ba, maja a key ta hwaɗ ŋgene na, ara ta gədaŋ ŋga Mesəfney ŋga Gazlavay. 21A yawa bəz-mezəle la, ka da par mezəley Yesu, maja a da ləhdata ndəhay aŋga hay daa mebərey ata hay.» #1.21 Pəs 130.7; Mat 1.25; Luk 1.31; Snm 4.12
22Cek aha keɗe cəpa ta key la anda Gazlavay maa guzlwa zleezle ta mey *ndaw ma təla mey aŋga, ma ləvey:
23«Nəka taw! dam-saɓara a key ta hwaɗ la manjar zel,
a da yawa bəz-mezəle.
A da zəlmara Emanəwel»,
anda meləvey, Gazlavay aa ta aləkwa. #1.23 Iza 7.14
24Jawzef a sləkɗey daa ɗar, fa dəɓa ha a ka anda maslaŋ ŋga Bay Gazlavay ma ləvar heyey. Leŋ! a la kwakwa aŋga Mari a way, 25ama, ta cəmam cew e daa ba, kasl fa mayawa ŋga bəzey a. Jawzef a par mezəley Yesu. #1.25 1.21
നിലവിൽ തിരഞ്ഞെടുത്തിരിക്കുന്നു:
Matiye 1: MIFU
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
