Lukku 8
8
Mwanakazi Utobela Jesu
1Kuzwa aawo Jesu wakayinda muzisi amumyuunzi, kakambawuka akweeta makani mabotu atala abwami bwaLeza. Alimwi balikkumi ababili bakali anguwe, 2alimwi bamwi banakazi, mbaakaponiya kumuuya mubi amachise: Meri (Utegwa Magadalini), ooyu wakalijisi myuuya mibi yasikazwa ilimusanu ayibili wakayitanda kuzwa mulinguwe, 3Alimwi Jowana mwanakazi waChuuza, mweendelezi waŋanda yaHerodi aSusana abayingi bamwi, bakali kumukutawukila mumilimu yabo kababelesya zyabo.
Chikozyano Chasikumiza Mbuto
(Mateyu 13:1-9; Makko 4:1-9)
4Alimwi nkamu mpati yakabungana abantu kabazwa kudolopo adolopo bakaza kulinguwe, wakaambuula muchikozyanisyo wati:
5“Sikumiza wakaya kukumiza mbuto yakwe, alimwi aawo naakali kumiza, imwi yakawida munzila mpawo yakalyatwa amawulu, mpawo bayuni bamujulu bakiilya. 6Alimwi imwi yakawida amwaala; niyakali kuyabukomena, yakapusama, nkaambo takukwe niyakajana butete. 7Mpawo imwi yakawida anyika yakali amisamu yamaamvwa; alimwi maamvwa akakomena aamwi akayisyanikizya. 8Alimwi imwi yakawida muvu bbotu mpawo yakamena, yazyala zilyo zilimwaanda yindulidwe.”
Naakachili kwaamba eechi, wakayiita, “Aabo balaamatwi akumvwa, ngabamvwe.”
Bupanduluzi Bwachikozyano
(Mateyu 13:10-17; Makko 4:10-12)
9Lino basikwiiya bakwe nibakabuzya, atala acheechi chikozyanisyo kuti chambaanzi. 10Wakaamba wati, “Kulindinywe zilipedwe kuti muyizibe nsiiswa yabwami bwaLeza, pesi kuli bamwi ndaambuula amikozyanisyo, kuchitila kuti kababona pesi kabatabonesesyi pe, alimwi kabamnvwa pesi kabatamvwisisisyi pe.”
Jesu Mbwapandulula Mukozyano Wasikumiza
(Mateyu 13:18-23; Makko 4:13-20)
11“Lino nzuwaamba mukozyanisyo ooyu nzeezi: Imbuto ndijwi lyaLeza. 12Eeyo yakawida munzila ilimbuli aabo bantu bamvwa ijwi lyaLeza, mpawo Satani wasika wabanyanzya ijwi kuzwa mumyoyo yabo, kuti baleke kusyoma akufutulwa. 13Eeyo yakawida amwaala ilimbuli aabo bantu, nibamvwa jwi lyaLeza, balitambula alukondo; pesi takukwe nibaba amiyanda, balasyoma kwachiindi chiniini, alimwi muchiindi misunko niyasika balawa. 14Alimwi atala ayeeyo yakawida mumaamvwa, ilimbuli aabo bantu bamvwa ijwi lyaLeza, pesi nibayabweenda balayaswa aziyandisyo abuvubi amisalo yabuumi, alimwi michelo yabo tayikwe niibizwa pe. 15Mpawo eeyo yakawida muvu bbotu, ilimbuli aabo bantu, bamvwa ijwi lyaLeza, balijatisisya munzila isyomekede amoyo mubotu, akuzyala michelo chakutaleka.”
Ilampi aChibikilo
(Makko 4:21-25)
16“Taakwe uyasya chimwinikisyo, mpawo watibbika achisuwo, naakuti wabikka munsi abulo, pesi ulabikka achibikilo chimwinikisyo kuchitila kuti aabo banjila bamunikilwe.”
17“Nkaambo takukwe chisisidwe pe chitakwe kuyoozwa antangalala, nikuba kufumbwa nsiiswa iyooleka kufunkununwa kuza kumumuni.”
18“Ngamuchenjele aboobo nzila njimumvwa aayo, nkaambo ooyo ujisi uyooyungizigwa, alimwi ooyo utajisi, azeezyo nzyayeeya kuti ulijisi uyoonyanzigwa.”
Banyina aBakulana baJesu
(Mateyu 12:46-50; Makko 3:31-35)
19Lino bayina aJesu abanike bakwe bakaza kabayanda kwaambula awe, pesi taakwe nibakakonzya kusika mpakalibede nkaambo kamakamu. 20Mpawo umwi wakamwaambila kuti, “Banyoko abanike bako baliimvwi aanze, bayanda kukubona.”
21Pesi wakavwiila wati, “Baama abanike bangu mbaaba bamvwa ijwi lya Leza akulichita.”
Jesu Wumuzya Muuwo
(Mateyu 8:23-27; Makko 4:35-41)
22Buzuba bumwi wakayinka waakunjila mubwaato abasikwiiya bakwe, mpawo wati, “Ngatuzubukile mutaleeliya yalwizi.” Mpawo bakazubuka baya mutala. 23Mpawo nibakali kuyabuyamba wakoona. Alimwi kwakawunga iguwo pati lyamulwizi, bakazula ameenda, alimwi bakali mupenzi. 24Mpawo bakayinka bamubusya bati, “Mwami, Mwami, tuliikufwa!”
Alimwi wakabuka wakulayilila iguwo amayuwe mumeenda; mpawo meenda akabatama. 25Mpawo wakababuzya wati, “Lulaali lusyomo lwanu?” Alimwi bakayoowa bakaankamana, bakaambilana bati, “Ngwani ooyu ulayilila niliba guuwo ameenda, mpawo zimuswiilile?”
Jesu Uponiya Mwaalumi Ula Basikazwa
(Mateyu 8:28-34; Makko 5:1-20)
26Mpawo bakayamba baakusika kubusena bwaba Gerasene, bulangene aGalili. 27Mpawo Jesu naakazwa wakalyata kunkomwe, wakaswaniya mwaalumi uzwa muchisi wakala muuya mubi; kwachiindi chilamfu taakali kuzwaata zisamo pe, taakali kukkala muŋanda pesi mumagolo azibunda. 28Naakabona Jesu, wakagawula, wawida kumawulu aakwe, mpawo wompolola ajwi pati wati, “Ujisi nzi andime, Jesu, Mwana waLeza Sijulu lyaMajulu? Ndakukumbila, kuti utandipenzyi.” 29Nkaambo Jesu wakalayilila muuya mubi kuti uzwe mumwaalumi ooyu. (Nkaambo chiindi chiingi wakali kunoonga wamusikila; wakali kulindwa, akwaangwa anketani kumaboko akumawulu, pesi wakali kuzidunsula alimwi wakali kutolwa asikazwa kubusena butakwe bantu.)
30Eelyo Jesu wakamubuzya kuti, “Nduweni zina lyako?” Mpawo wakamuvwiila wati,
“Ndime Ligiyoni”; nkaambo wakalinjidwe abasikazwa bayiingi. 31Mpawo yakamukumbila kuti atayitandili mumulindi utagoli.
32Lino kwakali butanga bupati bwangulube bwakali kuchela kumbali achilundu; eelyo myuuya yakamukumbila kuti ikanjile mungulube. Mpawo wakiizumizya kuti iyeende. 33Mpawo basikazwa bakazwa kuli ooyu mwaalumi mpawo bakunjila mungulube, mpawo butanga bwakachijana bwakukunukila mulwizi mpawo bwanikila.
34Lino aabo beembeli nibakabona zyakachitika, bakachija, mpawo bakubaambila eezi muchisi amunyika. 35Mpawo bantu bakazwa kukuyoolanga zyakachitika, alimwi bakaza kuli Jesu, mpawo bakamujana mwaalumi wakali abasikazwa bakali baandwa, kakkede kumawulu aJesu, kazweete alimwi kalomene; mpawo bakayoowa. 36Lino aabo bakali bazibona bakabaambila kuti ooyo wakali abasikazwa wakapona. 37Mpawo bantu bamasena abambene anyika yaGerasene bakamukumbila kuti ayende, nkaambo bakali bazula kuyoowa, alimwi wakanjila mubwaato mpawo wabweeda. 38Lino ooyo mwaalumi wakagwisigwa muuya mubi wabasikazwa, wakakumbila kuti akkale aawe;
pesi wakamulayilila, wati, 39“Bweeda kuli bakuŋanda yanu, ukabaambile akubatondeezya eezyo Leza nzyakuchitila.” Alimwi mwaalumi ooyu wakeenda, kalokwaambila chisi choonse eezyo zyoonse zipati nzyakachitilwa aJesu.
Mwana Musimbi waJayirasi aMwanakazi Wakajata Chikobela ChaJesu
(Mateyu 9:18-26; Makko 5:21-43)
40Lino Jesu naakaboola, nkamu yakamutambula, nkaambo boonse bakali kulinda nguwe. 41Alimwi kwakaza mwaalumi izina lyakwe utegwa Jayirasi, wakali mweendelezi wachikombelo chabaJuda; mpawo wakafugama kumawulu aJesu wamukumbila kuti beende aamwi kuŋanda yakwe, 42Nkaambo wakali amwana musimbi uumwi biyo, ulaminyaka ilikkumi ayibili, alimwi wakali waamba kufwa. Alimwi nakeenda,
inkamu yabantu yakali kumusyanikizya. 43Mpawo kwakali mwanakazi wakalaabulwazi bwakalobola kwaminyaka ilikkumi ayibili; alimwi taakwe wakamuponiya pe. 44Wakaza kusule lyakwe mpawo wajata mupimbili wachisamo chakwe, alimwi mpawaawo bulwazi bwakalobola bwakamana. 45Eelyo Jesu wakabuzya wati, “Ngwani wandijata?” Eelyo boonse nibakakazya,
Pita wakati, “Mwami, inkamu ilikuzyungulukide akukusyanikizya.”
46Pesi Jesu wakati, “Kuli umwi wandijata; nkaambo ndamvwa nguzu kazizwa kulindime.” 47Mwanakazi naakabona kuti tachikonzyi pe kulisisa, wakaza bukankama; mpawo wakafugama kumawulu aakwe, wakaamba kunembo lyabantu boonse kuti nkaamboonzi chapa kuti amujate, alimwi ambwaakabuka akupona mpawaawo. 48Jesu wakati kulinguwe, “Yomusimbi, lusyomo lwako lwakuponiya; koya muluumuno.”
49Naakachili kwaambuula, kwakaza umwi mwaalumi mweendelezi wachikombelo chabaJuda, wakamwaambila wati, “Simalelo wangu utalikatazyi mwana musimbi wako wafwa.”
50Jesu naakamvwa oobo wakavwiila wati, “Utayoowi, syoma biyo, alimwi mwana musimbi wako ulapona.”
51Mpawo naakasika kuŋanda yaJayirasi, taakwe mbakazumizya kunjila awe, kunze kwa Pita aJoni aJakkobbu awisi abayina baMwana. 52Bantu boonse muchiindi nchicheecho bakali kulila akuumamubila nkaambo kamwana, pesi Jesu wakati, “Mutalili, nkaambo tafwide pe, mwana muumi pesi ulede biyo.”
53Mpawo bakamuseka, kabazi kuti mwana wakalifwide. 54Pesi wakamujata aluboko mpawo wati, “Yomwana buka!” 55Mpawo muuya wakwe musimbi wakaboola, eelyo mpawawo wakabuka, alimwi Jesu wakabalayilila kuti bape mwana chakulya. 56Mpawo bazyali bakwe bakagamba, alimwi Jesu wakabalayilila kuti bataambili naba uumwi zyakachitika.
നിലവിൽ തിരഞ്ഞെടുത്തിരിക്കുന്നു:
Lukku 8: TTP
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
The Word for the World International
