Mata 25

Laslaŋgal ma ata heldəməye wam

1Yesu a zlap, a ŋgaya: «Lazam bay ma mgba ata uzlaf ca, a nja ana laslaŋgal ma ata heldəməye wam, maa əy ŋta patarla tata ege, əy nda ŋ ŋgelene ma a mawal dəma. 2Heldəməye jaɓan ŋ taba tata ege ca, ŋkwaɓ ŋ ha tata ege askwaw, ma jaɓan ege yam, ŋkwaɓ ŋ ha tata ege aka. 3Heldəməye maa ŋkwaɓ ŋ ha tata ege askwaw wese ca, əy ŋta patarla tata ege, kaw əy keɗeɗe mel ara ŋ gajak matakan ege, askwaw. 4Cemey, a heldəməye maa ŋkwaɓ ŋ ha tata ege aka ca, əy ŋta patarla tata ege leŋ əy keɗeɗe mel ara ŋ gajak matakan ege. 5Mawal dəma wese káhwasha kəcaŋ askwaw. Aya, heldəməye wese ege, wan əy wan tata tewtew. 6Ŋ taba zaɗaw ca, əy zləme varay a kaja, a ŋgaya: “Mawal dəma káhwasha aza, hune nda ŋ ŋgelene ma!” 7Aya, heldəməye wese ege, əy gwarzam, əy slata patarla tata ege. 8Heldəməye maa ŋkwaɓ ŋ ha tata ege askwaw wese, əy zlepetene ŋ heldəməye maa ŋkwaɓ ŋ ha tata ege aka, əy ŋgaya: “Mbahw, hune njeney mel ŋkune wese, cekuɗe may? Patarla ŋcene ege, əy kamac tata.” 9A təwse ca, əy zenetene, əy ŋgaya: “Andəwse səkwaw, mel anta a kanahwasaheje tewtew ŋtakwaw, səkwaw. Galaɓa ca, hune nda ŋ səkamha ara hejəye ma kasəkam mel ege.” 10Maa heldəməye maa ŋkwaɓ ŋ ha tata ege askwaw wese, əy ɗak ŋ səkamha mel ca, mawal dəma, a hwasha, aya, heldəməye maa ŋkwaɓ ŋ ha tata ege, əy dam tata tewtew a ujek zlaɓa mawal dəma, aya, əy mpak ma ujek aza. 11A dəwze anta ca, heldəməye ma jaɓan maa ŋkwaɓ ŋ ha tata ege askwaw wese, əy ndaha, əy ɗaf ma a ma ujek, əy ŋgaya: “Bay madakal, bay madakal, zlerzeney ma ujek.” 12Cemey, mawal dəma wese, a zenetene, a ŋgaya: “Sa kazlapahune, njenjəwen, sa kasanahune səkwaw.”» 13Aya, Yesu a zlap zeney, a ŋgaya: «Hune sla ka, mavəday kaw hune kasan pes anta səkwaw, kaw kasan la kála anta tete, səkwaw.»

Laslaŋgal ma ata mala zlan ege mahkaɗ

14Yesu a zlap, a ŋgaya: «Lazam bay ma mgba ata uzlaf ca, a nanja ana vemey? A nanja ana laslaŋgal ma ata ɗala ma kanda ŋ ŋcəwerha. Aya, a yahata mala zlan anta ege, a veletene səkan ma asa ra anta ka. 15A velene ŋ kaw vayay tata, səlay tete ata ɓarɓar anta. A velene ŋ ɗala wende səlay bakatar temere jaɓan, ŋ ɗala wende zeney, səlay bakatar temere gbak, ŋ ɗala mamahkaɗ anta, səlay bakatar temere teŋguleŋ. A dəwze anta, tel a nda anta. 16Mala zlan ma lem səlay bakatar temere jaɓan wese, a nda a la fəlew a mbe, aya, a lemha səlay bakatar temere jaɓan matakan a heɗe. 17Mala zlan ma lem səlay bakatar temere gbak, a nda a la ana mbe yam, a lem səlay bakatar temere gbak matakan a heɗe. 18Cemey, mala zlan ma lem səlay bakatar temere teŋguleŋ wese ca, a nda, a ra uley ka ŋ hayak, a mpas səlay a təwjek anta wese ka ŋma.»

19«Wan dakala a dəwze anta, təwjek mala mala zlan ege wese, a zenha aza, aya, a ɗawzata səlay maa a veletene wese. 20Mala zlan ma lem səlay bakatar temere jaɓan wese, a ndaha, a ghwelzene səlay bakatar temere jaɓan matakan, a ŋgaya: “Təwjek naka, hwa kévelekey səlay bakatar temere jaɓan. Sa kélem səlay bakatar temere jaɓan matakan a heɗe.” 21Təwjek anta a zenene, a ŋgaya: “Kadak, hwa mala zlan ma taŋtaŋ. Hwa kála zlan kadak a səkan ma pəzekw, sa navalahwaw səkan ma pa ma tuwah dakala. Ndaha, kazaw, ŋ sasam ŋ la anta.” 22Mala zlan ma lem səlay bakatar temere gbak, a ndaha a ghwelzetene səlay bakatar temere gbak matakan, a ŋgaya: “Təwjek naka, hwa kévelekey səlay bakatar temere gbak. Ca, sa kélem bakatar temere gbak matakan, a heɗe zeney.” 23Təwjek anta a zenene, a ŋgaya: “Kadak, hwa mala zlan ma taŋtaŋ. Hwa kála zlan kadak a səkan ma pəzekw, sa navalahwaw səkan ma tuwah dakala, ndaha ŋ sasam ara sa.”»

24«A dəwze anta, mala zlan ma lem səlay bakatar temere teŋguleŋ, a ndaha, a zlepene, a ŋgaya: “Təwjek naka, sa kasanaw, hwa ca, hwa ɗala ma kasan hahar ata ɗala səkwaw. Hwa kepet səkan ata la maa hwa kázlakwaw, askwaw, hwa kambal səkan ata la maa hwa káŋgaɓaw, askwaw. 25Sa kálalak naka ata hwa, sa kánda ŋ ɓahaza bakatar temere ŋkwa ka ŋ uley ŋ hayak, ŋghe səlay ŋkwa.” 26Təwjek anta a zenene, a ŋgaya: “Hwa mala zlan ma kadak səkwaw, masagal. Hwa kasan, sa kepet səkan ata la maa sa kázlakwaw, askwaw, sa kambal səkan ata la maa sa káŋgaɓaw, askwaw. 27Keɗe hwa ata cekey səlay naka aka ara mabah səlay ege, ndar mada sa kézenha aza ca, sa nalamza səlay naka a yam a heɗe.” 28Aya, təwjek anta wese, a zlepene, a ŋgaya: “Hune ŋtene səlay bakatar temere ma ara mbe wese aza, hune velene ŋ mala zlan ma lem səlay bakatar temere jaɓan a heɗe wese. 29Mavəday, kaw vayay, maa səkan anta aka ca, əy nevelene a heɗe zeney, a nelem dakala. Cemey, a ɗala maa səkan anta askwaw ca, kaw ma pəzekw maa a kedeŋza ŋ lem ca, əy neŋtene aza. 30Cemey, mala zlan masagal wese ca, hune nahza a bəza ŋ kuzle, ma lahan leŋ ma ɓam zləɗeŋ, a təwse”.»

Mba Ɗala a nandaha ŋ ghem manhayak

31Yesu a zlap zeney, a ŋgaya: «Maa Mba Ɗala a kanandaha ŋ ɓardakw anta zlaɓa malaɓ anta ege tewtew ca, a nanja ata lanja bay anta. 32A təwse ca, hejəye tewtew ma ŋ manhayak ege, əy neɓecaha a tama anta. Aya, a naŋgalata hejəye ana maa mba njəwen a kaŋgalata ŋtəməye ey ŋhwəye. 33A nagarzata ŋtəməye ka ata ra zam anta leŋ ŋhwəye ata ra gula anta. 34Aya, bay a nezlepetene ŋ hejəye ma ata ra zam anta ege wese, a ŋgaya: “Hune ndaha, hune hejəye maa bəzla Vana ata hune ege, hune lem lazam bay mala Gazlavay maa a slaza ka mavəday hune, mar aka ata laba manhayak. 35Ayaw! Metes kéjekey, hune kévelekey səkan ta zam, yam kéjekey, hune kévelekey yam ŋ sa, sa mbəlakw, hune kélemzekey a wata ŋkune ege. 36Sa a meterseŋw, hune kécekey rəgwac ata kusam, sa kádawar, hune kándaha ŋ serzekey, sa ŋ daŋgay, hune kándaha ŋ serzekey.”»

37«Aya, hejəye ma taŋtaŋ wese ege, əy naɗawza, əy ŋgaya: “Bay Madakal, nene gərehwaw, metes a kajahwaw, nene kávalahwaw səkan ŋ zam ca, vepey? Askwaw ca, yam a kajahwaw, nene kávalahwaw yam ŋ sa ca, vepey? 38Nene gərehwaw, hwa mbəlakw, nene kálamzahwaw a wata ŋcene ege ca, vepey? Askwaw ca, hwa a meterseŋw, nene kácahwaw rəgwac ata kusam ca, vepey? 39Nene gərehwaw, hwa kadawar, askwaw ca, hwa ŋ daŋgay, nene kánda ŋ sarahwaw ca, vepey?” 40A təwse ca, bay wese, a nezenetene, a ŋgaya: “Sa kazlapahune njenjəwen, səkan tewtew maa hune letene ŋ zlana ma pa ma pəzekw ŋ taba zlana ŋghe ege ca, hune la ca, ŋ sa.”»

41«A dəwze anta, bay wese, a nezlepetene ŋ hejəye ma ata ra gula anta ege, a ŋgaya: “Hune nda ŋkune gədak a sa, hune hejəye magayagay ege. Hune nda ŋ kwahwaw ma kamac səkwaw maa Gazlavay a sletene aka ŋ malula ey malaɓ anta ege. 42Ayaw! Metes kéjekey, hune kévelekey səkan ta zam askwaw, yam kéjekey, hune kévelekey yam ŋ sa, askwaw. 43Sa mbəlakw, hune kélemzekey a wata ŋkune ege, askwaw, sa a meterseŋw, hune kécekey rəgwac ata kusam askwaw, sa kadawar leŋ sa ŋ daŋgay, hune kándaha ŋ serzekey askwaw.”»

44«Aya, əy nezenene, əy ŋgaya: “Bay Madakal, maa nene gərehwaw, metes a kajahwaw, askwaw ca, yam a kajahwaw, askwaw ca, hwa mbəlakw, askwaw ca, hwa a meterseŋw, askwaw ca, hwa kadawar, askwaw ca, hwa ŋ daŋgay, nene kácakzahwaw askwaw ca, vepey?” 45Bay wese, a nezenetene a ŋgaya: “Sa kázlapahune, səkan tewtew maa hune kélene ŋ ɗala teŋguleŋ ŋ taba hejəye naka ma pa pəzekw pəzekw ŋghe ege askwaw, ca, hune la səkwaw ca, ŋ sa.” 46Aya, hejəye ma ata ra gula ege wese, əy nanda ŋ sa gef ma katuwaɗ səkwaw, cemey, hejəye ma taŋtaŋ ege a tama Gazlavay ca, əy nelem lanja ma tuwah ma katuwaɗ səkwaw.»

നിലവിൽ തിരഞ്ഞെടുത്തിരിക്കുന്നു:

Mata 25: BHS

ഹൈലൈറ്റ് ചെയ്യുക

പങ്ക് വെക്കു

പകർത്തുക