Lukku 6
6
Mubuzyo Atala Abuzuba Bwasabata
(Mateyu 12:1-8; Makko 2:23-28)
1 #
Mat 12:1-8; Mkk 2:23-28; Det 23:25. Mubuzuba bwasabata, #6:1. Amwi ansiku akazumizigwa alembedwe kutimusabata lyabili litobela taanziJesu naakali kuyabweenda kabayabwiinda mumyuunda yazilyo, mpawo basikwiiya bakwe bakatalika kupulula mayila, kabaliikupuka amaboko mpawo kabolookulya. 2#Kul 20:10; 23:12; Det 5:14. Pesi bamwi babaFarisi bakababuzya bati, “Nkaamboonzi nimuchita ziteelede mumulawu mubuzuba bwasabata?”
3 #
1 Sam 21:1-6. Mpawo Jesu wakavwiila wati, “Tamunabala na kuti Devidi wakachitayi naakaba anzala, lwakwe antoomwe abaabo mbakali aabo: 4#Lev 24:9. Ambwaaka kunjila muŋanda yaLeza, mpawo wakubweza chinkwa mpawo walya chipayililidwe, eecho chitakukwe kuzumininwa amumulawu wakachita ziteelede mumulawu kunze kwabapayizi abalikke kukulya, alimwi wakapa bakali kweenda aawe?”
5Alimwi wakabaambila wati, “Mwana amuntu nguMwami wasabata.”
Mwaalumi Wakali Aluboko Lulebukide
(Mateyu 12:9-14; Makko 3:1-6)
6 #
Mat 12:9-14; Mkk 3:1-6. Mulimwi sabata, Jesu wakanjila muchikombelo chabaJuda mpawo wayiisya, alimwi kwakali mwaalumi wakali aluboko lwakululyo lulebukide. 7Mpawo bayiisyi bamulawu abaFarisi bakali kuyanda kulanga kuti ulamuponiya na mubuzuba bwasabata, kuchitila kuti bamujanine mulandu wakumutamikizya. 8Pesi Jesu wakalizi zyakali mumizeezo yabo, mpawo wakaambila mwaalumi wakali lebukide luboko wati, “Nyampuka uze wimikile awa akati.” Alimwi mwaalumi ooyo wakabuka wimikila mpawawo. 9Alimwi Jesu wakabaambila wati, “Ndikumbila kubuzya, zileelede mumulawu na mubuzuba bwasabata kuchita chintu chibotu naakuti nchibi, kuvuna buumi naa kubunyonyona?” 10Mpawo naakamana kubalanga boonse, wakaaambila mwaalumi ooyu wati, “Tandabika luboko lwako.” Alimwi wakachita oobo: luboko lwakwe lwakapona.
11Alimwi kabafundikide mukunyema abukali, mpawo bakabamba kuti ngabalamuchita biyeni Jesu.
Jesu Usala Basikwiiya Balikkumi Ababili
(Mateyu 10:1-4; Makko 3:13-19)
12 #
Mkk 3:13-19; Mat 10:2-4; Inch 1:13. #Luk 3:21; 5:16; 9:18,28; 11:1. Lino mumazuba aayo, wakaya kuchilundu kukukomba, oko nkwakakukomba kuli Leza busiku boonse. 13Nibwakacha, wakayiita basikwiiya bakwe, mpawo wasala balikkumi ababili akati kabo, aabo mbakawulika kuti mbatumwa; 14Wakasala Sayimoni, ooyo ngwakawuzika kuti Pita aEnduru mukulana aSayimoni aJakkobbu aJoni aFilipu aBbatolomewu, 15mpawo Mateyu aTomasi aJakkobbu mwana aAlifasi aSayimoni muZiloti, 16alimwi Judasi mwana aJakkobbu aJudasi Isikkariyoti, ooyu wakamuzya.
Jesu Ulaponiya Akuyiisya
(Mateyu 4:23-25)
17 #
Mat 5:1-2; 4:24-25; Mkk 3:7-12. Wakaseluka aabo, mpawo bakayimikila anyika itendebede, kali ankamu mpati yabasikwiiya bakwe, amakamumakamu abantu bakaza kabazwa mumyuunzi yoonse yaJudiya akuJerusalemu, alimwi akunkomwe zyalwizi lwakuTaya akuSidoni, bakaza kuzomuswiilizya, akuti abaponiye kumalwazi aabo; 18alabo bakali kupenzegwa amuuya mubi bakaponesegwa. 19#Mkk 3:10; Mat 9:21; 14:36; Luk 5:17. Alimwi makamumakamu woonse akali kuyanda kumuguma, nkaambo nguzu zyakalikuzwa kulinguwe mpawo wakabaponiya boonse.
Lukondo Amapenzi
(Mateyu 5:1-12)
20 #
Mat 5:3-12. Mpawo wakatambya meso akwe kuli basikwiiya bakwe, wati:
“Mulaachoolwe nubachete,
nkaambo bwami bwaLeza mbubwanu!”
21“Mulaachoolwe inywe nimulaanzala lino,
nkaambo muyookkuta!”
“Mulaachoolwe inywe nimulila lino,
nkaambo muyoosekelela!”
22 #
1 Pit 4:14; Jn 9:22; 16:2. “Mulaachoolwe na bantu bamusula akumwaanda akumwaamba bubi, nkaambo kazina lyaMwana aMuntu!” 23Ngamukabotelwe mubuzuba oobo, alimwi mukakondwe, nkaambo impindu mpati ili kujulu, nkaambo mbumbubo mbubakachita bamawisi kubasinsimi.
Mapenzi Mbwaakambwa
24 #
Luk 10:13-15; 11:38-52; 17:1; 21:23; 22:22. #Luk 16:25; Jakk 5:1-5; Mat 6:2. “Pesi maawe kuli ndinywe bavubi,
nkaambo mwabujana kale bulumbu bwanu!”
25“Maawe kulindinywe nimukkutide lino,
nkaambo muyooba anzala!”
“Maawe kulindinywe nimulo kusekelela lino,
nkaambo bayoolila akuuma mubila!”
26“Maawe kuli ndinywe, naa bantu boonse nibazomulumbayizya, nkaambo mbubakachita bamawisi kubasinsimi babeji!”
Yanda Basinkondonyokwe
(Mateyu 5:38-48; 7:12)
27 #
Mat 5:39-44; Rom 12:17; 1 Kkor 6:7. “Pesi ndamwaambila eezi inywe nimuswilizizye kuti, Muyande basinkondonyokwe, mubachitile bubotu aabo bamusula, 28amubalongezye aabo bamusyulikizya bubi, mubakombele bamudyaamizya. 29Kuli ooyo umumata kuseya, mumupe alubo lumbi; alimwi kuli ooyo umutolela chisamo chanu mutamukasyi kuti abweze achigogo lubo. 30Mupe kuli woonse umukumbila; alimwi bamutolela mbono zyanu mutakazilondi lubo pe. 31Alimwi mbuli mbumuyanda kuti bamuchitile, amubachitile abalabo.
32 #
Mat 5:44-48. “Nkaambo kuti mwayanda bantu bamuyanda, niinzi nchimulumbwa aacho? Nkaambo basizibi alabo bayanda babayanda. 33Alimwi kuti mwachita bubotu kuli baabo bamuchitila bubotu, niinzi mpindu njujana? Nkaambo nikuba basizibi mbubachita mbuboobo. 34Na kuti wapa muntu ngulangilila kukupa, ninzi nchimulumbwa aacho? Nkaambo basizibi balapa kuli basizibinyina kuti bajane zyiindilide lubo. 35#Mat 5:9. Pesi yanda basinkondonyokwe, alimwi uchite obotu, amupe, kamutalangilili kujana#6:35 kujana Amwi malembe ansiku akazumizigwa aamba kuti ; nkaambo mpindu yanu iyooba mpati, alimwi muyooba bana baSijulu lyaMajulu; nkaambo ulaluse kuli batalumbi abasindya. 36Amube aluse, mbuli Taata wanu mbalaaluse.
Mutabeteki Bamwi
(Mateyu 7:1-5)
37 #
Mat 7:1-2; Rom 2:1. “Mutabeteki, kuti anywebo mutabetekwi; mutatamikizyi, kuti mutatamikizigwi alanu; amulekelele, kuti anywebo mukalekelelwe; 38#Mkk 4:24; Inch 20:35. ngamupe, anywebo muyoopegwa, mumweelwe weelede, chisindiidwe, alimwi chumidwewumidwe, chifusukide kulindinywe. Ooyo mweelo ngumubelesya kulibamwi nguyoobelesegwa akulindinywe.” 39#Mat 15:14. Wakabaambila chikozyanisyo wati: “Sa moofu ulakonzya na kuzulwida moofu nyina? Tabakonzyi kuwida mukomba boonse na? 40#Mat 10:24-25; Jn 13:16; 15:20. Sikwiiya tayindi sikumuyiisya pe, pesi nawayiiya chizulide ulaba mbuli sikuuyiisya.” 41#Mat 7:3-5. “Nkaamboonzi nimubona kafwapu aako kali muliso lyamukulana wako, pesi kutaboni tanda lili muliso lyako? 42Naakuti nkaamboonzi nuwaamba mukulana wako kuti, ‘Mukwesu, ima ndikugwisye kafwapu kali muliso lyako,’ awo iwe nkujisi tanda muliso lyako? Nusikuupawupa, lutaanzi talika ugwisye tyanda lili muliso lyako, alimwi eelyo ulabona antangalala kugwisya kafwapu ako kali muliso lya mukulana wako.”
Musamu aMichelo Wayo
(Mateyu 7:16-20; 12:33-35)
43 #
Mat 7:18-19; 12:33-35; Jakk 3:11-12. “Nkaambo taakwe musamu mubotu ukonzya kuzyala michelo mibi, nikuba kuti musamu mubi ukonzya kuzyala michelo mibotu; 44nkaambo awumwi musamu tulakuuziba amichelo yawo. Nkaambo kumukuyu tukoyochela maamvwa pe, nikuba kumasaansa kuzwa kumasanzu achooba pe. 45#Mkk 7:20. Muntu ululeme mulizezyo nzyabambide zimwetela bubotu, pesi muntu ulamoyo mubi mububi moyo wakwe weeta bubi; nkaambo zilimumoyo nziizwa amulomo wakwe.”
Muyaki Musongo aMufubafuba
(Mateyu 7:24-27)
46 #
Mat 7:21. “Nkaamboonzi nimundita kuti, ‘Mwami, Mwami,’ kamutachiti nzindimwaambila? 47#Mat 7:24-27; Jakk 1:22-25. Woonse uza kulindime alimwi kaswiliizya majwi angu akwaachita, ndiyoomutondezya kuti ukozyezye aani: 48ulimbuli muntu uli kuyaka ŋanda, wasya yabbila, mpawo wabika ntalisyo amwaala; alimwi nikwaba zambangulwe, iguwo nilyasika atala aŋanda, alimwi tikooyokonzya kuzyukuka pe, nkaambo iyakidwe obotu.#6:48. Aamwi ansiku akazumizigwa kwaamba kuti 49Pesi oyu umvwa akutalichita ijwi lyangu ulimbuli muntu uyaka ŋanda anyika itakwe ntalisyo; awo nilyaza zambangulwe, alimwi mpawaawo yawa, mpawo kuwa kwayo ŋanda nkupati.”
നിലവിൽ തിരഞ്ഞെടുത്തിരിക്കുന്നു:
Lukku 6: TTP
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
The Word for the World International
