१ कोरि 15
15
मा़सियाक् जिवेत् बेरेदोक् रेयाङ
1आदो ए बोयहा आर मिसराको, ओना भागे सोमबात इञ बाडाय ओचोयेत्पेया, ओकाटाक् इञ जा़हिरात्पे, ओने ओकाटाक् आताङ होंपे आताङकेत्, आर ओकाटाक्रे तेङगो होंपे तेङगोव आकान, 2आर ओकाटाक् भागे सोमबातते बाञचाव होंपे बाञचावक्, खा़जुक इञिञ जा़हिरापे काथा साप् दोहोवाकायपे ताहेन, बाङखान आपेयाक् पा़तिया़उ दो आ़उड़ियागोक् तापेया।
3एनते आसोलाक् मेनकातेञ जिमा़वात्पेया ओकाटाक् इञ होंञ आताङकेत्, बाङमा सोसतोरको रेयाक् लेका, मा़सि दो आबोवाक् का़इको ञुतुमतेये गोच्लेना। 4आरे तोपा ओचोलेना,आर सोसतोरको लेका तेसार हिलोक्रेये जिवेत् बेरेत्एना। 5आर केफास ठेने ञेल ओचोयेना, आर ओनाकाते दो ओनको गेलबार आपोसतोलको ठेनगे। 6ओना काते दो मित् धावते मोंड़ें साय खोन बा़ड़ति बोयहाको ठेने ञेल ओचोयेना, ओने ओनको मोदरे ढेरतेत् दो नित हा़बिच् मेनाक्को मेनखान आदोमको दोको जा़पित् आकात्। 7ओनाकाते दो जाकब ठेने ञेलओचोयेना, आर आपोसतोलको ठेनगे।
8आर सानाम खोन तायोम दो इञ लेंदा टुरिया़ ठेन होंए ञेल ओचोलेना 9एनते इञ दो आपोसतोलको मोदरे हुडिञ उता़रिच् कानाञ इञ ओकोय आपोसतोल बिका़उक् लेकगेञ बाङ कान, एनते इसोराक् का़लिसिया़रेनकोञ खेद लेत्को इया़ते। 10मेनखान ओका मेना़ञ दो इसोराक् दायातेगे मिना़ञा, आर इञ सेनाक् उनियाक् दाया दो बाङ आ़उड़ियाक् लेना, मेनखान इञ दो ओनको सानाम खोन बा़ड़तिगेञ मेहनोत आकादा, एनरेहों इञ दो बाङ मेनखान इञ तुलुच् मेनाक् इसोराक् दायातेगे। 11ओनाते चाहे इञगे चाहे ओनकोगे इना़गेले पोरचारेदा, आर ओनकागेपे पा़तिया़वेना।
आबोकोवाक् जिवेत् बेरेदोक्
12आदो मा़सि रेयाङ पोरचारोक् कान खान गोच्को खोने जिवेत् बेरेत् ओचोआकाना मेनते, चेकाते आपे तालारे आदोम आदोमकोको मेनेदा, गोच्कोवाक् जिवेत् बेरेदोक् दो बा़नुक् आनाङ? 13मेनखान गोच्कोवाक् जिवेत् बेरेदोक् बा़नुक् खान, मा़सि हों बाय जिवेत् बेरेत् ओचोआकाना। 14आर मा़सि बाय जिवेत् बेरेत्आकान खान आलेयाक् पोरचार दो आ़उड़ियाक्गेया आर आपेयाक् बिसवा़स हों आ़उड़ियाक्गेया। 15हें इसोररेन एड़े गोहाको होंले सा़बुतोक् काना, एनते इसोर रेयाक् गोहाले एमआकादा, बाङमा मा़सिये जिवेत् बेरेत्केदेया, ओने उनि मा बाय जिवेत् बेरेत्लेदे, आलेमा इसोर रेयाक् गोहाले एम आकात्, मेनखान सा़रिगे गोच् कोवाक् जिवेत् बेरेदोक् बा़नुक् खान मा़सि दो बाय जिवेत् बेरेत् लेना। 16गोच्को एनते बाको जिवेत् बेरेत् ओचोक्कान खान मा़सि हों बाय जिवेत् बेरेत् ओचोकाना। 17आर मा़सि बाय जिवेत् बेरेत् आकान खान, एनडेखान आपेयाक् बिसवा़स दो आ़उड़ियाक्गेया, आर नित हा़बिच् आपेयाक् का़इरेगे मेनाक्पेयाक् 18आर नोनकाते मा़सिरे जा़पित्आकात्को होंको नोसटोयेना। 19एकेन निया़ जिवेत्रेगे मा़सिरे बोन भोरसावाकान, एनडेखान जोतो होड़को खोन, बा़ड़ति माँयाँवान लेक कानाबोन
20मेनखान नितोक् मा़सि दो गोच्को खोने जिवेत् बेरेत् ओचोआकाना, जा़पित्आकात्को मोदरेन पा़हिल जोगे। 21चेत् लेका मित्टेन मानवा होतेते मोरोन होयेनते मित्टेन मानवा होतेते गोच्कोवाक् जिवेत् बेरेदोक् हों होय आकाना। 22एनते चेत् लेका आदामरे सानामको गुजुक् काना, ओनकागे मा़सिरे सानामको जिवेत् ओचोक्आ। 23मेनखान मिमित् होड़ आपान आ़पिन पा़रिरे, पा़हिल जो दो मा़सि, मा़सिरेनको उनियाक् सेटेरोक्रे। 24इना़ तायोम दो मुचा़दोक्आ, उनरे उनि दो सानाम राज चलावको आर सानाम एकतिया़रि आर दाड़ेये मारावते इसोर बाबावाक् तिरे राजोसटिये जिमा़काक्आ। 25चेदाक् जे सानाम बा़इरिको आ़उरिये आच् जाङगा लातारको हा़बिच् राज चाक्लावगे होयोक्ताया, 26सानाम खोन तायोम माराव ओचोक् बा़इरि दो मोरोन। 27एनते सानामाक् उनि जाङगा लाताररेये गोबोलकेदेया। मेनखाने मेनलेरे, सानामाक् गोबोलआकाना मेनते एनडेखान पुड़छोगे, उनि ठेन सानामाक् ए गोबोलकेत्इच् दोए आलाक छाडागेया मेनते। 28आदो सानामाक् उनि गोबोललेन खान, होपोन आच् हों उनि ठेने गोबोलोक्आ। ओकोय दो सानामाक् होपोन ठेने गोबोल ओचोकेत्, जेमोन इसोर दो सानामाक्रे सानामाक्ए होयोक्।
29बाङखान गोच्को ञुतुमते बा़प्तिसोक् कानको दो चेत्को चेकाया? गोच्को सा़रिगे बाको जिवेत् बेरेत्ओचोक् खान, एनडेखान ओनको ञुतुमते चेदाक्को बा़प्तिसोक्काना? 30चेत् इया़ते आले हों मित् तालाव मुहिमरेले ओडावक्काना? 31ए बोयहा आर मिसराको दिना़म हिलोक्गेञ् गुजुक् काना, हें नोवा दो मा़सि जिसु आबोरेन प्रोभुरे आपे ञुतुमते इञाक् सुहुक्आक्तेञ किरया़क् काना। 32एफेसुसरे आर आर होड़को लेका बिर जानवारको तुलुच् इञ ला़ड़हा़इलेन खान, इञाक् पोरहो दो चेत्? गोच्को बाको जिवेत् बेरेत् ओचोक् खान, देबोन जोमजोङमा, आरबोन ञुजोङमा एनते गापाबोन गुजुक्आ।
33आलोपे बुला़उक्आ, बा़ड़िच्को तुलुच् गातेक्ते भागे चालचोलोन बा़ड़िजोक्आ। 34सा़रियाक् सेच्ते एबहेनोक्पे आर आलोपे का़या, आदोमको दो एनते इसोर बाको बाडाय एदेकाना, लाजाव ओचोपेया मेनते नोनका दोञ रोड़ेदा।
जिवेत् बेरेत् आकान होड़मो
35मेनखान जाहाँय ए मेन गोच्को दो चेत् लेकातेको जिवेत् बेरेत्ओचोक्आ? आर चेत् लेकान होड़मोवानतेको हिजुक्आ? 36ए बेबुज होड़, ओकाम एरेत् ओना बाङ गोच्लेन खान बाचो जिवेत् ओचोक्। 37आर ओकाम एरेत्, तायोमते होयोक्आक् होड़मो दो बाम एरेदा, मेनखान एकेन इता़गे, चाहे गुहुम रेयाक् चाहे एटाक्आक्को मोदरे जाहाँटाक् रेयाक्। 38मेनखान इसोरगे ओना दो मित्टेच् होड़मो ए एमआकाना, आयाक् कुसिलेका, मिमित् इता़ आपान आ़पिन निज होड़मोगे।
39जोतो होड़मो इना़ मित् होड़मो दो बाङ काना, मेनखान मानवा रेयाक् मित् लेकाना, आर जानवारको रेयाक् एटाक् लेकाना, आर चेंड़ेंको रेयाक् एटाक् लेकाना, आर हाकोको रेयाक् एटाक् लेकाना।
40आर सेरमा होड़मोको मेनाक्आ आर धा़रति होड़मोको मेनाक्आ मेनखान सेरमारेनकोवाक् होड़मो रेयाक् ठोनोक दो मित् लेकाना, आर धा़रतिरेनकोवाक् दो एटाक् लेकाना, 41सिञ चाँदो रेयाक् ठोनोक दो मित् लेकाना आर ञिंदा़ चाँदो रेयाक् ठोनोक दो एटाक् लेकाना, आर इपिलको रेयाक् ठोनोक दो एटाक् लेकाना, एनते इपिल इपिलरे ठोनोकतेत् दो जुदा़ जुदा़गेया।
42ओनकागे गोच्को रेयाक् जिवेत् बेरेदोक् हों सेयाक्रे एरोगोक्आ, बिन सेयाक्रे जिवेत् बेरेत् ओचोक्आ, 43बेमानोतरे एरोगोक्आ ठोनोकरे जिवेत् बेरेत् ओचोक्आ निजोररे एरोगोक्आ, दाड़ेयानाक् जिवेत् बेरेत् ओचोक्आ। 44जिवितेयाक् होड़मो एरोगोक् काना आर जिउतेयाक् होड़मो जिवेत् बेरेत् ओचोक्काना। जिवितेयाक् होड़मो मेनाक् खान जिउ तेयाक् होड़मो हों मेनाक्गेया। 45ओनकागे ओल हों ओल आकाना, “पा़हिल मानवा आदाम दो जिवेत् आनिच् ए होयेना, सेस आदाम दो जिवि एमोक् इच् जिउगेये होयेना।” 46मेनखान ओका पा़हिलतेयाक् कान ओना दो माराङाक् दो बाङ काना, बिचकोम ओका जिवितेयाक् कान ओनागे, आर ओना तायोम दो जिउतेयाक्. 47पा़हिल मानवा दो ओत खोन हासारेन, दोसार मानवा दो सेरमा खोन। 48हासा ते बेनाव आकान होड़ चेत् लेकाय ताहेंकान, हासा ते बेनाव आकानको हों ओनकागेको होयोक्आ, आर सेरमारेन चेत् लेकान, ओनका लेकानकोगे सेरमारेन हों को होयोक्आ। 49आर हासारेनिच् रेयाक् रुप होंबोन आसेन बाड़ायेत् लेका, सेरमारेनिच् रेयाक् रुप होंबोन आसेन बाड़ाया हापेन।
50आदो नोवागेञ रोड़ेदा, ए बोयहा मिसराको जेल आर माँयाँम दो इसोराक् राज बाकिन आ़इदा़रि दाड़ेयाक्आ, आर बाङ दो सेयाक् हों बिन सेयाक्गेये आ़इदा़रि दाड़ेयाक्आ। 51ञेलपे, मित्टेच् ओकोवाक् इञ ला़इयापे काना, सानामको दो बाबोन जा़पिदा, मेनखान सानामकोगेबोन फेरावक्आ, 52टुङ घा़ड़िच्ते, मित् रिपित्तेगे, सेस सिङगा़ साडेतेगे, एनते सिङगा़ ओरोङोक्आ। आर गोच्को दो बिन सेयागेको जिवेत् बेरेत् ओचोक्आ आर आबो दोबो फेरावक्आ 53चेदाक्जे नोवा सेयाक्आक् दो बिन सेयाक्आक् होरोक् होयोक्ताय आर नोवा गुजुक्आक् दो बिन गुजुक्आक् होरोक् होयोक्ताया। 54आर नोवा सेयाक्आक् दो बिन सेयाक्आक्ए होरोक् लेखान, आर नोवा गुजुक्आक् दो बिन गुजुक्आक्ए होरोक् लेखान, उनरे नोवा काथा दो पुरा़उक्आ, ओकाटाक् ओल आकान, जित दो गुजुक्ए उत् गोत्कादा। 55ए गुजुक् ओकोरताम जित दो?
ए गुजुक् ओकोरताम सुङगा़ दो?
56गुजुक् रेयाक् सुङगा़ दो का़इकाना, आर का़इ रेयाक् दाड़े दो आ़न। 57मेनखान इसोरे सारहावक्मा, ओने उनि जिते एमाबोन आबोरेन प्रोभु जिसु मा़सि होतेते।
58ओनाते, ए दुला़ड़िया़ बोयहा मिसराको, दिड़हो आर राकझाकगे ताहेनपे, जावगे प्रोभुवाक् का़मिरे सारेड़ोक्पे, नोवा बाडायकाते, जे प्रोभुरे आपेयाक् मेहनोत दो बाङ आ़उड़ियागोक् तापेया।
നിലവിൽ തിരഞ്ഞെടുത്തിരിക്കുന്നു:
१ कोरि 15: NTSPt25
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
The New Testament Books in Santhali Language © The Word for the World International and Santhali Translation Project, Nepal, 2025