BaFilipi 3
3
Bululami bweChokomende.
1Banakwaina bangu, pakujiba, shantani munaTezi. Azwitondinyaja imi kukwala zwinhu zwimwempela kwamuli, akale chitabilijo kunamwi. 2Chenjelelani bananga sembwa, chenjelelani bashingi bobubi, chenjelelani banonyonyonganya umbili. 3Nokuti timhalajo yechokomende, inonamata Mwali mumpepo, akale tishiya munaKristo Jesu, tisinobiga lubimbo mumbili. 4Kojoba imi nokwangu ndinachisoko cholubimbo mumbili bo. Kana umwe unhu eyeya kuti unachisoko cholubimbo mumbili, imi ndinanacho chilopindilija, 5ndakamhalajwa nezhuba lyashanu lina matatu, ndili umwe wabaIzilayeli, woluji lwaBhenjamini, uHebhelu wakazwalwa namaHebhelu, kumulawo ndili umFalisi, 6mukusungwala ndili unjabisi wegubungano, kubululami ndipo pasi pomulawu ndisina ndandu. 7Ingwano yose indakawana, ndakaitola sokulashikilwa pezhulu paKristo. 8Pezhulu paizwo zwose ndinolaba zwose sokulashikilwa pezhulu pokuziba Kristo Jesu Tezi wangu kunopinda zwose. Pezhulu pape ndakayabula kulashikilwa nezwinhu zwose, ndikazwilaba seshambwa, kutila kuti ndiwane Kristo, 9akale ndiwanikwe mwaali, ndisina kululama kwangu, kunova mumulawo, koga bunova mukudimbwa munaKristo, bululami bunova kunaMwali buloyaama mukudimbwa, 10kuti ndunzibe nesimba lyokumuka kukwe, akale kuti ndikobane naye mukuyabula kukwe, nditojane naye mukufa kukwe, 11akale ndina chibimbo kuti ndowana kumuka kubafi.
Kulabukila kuChinangwa
12Kusi kuti yezwi ndakazwiwana kale kana kuti ndakapeleleswa kale, koga ndimulwisa kuti ndizwite zwangu, yezwo Kristo Jesu zwakanditila kale. 13Banakwaina, anditoleba kuti chakaba changu, koga chinhu chimwempela chandinota, ndokanganwa zwimushule akale ndilwisila zwikombeli, 14imi ndilwisila kundambeli kuchinangwa chombhailo wopezhulu undikumushobelwa naMwali munaKristo Jesu.
15Tose takubuka mumpepo ngatibe nendangalilo yeyo, akale kana besina indangalilo yeyo, Mwali unoomuzhulila yezwo. 16Atibhatilileni chete muchokomende kunezwo zwatakawana.
17Banakwaina shanganyilanani mukundikwejejela, akale lingisisani yabo banolalama betobela chitondejelo chibuya munasu. 18Banji, bandakamubuja nozwabo tunjinji akale mane ngweno ndinomubuja ndilila, bagele sezwita zwonchinjikwa waKristo. 19Mapejelejo abo kupalajwa, mwali wabo untumbu, akale beshiya nokuswaba kwabo, nendangalilo jipo pazwinhu zwenyika. 20Koga bugalo bwedu bukokudenga, akale kuvila kwalili tilomilila unchiji, Tezi Jesu Kristo, 21iye uchashandula mibili yedu yopasi inabutela kuti ibe sombili uwe wongaima, nesimba linota kuti etubule kubiga zwinhu zwose pasi pape.
The word for The World International