Makko 7
7
Injisyo yaBamataata
(Mateyu 15:1-9)
1Bafarisi abamwi bayiisyi bamulawu bakali bazwa kuJelusalemu bakabunganina Jesu, 2bakabona bamwi basikwiiya bakwe kabaliikulya chakulya amaboko “atasalali,” nkukuti, atasambide zyeendelana achiyanza chabo.
3(Bafarisi abaJuda boonse tabalyi chakulya kabatasambide maboko aabo pe, mbuli ziyanza zyaabamataata. 4Nibazwa kuzisambalilo tabalyi pe kunze akuti basambe maboko aabo. Balabamba azimwi ziyanza zyiingi, zili mbuli kusanzya nkomechi, nongo zyameenda azilongo.)
5Aboobo bafarisi abalembi bamulawu bakabuzya Jesu bati, “Nkaamboonzi basikwiiya bako nibatalondoli ziyanza zyabamataata, balalya amaboko atasalali?”
6Jesu wakabavwiila wati, “Isaya wakali kwaamba kabotu naakasinsima atala andinywe nibasikuupawupa; mbuli mbukulembedwe kuti,
‘Aaba bantu bandilemeka amilomo yabo,
pesi myoyo yabo ilikule andime.
7Bandikomba chabiyo, injiisyo zyabo milawu yanjiisyo zyabantu!’#7:7 Iyizaya 29:13
8Mwakaleka milawu yaLeza, mpawo mwajatisisya kuziyanza zyabantu.”
9Mpawo wakamba kuti kulimbabo, “Mujisi nzila inembene yakusunzulusya mulawu waLeza akuubikka ambali kuti mulondole kabotu ziyanza zyanu. 10Mozesi wakati, ‘Lemeka wuso abanyoko,’ alimwi, ‘Kufumbwa muntu utukila wisi abayina, weelede kujeegwa.’ 11Pesi nywe mulati na muntu waamba kuli wisi abayina, kuti kufumbwa zilibiyeni nzimwaleelede kugwasigwa kulindime ngu ‘Kkobbani’ (nkukwaamba kuti, nchipo chaLeza), 12eelyo mutamuzumizyi kuti achite chimwi chintu kuli wisi nibaba bayina. 13Aboobo mulalobya ijwi lyaLeza nkaambo kaziyanza zyanu nzimwakabamba. Alimwi mulachita zintu zyiingi zili mbuli eezyo.”
Zintu Zisofwazya Muntu
(Mateyu 15:10-20)
14Eelyo Jesu wakayita makamu abantu wati, “Amundiswiilizye moonse mumvwisisisye eechi. 15Taakwe chili kunze amuntu chikonzya ‘kumusofwaazya’ kuti chanjila mulinguwe. Pesi chisofwaazya muntu ncheecho chizwa mukati mumoyo wamuntu ‘nchiimusofwaazya.’ 16Kufumbwa muntu ulaa matwi akumvwa ngamvwe.”
17Jesu kali wasiya makamu abantu wakunjila muŋanda, mpawo basikwiiya bakwe bakamubuzya atala achikozyano eechi. 18Wakati kulimbabo, “Anu mulibafubafuba na? Tamubwene na kuti taakwe chinjila mumuntu chili kunze chinga chilamusofwaazya, 19mbukunga tachinjili mumoyo wakwe pesi mubula biyo, mpawo chazwa aanze.” (Mukwaamba oobu, Jesu wakasalazya zyakulya zyoonse.)
20Wakeendelela anembo kaamba kuti, “Chizwa mumuntu nchiichita kuti asofwaale. 21Nkaambo mukati, kamyoyo yabantu, muzwa mizeezo mibi, buyangwe, kubba, bujayi, bwaamu, 22butangazu, luuni, lweeno, malali, ibbivwe, kusinga, kulipunayizya abufubafuba. 23Zibi eezi zyoonse zizwa mumoyo nzisofwaazya muntu.”
Lusyomo LwaMwanakazi
(Mateyu 15:21-28)
24Jesu wakasiya busena oobo akuya kuchilikiti chaTaya. Wakanjila muŋanda alimwi teewakayanda kuti naba uumwi muntu azibe kuti mpali, nikuba boobo wakakachilwa kuyuba. 25Mpawawo umwi mwanakazi wakali amwana wakalinjidwe muuya mubi, naakamvwa biyo atala aJesu wakaza wawida kumawulu aakwe. 26Mwanakazi ooyo wakali wamusyobo wabaGilikki wakazyalilwa kuSayilofonisiya. Wakakumbila Jesu kuti atande muuya mubi uzwe kumwana wakwe musimbi.
27Jesu wakati kulinguwe, “Lutaanzi leka bana balye zyoonse nzibayanda, nkaambo tachili chibotu pe kubweza chakulya chabana mpawo usoweele bankala.”
28Wakamuvwiila wati, “Iiyi Mwami, pesi alabo bankala balabwezelela bufwefwelenge bulosegwa abana munsi lyatebuli!”
29Mpawo wakamwaambila kuti, “Mbwasandula oobo, kuya biyo, muuya mubi wazwa kale mumwana wako musimbi!”
30Eelyo wakabweeda kuŋanda wajana mwana ulilede abulo, muuya mubi kuuli wazwa kale.
Jesu Uponesya Musinkematwi KaliSyataambi
31Eelyo Jesu wakazwa kuchilikiti chaTaya wakeenda wayinda muSidoni, kaya kulwizi lwaGalili mpawo wanjila muchisi chaDekkapolisi chamadolopo alikkumi. 32Ooko, bamwi bantu bakamweetela mwaalumi musinkematwi kalisyataambi, mpawo bakamukumbila kuti amubikke luboko lwakwe amuponesye.
33Eelyo wakamugwisya mubantu bayiingi wamutola kumbali, Jesu wakamunjizya minwe mumatwi. Mpawo Jesu wakaswida wadompa lulimi lwamwaluumi ooyo. 34Mpawo wakalungumana walanga kujulu, mukweefula kupati wakati kulinguwe, “Efata!” (nkukwaamba kuti, “Sinkuka”).
35Nizyakachitwa eezi mwaalumi oolya wakasinkuka matwi aakwe, lulimi lwakwe lwakaangunuka mpawo watalika kwaambuula kabotu.
36Eelyo Jesu wakabalayilila kuti, bataambili bantu, pesi naakali kubalayilila oobu, bantu nibakayindilila loko kwaambuula azyakachitika. 37Bantu bakazula kugamba kabaamba kuti, “Uchita kabotu loko muzintu zyoonse, Uchita basinkematwi kuti bamvwe aabo syataambi kuti baambuule.”
നിലവിൽ തിരഞ്ഞെടുത്തിരിക്കുന്നു:
Makko 7: TTP
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
The Word for the World International
